LUK 2
2
Jisu ṭou
1Mpha ava thu Akastas Keisar ri dultipaam mii mkheng ngi miing mdo plu nrangki pau pṭum da. 2Kuirinia ki Syria paam kpu mkurthut thu hava miing kuplut ava mkhat na thok da. 3Ungta mii mkheng ngi miing kuplut ra mpaam mpaam ki khuwpii tha miing kuplut ra chet lamda. 4Ungta Joseph ruk ka Galil ki Nasareth khuwpii thungki, Bethlehem mdo dit, Devid khuwpii judia tha hang da, mleija mma ava Devid rilam ungu mphungka ruk kurthuwk da. 5Mma ngi inn mdo thlot dok, nao kuhur daat, Mery ṭhida mmiing in kuplut ra hang lamda. 6Ungta mmaanni ava tha ma am daat arlaanni Mery nao pluk naki mpha ava vei da. 7Ungta Mery ngi ru kri reep ki mchapa ava plu da, ungu Nao ava buw laak thung ngi klum da, sil arkuw thung pi iip da, mleija mthlun nraan inn ktlong ame.
Jao Krung rek leh Waan tamsii rek
8Ungta ava paamkowl tha bil thung ngi jao krung rek am lamda, mjao in arkhii lamda, jaanni sut pṭoi lamda. 9Ungu Mukpu waan tamsii ngi mhin inni ktardet da, Mukpu laarneiji tkhul dok lamda, ungbi kdung ngi ṭi lamda. 10Ungta waan tamsii ngi mhin inni theda, “ṭi maan, mleija asuwn, mii mkheng thung ngi ka am ra klin langlang ki kṭha pauren naan hinni kurjun hurra. 11Mleija snii ngi Devid khuwpii thung ngi kaktlan rang ki khat Mukpu Khrista ava kṭouva. 12Ungta hava ngi naan do tinna kurthuwk ra: Naanni nao kdowng khat buwlaak suwnni klum da, sil arkuw khat thung ngi ki iip daat pha naan di.” 13Ungta tun kat daatti Waan tamsii tu kilṭhi ngi parwaan ki kurtuwl mii rekki Isowr panpaak da, ungu laa the lamda,
14“Kparthaang sii ki Isowr hin tha kunlor,
ungu dultipaam thu Mma ngi plung mdo pngam Mma mii rek arlakki kdaai am so!”
15Waan tamsii rekki parwaan tha mmaan hinki mhunkal dok in thungta, jao krung rekki khat leh khatti the lamda, “Nen ni Bethlehem tha hang in chera, kthuwk nong Mukpu ngi mido tithe pik in ava suw inche.” 16Ungta mmaanni kuknotti mhan in thungta, Mery leh Joseph pha lamda, ungu sil arkuw khat thung ngi nao kdowng ava iip daat da. 17Ungta mmaanni ava mdee in thungta, hava nao mlei thung ngi mdo the pik lam ava song chlam da. 18Ungta karyaa mii mkheng nga jao krung rek pau sonni ngak chlam da. 19Pdainu hava le mkheng nga Mery ngi muplung ril thung ngi purdun da arkhii da. 20Ungta jao krung rekki mdil kinle lamda, mmaan hin mdo son pik lam, mdo aryaak in mkheng leh mdo dee in ava leiji kanpa ngi Isowr panpaak chlam da.
Jisu dida mdo Thowl
21Ungta Mma ava vunmor mdo reen nrang ki mnii tret na mphaak thungta, Mma ngi mnuh poi thung ngi ma am du liitti Waan tamsii ngi miing mdo the dok, Jisu dida thowl lamda.
Luwbuk Inn thu Jisu mdo ṭhiin
22Ungta Mousi Nowlam dil kṭoiji kartleu naki mpha marvan thungta, Jisua Mukpu hin mdo piik nraan ki Jerusalem tha hanṭhi lamda. 23(Mukpu Nowlam thung ngi mdo kjit dok lulu ngi, “Ru kri ver ri poi thungki mdo pluk pselpa khim khaija Mukpu hin kchiir kdi lamra.”) 24Mukpu Nowlam do the dil kṭoiva, tlaai kdownni mdo piik chaak ra ava “Uṭhuw sik khat mata msuwn knii rek ra.” 25Tunva Jerusalem thung ngi miilai khat mmiing Simion tdit amda, hava miilai ava rinkindit ungu plung klut langlang, Isreel kaktlan pik rangki mlam ksuw chdaat, mma ava pthla kchiir ri mleen dim chda. 26Ungta Mukpu Khrista ava mdee du ngi mma ngi kdiyou dei nime dida pthla kchiir ri mhin the pik da. 27Ungta pthla do kso dil kṭoiji mma ava luwbuk Inn thu arva da; mleija mhin ni Nowlam ki nopa dil kṭoiji ava ktlora nao Jisu ava mnuh leh mpah ngi arhan ṭhi lamda. 28Mma ngi mbaanni Jisua kdom thida, Isowr panpaak da theda,
29“Mukpu, Nah apauna dil kṭoiji,
tunva Nah asra owr ra kdaaiji sun chaso;
30mleija nei kmik ki Nang ki kirliing ava kdee chaakka,
31mii mkheng awng ngi ado purchuwl dok,
32Ktlok chati rek hin mar awng khatti ado phuwn,
ungta Nah amii Isreel rek laarnee na kurthuwk.”
33Ungta mnuh leh mpah ava Mma mlei thung ngi mdo the ava ngi ngak chlam da; 34ungta Simion ni phowl kṭha parlaan lam thida, mnuh Mery hin theda, “Asuw, hava naova ktluw rangki ungu Isreel mii knempok kpardel rangki ngi mdo sii, ungta titinna khat tummi mraal ka amra. 35(Ungta nah aplung rukka kchei khat do thun heppi kthuwk ra), ava ngi mii knempok plung binna ktidet ra.”
36Ungta Anna, tdit Phanuel chanu, Asher chati thungki khulpi khat amda; mma ava kdung ngi der chda, inn mnei daat ki mi innpu tung ngi kum tikheu daat paal ve chlam da, 37ungu meikhunu khatti kum som tret lei plii kpha dok kurthuwk da. Mma ava luwbuk Inn thung ki sun liit me, suwn leh jaanni then mdo ngowl tu kilṭhi ngi luwbuk chda. 38Ungta ṭhang ava kat thung ngi arhang da Isowr panpaak chda, ungu Jerusalem mdo ktlan pik nrangki tummi mlam ksuw kcha rek mii mkheng hinni Jisu ki lei thung ngi son pik chlam da.
Nasareth tha Mkinlet
39Ungta Mukpu Nowlam dil kṭoiji do khim khai mtlot dok dil thaanni, mmaanni Galil ki mkhuwpii thaanni mdil kinle lamda. 40Ungta Nao ava linsaang da ungu mru tangda, lousing ngi dim chda, ungta mleenni Isowr do purhui amda.
Luwbuk Inn thu Pselnao
41Tunva kum ktaiji mpah leh mnuh ava taplaanna kmaal ra Jerusalem tha hang kchok lamda. 42Ungu Mma ngi kum sowm lei knii mphaak thungta, nopa dil kṭoiji hang lamda. 43Ungta kmaal ava ṭuw dok da, mmaanni mjun kinlet in thungta, Pselnao Jisua mdil thaanni Jerusalem thung ngi kcheeng daat da. Mnuh leh mpah va dei lamme 44pdainu maplap rek tu kilṭhi pak da kdingi nii khat lik klutti jung lamda, ungu mmaanni mi inn khur kthuwk rek leh maplap rek hin thlaam lamda; 45ungu mmaanni mdee maan thungta, Mma kthlaam Jerusalem tha mdil kinle lamda. 46Nii kdum dil tha luwbuk Inn thu phang lamda, chukpu rek arlakki ku ong daat da, mmaan hin aryaa da paukhewl lamda; 47ungta Mma hinni karyaa mii mkheng nga mdo dee pindit leh mpau arthaan rekki ngak chlam da. 48Ungu mmaanni Mma ava mdee in thungta, ngak chlam da; ungbi mnuh ngi Mhin theda, “Kchapa, talu leiji hanto ado tatlot inda? Apah tu neenve va kdung ngi alam suw chaannu.” 49Ungbi Mma ngi mhin inni theda, “Tak heppi naanva ado tathlaam inda? Neia Kpah Inn thung ngi trin kma am nik di tdit naanni dei maan ti mo?” 50Ungta mhin inni mdo the pau ava dei pindi chlam me. 51Ungta mmaan tu kilṭhi ngi Nasareth tha arjung lamda, ungu mpau theen pṭoi da; ungta mnuh va havale mkheng nga muplung thung ngi arkhii da.
52Ungta Jisua lousing ngi dim chda, mdak ruk lin saangda, ungu Isowr leh mii rek do purhuiji amda.
Currently Selected:
LUK 2: LAMKBSI
Označeno
Share
Copy
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.