Mat 11
11
1Na, daa Zozii bhɩalɩ 'lɛ wɔlɩ ‑naa ɔla gɩlɩnyaa* 'kʋgba ‑mɔsɔa solulɩɛ na, ɔ ya dɩpɩa 'wlʋ 'nyɩ ɔ ya mala 'dia 'kʋ cakan ɩya Dɩnanɩa* ‑sakan mʋ.
'Nyuwluzʋnyɔ Zaan ya ncɛlɩ Zozii 'bhlɩ lobhu
(Luk 7.18-35)
2'Dɛ 'la daa, 'Nyuwluzʋnyɔ Zaan ‑kʋa ‑palʋʋnpapalʋ ‑zɔn. Ɔ ya Laagɔ 'la ‑Sasanyɔa* 'la lobholia 'la wɔlɩa 'nu. Ɔ ya ɔla gɩlɩnya* Zozii 'bhlɩ lobhu, le ma 'clɔɔ neen lebhe: 3«‑Mɔ ‑glɩ 'lɛ ɔmɔa ‑ɔ -cɩ ka 'lɛ ci na bha? ‑Aana ka ‑a -cɩ ka 'lɛ ‑buun ‑naanɔ bhlo ‑bɛ bha?» 4Zozii ya maa 'cla lebhe: «A mʋ ɩya ɩmɩa a ‑ŋlɛ 'lɛ 'nyɩ a ‑jlɛ 'lɛ na, a solui Zaan: 5'Citutunya lɩ sa 'nyɩ bhɩbhlinya namʋnɩ 'nanɩ, kokobhebhlanya jabha 'nyɩ 'nyukwlitelinya nunɩ, 'ku bho 'kwɩɩn 'kʋ 'nyɩ ma sanɩ Dɩnanɩa* ŋaazɩnya. 6'Nyɩ ‑amʋ 'wluku, ɔmɔa ‑ɔ cɩ 'ta 'lɛ bhli na, ɔ ‑kʋ 'nanɩ.»
7Na, daa 'Nyuwluzʋnyɔ Zaan 'la gɩlɩnyaa ‑kʋa 'lɛ mʋda na, Zozii ya Zaan 'la wɔlɩ ‑alawleea solulɩɛ bhɔ. Ɔ nabhe: «'Lɩsaa a mʋanɩa 'lɛ 'pʋpʋa nɩkplaan 'lɩmʋkan bha? 'Dʋkɔlʋa ‑pupolu 'dɩdɔa 'lɛ na bha? 8Na, 'lɩsaa 'titi a mʋanɩa 'lɛ 'lɩmʋkan bha? Nclɔɔa ‑ɔ ‑pla 'lɛ loku 'nanɩ nɩkplaan na bha? Sa, maa ‑ɔ pla 'lɛ loku 'nanɩa nɩkplaan na, nyɩbhɛlɩa 'la 'slia nɩkplaan ma ‑kʋ 'lɛ. 9Na, 'lɩsaa a mʋanɩa 'lɛ 'lɩmʋkan bha? Laagɔnekʋnyɩtɛnyɔ* bha? ‑Ghɛɛ, n cla anyɩ sɛɛ, 'nyɩ ɔ zi Laagɔnekʋnyɩtɛnyɔ 'kʋ. 10Ɔ ‑glɩ ɔmɔa 'la gbʋa ɩ ‑zieo 'lɛ lebhe: 'Lɩka, ‑amʋ n lobhu 'na dɩfanyɔa le ɔ pʋɔ 'kʋklʋʋn ɩya ɔ 'ka ‑naa ‑gugwiea bhɔsʋa. 11N solu anyɩ, ɩ ‑glɩ ‑nʋawlɛ, maa 'fɩan ɔ 'wlʋlʋ 'lɛ 'ŋlɔ nɩkplaan na, bhlogbɩɩ 'ta 'Nyuwluzʋnyɔ Zaan 'kʋzi. 'Bhlɩmɔɔn, ‑laagɔɔn 'la Nyɩbhɛlɩdua* nɩkplaan 'la leen ‑naanɔa zio 'kʋ. 12'Nyɩ 'Nyuwluzʋnyɔ Zaan 'la 'bhlɛsʋʋn tooto ‑aan ‑yaka, ncɛlɩ 'tɩtɔ ‑laagɔɔn 'la Nyɩbhɛlɩdua 'nyɩ ‑bhɩakpanya, maa mʋʋ 'lɛ. 13Laagɔnekʋnyɩtɛnyaa 'fɩan ɩya Moyizi 'la ‑jlɩmaa ‑kʋ Nyɩbhɛlɩdua 'la cɩa wɔlɩ nyɩtɛda ‑aan 'nyɩ Zaan ya 'lɛ ci. 14A ‑ka ‑wa le a 'ka 'nanɩ 'nu na, ɔmɔ ‑ɔ ‑glɩ 'lɛ Eliia ‑ɔ cɩ kaa 'lɛ ci na. 15Na, ɔmɔa ‑ɔ ‑ka 'lɛ 'nyukwli na, 'naa ɔ 'nu.
16'Nyɩ ncaasaa n cɩ 'kaa 'lɛ ‑pɔtɔnʋ 'la ncɛlɩa palalɩ bha? Ka ala gbɩa palalɩ 'lɛ le 'cuoa ‑ɔ kʋ 'lɛ 'clikpua nɩkplaan sa, ‑ɔ 'papalɩ 'lɛ wɔlɩ 'nyɩ ‑anʋa cla 'lɛ ma 'ye lebhe: 17‑A ya ‑kete bholi 'nyɩ a 'ta ce. ‑A ya ‑takpa bhlɩ 'nyɩ a 'ta acɩ dineen 'bhla ɩya a 'ka 'tu na. 18Sa 'Nyuwluzʋnyɔ Zaan ya ci, 'ɔ li 'ta, 'ɔ 'mla 'ta 'nyɩ ma nabhe: Ɔ ‑ka 'wugo ‑nyunyu. 19'Nyɩ Nclɔɔa 'Cʋa* ya ci, ɔ li, ɔ mla, 'nyɩ ma cla lebhe: 'Lɩka nyaagbulinyɔ ɩya nʋgbumlanyɔ, ‑lapooclanya ɩya nyinyinʋnya 'nagɔ! ‑Ma Laagɔ 'la dɩgalɩa 'la nʋnʋgbɩa ya ɩla 'kʋnylugolulɩɛa pala.»
'Dia ‑ɩ 'ta 'lɛ ‑wa le ‑ɩ ka kwlacala na
(Mat 10.15; Luk 10.12-15)
20Na, Zozii ya 'dia 'kʋa ɔ nʋnʋa 'lɛ 'ciinzizielɩlobholi ‑gbɔɔn na, 'kwlɩbhɩalɩɛ bhɔ, ‑ofi lebhe ɩ 'ta kwlacala. Ɔ nabhe: 21«‑Mɔ Kolaziniidu, ‑munzue yɔɔ bho! ‑Mɔ Bɛsayidaadu, ‑munzue yɔɔ bho! Sa ɩ ‑kaa ‑kʋ le 'ciinzizielɩlobholia ‑ɩ ‑nʋnʋɔ 'lɛ anyɩ nɩkplaan na, Tili ɩya Sidɔɔndia 'kʋ ɩ kaa ‑nʋnʋɔa na, ɩ yaanɩa ‑baagɩ bibie, ma yaanɩa macɩ 'tɩtɔ 'wlʋ 'kɔsɔ 'nyɩ ma yaanɩa kwlacala. 22‑Ghɛɛ, n solu anyɩ lebhe 'tɩtɩplaclɩɩa 'kʋ, Tili ɩya Sidɔɔn 'la gbaylɩsalɩɛa cɩ 'ka cɔbha ɩya ɩ 'ka a 'nɩa 'kʋzi. 23'Nyɩ ‑mɔ Kapɛnayumʋdu, ‑n gugu lebhe ‑n cɩ ncɩ 'kʋto ‑aan ‑laagɔɔn bha? ‑Wɔɔ! -N -cɩ ka ‑gluu pla ‑aan 'kuduku. Sa 'ciinzizielɩlobholia ‑ɩ ‑nʋnʋɔ 'lɛ nɩkplaan na, Sodɔmʋdua nɩkplaan ɩ ‑kaa ‑nʋnʋɔa na, ʋ ‑kʋ kaanɩa ‑yaka. 24‑Ghɛɛ, n solu anyɩ lebhe 'tɩtɩplaclɩɩa 'kʋ Sodɔmʋbhlɩa 'la 'tɩtɩa cɩ cɔbha ɩ cɩ ‑na 'nɩa 'kʋzi.»
Zozii bhɔlʋ ɔ To
(Luk 10.21-22)
25'Dɛ 'la 'bhlɛsʋan, Zozii ya wɔɔnyɩtʋ 'ma 'nyɩ ɔ ya 'cla lebhe: «N woo ‑evli, To, ‑laagɔɔn ɩya ‑dʋdʋ 'la ‑Kwlenyɔ, saa ‑n ya 'lɛ ɩmɩ ‑naa wɔɔcibhlilinya ɩya dɩgalɩnya zizieli 'nyɩ ‑n yɩɩ 'lɛ 'cicuoa pala na. 26‑Ghɛɛ, To, sɛɛ ɩ ‑plɔɔ 'lɛ 'tʋ le ɩ kʋ. 27N To yaan ‑tɛtɛa 'fɩan wlɩɩn zʋ. Nclɔɔ bhlogbɩɩ 'ta 'Cʋa ‑ci, ɩ ka ‑kʋ le ‑n 'ta Toa bhloo na. 'Nyɩ nclɔɔ bhlogbɩɩ 'ta Toa ‑ci, ɩ ka ‑kʋ le ‑n 'ta 'Cʋa bhloo, ɩya ɔmɔa 'Cʋa ‑wa 'lɛ le ɔ cɩ gba 'nyɩ ‑ɔ cɩɔ cibhlili na.
A ci ‑ma n cɩ anyɩ 'wlusa
28Anyɩa 'fɩan ‑ɔ ‑slo 'lɛ 'nyɩ ‑gbaakʋa ‑pla 'lɛ na, a 'ciin 'bhlɩ ‑ma n cɩ anyɩ 'wlusa. 29A 'ma 'na ‑gbaakʋa ɩya a 'plɩ 'na gɩlɩnya*. Sa n ‑glɩ ncaawɔtɔ 'nyɩ ‑tutule 'taan nɩkplaan ‑kʋ, ɩya a 'ka nyɔkwɛ 'lɩ. 30‑Ghɛɛ, 'na ‑gbaakʋa 'ta bhɛda 'tɛ 'nyɩ ʋ 'ta 'kʋwɔlʋ.»
Aktuálne označené:
Mat 11: NTLD13
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Dida New Testament © Bible Society of Côte d'Ivoire, 2013.
