Mat 10
10
Zozii 'la lobhulobhunyaa 'kʋgba ‑mɔsɔa 'la 'ŋlɩ
(Mak 3.16-19; Luk 6.14-16; Lobh 1.13)
1Zozii ya ɔla gɩlɩnyaa* 'kʋgbaa ‑mɔsɔa ɔcɩ cɩ lalɩ, 'nyɩ ɔ ya maa 'tɛtɩ 'nyɩ le ma 'ka 'wugwi ‑nyinyi 'tli ɩya ma 'ka gu ɩya 'bhlɛa ‑tɛtɛa jabha.
2Na, 'lɩka Zozii 'la lobhulobhunyaa* 'kʋgba ‑mɔsɔa 'la 'ŋlɩ: ‑Bɛɛ, Simɔɔn, ma la 'lɛ Pɩɛlɩ na, ɩya ɔ bholi Andlee, Zebedee ‑yowli Zakɩ ɩya ɔ bholi Zaan, 3Filipʋ ɩya Batelemii, Tomaa ɩya ‑lapooclanyɔ Matie, Alɩfee ‑yowli Zakɩ ɩya Tadee, 4'bhlɩkʋtɩtɔlʋnyɔ Simɔɔn ɩya Zuda Iskalɩɔtʋ, ɔmɔa ‑ɔ zʋ 'lɛ Zozii 'pɛlʋ na.
Zozii ya 'Kʋgba ‑mɔsɔa lobhu
(Mak 6.7-11; Luk 9.2-5, 10.3-12)
5Maa ‑naa 'kʋgba ‑mɔsɔa, Zozii ya maa lobhu. Ɔ ya maa 'cla lebhe: «A 'la mʋa ncɛlɩa ‑ɔ 'ta 'lɛ Zifʋnya* ‑glɩ na 'bhlɩ ɩya a 'la blea Samaliibhlɩa 'kʋ 'la 'du bhlogbɩɩ nɩkplaan. 6‑Ma a mʋnʋ Izlayɛlɩlɔlʋ* 'la 'bhlabhlɩa ‑ɩ ‑mlɔɔ 'lɛ na 'bɩɩn. 7A ‑ka mʋda ‑kʋ na, a 'cla lebhe: ‑Laagɔɔn 'la Nyɩbhɛlɩdua* ya cɩmɛ. 8A jabha guzenya, a ‑bho 'ku 'kwɩɩn 'kʋ, a jabha kokobhebhlanya, ɩya a 'tli 'wugwi ‑nyinyi. A ya 'lɛ 'kpɔkpɔ 'lɩ na, a 'nyɩ 'kpɔkpɔ. 9A 'la 'maa ‑asɩkɛ, 'dala, ‑aana 'dalacʋa a cɩ 'lɛ ‑jukuun zʋ na. 10‑Gugwiea a cɩ 'ka 'lɛ bhli na, a 'la maa bodu, nɩkplaanplalɩɩ ‑mɔsɔ, ‑gbanbʋɩ ‑aana ‑kpama, sa lobholinʋnyɔ 'la lilinyɩa ɩ 'ta 'dɛ ‑wlʋɔ.
11'Du 'tʋtʋʋntʋa a cɩ 'ka 'lɛ nɩkplaan ble na, a 'matɩ nclɔɔa ‑ɔ ‑cɩ ka 'lɛ anyɩ 'nanɩ kla na ɩya a kʋɔ 'bhlɩ ‑aan ɩya ala mʋda 'ka ŋeni. 12A ‑ka 'sleen ble na, a 'pa 'slea ‑ayo ɩya a 'cla lebhe: 'Naa pupue kʋ anyɩ cɩ! 13Ɩ ‑ka ‑kʋ le 'dɛ 'la 'slea ‑ya ala pupuea ‑fata na, 'naa ala pupuea ŋenia 'kʋ. ‑Ma, ɩ ‑ka ‑kʋ le 'slea ‑ya ala pupue 'ta ‑fata na, 'naa ala pupuea cɔlɔ anyɩ 'kʋ! 14'Nyɩ ɩ ‑ka ‑kʋ le ma 'ta anyɩ kla, ‑aana ma 'ta anyɩ 'nyukwliinpo na, a ‑ka 'dɛ 'la 'slea ‑aana 'dɛ 'la 'dua nɩkplaan 'wlʋda ‑kʋ na, a gbɔtɔ ala kplia cɩ 'la pipia. 15Na, n solu anyɩ, ɩ ‑glɩ ‑nʋawlɛ, lebhe: 'Tɩtɩplaclɩɩa 'kʋ, Sodɔmʋ ɩya Gomɔlʋdua 'la gbaylɩsalɩɛa cɩ 'ka cɔbha ɩya ɩ 'ka 'dɛ 'la 'dua 'nɩa 'kʋzi.
Zozii nyɩtɛ gbaylɩsalɩɛ 'la wɔlɩ
(Mak 13.9-13; Luk 12.11-12, 21.12-19)
16'Lɩka, n lobhu anyɩ 'bhlabhlɩ 'bhisa, mlanyinyi sidiin. Na, a gblɩbhalɩ tla 'bhisa ɩya ala gbɩ nama 'dablii 'bhisa. 17A zʋlʋ ncɛlɩ pɔlɛ 'kʋ: Ma cɩ 'ka anyɩ 'tɩtɩplajliin fa ɩya ma 'ka anyɩ mala bhibhiepalɩa* ‑zɔn, ‑ngblieen bhutili. 18‑Amʋ 'wluku, ma cɩ 'ka anyɩ goonvlacɩ ɩya nyɩbhɛlɩ ‑deliin fa. Ma cɩ 'ka 'dɛ ‑danʋfʋɛlilie 'lɩlɩ, maa ɩya maa ‑ɔ 'ta 'lɛ Zifʋnya* ‑glɩ na. 19Daa ma cɩ 'ka 'lɛ anyɩ 'tɩtɩplajliia nɩkplaan fa na, saa a cɩ 'ka 'lɛ nyɩtɛnyɩtɛlɩ, ‑aana ɩmɩa a cɩ 'ka 'lɛ nyɩtɛ na, 'la pɔɔvʋ 'la 'bhlaa anyɩ. Sa, ɩmɩa a ‑cɩ 'ka 'lɛ nyɩtɛ na, ɩ cɩ 'ka anyɩ 'dɛ 'la 'ŋwacɩa bhlogbɩɩ 'kʋ 'wluun ci. 20Sa, ‑n 'ta anyɩ 'titi ‑ɔ cɩ 'tanɩ 'lɛ nyɩtɛ, ‑ma a To 'la 'Wugoa, ʋmʋ ‑ʋ ‑cɩ ka 'lɛ anyɩ nɩkplaan nyɩtɛlɩ.
21Na, bholi cɩ 'ka ɔ bholi ‑sa le ma 'bhlɔɔ ɩya to 'ka ɔla 'cʋ ‑sa. 'Cuo cɩ 'ka mala valɩnya gbatlɩmʋnʋ ɩya ma 'ka 'cla le ma 'bhla maa. 22'Na 'ŋlɩa 'la gbʋ, ncɛlɩa ‑tɛtɛa cɩ 'ka anyɩ zɔbhɛlɩ. ‑Ma, ɔmɔa ‑ɔ ‑cɩ ka 'lɛ pɔlɛkla ‑aan bhɩalɩdaa na, 'dɛ ‑naanɔa cɩ 'ka gbʋʋnsalɩɛ 'lɩ. 23'Dua 'kʋa ma cɩ ka 'lɛ anyɩ gbaylɩsa na, a 'gu, a mʋ ‑buun du 'kʋ. N solu anyɩ, ɩ ‑glɩ ‑nʋawlɛ: 'A cɩ 'ta Izlayɛlɩdia* 'fɩan 'kʋcɩlɩ 'nyɩ Nclɔɔa 'Cʋa* cɩ 'ka 'lɛ ci.
24Gɩlɩnyɔ* 'ta ɔla canyɔ 'kʋzi 'nyɩ lobhoco 'ta ɔla ‑kwleto 'kʋzi. 25Gɩlɩnyɔ 'la da ‑glɩ 'lɛ le ɔ 'plɩ ɔla canyɔa 'bhisa 'kʋ ɩya lobhocoa ‑ma, ɔ 'plɩ ɔla ‑kwletoa 'bhisa 'kʋ. Ma ya 'lɛ 'sletoa Bɛzebulu la na, 'nsasa ma cɩ 'taa 'lɛ 'slinyaa ‑ma, sɛɛ lamʋ bha?
Ŋanɔ ‑ylɛylɛ 'la 'bhlaa anyɩ
(Luk 9.26, 12.2-9)
26Na, a 'la 'gulua maa! Lʋʋ bhlogbɩɩ cɩ 'ta ‑gblio, ɩya ʋ 'la 'ka ‑zɔnwlʋ, lʋʋ bhlogbɩɩ cɩ 'ta ‑zizieo ɩya ʋ 'la 'ka ‑cibhlilio. 27Ɩmɩa n solu 'lɛ anyɩ 'tutuun na, a nyɩtɩɩ zezeliin. 'Nyɩ ɩmɩa ma nyɩtɛlɩ 'lɛ anyɩ 'nyukwli cɩ na, a nyɩtɩɩ ɩya ncɛlɩa 'fɩan 'ka 'nu. 28Na, a 'la 'gulua maa ‑ɔ bhla 'lɛ 'nyɛkɛa 'nyɩ ‑ɔ mino 'ta 'lɛ 'wugoa 'bhlalɩɛ na. ‑Ma a 'gulu ɔmɔa ‑ɔ -cɩ ka 'lɛ gba ɩya 'wugoa ɩya 'nyɛkɛa 'ka 'lɛ ‑kosua ‑ʋ ŋomu 'ta 'lɛ na nɩkplaan ‑gbɩɔlʋ na. 29'Maa zʋ 'ta 'kpoongbilibhli ‑mɔsɔ 'deencie bha? ‑Sakɛ 'bhlɩmɔɔn, a To 'ta 'ka ‑jioli 'nyɩ na ɩla nɩkplaan, bhlogbɩɩ bhli 'ta ‑dʋdʋ 'kʋ. 30‑Ma, ‑ɔ ‑glɩ 'lɛ anyɩ na, ala 'nyɩa 'titio, 'ɩ ‑tɛtɛa ‑zɛlɩɔ. 31Na, ŋanɔ 'la 'bhlaa anyɩ. Anyɩ, a zi 'kpoongbilibhlia ‑tɛtɛa 'kʋ. 32Ncaatʋtʋʋntʋa ‑ɔ -cɩ ka 'lɛ ncɛlɩ 'ci 'kʋ, 'cla lebhe ɔ ‑glɩ 'naanɔ na, ‑amʋ ‑ma, n cɩ 'ka n Toa ‑ɔ ‑kʋ 'lɛ ‑laagɔɔn na, 'ci 'kʋ 'cla lebhe ɔ ‑glɩ 'naanɔ. 33‑Ma, ncaatʋtʋʋntʋa ‑ɔ ‑cɩ kaan 'lɛ ncɛlɩ 'ci 'kʋ ‑blɔ na, ‑amʋ ‑ma, n cɩ 'kɔɔ n Toa ‑ɔ ‑kʋ 'lɛ ‑laagɔɔn na, 'ci 'kʋ ‑blɔmʋ.
Zozii 'ta pupue ‑lamʋ
(Luk 12.51-53)
34Na, a 'la gugua lebhe ka n ci 'lɛ ‑dʋdʋa 'kʋ pupue ‑lakan. N 'ta pupue ‑lakan ci, ‑ma tavʋlɛtɛ n ‑la 'lɛ. 35Sa, ka n ci 'lɛ le n 'ka nclɔɔ ɩya ɔ to, ŋlʋcʋkwla ɩya ɔ 'nɔ, 'cɩŋlɔ ɩya ɔ 'wʋtlɔ cɩsasalɩ. 36Nclɔɔ 'la 'slinya -cɩ kanɩ 'lɛ ɔla ‑zɔbhɛlɩgbanya 'plɩ.
‑Blɔ ‑ncɩ ɩya ‑n ka Zozii gɩlɩ
(Mak 8.34-35; Luk 9.23-24, 14.26-27)
37Na, ɔmɔa ‑ɔ ‑wa 'lɛ ɔ to ‑aana ɔ 'nɔ 'nyɩ ‑ɔ ziin 'lɛ 'kʋ na, n ‑yɔɔsɔ 'ta 'kʋŋwa. Ɔmɔa ‑ɔ ‑wa 'lɛ ɔ ‑yowli ‑aana ɔ ‑nyɔŋlɔ 'nyɩ ‑ɔ ziin 'lɛ 'kʋ na, n ‑yɔɔsɔ 'ta 'kʋŋwa. 38Ɔmɔa ‑ɔ cɩ 'ta 'lɛ ɔla dabhlalɩsua bhɛ ɩya ɔ kaan gɩlɩ na, n ‑yɔɔsɔ 'ta 'kʋŋwa. 39Ɔmɔa ‑ɔ ‑cɩ ka 'lɛ 'matɩ le ɔ 'ka ɔla jabhʋa 'kʋtɩtɔlʋ na, ʋ cɩ mlɔ, ‑ma ɔmɔa, 'na gbʋ, ɔla jabhʋa cɩ 'ka 'lɛ mlɔ na, ɔ cɩʋ 'lɩ.
Ɔmɔa ‑ɔ kla 'lɛ anyɩ na, ‑amʋ ɔ kla 'lɛ
(Mak 9.37,41; Luk 9.48, 10.16; Zan 13.20)
40Na, ɔmɔ ‑ɔ ‑ka anyɩ kla na, ‑amʋ 'titi ɔ kla 'lɛ 'nyɩ ɔmɔa ‑ɔ klaan 'lɛ na, ɔmɔa ‑ɔ lobhuun 'lɛ na, ɔmɔ ɔ kla 'lɛ. 41Ɔmɔ, ‑ɔ ‑ka Laagɔnekʋnyɩtɛnyɔ* kla, ‑ofi lebhe ɔ ‑glɩ Laagɔnekʋnyɩtɛnyɔ na, ɔ cɩ 'ka Laagɔnekʋnyɩtɛnyɔ 'la klalɩɛa 'la dluuplʋlɩɛa 'lɩ. 'Nyɩ ɔmɔ ‑ɔ ‑ka 'kʋnylugolunyɔ 'nanɩ kla, ‑ofi lebhe ɔ ‑glɩ 'kʋnylugolunyɔ na, ɔ cɩ 'ka 'kʋnylugolunyɔ 'la klalɩɛa 'la dluuplʋlɩɛa 'lɩ. 42Na, n solu anyɩ, ɩ ‑glɩ ‑nʋawlɛ: Ncaatʋtʋʋntʋa ‑ɔ -cɩ ka 'lɛ 'nyuwɔtʋglaasɩ ‑tɛɛ 'ma ɩya ɔ ‑kɛɛ 'cuo ‑naa sidiin 'la bhlo 'nyɩ, ‑ofi lebhe ɔ ‑glɩ 'na gɩlɩnyɔ* na, ɔla dluuplʋlɩɛa 'ta 'dɛ ‑wlʋɔ.»
Aktuálne označené:
Mat 10: NTLD13
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Dida New Testament © Bible Society of Côte d'Ivoire, 2013.
