Genèse 45
45
Joseph a ngreda va na
1A Joseph a slaha a ngheda a sam ndohi man ta zlatsa a pa, asaɓai, a mboho: Ndohi tèlè, vo-do auda! Ndo ngiɗè az a pa ɓai, aman Joseph a ngreda ta va na a kramamhi na. 2A kuɗi a vata, a ndohi Egypte ta tsenaʼa, a ta tsena te gi Pharaon tèlèba.
3A Joseph a ngaɗa ta kramamhi na: I Joseph; bab ga a zhè a nshèffè di ɗè? Aman kramamhi na ta mbeɗa na a ma ɓai, ta gudzi a zlau a sam na. 4A Joseph a ngaɗa ta kramamhi na: Va-herdekay va! A ta herda na va. A ngaɗa ta: I Joseph, kramam kinè, man kin preda ma a kokwar Egypte. 5Aman anai kin hur gèɗ ɓai; kin hur skwi nte deɓa asaɓai, a géɗ man kin prekayè a haha. Aman Zhiklè a nzlindkayè a ma kinè, aman a mbél nshèffè ndohi kumba. 6Aman mi a zhè te kokwar mvi 2 ma; njèkè mvi 5 a ma, a ndohi ta da pizhè a ta da ɓicè skwi azɓai. 7A géɗ nengaʼa Zhiklè a nzlindkayè a ma kinè, a mbél wudahi kinè a nshèffè kin kumba. 8Gar haha kinè, kin zlindkayè ka ɓai; aman Bi Zhiklè. Nengaʼa a ngiyè a bab Pharaon, a bi gi nengaʼa tèlèba, a ndo nkwèr kokwar Egypte tèlèba.
9Aman va-vassa va, vo-do a sam bab ga, a kin gaɗa na: Joseph, kra ngaya, a ngaɗa ka: Zhiklè a ngiyè a bi kokwar Egypte tèlèba. Washkè a sam ga, ka shinka va ɓai! 10Ka da nzi a kokwar Gosen, ndul ndul a sam ga, ka a wudahi ngaya a wud wudahi ngaya, a tambakihi a zlèhi a skwi ngaya tèlèba. 11I da wara kinè dai te pa; aman njèkè mi a gi mvi 5 dai; a ntewèshè da ga ka ɓai, ka a gi ngaya a skwi ngaya tèlèba. 12Kin rka a di kinè, a Benjamin, kramam ga ba a rka, iyè a va ga, man i gaɗa kinè a haha. 13Va-ngra na bab ga tèlèba, ara man ta slebardyè te kokwar Egypte, a skwi tèlèba man kin rkaʼa. Te deɓaʼa a va-menkaɗa deɓa tsam-tsam a nda bab ga.
14Te deɓaʼa a nkelawa na ri a daʼai a Benjamin, kramam na, a nkuɗai. Benjamin ba a kuɗai, a daʼai na. 15Te deɓaʼa a nkelawa ta ri a daʼai a kramamhi na tèlèba, a nkuɗai, a nhumbat ta. Te deɓaʼa kramamhi nengaʼa ta tsu tsaval a vna.
16A skwi haha a ntsenaha a gi Pharaon ba. Ta gaɗa: kramamhi Joseph ta shkè, ar ta. Ambaha Pharaon a ndohi mizlinè nengaʼa. 17A Pharaon a ngaɗa na Joseph, man a menda ta kramamhi na: Va-gu ar haha! Va-peda skwi a deɓ kɗèh, vo-do a deɓa a kokwar Canaan! 18Te deɓaʼa kin hulko bab kinè a ndohi gi kinè, a kin shkè a deɓa a sam ga. I woy a i va kinè skwi mbelaʼa te kokwar Egypte tèlèba, a kin ndi lak te kokwar Egypte. 19A ngaɗa ta a vaʼa: Va-gu ar haha. Va-helda kikai a rai te kokwar Egypte, a kin hulko wudahi a ngwozi kinè a bab kinè a vna! 20Kin loloy skwi gi kinè ɓai, aman skwi mbelembela te kokwar Egypte tèlèba, a kinè.
21A wudahi Israel ta gu arsa. Joseph a mpa ta kikai ara man Pharaon a gaɗa na. A mva ta skwi nʼndi a ri a civèɗ, 22a mva ta maslaka ngolala a va staɗ staɗ, a Benjamin a mva na gurso 300 a maslaka ngolala 5. 23A nzlündo kɗèhi 10 a sam bab na, a mpa ta skwi te kokwar Egypte a deɓ kɗèh, a mam kɗèhi 10 a dau, movar a skwi nʼndi bab na man a da ndiaʼa a civèɗ. 24Aranta a mpre ta kramamhi na, a to do ta, a ngaɗa ta: Kin da bozl va a civèɗ ɓai!
25A ta jèkede kokwar Egypte, a ta shkè a sam Jacob, bab ta, a kokwar Canaan. 26A ta menda na, a ta gaɗa: Joseph a zhè a nshèffè dai, a vava, nengaʼa bi a géɗ kokwar Egypte tèlèba. Aman ma haha a mdo a ndav bab ta ɓai, a nca ma tengaʼa ɓai. 27A ta ngra na tèlèba, man Joseph a ngaɗa ta. Aman a nrka kikai, man Joseph a nzlündo, aman ta dè a sam Joseph a vna, a mwuffeda Jacob. 28A Israel a ngaɗa: Yowa! Joseph, kra ga, a zhè a nshèffè dai! I woy a i dè a i da rka, ga i metsi ga.
Aktuálne označené:
Genèse 45: MOF89
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Alliance Biblique du Cameroun 1989