УблапӀэ 31
31
ЯщэкӀэнэрэ зырэ шъхьэр
Якъубэ Лабан къызэрэӀэкӀэкӀыжьыгъэр
1Якъубэ Лабан ыкъомэ ежь пае аӀохэрэр зэхихыгъэх: «ЗэкӀэ тятэ иӀагъэр Якъубэ зыӀэкӀиубыти, тятэ ыӀэ илъыгъэм имылъку ежь хишӀыкӀыгъ». 2Якъубэ ежьми нахьыпэрэм фэдэу Лабан къызэрэфыщымытыжьым гу лъитагъ.
3ЕтӀанэ Зиусхьаным Якъубэ къыриӀуагъ: «Шъуадэжь, уятэхэм адэжь кӀожь; сэри о сыуигъусэщт».
4Арыти Якъубэ Рахъэлрэ Леарэ алъигъакӀохи, ибылым Ӏэхъогъухэр зыдэщыӀэ шъофым къаригъэщагъэх. 5Ахэмэ ариӀуагъ: «Нахьыпэм фэдэу шъуятэ къызэрэсфыщымытыжьыр сэлъэгъу. Ау сятэ и Тхьэ сэ сигъус. 6Шъори шъошӀэ зэкӀэ лъэкӀэу сиӀэмкӀэ шъуятэ сызэрэфэлэжьагъэр. 7Ау шъуятэ сигъапцӀэзэ, пшӀэ фэдизрэ силэжьапкӀэ зэблихъугъэ. Ау Тхьэм ащ сэ бзэджагъэ къысишӀэнэу фидагъэп. 8„Былымэу бжьыгъэ зиӀэхэр уилэжьапкӀэ хъущтых“ къызысиӀокӀэ, зэкӀэ былымхэр бжьыгъэ яӀэу къэхъущтыгъэх. „Къолэнхэр уилэжьапкӀэ хъущтых“ зиӀокӀэ, зэкӀэ былымхэр къолэнхэу къалъфыщтыгъэх. 9Джаущтэу Тхьэм шъуятэ ибылымхэр ыштэхи, сэ ахэр къыситыгъэх.
10Зэгорэм, былымхэр зыщылъыхъожьыхэрэ уахътэм, сэ пкӀыхьапӀэкӀэ слъэгъугъэ: ачъэу пчэнхэм зязыдзыгъэхэр зэкӀэ къолэныгъэх, бжьыгъэхэри яӀагъэх. 11Тхьэм имэлэӀич пкӀыхьапӀэм сыхэтэу къысиӀуагъ: „Якъуб!“ Сэ сӀуагъэ: „СыкъэдаӀо“. 12Ащ къысиӀуагъ: „Моу плъэри, плъэгъущт: ачъэу пчэнмэ зязыдзыхэрэр зэкӀэ е къолэных, е бжьыгъэхэр яӀэх. Лабан къыуишӀэрэр зэкӀэ Сэ слъэгъугъэ. 13Мыжъосыным дагъэ зыщытепкӀагъэу, Сэ гущыӀэ пытэ къызщысэптыгъэ Бэтэл зыкъыщыозгъэлъэгъугъэ Тхьэр Сэры. Джы тэджи, мы хэгъэгум икӀыжьи, укъызыщыхъугъэ хэкум кӀожь“».
14Рахъэлрэ Леарэ джэуап Якъубэ къыратыжьыгъ: «Тятэ тэ тызэригъэхымэрэр нафэба? 15Тэ тищи, къыткӀэкӀуагъэр ежь ыгъэфедагъ. 16Аущтэу зыхъукӀэ, зэкӀэ мылъкоу Тхьэм тятэ Ӏихыгъэр тэри тисабыйхэми тэтый. Арышъ зэкӀэ Тхьэм къыуиӀуагъэр гъэцакӀэ».
17Якъубэ исабыйхэри ишъузхэри махъшэхэм атыригъэтӀысхьагъэх; 18зэкӀэ ибылымхэри, зэкӀэ ыгъотыгъэ мылъкури, ежь ышъхьэкӀэ ибылымэу Мэсэпэтамым щызэригъэгъотыгъэри, ятэу Исхьакъ дэжь, КъэнаӀан чӀыгум кӀожьынэу зыдырищэжьагъ.
19Лабан имэлхэр ыупхъонхэу кӀуагъэти, ятэ иӀэгъэ тхьэ нэпцӀхэр Рахъэл къытыгъугъэх. 20Джаущтэу Якъубэ арам цӀыфэу Лабан ыгъэпцӀагъ: зэрэкощыжьырэмкӀэ макъэ ригъэӀугъэп. 21ЗэкӀэ иӀагъэр зыкӀигъэгъуи, ежьэжьыгъ; псыхъоу Ефрат зэпырыкӀи, ГъылыӀад къушъхьэлъэ хэкум фиузэнкӀыгъ.
Лабан Якъубэ зэрэлъежьагъэр
22Ящэнэрэ мафэм Якъубэ зэрэкӀожьыгъэр Лабан раӀуагъ. 23ИӀахьылхэр гъусэ ышӀыхи, Лабан ащ лъежьагъ, мэфибл тешӀагъэу ГъылыӀад къушъхьэлъэ хэкум дэжь щыкӀэхьагъ. 24Чэщым пкӀыхьапӀэкӀэ Тхьэр арамэу Лабан къыфакӀуи, ащ къыриӀуагъ: «Зыфэсакъыжь, Якъубэ зыгорэ епшӀэкъон!»
25Лабан Якъубэ кӀэхьагъ; Якъубэ ищэтырэ Ӏуашъхьэм тыригъэуцуагъ, Лабани иӀахьылхэр игъусэхэу ГъылыӀад къушъхьэлъэ хэкум къыщыуцугъ. 26Лабан Якъубэ риӀуагъ: «Сыда о пшӀэрэр? Сыда, сыбгъапцӀи, спхъухэр зыкӀепщэжьагъэхэр, ӀашэкӀэ заом гъэры щашӀыгъэхэм фэдэу? 27Сыда шъэфэу зыфыкӀэптхъужьыгъэр, сызыкӀэбгъэпцӀагъэр, зи къысэмыӀоу? Тычэфэу, орэдхэр къатӀозэ, шъонтырыпымрэ пхъонтэпщынэмрэ къядгъаӀозэ, сэ укъэстӀупщыжьыныеба. 28Аужыпкъэм о сипхъорэлъфхэми спхъухэми сябгъэбэужьыгъэп; акъылынчъэу узекӀуагъ. 29Сыогоон слъэкӀыни дэгъоу, ау шъуятэ и Тхьэ тыгъосчэщ къыздэгущыӀи, къысиӀуагъ: „Зыфэсакъыжь, Якъубэ зыгорэ епшӀэкъон!“ 30КӀо, о укӀожьыгъэми Ӏофыгъэп, сыда пӀомэ уятэ иунэ узэрифэжьыщтым пфэмыщыӀэжьэу удэгуӀэщтыгъэ, ау сыда ситхьэ сурэтхэр зыкӀэптыгъугъэхэр?»
31Якъубэ джэуап Лабан ритыжьыгъ: «Сэ сыщынэщтыгъэ, о ппхъухэр степхыжьыных сшӀошӀыщтыгъэ. 32Уитхьэ сурэтхэр зэбгъотылӀэжьхэрэр псэоу къэнэжьыщтэп. ТиӀахьылхэр шыхьат орэхъух: зэкӀэ къэлъыхъуи, оуиер штэжь». Ау Якъубэ ышӀэщтыгъэп ахэр Рахъэл къызэритыгъугъэхэр.
33Лабан Якъубэ ищэтыри, Леа ищэтыри, бзылъфыгъэ унэӀутитӀумэ ящэтыри ачӀэхьагъ, ау зи къыгъотыгъэп. Леа ищэтырэ къызычӀэкӀыжьым, Рахъэл ищэтырэ чӀэхьагъ. 34Рахъэл тхьэ сурэтхэр ыштэхи, мэхъшэ уанэм ычӀэгъ чӀилъхьагъэх, ежь ахэмэ атетӀысхьажьыгъ. Лабан зэкӀэ щэтырыр къылъыхъугъ, ау зи къыгъотыгъэп. 35Ежь Рахъэл ятэ риӀуагъ: «Сизиусхьан къысфэрэмыгубж, сыкъыфэтэджын зэрэсымылъэкӀырэмкӀэ: сэ бзылъфыгъэ хабзэр къысфэкӀуагъ». Лабан лъыхъуагъэ, ау тхьэ сурэтхэр къыгъотыгъэхэп.
36Джы Якъубэ къэгубжи, Лабан ыгъэмысэу ыублагъ: «Сыда сызэрэмысэр, сыд псэкӀода сшӀагъэр, сауж уимыкӀынэу? 37О зэкӀэ сиӀапӀэмэ уяплъыгъ, сыда уиунэ илъ пкъыгъо пстэумэ ащыщэу къэбгъотыгъэр? ТиӀахьылхэм апашъхьэ къилъхь, ахэмэ тиӀоф къызэхарэф. 38Мары, илъэс тӀокӀырэ уадэжь сыщыӀагъ; уимэл пчэнхэми шъэрэзыжьыгъэ къахэкӀыгъэп, уиӀэхъогъу щыщ тӀыхэр сшхыгъэхэп. 39ХьэкӀэ къуакӀэм зэхицунтхъагъэу къыпфэсхьыжьыгъэп, ар сэ сизэрарыгъ; чэщым атыгъугъэри, мафэм атыгъугъэри сэ сэбгъэпщыныжьыщтыгъэ. 40Мары сиӀоф зытетыгъэр: мафэрэ жъоркъым, чэщырэ чъыӀэм къин сагъэщэчыщтыгъэ; сичъые сынэмэ апэчыжьэ зишӀыщтыгъэ. 41Джащ фэдэх илъэс тӀокӀэу уиунэ щисхыгъэр. УипшъэшъитӀумэ апае илъэс пшӀыкӀуплӀырэ сыпфэлэжьагъ, илъэсихырэ – уибылымхэм апае; ау о къыстефэрэ лэжьапкӀэр гъогогъуипшӀэ зэблэпхъугъэ. 42Сятэ и Тхьэ, Ибрахьимэ и Тхьэ, Исхьакъ Щынагъо зыфыриӀэр скӀымыгъугъэмэ, о джыри сэ ӀэнэкӀэу сыптӀупщыжьыщтгъэ. СитхьамыкӀагъэрэ Ӏофэу сӀэхэмкӀэ сшӀагъэмрэ Тхьэм къылъэгъухи, тыгъосчэщ Ар къыскъоуцуагъ». 43Лабан джэуап Якъубэ къыритыжьыгъ: «Пшъашъэхэр – сэ спхъух; сабыйхэр – сэ сисабыих; былымхэр – сэ сибылымых, зэкӀэ о плъэгъурэр сэсый. Спхъухэмрэ ахэмэ къалъфыгъэ сабыйхэмрэ агу хэзгъэкӀын слъэкӀыщта? 44Джы оррэ сэррэ тызэгъэзэгъ, тазыфагуи шыхьат дэрэт».
45Якъубэ мыжъо ин, саугъэтым фэдэу, зандэу ыгъэуцуи, 46иӀахьылхэм ариӀуагъ: «Мыжъохэр къэшъуугъоих». Ахэмэ мыжъохэр къаугъоигъэх, Ӏуашъхьэу зэтыралъхьэхи, а мыжъо Ӏуашъхьэм дэжь щышхагъэх. 47Лабан ащ Егъар Сахъадут фиусыгъ, Якъубэ ащ ГъалыӀэд#31:47 Егъар Сахъадут – арамыбзэкӀэ, ГъалыӀэд – джуртыбзэкӀэ, къэӀокӀитӀуми къарыкӀырэр: шыхьат Ӏуашъхь. фиусыгъ. 48Лабан къыӀуагъ: «Непэ мы Ӏуашъхьэр оррэ сэррэ тазыфагукӀэ шыхьат». Ащ къыхэкӀэуи ащ ГъалыӀэд раӀо, 49джащ фэдэуи – Мыцпэ#31:49 Мыцпэ – къэрэгъулэ щытыпӀ., Лабан зэриӀуагъэм пае: «Зиусхьаныр оррэ сэррэ тызэгокӀыжьэу, тызэрэмылъэгъужьы зыхъукӀи, къытлъэрэплъ. 50Спхъумэ о дэеу уадэзекӀо зыхъукӀэ е ахэмэ апэмыкӀэу шъузхэр пштэхэмэ, ащыгъум зэгъашӀэ, сэррэ оррэ цӀыф шыхьат тимыӀэми, тазыфагу Тхьэр шыхьатэу дэт».
51Лабан Якъубэ риӀуагъ: «Мары мы Ӏуашъхьэр, мары мы мыжъосыныри, сэррэ оррэ тазыфагу дэзгъэуцуагъэр. 52Мы Ӏуашъхьэм сыкъыблэкӀэу бзэджэ Ӏоф пае сэ уадэжь сыкъызэримыхьащтымкӀэ ори мы Ӏуашъхьэми мы мыжъосыными уакъыблэкӀэу бзэджэ Ӏоф пае садэжь укъызэримыхьащтымкӀэ, мы Ӏуашъхьэри шыхьат, мы саугъэтри шыхьат. 53Ибрахьимэ и Тхьэ, Нахъор и Тхьэ, ахэмэ ятэ и Тхьэ, хьыкумышӀэу тазыфагу дэрэт». Якъубэ ежь ятэ Исхьакъ Щынагъо зыфыриӀэмкӀэ тхьэрыӀо ышӀыгъ. 54Якъубэ Ӏуашъхьэм къурмэныпхъэр щышӀуибзыгъ, иӀахьылхэри къыригъэблэгъагъэх шхэнхэу. Зэшхэхэм, ахэмэ Ӏуашъхьэм чэщыр щырахыгъ.
55 # 31:55 Мы усэр ижъырэ джуртыбзэкӀэ тхыгъэ Ӏэпэрытхым ия 32 рэ шъхьэ иапэрэ усэу щыт. Лабан пчэдыжьым ипхъорэлъфхэми ыпхъухэми къябэужьыгъ, ахэмэ Тхьэм ынэшӀу къащифэнэу афелъэӀуи, етӀанэ ядэжь къежьэжьыгъ.
Aktuálne označené:
УблапӀэ 31: АдыТГ
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Институт перевода Библии, 2002-2023