УблапӀэ 32
32
ЯщэкӀэнэрэ тӀурэ шъхьэр
1Якъубэ ежь игъогу техьажьыгъ, Тхьэм и МэлэӀичхэр ащ къыпэгъокӀыгъэх. 2Ахэр зелъэгъухэм, Якъубэ къыӀуагъ: «Мыр Тхьэм иошъогудзэмэ яуцупӀ». А чӀыпӀэм Махъанаим#32:2 Махъанаим – ижъырэ джуртыбзэкӀэ къикӀырэр: уцупӀитӀу. фиусыгъ.
3Якъубэ мэкъэгъэӀухэр ыпэ ригъэшъыхи, Едом хэгъэгум щыӀэ хэкоу СэӀир, ежь ышэу Ӏэсау ыдэжь ыгъэкӀуагъэх. 4Ахэмэ унашъо афишӀэу ариӀуагъ: «Мырэущтэу ешъуӀу сизиусхьанэу Ӏэсау: „Мары уиӀумэтэу Якъубэ ыӀорэр: ‘Сэ бэрэ хымэ хэгъэгум, Лабан дэжь сыщыпсэугъ. 5Джы сиӀэх цухэри, щыдхэри, мэл пчэнхэри, унэӀут хъулъфыгъэхэри, унэӀут бзылъфыгъэхэри; унэшӀу къысщыфэным сыщыгугъэу, сикъэбар сизиусхьан раӀонэу къэсӀопщыгъэх’“».
6МэкъэгъэӀухэм къагъэзэжьи, Якъубэ къыраӀуагъ: «Пшэу Ӏэсау дэжь тыщыӀагъ. Ар ежь къыппэгъокӀыгъэу къэкӀо, нэбгырэ шъиплӀи игъус». 7Якъубэ лъэшэу къащти, къэгумэкӀыгъ, кӀыгъугъэ цӀыфхэри, былымхэри, махъшэхэри купитӀоу ыгощыгъэх. 8«Ӏэсау зы купым къытебанэу зэхикъутэмэ, – егупшысагъ Якъубэ, – адрэ купым зыкъигъэнэжьын ылъэкӀыщт».
9Якъубэ къыӀуагъ: «Сятэ Ибрахьими сятэ Исхьакъи я Тхь, сихэгъэгу, сиӀахьылхэм адэжь згъэзэжьынэу О, Зиусхьанэу къысэзыӀуагъэр, ЫнаӀэ къыстетынэу сызгъэгугъагъэр! 10Къыстефэрэп сэ зэкӀэ шӀугъэу, зэкӀэ шъыпкъагъэу О уиӀумэт къыфэплъэгъугъэр. Сибэщ закъо сӀыгъэу мы Иордан псыхъом сызэпырыкӀыгъагъ, джы купитӀу мылъку яӀэу сигъусэ. 11СыолъэӀу, сыщыухъум сэ сшэу Ӏэсау! Сыда пӀомэ ащ сыщэщынэ: ар къэкӀонышъ, сэри, ныхэри, зэкӀэ кӀалэхэри, тиукӀынкӀэ сэщынэ. 12Орба къысэзыӀуагъэр: „Сэ о шӀу къыпфэсшӀэщт, ипчъагъэкӀэ зэрэбэм къыхэкӀэу плъытэн умылъэкӀыным нэсэу, хы пшахъом фэдэу, о птекӀыщт цӀыфхэр згъэбэгъощтых“».
13А чэщыр Якъубэ а чӀыпӀэм щырихи, иӀагъэм Ӏэсау пае тынхэр къыхихыгъэх: 14пчэн шъитӀу, ачъэ тӀокӀ, мэл шъитӀу, тӀы тӀокӀ; 15якъунанхэр акӀыгъухэу ащырэ мэхъшэ щэкӀ, чэм тӀокӀитӀу, цуипшӀ, щыдыбз тӀокӀ, щыдипшӀ. 16ИунэӀутмэ Ӏэхъогъу пэпчъ шъхьаф шъхьафэу арити, ариӀуагъ: «Сапэ шъуитэу шъукӀу, шъуазыфагу чӀыгууанэ къижъугъан». 17Апэрэм унашъо фишӀыгъ: «Сэ сшэу Ӏэсау уӀукӀэу: „Хэт урий? Тыдэ укӀорэ? Хэт иӀэхъогъуа уапэ итыр?“ ыӀоу, къызыоупчӀыкӀэ, 18джэуап ет: „Мыхэр уиӀумэтэу Якъубэ ибылымхэу сизиусхьан Ӏэсау тынэу къыпфишӀыгъэхэр арых. Мары ежь Якъуби тауж ит“».
19А дэдэр ариӀуагъ ятӀонэрэми, ящэнэрэми, зэкӀэ Ӏэхъогъумэ ауж итыгъэхэми: «Шъори, Ӏэсау къызышъупэгъокӀыкӀэ, джащ фэдэу яшъуӀу. 20ЕтӀани ешъуӀу: „Мары уиӀумэтэу Якъуби тауж ит“». Сыда пӀомэ ар егупшысэщтыгъэ: «Сапэ изгъэшъыгъэ тынхэмкӀэ ащ ынэшӀу къызщызгъэфэн. ЕтӀанэ, тызэӀукӀэмэ, дэгъоу къыспэгъокӀынкӀи мэхъу». 21Джаущтэу тынхэр апэ ригъэшъыхи, ежь а чэщыр пщыпӀэм щырихыгъ.
Якъубэ Тхьэм зэребэныгъэр
22А чэщ дэдэм Якъубэ къэтэджи, ишъузитӀуи, иунэӀут бзылъфыгъитӀуи, ыкъо пшӀыкӀузи зыдырищажьэхи, псыикӀыпӀэмкӀэ Ябэкъ зэпырыкӀыгъ. 23Ахэр псыхъом зэпырищыгъэх, зэкӀэ иӀагъэри зэпырищи, 24ежь Якъубэ изакъоу къэнагъ. Нэфылъыр къызэкӀечыфэ лӀы горэ ащ къебэныгъ. 25КъызэрэтемыкӀошъущтыр Ащ къызелъэгъум, ыкопкъ зэрытыпӀэ къынэси, къупшъхьэ зэрытыпӀэр зэриутыгъ. 26ЕтӀанэ къыриӀуагъ: «СыкъэтӀупщ, нэф къэшъыгъ». Ау Якъубэ къыӀуагъ: «УнэшӀу къысщымыфэу устӀупщыщтэп». 27«Сыда о пцӀэр?» – адрэр къеупчӀыгъ. Мыдрэм къыӀуагъ: «Якъуб». 28Арыти адрэм къыриӀуагъ: «Джы къыщегъэжьагъэу о пцӀэ Якъубэжьыщтэп, Исраил#32:28 Исраил – ижъырэ джуртыбзэкӀэ къикӀырэр: ар Тхьэм ебэны, е: Тхьэр мэбанэ. нахь; сыда пӀомэ о Тхьэми цӀыфхэми уябэныщтыгъэ, текӀоныгъэри къыдэпхыщтыгъэ». 29Якъуби елъэӀугъ: «О пцӀэ къысаӀоба». Адрэм къыриӀожьыгъ: «Сыд о сцӀэ хэбгъотэщтыр?» Ащ дэжьым Ащ ынэшӀу къыщыщифагъ.
30«Сэ мыщ Тхьэм ынэгу сыщыкӀэплъагъ, псэоуи сыкъэнэжьыгъ» ыӀуи, Якъубэ ар зыщыхъугъэ чӀыпӀэм Пэниел#32:30 Пэниел – ижъырэ джуртыбзэкӀэ къикӀырэр: Тхьэм ынэгу. Пэниел нэужым Пэнуел фаусыжьыгъ. фиусыгъ. 31Якъубэ Пэнуел зэпичы зэхъум, тыгъэр къыкъокӀыгъ. Ар ыкопкъэу узырэм ригъэлъэщаощтыгъэ. 32Джащ къыхэкӀэу джы къызнэсыгъэм исраил цӀыфхэм копкъ зэхэтыпӀэм фэу телъыр ашхырэп, сыда пӀомэ Къебэныгъэр Якъубэ ыкопкъ зэхэтыпӀэ фэу телъым нэсыгъагъ.
Aktuálne označené:
УблапӀэ 32: АдыТГ
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Институт перевода Библии, 2002-2023