УблапӀэ 33
33
ЯщэкӀэнэрэ щырэ шъхьэр
Якъубэ Ӏэсау зэрэӀукӀагъэр
1Якъубэ зэплъэм, мары Ӏэсау нэбгырэ шъиплӀ игъусэу къакӀоу ылъэгъугъ. Леаи, Рахъэли, иунэӀут бзылъфыгъитӀуми ясабыйхэр Якъубэ янэхэм акӀыгъунхэу ышӀыгъэх. 2Ишъуз гуадзэхэмрэ ахэмэ ясабыйхэмрэ апэ ригъэуцуагъэх, ахэмэ ауж Леарэ ащ исабыйхэмрэ ригъэхьагъэх, етӀанэ зэкӀэмэ ауж Рахъэлрэ Юсыфрэ ригъэуцуагъэх. 3Ежь зэкӀэ ахэмэ апэ иуцуи, ыш екӀуалӀэзэ, чӀыгум нэсэу блэунае шъхьащэ ышӀыгъ.
4Ау Ӏэсау къыпэгъочъи, ӀаплӀ къырищэкӀызэ, ыпшъэ зыкъыридзи, къебэугъ, тӀури гъыгъэ. 5Ӏэсау зэплъэм, шъузхэри бынхэри ылъэгъуи, къыӀуагъ: «Хэт щыщых мы уигъусэхэр?» Якъубэ джэуап къытыжьыгъ: «Тхьэм игукӀэгъукӀэ уиӀумэт къыритыгъэ бынхэр арых». 6Шъуз гуадзэхэмрэ ахэмэ ясабыйхэмрэ Ӏэсау къекӀуалӀэхи, шъхьащэ къыфашӀыгъ. 7Ащ ыуж Леа исабыйхэр игъусэхэу къекӀуалӀи, шъхьащэ къыфашӀыгъ, етӀанэ Рахъэлрэ Юсыфрэ къекӀуалӀэхи, шъхьащэ къыфашӀыгъ. 8Ӏэсау къыӀуагъ: «Мы сыкъызӀукӀэгъэ Ӏэхъогъухэр сыд лӀэужыгъоха?» Якъубэ джэуап къытыжьыгъ: «Ар сизиусхьан нэшӀукӀэ къысэплъыным пае». 9«Сэ сиӀэр икъущт, сшы, – Ӏэсау ыӀуагъ, – оуиер о уерэӀ». 10«Хьау, – ыӀуагъ Якъубэ, – нэшӀукӀэ къысэплъи, мы тыныр сӀых! О услъэгъуныр – Тхьэм ынэгу занкӀэу сыкӀэплъэным ычӀыпӀ, о дэгъоу укъыспэгъокӀыгъ! 11Сызэрэпфэразэм ишыхьатэу тынэу къыпфэсшӀыгъэр штэ, сэ Тхьэм гукӀэгъу къысфишӀыгъ, сызыфэныкъо щыӀэп». Якъубэ елъэӀути, Ӏэсау тыныр ыштэнэу къезэгъыгъ.
12«Гъогум тытехьан, – къыӀуагъ Ӏэсау, – сэ уапэ ситэу сыкӀощт». 13Ау Якъубэ ащ риӀожьыгъ: «Сизиусхьан ешӀэ сабыйхэр зэрэхъыбыехэр. Симэл пчэнхэмрэ былым пӀашъэхэмрэ ащых: ахэр мэфэ псаум зыпфыхэкӀэ, зэкӀэ къозэу хъущтых. 14О сизиусхьан, тапэ итэу кӀо, сэ, уиӀумэт, мэкӀэ макӀэу, былымыр зэрэкӀощтым фэдэу, сабыйхэр зэрэкӀощтхэм фэдэу сыкъэкӀощт сизиусхьан дэжь, СэӀир сыкъэсыфэ». 15Ӏэсау къыӀуагъ: «ЦӀыфэу скӀыгъухэм ащыщэу заулэ уигъусэнэу къэзгъэуцун». Якъубэ къыӀуагъ: «Сыда ар зэрищыкӀагъэр? УнэшӀу къысщыфэ къодыеми сэркӀэ екъу. Сизиусхьан, укъысфэдэгъущ!»
16А мэфэ дэдэм Ӏэсау ежь игъогукӀэ СэӀир къыгъэзэжьыгъ. 17Якъубэ СукъоткӀэ кӀуагъэ, унэ зыфишӀыгъ, былымхэм чэлхэр афишӀыгъэх. Джащ пае а чӀыпӀэм Сукъот#33:17 Сукъот – ижъырэ джуртыбзэкӀэ къикӀырэр: чэлхэр. фиусыгъ.
18Мэсэпэтамым къикӀыжьи, зи мыхъун къемыхъулӀэу Якъубэ КъэнаӀан хэгъэгум ит Щэхэм къалэм къэкӀуагъ. Къалэм дэмыхьэу, ащ пэмычыжьэу къыщыуцугъ. 19Щэхэм лӀым ятэу Хъаморэ ыкъомэ яшъоф щыщэу чӀыгу тыжьын ахъщишъэкӀэ ыщэфи, ащ ежь ищэтыр щигъэӀагъ. 20Ащ къурмэншӀыпӀи щигъэуцуи, фиусыгъ: «Тхьэ, Исраил и Тхь».
Aktuálne označené:
УблапӀэ 33: АдыТГ
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Институт перевода Библии, 2002-2023