Lukas 20
20
Su ndemani Jesu le ndoui aden.
1Bersi muren, be i gin henunuen su ndramed le um ad Jehova, i gin bohernou le ndro su nongen hian ber lang, su ndurhian, su ndremda hernou, ma su laben ber gor su la ndro i. 2Su vong le ndro i, su boi: Bai me ndro du, uo da henunuen su ndramed gle ndoui ad sie, sie i gin rendegien uo le henunuen su ndoun dagara? 3I bode: Io lie beg ndemani mu longu hendre, absou me ndro io. 4Surhi ad Johanes i longu hendre ber lang de asu ndramed molhege? 5Malabo su vong me goure, su boi: Be iou bai: Ber lang, boen i vong me ndro du, desa mu de gin somui leri bui. 6Be iou bai: I longu asu ndramed molhege, su ndramed masi su gdaii du gle bad, su masi hanguruen Johanes i hom Provet. 7Malabo su vong le ndro Jesu, su bai: Dandu i bui, surhi ad Johanes ber lang de bui. 8Malabo Jesu i vong le ndro su: Malabo io de bosoui le ndro mu bui, io da henunuen su gle ndoui ad sie.
Heb nongen dohongein le su ndremda beleng momen.
9I bosoui le ndro su nongen dohongein ogoro: Hom gamel i daui beleng hasel, i hengen i le ndro su ndremda beleng, boen i dogi le gor hoger manan. 10Sengen beg meher, i rendegien hom lao aden le ndro su ndremda beleng, beg hedi sengen ber beleng. Su ndremda beleng su rii lao ad ndorlaben, boen i mul le ndro i, heb sengen bui. 11Ndorlaben i rendegien hom lao aden lie, su boii i, su rii i, i de hur heb sengen le ndro ndorlaben bugane. 12Boen i rendegien hom lao aden lie, su rii lao ogo ndoun ndoun, ndrai aden gin muh le boan, boen su robuldi i le beleng asu gineao. 13Malabo ndorlaben ber beleng i vong i boi: Io ghinen sa malabo ie? Io beg rendegien nduro, goloisden i, su noh aden de bui. 14Be su ndremda beleng su ilndri ndurn, su vong la goure, su boi: Aga ndurn i la ngab memrad ad damen, iou beg raii i. Boen memrad aden adu ge. 15Su hedi i, su buldi i le marbohon beleng, boen su daii i. Ndorlaben ber beleng i gob sa malabo le ndro su? 16I gmeher, i gdaii su ndremda beleng, i ghengen beleng aden le ndro su lao aden monen ge. Be su gin hirong nongen ogo, su bai: Bugane! 17-18Jesu lele su ndoun, i vong le ndro su, i boi: Nongen i da Buk Helian, mu da hanguruen sa gleri: Ndou si su ndremda um su gin bieni i, i bahud malabo, homo ma homo i da los gle bahud ogo, bahud i ndumbue i; be bahud na glos gle mandrn, i gina momen gane. 19Su ndremda hernou, ma su ndurhian asu, su beg hosi Jesu, su noh su ndramed ge, su gin hanguruen le bergolsu nongen dohongein ogo le ndro su.
Heb nongen le taks ad Kiap.
20Boen su bogulue Jesu, su rendegien su lao asu holel, su da bahilou le ndro Jesu, su lengi Jesu hanguruen su ndramed ge voasuiso nongen ad Jehova. Su beg hosi Jesu le nongen aden, boen beg bo gord le ndro i, beg daui i le ndro ndorlaben. 21Su ndemani i: Ndorlaben, dandu i, nongen adem monen gane, uo henunuen su ndramed monen ge, uo de hanguruen su ndramed bui, su labenen, de su ndramed molhege. Sidesi uo henunuen su ndramed le sal ad Jehova ndangen. 22I monen, de i monen bui, be iou hengen le ndro Sesar moni adu? 23-24Jesu i danen hanguruen asu momen, i vong le ndro su, i boi: Moni si gme ndro io, balen ad sie, nongen ad sie i da ndro i ie? Su bode, ad Sesar. 25Malabo i vong le ndro su, i boi: Hian, ghengen le ndro Sesar longu ad Sesar, ghengen le ndro Jehova longu ad Jehova. 26De dansu hosi i le nongen aden bui, meluasu masi i ieb le nongen aden, le nongen i da gin bai le ndro su.
Heb nongen le ndro su Sadusi.
27-28Boen su Sadusi holel, su da vong, su da boi: Su ndramed de dansu dne le ngad asu bui, su la ndro i, su ndemani i, su boi: Ndorlaben, Mose gin hondre le ndro du: Ar ndern ad homo na gmed, nambulen ndurn aden bui, i ibdi nambulen ad ndern gle nambulen aden, su ndurn na gmeher, su surien i ndern i da ginmad. 29Su ndern manondrdilmou su da le um hom. Ndern hanu gin ibdi hom bihin le nambulen, i ginmad, ndurn bui. 30Ndern muren i ibdi bihinou gle nambulen, i ginmad, ndurn bui. 31Dagara su manondrdilmou, homo ma homo su ginmad, ndurn bui. 32Boen bihinou ogo i ginmad lie. 33Be su gedne lie, bihin ogo i nambulen ad sie le gor lundielang? Su manondrdilmou gin ibdi i le nambulen. 34Jesu i vong le ndro su: Su ndramed ber boan ogo su ibdi bihin le nambulsu. 35Su ge Ndorlaben gin loh su, su da gin dogi monen ge, su gedne lie le ngad asu, de dansu hanguruen bihin bui. 36Su de somad bui, su dege su Angelo, su mbunana ad Jehova, Jehova gin loh su le ngad asu. 37Dandu i, su ndramed su gedne lie le ngad asu le nongen ad Mose, be i gin bosoui me ndro du longu i da gin meher le dogrogei, gle born‐ndrui: I bosoui Ndorlaben, Jehova ad Abraham, Jehova ad Isaak, ma Jehova ad Jakob. 38Jehova i Ndorlaben asu, su da ginmad gane bugane, i Ndorlaben asu, su da mamaren ge. Su mamaren gle ndoui ad Jehova. 39Su ndremda hernou holel su vong le ndro i, su boi: Ndorlaben, nongen adem i hian monen gane. 40Su noh le ndemani i heb longu hendre lie.
41Boen i vong le ndro su, i bai: Su da bosoui Kristo ndur David derbe? 42David, i ge, i gin bai le Buk ad Psalm: Ndorlaben gin bai le ndro Ndorlaben ordo, lugdo im logna adem, gle nemen sengen ordo, io beg ndounen su ndremda rah adem. 43Io beg daui su baghege gle ndegem. 44David i bosoui i “Ndorlaben,” i ndurn aden derbe?
Heb nongen le asu ndremda hernou.
45Boen i vong le ndro su lao aden, su ndramed masi dansu hirong i, i vong, i bai: 46Gobgulue meluamu le asu ndremda hernou, voasuiso salo eluen ge, su ha lengi, su ndramed bamugueni su le logna bah, su ie lengi logna hian ge le numo hernou, le mandrgosgeao asu, su da bo gous, 47su behena um asu bihinou, boen su bahilou, su raring eluen ge. Gord manden, ndoun ndoun, ir belengen su.
Aktuálne označené:
Lukas 20: LLENT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Published by the British and Foreign Bible Society 1956
