Lukas 11
11
Heb nongen le raring.
1Bersi Jesu i raring, be i da le sal le gor si. Raring aden boen, homo asu lao aden i vong le ndro i, i bai: Ndorlaben, henunuen du le raring adem, dege Johanes gin henunuen su lao aden lie. 2Jesu i vong le ndro su, i boi: Be mu raring, absou nongen ogo: Damu, ngarm i helian ge, i helian ndro du lie, gor adem na gmehere. 3Hengen le ndro du gan anu mosen, bing si e rang si. 4Esbui longu adu momen giao, iou gol de la ri bugane longu momen su hinen ndro du. Or gulue du be Satan beg seslaini du.
5Boen i vong le ndro su: Sie ademu gous aden i meher ndro i le dogrobing i vong le ndro i, i boi: Gous ordo, hengen me ndro io suslong madolo, 6hom gous ordo ber gor manan gin meher ndro io, heb gan ono bui. 7Gous aden i da lundieum i vong le ndro i, i boi: Io mbuere, io gin vadi babi ber mu ordo boen, su nduro su da medir le, io de dono hengen i de la ndro uo bui. 8Io vong le ndro mu, be i da hanguruen i bui: Aga gous ordo, io beg hengen le ndro i, dege i lengi, i ghengen le ndro i, be i da hanguruen soling aden. 9Io boi le ndro mu lie: Soling, Ndorlaben na ghengeni mu, gahi, mu gu danoni i, reregdi le babi, su audi babi. 10Homo ma homo i da soling i hedi i muren; homo ma homo i da gahi, i gu danoni, be homo i da reregdi su audi babi. 11Damen homo i da oho, be ndurn i ndemani i gle suslong, i ghengen le ndro i bad, de i ndemani i le ni homo, i hengen le ndro i ndrondrhun, 12de i ndemani i le neldun, i hengen le ndro i suburungai. 13Ar mu, danmu hengen le ndro su ndurm longu hian ge, mu da momen ge, Damu ber lang i da hengen Meluan Helian le ndro su, su da soling leri hanu.
Su boii Jesu.
14Boen Jesu i robuldi ngongong le ndrnen ad hom ndramed, bohon bui, be ngongong gin bieni i, i danen vong hian ge. Meluasu ndramed masi i ieb. 15Su holel asu su vong, su bai: Belsebub, ndurhian asu ngongong gin sobani i. 16Su holel lie su beg seslaini Jesu, su beg i hinen gelman si le ndro su, gelman ber lang. 17I ge, i danen hanguruen asu, i vong le ndro su, i boi: Gor hoger e hoger, be um hom i bo bahun gle um hom, i de heb ndoun bui, su ndremda rah, su gmeher, su ndumbue gor ogo. 18Ar Satan i sobani homo le robuldi Satan, i heb ndoa bui, muren uomu da bai: Io robuldi su ngongong le ndoui ad Belsebub. 19Be io da hinen i dagara, su lao ademu, su da robuldi su ngongong le ndoui ad sie? Su ge, su gob gord le ndro mu. 20Ar io da robuldi su ngongong gle gobnemen ad Jehova, aga i vonei, gor ad Jehova gin meher baghege ndro mu. 21Be laben homo ir gulue um aden hian ge, mordo ber bahun i da le nemen, memrad aden i hian ge. 22Be homo i gmehere i da danen ndounen i, i hedi mordo aden giao, i da beg bo iil leri. Boen i behena memrad aden sumburdi. 23Homo i de sobani io bui, i bo iil me ndro io, homo i de daui me goure bui, i da ma sumbue ge.
24Be su beld gin bieni bergoln ad hom ndramed, i hilou le marboga, i gahi logna hendre lie. Be i da danoni i bui, i vong, i boi: Io la mul um ordo, goru io gin bieni i. 25Be i gmeher lie, i ilndri, su gin abseri um aden, rosan gane. 26Boen i hilou, i hedi su ngongong manondrdilmou, su momen hanu, su me, su la lundieum, ndramed ogo i gina momen gane. 27Be i da gin vong dagara, bihin homo i da le molengasu, i lug bohon, i loh, i boi: Horuan ge, hian ndrnen bihin, uo da gin meher ri, hian horuan sus ad bihin, i da gin hengen gan anem. 28Jesu i bode: Ehe, hian horuan ge, be homo i delengan le nongen ad Jehova, ir gulue i.
Heb nongen le gelman.
29Su ndramed mabosanged me goure. Jesu i vong le ndro su, i boi: Su ndramed ber range su momen ge, su ha leng ilndri gelman si, io de dou gelman si de la ndro su bui, gelman ad Provet Jona i da ndro su. 30Provet Jona i dege gelman si le ndro su ndramed ber Ninive. Dagara Ndurndramed i gelman ber lang le ndro su ndramed ber range. 31Ndurhian ber gub bihin homo, i da gob gord le ndro su gamel ber range, be i gmehere, i gdieni su, i ge hom bihin, i gin dogi le gor manan, manan ge, beg hirong nongen hian ad Salomo, i ge, i gorbo, i manden hanu le King Salomo. 32Su ndramed ber Ninive su gob gord le ndro su ndramed ber range, su gdieni su. Su delengasu le bohernou ad Jona, su gin belueni bern asu gina houen, homo gorbo, i manden hanu le ad Jona. 33Homo i do da bugane i da hesul lamp, i gorni i, i daui i behendra lus, i ge daui i ndre geao, i da hinganen le ndro su masi su la lundieum. 34Begmarm, aga sul adem gle mandrm; ar begmarm i horuan, mandrm masi i horuan ge; ar begmarm i momen, manderm masi ndrogum ge. 35Or gulue sul adem, debosan uo ndrogum ge. 36Be sul i da hinganen gle mandrm gane, uo horuam ge, muren sul ogo i dege mernal, i da hinganen ndro uo.
Heb nongen le ndro su Pharisi.
37Boen hom Pharisi i ndemani Jesu, i gmeher, i gien gan anen, le mandrgosgeao aden. Jesu i gina le um aden, i lugdo mi logna aden le mandrgosgeao. 38Pharisi, be i gin ilndri i, meluan i ieb, Jesu de gin surhi nemen hanu bui. 39Ndorlaben i vong le ndro i, i bai: Ehe, su Pharisi, su da surhi lus asu ge, gan ansu i da lus, gan ber behena ge. 40Mu ndramed momen ge, i ge, i da gin mengseni mandrn, i gin mengseni ndrnen ad hom ndramed lie? 41Hengen le ndro su, heb memrad asu bui gle gan anmu i da le lundielus ademu, boen lus ademu i rosan gane. 42Mu Pharisi, mu momen ge, mu hengen heb le gan anmu le ndro Jehova, mu de hanguruen heb monen le gord ademu bui, mu de hanguruen golnisden ad Jehova bugane, ghinen longu ogoro, mbue golmu i ndud longu ogoro lie. 43Mu Pharisi, mu gina momen ge voamuiso logna hian ge le numo hernou, mu ha lengi su ndramed su gabmugueni mu le logna bah. 44Mu gina momen ge, mu dege ngai, su gin doni su ndramed leri. Sie danen lundiengad i borah, su ndramed su dogi ndre ngad, de dansu i bui.
45Homo asu ndremda hernou i vong le ndro Jesu i bai: Ndorlaben, uo boii du lie gle nongen adem ogoro? 46Jesu i bode: Mu ndremda hernou, mu gina momen lie, mu da daui gundun beruan ie hauesu ndramed, mu de boro heb leri gle gobdegemu bui. 47Mu gina momen ge, mu da mengseni gelman hian ge ndre ngad asu Provet ber goru, su damu ber goru, su gin daii su. 48Le longu ogo mu da mugueni su damu le longu asu momen. Su gin daii su Provet ber goru, mu da mengseni um ndre ngad asu. 49Nongen ad Ndorlaben Jehova i monen gane, i da gin bai goru: Io grendegien le ndro su Provet ma su Apostel, su gdaii su holel, su hingismad asu. 50Ndrai asu Provet masi ber nandugian su gin harengeni le boan, io beg surien i. 51Ndrai ad Abel, mabenan le rang ad Sagarias, ndrai aden i da gin muh le um ad Jehova, baghege le logna dohor aden, ehe, aga ndangen, Jehova i gsurien i. 52Mu ndremda hernou, mu gina momen ge, mu gin behena ki ber gor lundielang, danmu dogi le gor lundielang bui mu sendraini su, su da beg dogi ri. 53Boen i bieni su i iao. Su ndremda hernou, ma su Pharisi, ndrnesu i mah gle aden, su ndemani i longu dsoln, 54su bogulue i, beg hirong heb nongen momen le bohon, beg ga rii i.
Aktuálne označené:
Lukas 11: LLENT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Published by the British and Foreign Bible Society 1956
