Juan 10
10
Suxi pokaiti sai ïgai ïr go paxturu bïïxi adaama kïï tuigakïdï
1Daidi Suxi aagai ïmo maaxidaragai aatagi aagaitai kañiñiru ïmadï paxturugadï dai aagaitai go judidiu bhaitï gukakamigadï ïpï. Daidi potïtïdai ïgai go odami,
—Kïïga abïr gïn tïgito kaïka idi ñoki. Daiñi gobai ix makïdï ïr ïïxibogami dai oomarhigakami kïïga bapakïi kurarïrï xako kukupi kañiñiru dïï mai kuuparagana sïïrhi bapakïi. Ïgai bhaiyoma mos kurarai daama sïïrhi nïnïyiña dai bapakïi. 2Dïï gia gobai ix makïdï kïïgakïrï ïr paxturugadï go kañiñiru gobai gia kuuparagana sïïrhi bapakïi. 3Kupiokïi go nukadakami kuuparagai sai bakïna go paxturu dai sosoigadï kïïga kaïkana ñokidï bai bapaidiña ïgai sosoigadï ïïgi ix tïtïgidukagi dai bubaidiña kuraraiñdïrï dai bhaitï kïïkigiña. 4Bhaitï kïïkigiña ïgai bai sosoigadï gokiïrï oidiña kïïga ïïmadatai ñokidï. 5Dïï xadïrï oidiña ïgai go ix makïdï ïr ïxibugami dai omarhigakami. Xudu ñokada ïgai dïgabuna bopoyiña go kañiñiru bhaiyoma mai ïïmadatai ñokidï— itïtïdai Suxi.
6Podukai gamaa Suxi aatagi ïmo maaxidaragai dukai dïï go odami mai maatï kaï. 7Kaxkïdï ïpïpï aagidi ïgai sai maatï kaïkana ix tïiya ïrhidi go aatagi daidi potïtïdai,
—Kïïga abïr gïn tïgito kaïka idi ñoki. Daiñi, gïn aagida in ïrhidi sai aanï ïr go kuuparagai gï dukami xako kurarïrï bapakïi kañiñiru. Kaxkïdï tudu aanïkïdï bapakïi odami xako daja Diuxi. 8-9Aanï ïr go kañiñiru baakigaigadï gï dukami dai xorai gin buaboitudagi dai podukai aiyagi Diuxi ka kïïgakïrï bubuakimu. Dai ix makïdï aanïkïdï kïïgakïrï bubuakiagi ïpïan dukamikamu kañiñiru kïïga nukatikami ix makïdï kïïgakïrï ajiopai tomaxakoga tomaxi kurarïrï xiïpï oidigana dai kïïga tïtïgai ix tuma ugiagi. Dïï gia bïïxi go bhaitï gukakami ix makïdï gaatabuadana mai kia dibiakai aanï mos ïr ïïxibogami gïn dukamikana dai oomarhigakami. Ïgai mos bupuirumadaiña odami dïï ix dukai kañiñiru mai ïïgidi ñokidï ix makïdï mai ïïmadai ïgai podukai ïpï go odami mai ïïgidi go bhaitï gukakami ïïxibogami. 10Daiñi, go bhaitï gukakami ïïxibogami mos soi buadana odami. Ïpïan buadana ïgai ïïxibogami ix makïdï gaïïxiada ïrhidi dai kodada ïrhidi kañiñiru. Dïï aanï mai podukai aatabuayi. Aanï gia dibia sai kïïgakïrï óídakana aapimï kïïga biakatai bïïxi ix tumaxi gï agadagi gïn iibhïdaga bïïtarï— itïtïdai.
11—Aanï ïr ïmo paxturu kïï tuigakami gï dukami. Ïmo paxturu kïï tuigakami kïïga nunukadai sosoigadï tomaxi gï aagadagi ix gï muatuda ïgai nukadatai sai mai kodagi ïxibugami. Pomaaxi tuigakami aanï tudu. Kïïga nukadamu aanï ix makïdï gin buaboitudai tomaxi gin muatudagi aanï nukadatai sai mai kona ïgai. 12Daiñi, ïmo paxturu ix makïdï mai soigaxikami mai kïïga nunukadai kañiñiru. Mos nïidiña ix dibiagi ïmo sïïyi bai ïgai mos daadagitoiña go kañiñiru baidi go sïïyi adaimïiña dai buyiña dai ïjïkobai biayiña. Mai kïï nunukadai, mos ïr pioñiga ïgai kaxkïdï. Maiti ïr paxturugadï kïïgakïrï kaxkïdï otoma daadagitoiña ïgai go kañiñiru. 13Ïmo gapioñiga go ïï tuminxikïdï gaatabuayi nukadatai kañiñiru dai kaxkïdï mai buamï ïrhidi ix gïn duñagi go kañiñiru. Dai pomaaxi aatabuayi gïn bhaitï gukamiga ïpï. Mai buamï gïn ïrhidi ïgai tomax xïï dui Diuxi maamaradï.
14-15Dïï aanï gia ïr go paxturu bamioma kïï tuigakïdï. Ix xïï kïïga gïr ïïmadai aanï ïmadï gin Oga pokaxi kïïga gïr ïïmadai aanï ïmadï ix makïdï gin buaboitudai ïpï dai aanï kïïga nukadakana ïgai tomaxi maatï aanï sai muatuda iñagai nukadakatai kïïga. 16Dai xibhïakoga bia aanï jaa odami ïpï ix makïdï maiti ïr judidiu. Xibhïadïrï óídakami kañiñiru gïn dukami ïgai dai gï agai ix buapa aanï dai bïïnaituda go judidiu ix makïdï kaxi gin urabaka. Aidï gia mosïkaxi aanï ïr paxturugadïka agai bïïxkatai dai ka mai biakamu ïgai paxtuturu omarhigakami dai ïxibugami. Aidï gia kïïga gin kaïkamu ïgai dai ïmo aadunumïkan dukai óídakamu ïmadï go judidiu ix makïdï kaxi gin urabaka.
17Kïïga gin oigïdai gin Oga maatïkatai sai gin dagito iñagai aanï ix gin muatudagi. Mukimu aanï tudu dïï gokiïrï ïpamu duaka iñagai kaxkïdï gin oigïdai ïgai. 18Dai mai xu ipïldakai odami gin muamu ïgai dai bhaiyoma ïïgi gin dagitomu aanï. Ïïgi aanï bhai aagai ix podukai gin duñagi kaxkïdï gin dagitomu aanï. ¡Ix aanï maiti gin dagitoagi xadïrï gin muana odami di! Ka podukai gin tïjai Gin Oga tudu kaxkïdï bia aanï sïïrhikami ix gin dagitoagi. Dai bia aanï gubukarhigai ïpï ix gin duakatudagi ïpamu gokiïrï— itïtïdai Suxi.
19Daidi go judidiu ïpamu aipako gïn bupui ñiño kaïkai ñokidï Suxi. 20Dai ïïmoko ikaititadai,
—Go Suxi bia ïmo diabora tïañikarudï dai arhiï buirugan kaiti dai maiti gï agai ix ïïgiada aatïmï ñokidï— ikaitiña.
21Daidi jaa ikaitiña,
—¡Cho daiñi, xadïrï poduu ñokaiña ïmo biakami diabora tïañikarudï di! ¿Dai mai ix duadi gobai bupuidï ïmo odami ix makïdï mai nïayi? Ix biakamudai gobai ïmo diabora tïañikarudï xadïrï pobuadana gobai— ikaitiña ïïmoko.
Go judidiu mai buaboidaitadai sai Suxi ïr Diuxi otosadï
22Aidïpïrï go judidiu gïn tïtïitoiña aidïxi gï kïsatu go gïï kiupai Jerusalenïrï dai ibuadana bagimi. 23Toomoko aidï dai Suxi no aimïraitadai go gïï kiupiïrï xako Solomon portarhigadï tïgidu. 24Daidi chïki bhaitï gukakamigadï go judidiu potïtïdai Suxi xikorhi gukibakai,
—¿Tui pïxi mai gïr aagida ïrhidi xorai aapi? Gïr aagidañi kïïga ix bhai ïr Ga Tïanïdami aapi tudu— itïtïdai go judidiu.
25Dai Suxi itïtïdai,
—Kaxi gïn aagidi aanï dïï aapimï maiti gin buaboitudai tomaxi ibuayi aanï naana maaxi maaxidaragai ix makïdï Diuxi gin tïjai. Dai go maaxidaragai ix makïdï ibuayi aanï kïïga maaxi aagai xorai aanï— itïtïdai. 26—Dïï modukai maiti gin buaboitudai aapimï. Maiti ïr gin sosoiga kañiñiru dukami aapimï kaxkïdï— itïtïdai. 27—Ix makïdï ïr gin sosoiga kañiñiru gia kïïga ïïgida kaïkana gin ñoki dai kïïga maatï aanï gin sosoiga dai ïgai gin ïmadï ajiopaiña. 28Dai aanï gamaakai gubukarhigai ïgai sai kïïgakïrï óídakana bïïxkïrï bïïtarï dai tomarhi ïmo imidagai mai koimu ïgai. Dai mai tipu xorai gin popoidagi ix makïdï nukada aanï. 29Gin Oga ïgai dai gin maa ix makïdï ïr gin sosoiga gïn dukami tudu. Ïgai kïïga nunukadai gin sosoiga dai ïgai bamioma ïr gubuakami ix bhai toma xorai. Kaxkïdï mai tipu xorai gin popoidagi gin sosoiga. 30Dai mos ïr ïmo odami aanï ïmadï gin oga— itïtïdai.
31Dai mos potïkai Suxi saidi mos ïr ïmo odami ïgai ïmadï Ogadï baidi go judidiu bui ojodai ïpamu dai maikarsa agaitadai mua ïrhiditai.
32Daidi Suxi itïtïdai,
—Kaxi nïidi aapimï sai ibuadana aanï naana maaxi maaxidaragai ix makïdï ïïgi gin Oga ixtutuidikïi ix ibuadagi dai ix makïdï ïgai gin tïjai. Gin aagidabïrai tudu ¿ix makïdï maaxidaragaikïdï mai bhai gïn ïrhidi aapimï dai gin mua ïrhidi?— itïtïdai.
33Daidi go judidiu itïtïdai,
—Cho aapi Suxi, mai xu go maaxidaragaikïdï ix makïdï ibuayi aapi gï maikarsa ïragai aatïmï. Ïmo buirudagai ñoki aagai aapi aagaitai Diuxi kaxkïdï gï maikarsa ïragai. Aapi mos ïr odami ïpïan dukami toma xorai dai pokaiti aapi saidi ïr Diuxi aapi kaxkïdï gï maikarsa ïragai aatïmï— itïtïdai.
34Daidi Suxi itïtïdai,
—¿Maiti ix tudu ojixi gïn sïïrhikamiïrï sai ñokidi Diuxi ïïmadutai gïn aaduñi ïïki dai potïtïdai,
Aanï ïr Diuxi dai aanï pokaiti sai aapimï ïr didiuxi gïn ïpïan dukami? itïtïdai Diuxi.
¿Mai ix poduu aagidi Diuxi gïn aaduñi ïïki?— itïtïdai Suxi.
35—Daiñi, mai tipu xorai potïiyagi sai soimaaxi ño Diuxi aidïxi podukai aagidi ïgai go odami ïïki. Dai ïkobïrakoga ka ojixi gobai Diuxi ñokidïrï ïpï dai ix makïdï ka ojixi Diuxi ñokidïrï mai tipu ix dukatai gajiadïrï biagi aatïmï. 36¡Kaxkïdï maiti gï agai ix potïiyagi aapimï sai soimaaxi ñokai aanï potïkai sai aanï ïr Diuxi Maradï! Aanï ïr Diuxi otosadï ix makïdï ïgai ïïko busaitu di— itïtïdai Suxi.
37—Aanï ibuayi go aaduindagai ix makïdï gin tïjai gin Oga tudu. Dai kaxkïdï gï agai sai gin buaboitudadagi aapimï. Ix maiti ibuadamudai aanï go aaduindagai aidï gia maiti gï agadamudai ix gin buaboitudagi aapimï. Dïï gia ibuayi aanï. 38Dai tomaxi maiti ipïrhiada aapimï ix gin buaboitudagi kaïkatai gin ñoki, gia buaboitudabïrai nïiditai go aaduindagai ix makïdï ibuayi aanï. Dai ix buaboitudagi aapimï aidï gia maatïkamu aapimï sai aanï ïmadï gin Oga mos ïr ïmo odami— itïtïdai Suxi.
39Daidi gokïdï ïpamu gïn aga go judidiu dai bhïiyi agaitadai go Suxi dïï mos go Suxi daibuna jii 40dai daibusai basadïrï go gïï aki Jordan tïgidukami dai mïï ayi xako gabapakonaiña Juan odami tukamïrï dai ami gï urhi chïki tasai. 41Dai odami mui iji dai mïï gaagamu go Suxi daidi ikaitiña,
—Tomaxi go Juan maiti ibuadana tomarhi ïmo maaxidaragai dïï mos bïïxkïrï kïïga buaboi bubuaka bïïxi go ñokidï ix makïdï aagaiña ïgai aagaitai go Suxi— ikaitiña odami.
42Dai kïïga mui odami buaboitu go Suxi amïï basadïrï go gïï aki Jordan tïgidukïdï.
Aktuálne označené:
Juan 10: NTP
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Copyright: Ethnos360 Sanford, Florida
