Juan 9
9
Duadi Suxi ïmo kïïrhi mai nïadami
1Daidi no aimïraitadai Suxi dai tïï ïmo kïïrhi ix makïdï busaikai abhiadïrï mai nïayitadai.
2Dai Suxi mamaatïrdamigadï itïtïdai go Suxi,
—¿Mamaatïtuldiadami, borai ïgai dai soimaaxi dui ix kaxkïdï mai nïadami busai gobai? ¿Ïïgi gobai ix soimaaxi dui go dïïdïdï xio?— itïtïdai go mamaatïrdamigadï.
3Daidi go Suxi itïtïdai,
—Tomarhi go kïïrhi tomarhi dïïdïdï ïr duñidï sai mai nïadami busai gobai. Bhaiyoma mai nïadami busai gobai sai podukai gï maaxitudana xïïxi ïr gubuakami Diuxi— itïtïdai. 4—Xibi gï agai ix kabami gin aaga aataduñagi aanï dai ibuadagi go naana maaxi maaxidaragai ix makïdï gin tïjai Diuxi bhaigobai gin otosakai. Kaxkïdï tudu ix dukai daibuskïi tasai dai odami ka mai bhaigakana ix gaatabuadagi ka aïkai tukagi, podukai ïpï ugitimu gïr oidakaraga tami oidigi daama dai aidï ka mai bhaigakamu aatïmï ix ibuadagi ix tumaxi Diuxi ipïrhidi— itïtïdai. 5—Dai ix dukai kudagikïdï nïidi odami ixtumaxi oidaga tami oidigi daama podukai ïpï aanïkïdï mamaatïrïi odami ix tumaxi ïr buaboi Diuxikïdï. Kukudaidan duu aanï odami iibhïadï tudu dai ix xïï tïbïpi oidakagi aanï kia tami idi oidigi daama po ïï tïbïpi kukudaidakamu aanï kia— itïtïdai Suxi.
6Dai mos potïi go Suxi dai dïbïrapi xixiba daidi go baa xixibaradïkïdï arapa lïïchi dïbïrai dai bupujiïrï daxi ïgai ix makïdï mai nïayi. 7Dai bhodïrï potïtïdai ïgai,
—Imïdañi dai mïï bakuana gï bupuji amïï posoana xako Siloé tïgidu— itïtïdai Suxi.
Daidi go kïïrhi mos bakuanakai bupuidï ka nïnïaba dai bhodïrï ka nora kiidïrï. Siloé tïgidu go poso ami tudu dai ïmo otoxikami duu busakïi gobai aatïmï gïr ñokikïdï.
8Dai gokiïrï mui odami nïidi ix makïdï ïr miadïrï óídakami go kïïrhi ïmadï jaa ïpï ix makïdï ïr xibhïadïrï óídakami dai mos nïidiña aidïxi no xibhï dakana ïgai dai gataanïiña soiñi. Dai xibi go odami ikaiti nïiditai,
—¿Maiti ix tudu idi ïr go kïïrhi ix makïdï mos dakana dai gataanïiña soiñi?— ikaiti.
9—Ïgiaba— ikaiti ïïmoko.
Dai jaa ikaiti,
—Maiti abïr ïgai. Mos ïpïamaaxi gobai ïrhi aanï— ikaitiña.
Daidi go kïïrhi ïïgi po kaiti,
—Aanï ana— ikaiti.
10Daidi go gaa itïtïdai aidï,
—¿Dukatai idui aapi dai nïnïaba?— itïtïdai.
11Daidi go kïïrhi itïtïdai,
—Go Suxi arapa lïïchi dïbïrai dai gin bupujiïrï tïki dai gin aagidi ansai mïï bakuana gin bupuji amïï posoana xako Siloe tïgidu. Dai aanï ïïgidi dai bakoi gin bupuji dai ka nïnïaba— itïtïdai.
12Daidi go gaa itïtïdai,
—¿Xako daja go Suxi xibi?— itïtïdai.
—Mai maatï aanï— itïtïdai go kïïrhi.
13Daidi bhodïrï go gaa baidaja go kïïrhi ix makïdï duayitadai bupuidï dai mïï go fariseos buidïrï kïi. 14Dai aidï ïr ïmo ibhïxtaragai tasïrïkatadai aidïxi Suxi arapa go dïbïrai dai bupuidïrï dáítadai go kïïrhi dai duadi. 15Daidi go fariseos gatïkakai go kïïrhi as dukatai duayitadai. Baidi go kïïrhi itïtïdai,
—Mos gin bupujiïrï dáí Suxi lïïchi bhidai dai bhodïrï gin bako aanï dai otoma nïnïaba— itïtïdai.
16Dai ïmo ibhïxtaragai tasïrï duaditadai Suxi go kïïrhi ix kaxkïdï ïïmoko go fariseos ikaititadai sai go Suxi mai xadutudai go ibhïxtaragai tasai daidi ikaiti,
—Mai xadutudai gobai go ibhïxtaragai tasai di. Xadïrï ïr Diuxi otosadïkana gobai— ikaiti ïïmoko.
Dïï gia jaa ikaitiña,
—Ïmo soimaaxi buadami xadïrï pomaaxi iduna maaxidaragai ix makïdï ibuayi Suxi ix makïdï abogiama Diuxi ixtutuidikïi ix ibuadagi— ikaitiña.
Daidi gïn bupui ñokadan kaitiña go fariseos. Ïïmoko ïmo dukai aagaiña dai jaa ïma dukai.
17Daidi ïpamu tïkaka ïgai go kïïrhi ix makïdï gï duaditu bupuidï dai potïtïdai,
—¿Aapia borai ïrhidi go ix makïdï gï duadi?— itïtïdai go fariseos.
—Ïmo aagadami Diuxi ñokidï ïrhi aanï ïgai— itïtïdai go kïïrhi.
18Dïï go judidiu mai buaboitudai ix mai nïadatadai ïgai ïkioma dai kaxkïdï báí go dïïdïdï 19daidi potïtïdai,
—¿Idi ix tudu ïr gïn maara ix makïdï pokaiti aapimï sai mai nïadatadai?— itïtïdai. —Bhaiton mai buaboitudai aatïmï ix mai nïadatadai gobai. ¿Dukatai xibi kïïga nïayi gobai di?— itïtïdai.
20Daidi dïïdïdï itïtïdai aidï,
—Kïïga maatï aatïmï sai idi ïr gïr maara dai maatï aatïmï ix mos busaikai abhiadïrï mai nïadatadai gobai. 21Dïï mai maatï aatïmï ix dukatai duayi gobai nïadagadï dai tomarhi xorai duadi— itïtïdai. —Kaxi ïr kïïrhi gobai tudu. Tïkakabïrai aapimï ïgai nïidana sa tïna— itïtïdai dïïdïdï.
22Go bhaitï gukakamigadï judidiu ka bhaiduitadai ñoki sai mai maaki agaitadai oigaragai ix baan gukakagi judidiu kiupaigadïrï xorai pokaitadagi ix go Suxi ïgai daidi ïr Ga Tïanïdami ix makïdï nïnïratadai óídakami. Kaxkïdï go dïïdïdï go kïïrhi ïbhïiditadai go bhaitï gukakamigadï judidiu dai potïtïdai sai mai maatï xorai duadi maradï 23dai kaxkïdï ïpï potïtïdai sai ïïgi tïkakana maradï kaxi kïïrhikatai ïgai.
24Baidi go judidiu báí go kïïrhi ïpïpï daidi itïtïdai,
—Kïïga maatï aapi sai gï maakimu Diuxi gïgïbituldaragai ix yaatagïdagi aapi kaxkïdï gï aagai ix sïïrhi aagada aapi xibi gï kaïkatai Diuxi dai gïr aagida ixdukatai duayi aapi. Xadïrï bhai maaxkami dukai gï duadana go Suxi tudu. Kïïga maatï aatïmï ix ïgai ïr ïmo soimaaxi buadami di— itïtïdai.
25Daidi go kïïrhi potïtïdai,
—Mai maatï aanï ix bhai ïr soimaaxi buadami ïgai ix maiti ïr soimaaxi buadami ïpï. Mosïkaxi ïmo ixtumaxi gia kïïga maatï aanï, ix ïïki mai nïadatadai aanï dai xibi gia kïï nïayi aanï— itïtïdai.
26Dai go judidiu apia ñokidi go kïïrhi daidi itïtïdai,
—¿Dukatai idui go Suxi daidi gï duadi gï nïadaga tudu?— itïtïdai.
27Dai go kïïrhi itïtïdai,
—Kaxi gïn aagidi aanï. ¿Tuixi maiti gin kaï aapimï? ¿Ix tuixidï ipïrhidi aapimï ix gïn aagidagi aanï ïpamu? ¿Aapimï mïx tudu ïpï buaboituda ïrhidi dai oijada ïrhidi?— itïtïdai.
28Aidï gia go judidiu galnaxi ñoki aagidi go kïïrhi daidi bhodïrï itïtïdai,
—Aapi gia ïïgidi go Suxi dïï aatïmï ïïgidi go Moiseskaru— itïtïdai. 29—Kïïga maatï aatïmï ix Diuxi ïmadï aatagaiña go Moiseskaru ïïki dïï gia mai maatï aatïmï tomarhi xajadïrï dibia go Suxi— itïtïdai.
30Daidi go kïïrhi itïtïdai,
—Mai maatï aanï ix tuixi mai maatï aapimï go Suxi ix xajadïrï dibia. Ka duadi ïgai gin bupuji di. Dai ix mai Diuxiañdïrï dibiamudai ïgai xadïrï gin duadana podukai. 31Kïïga maatiga maaxi sai Diuxi kïïga kaïkana daanïitai ïgai ix kaxkïdï ixtui ix gin duadiagi. Xadïrï kaïkana Diuxi odami ix makïdï soimaaxi ibuadana di. Mosïkaxi kaïkana Diuxi odami ix makïdï kïïga xadutudai dai kïïga ïïgidi. 32Daiñi, aidï abhiadïrï ix Diuxi idui oidigi mai taadaga ix oidakagi ïmoko ix makïdï duduadagi bupuidï odami ix makïdï busaikai abhiadïrï mai nïadana, dïï go Suxi gia gin duadi. 33Kaxkïdï gï maatï sai Suxi ïr otosadï Diuxi. Kaxi kïïga in duadi ïgai di— itïtïdai.
34Daidi go judidiu itïtïdai aidï,
—Aapi mos ïr soimaaxi buadamikana aidïxi abhiadïrï busai aapi. ¿Dukatai gïr maatïtulda ïrhidi aapi di?— itïtïdai.
Dai bhodïrï aadaji ïgai go kïïrhi abhai judidiu kiupaigadïañdïrï.
Mai nïadami gï dukamikana ïïmo odami mai maatïkatai ixtumaxi ïr buaboi
35Daidi gokiïrï Suxi kajioma sai go judidiu go gïï kiupiañdïrï aadajitadai go kïïrhi ix makïdï Suxi duaditadai bupuidï. Dai go Suxi mïï gaa go kïïrhi dai tïïgakai itïtïdai,
—¿Buaboitudai pïxi aapi ix makïdï kïïga odami busai?— itïtïdai.
36Baidi go kïïrhi itïtïdai,
—Gin aagidañi borai ïgai naidi buaboitudada aanï— itïtïdai.
37Daidi Suxi itïtïdai,
—Ka nïidi aapi. Aanï an ïgai ix makïdï gï ïmadï aatagai— itïtïdai.
38Daidi go kïïrhi itïtïdai,
—Gin Tïanïdamiga, aanï gia gï buaboitudai— itïtïdai.
Dai bhodïrï totonakïdï kïkiba buidïrï dai xadutugi.
39Daidi Suxi itïtïdai,
—Aanï dibia tami oidigi daama dai ïjïkobai dasa iñagai odami ix makïdï mai maatï Diuxi ïmadï ix makïdï gia maatï ïgai. Ix makïdï mai maatï Diuxi ïr mai nïadami gï dukamikana dai aanï dibia dai kïïga nïadatuda iñagai sai kïïga maatïkana Diuxi. Dïï gia ix makïdï pobïnïrhidi ix ka kïïga nïayi dai kïïga maatï Diuxi ïgai gia maatïtuldamu aanï sai maatïkana ix maiti ïr buaboi ix maatï ïgai Diuxi— itïtïdai Suxi.
40Dai ami darakatadai chïki fariseos ïpï dai potïtïdai ïgai Suxi,
—¿Aatïmï pïx mai nïadami dukai gïr nïidi ïpï?— itïtïdai.
41—Ïjï. Mai nïadami gïn dukami aba aapimï— itïtïdai Suxi. —Daiñi— itïtïdai. —Kïïga nïadami gïn aagai ïïgi aapimï pobïnïrhiditai ix kïïga maatï Diuxi tomaxi mai maatï aapimï toma lachi. Kaxkïdï ïr mai nïadami gïn dukami aapimï dai modukai gïpiïrï bïïtïkami bipiïyi aapimï bïïtarï Diuxi. Dïï gia ix bhai aagamudai aapimï saidi ïr buaboi ix mai nïayi aapimï mai maatïkatai ix tumaxi ïr buaboi Diuxikïdï aidï gia mai tipukamudai xorai gïn maakiagi gïgïbidaragai gïn soimaaxkamigakïdï. Dïï mai bhai aagai aapimï podukai— itïtïdai Suxi.
Aktuálne označené:
Juan 9: NTP
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Copyright: Ethnos360 Sanford, Florida
