Hechos 9
9
Go Saulo buaboitu Suxi
1Dai aidïpïrï go Saulo bui ñokaitadai go buaboitudadami kïïdaitai ïgai dai asta kodadan kaititadai. Gaagaimi ïgai ixdukatai naato ugititudagi go buaboitudadami dai mïï dibiji go bhaitï kïakamigadï dadaxdadami judidiu. 2Mïkadïrï gatáí ïgai ïmo ojixikami dai mïï gatïïgida agaitadai Damaskïrï kiupiïrï bhaitï gukakami. Go ojixikamikïdï biaka agaitadai ïgai gubukadagai ix mïï buiyagi go buaboitudadami Damaskïrï dai maamaixapikami buapagi Jerusalenamu modukai kïkïïrhi dai oki.
3Dai ïmo imidagai aidïxi ka miadïrï kïïkigi ïgai Damaskoana saidi todian dukai ami xako imïi ïgai ami xikorhi kuuda ïmo kudagi tïbagiañdïrï. 4Daidi go Saulo dïbïrapi gïi dai kaï ïmo ñoki daidi ikaiti go ñoki,
—Saulo, Saulo, ¿Tui pïxi gin buidïrï kaatïkami aapi dai soi gin buayi?— ikaiti go ñoki.
5—¿Borï aapi tïanïdami?— ikaiti Saulo aidï.
Daidi go tïbagiañdïrï ñoki ikaiti,
—Aanï ïr Suxi— ikaiti. —Dai soi gin buayi aapi— ikaiti go ñoki.
6Daidi go Saulo gigiburhi duadimukatai daidi itïi,
—Tïanïdami, ¿Tumaxi ipïrhidi aapi ix iduña aanï?— ikaiti.
Daidi Gïr Nukadakami itïtïdai aidï,
—Kïkibañi dai imi Damaskamu xi ami ïmo kïïrhi gï aagidamu pïx tuma duñagi— itïtïdai.
7Dai go kïkïïrhi ix makïdï oiditadai go Saulo arhiï duduadimu kaïkai go ñoki mai tïïgakai xorai ïgai dai ñokai. 8Daidi go Saulo kïkiba ïpamu dïï ka xatuitadai ïgai nïadagadï. Ka mai nïayi toma lachi. Baidi aaduñdï baidakai Damaskamu. 9Daidi go Saulo baika tasai mai uu toma lachi dai tomarhi maita ii.
10Dai ami Damaskoïrï oidakatadai ïmo kïïrhi buaboitudadami Ananias tïgidukami. Dai Suxi aatagidi ïgai tïïtïkidïrï dukai daidi itïtïdai,
—Ananias— itïtïdai.
—Gin Nukadakami, tami andaja— itïtïdai Ananias.
11Daidi Gïr Nukadakami itïtïdai aidï,
—Imiñi otoma amïï Udaxi kiidïrï, mïï kaye Sïïrhiñikïrï tudu, dai ami nïida ïmo kïïrhi Tarsoañdïrï oidakami. Saulo tïgidu ïgai dai gin daanïi ïgai mïïka dakatai. 12Tïïtïkidïrï gï tïï ïgai ix baatadai aapi xako daja ïgai dai daama darai aapi gï ïïka dai duadi nïadagadï— itïtïdai go Suxi.
13Daidi Ananias itïtïdai aidï,
—Gin Nukadakami gin oigïdañi dïï muiyoko kajiomakana aanï xïï idi kïïrhi kabami soi buididiña gï aaduñi Jerusalenïrï óídakami. 14Dai xibi ka dibia gobai tami dai go bhaitï kïakamigadï dadaxdadami judidiu as maa gubukadagai bïïxi xi maamaixapikami gïr bukia agai bïïxkatai ix makïdï gï buaboitudai— ikaiti Ananias.
15Daidi Gïr Nukadakami itïtïdai,
—Imiñi. Kaxi an ïko busaitu aanï go Saulo bai ñokaiña ïgai gin bïïtarï. Aituldamu ïgai gin ñoki bïïtarï ix makïdï maiti ïr judidiu dai judidiu ïpï dai bïïtarï gïgïr dudunukami. 16Aanï tïïgidamu go Saulo sai gï agadamu xi kabami soimaaxi taatagi ïgai ibuadatai gin aaduindaga— ikaiti Suxi.
17Daidi jii Ananias kiidïrï Udaxi xako dakatadai Saulo dai ami baakïkai daama darai gï ïïka daidi itïtïdai,
—Gin aduñi Saulo, Suxi Gïr Nukadakami gin otoi bhaigobai. Suxi ïgai dai gï maaxitu gï buitapi boiyaiñdïrï. Ïgai gin otoi saidi aapi ïpamu nïnïabana dai sai ïmo tïgibudagai bhïiyagi aapi ïmadï Diuxi Ibhïadï— itïtïdai Ananias.
18Mos potïi ïgai bai otoma surhi bupujiañdïrï batopa kokomidï maaxi go Saulo dai ka nïnïaba ïgai ïpamu. Dai bhodïrï bañi ïgai dai gï bakoi. 19Dai gokiïrï gauu dai bhïiyi gubukadagai ïpamu.
Go Saulo Damaskoana aimïrai
Anaaxi Damaskoana bii go Saulo chïki tasai buaboitudadami ïmadï.
20Otoma jii ïgai judidiu kikiupaigadïrï dai mïï aagidimi odami sai Suxi ïr Diuxi maradï. 21Dai bïïxkatai ix makïdï kaï mai tïtïgaitadai ixdukatai gïn tïtïgitoagi daidi ikaiti,
—¿Maiti ix ïr gobai ïgai dai aimïraiña Jerusalenïrï dai gaagaiña go buaboitudadami dai soi buadana? Xibi ka tami dibia gobai dai bukia agai buaboitudadami maamaixapikami ïrhi aanï dai mïïka tïïgida agai go bhaitï gukakamigadï dadaxdadami judidiu mïï Jerusalenïrï— ikaitiña odami.
22Dïï go Saulo mos bamioma bhïjimitadai gubukadagai dai tïgibudagai ixtukïdï aagidagi odami sai Suxi ïr Diuxi Otosadï Gïr Bhaitï kïakamiga. Baidi go judidiu Damaskïrï óídakïdï mai tïï ixdukatai gïn tïtïgitoagi kaïkai ïgai aatagidï.
23Bhai mui tasai aatagaitadai go Saulo podukai dai bhodïrï gïn ïmpagi go judidiu dai bhai dui ñoki dai mua agai. 24Dïï Saulo máí. Dai ami Damaskoïrï bïï xikorhi kïakatadai ïmo gïï bhidabiki maaxkami kurarai. Dai ami ïrana kuupikatadai ïgai. Baidi go judidiu nukadakana kukuparadï go gïï bhidabiki dai sobhidakana go Saulo dai mua agai. Kïïga nukadakana ïgai tasïrï dai modukai tukarï bïïxi. 25Dïï mos go buaboitudadami ïmo gïï asariïrï ïrana dáí go Saulo dai bhodïrï tukarï ïmo turobiñdikïdï tïbañi bhidabikiamu sïïrhi bai kïïgakïrï busai go Saulo.
26Dai aïkai go Saulo Jerusalenïrï uraba ïrhiditadai ïgai go buaboitudadami, dïï ïgai ïbhïidiña go Saulo. Mai buaboitudaiña ïgai xi go Saulo ïr buaboitudadami kïïgakïrï. 27Dïï ami dajatadai ïmo kïïrhi Bernabé tïgidukami dai ïgai soi. Baidakai ïgai go Saulo dai baan kïi go ojotoxikamiïrï dai aagidi ïgai go ojotoxikami ixdukatai tïï Suxi Kristo boiyañdïrï kïïkigitai. Aagidi ïpï ix kaiti go Suxi boiyañdïrï kïïkigitai go Saulo dai sai go Saulo mai duadimudakïdï aagaiña Diuxi ñokidï Damaskïrï Suxi bïïtarï. 28Aidï gia go Saulo urabakami bii go buaboitudadami Jerusalenïrï óídakami dai aipako aimïraiña ami dai mai duadimudakïdï aagaiña Diuxi ñokidï. 29Ga aatagaiña ïgai ïmadï go griego ñokadami judidiu. Dudatai gïn bupui ñokaiña go Saulo ïmadï ïgai. Dai go griego ñokadami judidiu gaagaitadai ixdukatai muagi go Saulo. 30Dai go buaboitudadami máí dai otoma baidakai go Saulo Cesareamu dai abhiadïrï maigobai otoi ïgai Tarsoamu.
31Dai aidï chïki tasai xioma óídakatadai go buaboitudadami Judeïrï dai Galileïrï dai Samarhiïrï mai tipukatai buidïrï bïïtïkami. Kïïga xadutudaiña ïgai Diuxi dai Diuxi Ibhïadï gamaakaiña gubukadagai xi ïgai bamioma kïïga muidaimi.
Piduru duadi ïmo kïïrhi Eneas tïgidukami
32Ïmo imidagai go Piduru didibiditadai buaboitudadami aipako óídakami dai dibiji ïgai go Lidiïrï óídakami ïpï. 33Dai ami tïï ïgai ïmo kïïrhi Eneas tïgidukami. Ïgai ka parï mamaakoba umigi mos kaatïkana mai bhaigakatai ixdukatai aimïrdagi.
34Daidi Piduru itïtïdai aidï,
—Eneas— itïtïdai, —Suxi Kristo kaxi gï duduadimi. Bañigiñi tudu otoma dai bhai duñi gï baakoxi— itïtïdai Piduru.
Dai otoma bañi go Eneas. 35Dai bïïxkatai Lidiïrï óídakami ïmadï go Saronïrï oidakami nïidi xi ka duayitadai go Eneas dai ka ïmadukai gïn tïtïgito ïgai dai buaboitu Gïr Nukadakami.
Diuxi soi go Piduru dai duakaturhi ïgai ïmo oki
36Aidï Jopeïrï oidakatadai ïmo oki. Buaboitudadami ïgai dai Tabita tïgidu. Griego ñokikïdï Dorkas ikaidakatadai tïtiaradï. Go Tabita kïï tuigakana dai soikïiña ïgai soititigami. 37Dai ïmo imidagai kabami oi ïgai kokodagai dai muu. Mïtai baïtïxdi tukugadï dai bhodïrï ïmo baaki gokoadaamarhiïrï tïkabiakoga tïï. 38Dai ami Jopañdïrï miadïga Lidiamu xako dakatadai Piduru aidï. Dai go buaboitudadami máí ix ami dakatadai Piduru dai otoi goka kïkïïrhi sai mïï aagidana go Piduru sai otoma dibiana.
39Daidi Piduru otoma oi go kïkïïrhi. Dai aïkai ïgai otoma baidakai xako kaatïkatadai go mukiadï. Ami xikorhi mui bipiudu gukatai gasuañimi. Buatadai ïgai yuupurui dai bapasaragai ix makïdï ibuadana go mukiadï dai tïïgi ïgai go Piduru. 40Dai Piduru kidigamu otoi bïïxkatai go ix makïdï ami darajatadai dai totonakïdï kïkibakai gadaanïi ïgai Diuxi. Dai bui nïnïaba ïgai go oki mukiadï daidi itïtïdai,
—Tabita bañigiñi— itïtïdai.
Dai ïgai kupioka gï bupuji dai tïï go Piduru dai sïïrhi daiba. 41Dai go Piduru nobiañdïrï bhïiyi go oki dai bañigi. Dai bhodïrï otoma báí ïgai go gaa buaboitudadami ïmadï go bipiudu dai baan kïïxi go oki duakakami. 42Dai bïïxi Jopeïrï óídakami kajioma. Dai muidutai ïgai buaboitu Gïr Nukadakami. 43Daidi Piduru bhai tïbïpi anaaxi Jopeïrï bii kiidïrï ïmo kïïrhi Ximuñi tïgidukami. Baketatadami go Ximuñi.
Aktuálne označené:
Hechos 9: NTP
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Copyright: Ethnos360 Sanford, Florida