Hechos 8
8
1-2Daidi go Saulo ami dajatadai ïpï aidïxi gï muatu go Tibañi dai bhai aa mïx muagi. Dai gokiïrï dada kïkïïrhi kïïga xadutuadadami Diuxi dai yaasa tukugadï Tibañi. Kabami susuanïitadai ïgai soi gïn ïrhiditai.
Saulo soimaaxi taataturhi go buaboitudadami
Dai aidï tasïrï aidïxi gï muatu go Tibañi go Jerusalenïrï óídakami bui surhi go gaa buaboitudadami ïpï dai soimaaxi taataturhimitadai. Dai go buaboitudadami aipako iji abhiadïrï. Jaa iji Judeamu dai jaa Samariamu. Mosïkaxi Suxi ojotosadï anaaxi bii Jerusalenïrï.
3Dïï go Saulo apia soi buadatadai go buaboitudadami tomaxi aipako ijitadai ïgai. Kiikidïrï bapaakïiña ïgai dai tïrhiusumaitai bubaidiña kïkïïrhi ïmadï oki daidi gamaamaixaiña.
Pirhi jii Samariamu dai ami maatïturhi odami Suxi aatagidï
4Daidi go buaboitudadami ix makïdï ka ijitadai Jerusalenañdïrï aipakoga ajiopaitadai dai aagidimitadai óídakami go bhai ïrhiaraga ñoki. Aagaiña ïgai go Suxi aipakoga ajiopaitai tudu.
5Ïmoko go buaboitudadami Pirhi tïgidukatadai. Ïgai jii xako Samaria tïgidu oidigi dai ami aagidi ïgai óídakami sai Suxi ïr Diuxi Otosadï Gïr Bhaitï Kïakamiga. 6Ami óídakami nïiditadai xi ibuadana go Pirhi naana maaxi ix makïdï ïïgi Diuxi ixtutuidi xi buadagi dai kïïga gïn tïgito kaïkana aatagidï. 7Muidutai ïgai óídakami biakana Diabora tïtïañikarudï dai Pirhi duduadi. Gïgïr iñakaiña go Diabora tïtïañikarudï dai bubuakïiña odamiañdïrï. Dai jaa odami ami óídakami mai bhaiga ix oiñadagi gïn tukuga dai Pirhi duduadi ïpï ïmadï jaa ix makïdï maiti ixtutuiditadai ix ajiopadagi. 8Daidi kïïga bhai gïn ïjïrhi ami Samariana óídakami.
Ïmo tabïgami Ximuñi tïgidukami
9Dai ami Samariana oidakatadai ïmo kïïrhi Ximuñi tïgidukami. Ïkioñdïrï abhiadïrï ïr tabïgamikana ïgai dai naana maaxi ibuadana ïgai yaatagiditai óídakami. Dai óídakami mai tïtïgaiña ixtumaxi gïn tïtïgitoagi nïiditai ixtumaxi ibuadana ïgai. Ïïgi pokaitiña ïgai saidi ïr ïmo gïdukami maatïkami. Gïdukami gï ïrhidi ïgai daidi ikaiti. 10Baidi ami óídakami kïïga gïn tïgito kaïkana aatagidï ïgai daidi ikaitiña,
—Gobai gia bia Diuxi gubukadadï— ikaitiña odami.
Pokaitiña ïgai bïïxkatai xi ïr gïn bipidakamikagi ïgai xi soititigamikagi ïpï.
11Podukai mui umigi go Ximuñi mos yaatagidiña odami gï tabïdarakïdï baidi odami kïïga gïn tïgito kaïkana dai ïïgidiña. 12Dïï gokiïrï ami Samariana dibia Pirhi dai aiturhi óídakami buitapi go bhai ïrhiaragai aatagi. Aagidi ïgai ix dukatai tïanïi Diuxi dai aagidi ïpï Suxi aatagidï ix makïdï bhai ïrhiatudai odami. Dai óídakami ïïgida kaï ñokidï Pirhi dai gïn bapakoi muidutai, kïkïïrhi ïmadï oki. 13Dai asta Ximuñi ïpï buaboitu dai gï bakoi. Dai bhodïrï aipako aimïraiña ïgai Pirhi ïmadï dai mai tïtïgaiña ïgai ixdukatai gï tïgitoagi nïiditai naana maaxi maaxidaragai ix makïdï ibuadana Pirhi ix makïdï ïïgi Diuxi ibuayi.
Ximuñi sabïda ïrhiditadai gobai ix makïdï Diuxi mos gaoidi
14Daidi go ojotoxikami Jerusalenïrï darakïdï kajioma sai go Samariana óídakami ka buaboida kaïtadai Diuxi ñokidï ïpï dai gamoko otoi ïgai go Piduru ïmadï Juan. 15Dai aïkai ïgai Samarhiïrï gadaañimi ïgai Diuxi sai dibiana Diuxi Ibhïadï go buaboitudadami ïmadï. 16Diuxi Ibhïadï mai kia ïmadï dakatadai tomarhi ïmadutai ïgai. Mos gïn bapakoñikatadai ïgai Suxi Kristo sïïrhikamigadïkïdï. 17Daidi go Piduru ïmadï Juan daama darai ïïkadï dai podukai dibia Diuxi Ibhïadï go buaboitudadami ïmadï.
18Daidi go Ximuñi tïï ix ka dibia Diuxi Ibhïadï buaboitudadami ïmadï daama darasakai go ojotoxikami ïïkadï. 19Dai tïïgakai gobai sai go Ximuñi potïtïdai go Piduru ïmadï Juan,
—Aapi Piduru dai aapi Juan, gin kaïkabïrai— itïtïdai. —Aanï gïn maakiagi tuminxi bai aapimï gin maaka gubukadagai nai xïxkadï aanï daama dadasdagi gin ïïka tomax makïdï odami bai dïdïbïdagi Diuxi Ibhïadï ïgai ïmadï— itïtïdai Ximuñi.
20Daidi go Piduru kabami ñokidi daidi itïtïdai aidï,
—Mos ugitimu aapi kïïrhi ïmadï gï tuminxiga ïpï— itïtïdai.
—Daiñi, Diuxi gïr urhiñdi Ibhïadï ïmo oidaragai dukai dai xibi aapi mos tuminxikïdï gasabïdadan kaiti. Gia mai kïïgadu gï tïgibudaga— itïtïdai.
21—Aapi toma lachi mai bia oigaragai xi gïr urabagi idi aaduindagïrï aidï. Diuxi ka nïidi ix mai sïïrhiñi gï tïgibudaga kaxkïdï. 22Dagitoñi tudu go soimaaxi tïgibudagai ix makïdï adaimïi aapi dai daañïda Diuxi sa bhai gï oigïldana. 23Kïï maatï aanï xi kabami ïgamudaga aapi dai gï maixakan duu aapi ïïgiditai go soimaaxi tïgibudagai— itïtïdai Piduru.
24Daidi go Ximuñi itïtïdai go Piduru ïmadï Juan aidï sai,
—Daanïdabïrai Diuxi sai gin oigïldana baidi maiti pobai gin duñana ïgai mïx dukatai aagai aapimï— itïtïdai.
25Bhodïrï Piduru ïmadï Juan aatagidi ami óídakami dai aagidi ix kaiti Diuxi ñokidï. Dai kugaidakai gïn aatagi iji ïgai dai ayi aipako kiikiïrï ami xako Samariana tïgidu oidigi dai aagidimi óídakami go bhai ïrhiaragai aatagi. Dai bhodïrï nonora ïgai Jerusalenamu ïpamu.
Pirhi aataga ïmadï ïmo dunukami Etiopiïrï oidakami
26Daidi ïmo imidagai ïmo Diuxi tïañikarudï ñokidi go Pirhi daidi itïtïdai,
—Obaidañi aapi Pirhi dai imi tabhiadïrï. Bhïiñi go boi ix makïdï Jerusalenañdïrï dai Gasamajako kaatï gobai ix makïdï oidigana sïïrhi daibunuga tudu xako mai tipu óídakami— itïtïdai Diuxi tïañikarudï.
27Dai oton jii go Pirhi dai no boiyamu ayi ïgai ïmo dunukami Etiopiïrï oidakami. Ïgai ïr tesorerogadï go reina Etiopiïrï. Kandaxi tïgidu go reina. Daidi go dunukami ïgai Jerusalenañdïrï imïitadai ïpï. Jerusalenïrï xadutudaitadai ïgai Diuxi dai ïpamu ka aa gïitadai ïgai kiiyamu. 28Ïmo kareta ïrana daitugaitadai go dunukami dai ïïgi aagaimi ojai ix makïdï go aagadami Diuxi ñokidï Isaias tïgidukami oja. 29Daidi Diuxi Ibhïadï itïtïdai Pirhi,
—Imiñi dai abhana kïkiba go kareta— itïtïdai.
30Dai Pirhi otoma mïï dai miadïrï kïkibakai kaï ïgai go dunukami ix aagaimi Isaias ojadï. Dadi go Pirhi tïkakai aidï,
—¿Maatï pïx kaï go ojai?— itïtïdai.
31—¿Dukatai maatï kaïkana aanï mai tipukatai xorai gin aagidagi ix tïiya ïrhidi gobai?— ikaiti go dunukami.
Dai bhodïrï báí ïgai go Pirhi sai tïsadïna karetïrï dai sai ami daibana gï ïmadï dai bhodïrï boiyamu iji ïpamu.
32Daidi go dunukami aagaitadai Diuxi ñokidïrï xako ikaiti ojai sai,
Mai taada jii ïgai aidïxi gï baidakatu ïgai dai gï muatu.
Ïgai ïpïan dukai jii ïmo kañiru dai mai suakai xudu gï muatudagi.
Mos mai taada daja ïgai ïpïan dukami ïmo kañiru maara ix makïdï mai suakaiña xuduku gï ikidagi.
33 Taata ïgai gïgïbidaragai tomaxi maiti ïr soimaaxi buadami.
Ugidagai ïgai mai kia maamarakai, ikaiti go dunukami aagaitai Isaias ojadï.
34Daidi bhodïrï ikaiti go dunukami,
—Gin oigïdakai gin aagida, ¿Xorai aagadankaiti go aagadami Diuxi ñokidï? ¿Ïïgi ix gï aagai ïgai, ïmai xia?— ikaiti.
35Daidi go Pirhi aatagidi go dunukami dai go baaxi ojakïdï aagidi go bhai ïrhiaraga aatagi aagaitai Suxi. 36Dai ayi ïgai xako dajatadai sudagi.
Daidi go dunukami itïtïdai aidï,
—Daiñi, bhobai kaatï sudagi— itïtïdai. —¿Kïïgadu xi ix ïmodïrï gin bakuanada aapi?— itïtïdai.
37Daidi Pirhi itïtïdai,
—Pïx kïïgakïrï buaboitudai, aidï gia kïïgadu gobai— itïtïdai.
Daidi go dunukami itïtïdai,
—Aanï gia buaboitudai sai Suxi Kristo ïr Diuxi maradï— itïtïdai.
38Daidi go dunukami gatïjai kïïsaragai go kareta dai bïï gokatai tïapai xako kaatïkatadai sudagi. Daidi Pirhi bakoi go dunukami. 39Dai bubuakïkai ïgai sudagiañdïrï Diuxi Ibhïadï todian dukai baidakai go Pirhi. Daidi go dunukami ka mai tïï ïpamu. Bhodïrï go dunukami oi gï imidaga dai kïïga bhai gï ïrhiditai imïi boiyamu. 40Diuxi Ibhïadï xibhïako baidaja go Pirhi dai ami aipako nïnïnai Pirhi dai mai ix Asotïrï daja. Abhiadïrï oi ïgai gï imidaga dai bïïxi kiikiïrï aijimi dai aagidimi go bhai ïrhiaragai aatagi. Mos pobuimi ïgai dai ayi Cesareïrï.
Aktuálne označené:
Hechos 8: NTP
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Copyright: Ethnos360 Sanford, Florida