Marko 5
5
AMASITANI NIGERUKIBWA MU NGURUBE.
1Mbe nibeza ha ngego endi y’enanza mu nsi y’Abanagerazi. 2Ka yarugire mu bwato, kachwi n’ako omuntu namwirukiraho naruga mu bituro, ali n’omwoyo gw’obulofu, 3ayaliga atwire mu bituro. Kai haliga hataliho muntu wo kuhicha kumuboha, naho kuli n’emikufu, 4kuba yaliga abohirwe ngendo ningi n’olunyoro n’amasegi, nachwagura olunyoro, kai nakananura amasegi, hataliho muntu wo kuhicha kumusinga. 5Bucha bucha mu kiro na musana yaliga ali mu bituro na mu mabanga, nayomba nayekorotoz’amabale. 6Mbe ka yalorerere Yezu hara, namwirukiraho, namuhabudu; 7nahamuka n’ilaka ihango nagira ati: Ndi na kiha n’ewe, Yezu Mwana wa Mungu asingire? nkukulahirira Mungu, otannaranaza. 8Kuba Yezu yamugambiraga ati: Iwe mwoyo gw’obulofu, noruge mu muntu onu. 9Kandi namubuza ati: Izina lyawe n’iwe ga? Ati: Izina lyange n’ine Mbaga, kuba tuli bengi. 10Namusaba muno aleke kugerucha mu nsi egyo. 11Hehi n’ibanga haliga haliho ekihyo kihango ch’engurube nizilya. 12Emyoyo nizimusaba nizigira ziti: Notusindike mu ngurube, tuzitahemo. 13Aho n’aho Yezu nazisindika; mbe emyoyo milofu nizirugamo, nizitaha mu ngurube; ekihyo chona nikikunuka nikilengetukira mu nanza; zaliga zihikire bihumbi bibili, nizefuma mu nanza. 14Abazilisyaga niberuka nibagamba mu charo na mu misiri. Nibarugaho kwiza kulora echagwa. 15Nibeza hali Yezu, nibabona ayaliga yanazibwe sitani, aikere, azwere, yagizire obwenge, nibatina. 16Abaliga babwene nibabatengera nk’okwo byabere ha muntu ayaliga ali na sitani, n’eby’engurube. 17Nibatandika kumusaba aruge mu mbibi zabo. 18Mbe ka yahanamire mu bwato, ayaliga anazibwe sitani natandika kumusaba aikare nage. 19Tiyamwikirize, nawe akamugambira ati: Nogende mu ka yawe ha bawe, obarobeze ebyo Omukama yakugirira n’okwo yakusasire. 20Nagenda, natandika kugamba mu Dekapoli ebyo Yezu yamugirire; bona nibakuma.
OMUKAZI W’OMUZWO NAKIZIBWA. — OMUHARA WA YAIRI NASUBA KULORA.
21Mbe Yezu ka yasubire kwambuka mu bwato akaza ha ngego endi, embaga ningi nemusumbirira, yaliga ali ha chambu. 22Mbe nihezaho omukuru omo w’esomero, izina lye Yairi; ka yamubwene, nagwa mu maguru ge, 23namulembereza muno nagira ati: Omuhara wange akwenda kufwa, noize omuteho omukono, akire, alore. 24Nagenda nage, embaga ningi nemuruba, nemuhiganisya.
25Mbe omukazi ogwo ayaliga nazw’ensagama kuruga myaka ikumi n’ebili, 26ayaliga anazibwe muno abafumu bengi, yakwasire byona ebyo yaliga ali nabyo, no kusomboka nangu, nawe niho naguma atamibwe, 27ka yahulire ebya Yezu, naruga mbaga ha numa, nakwata omwenda gwe. 28Kuba yagiraga ati: Kuba, naho nkakwata omwenda gwe chonka, hona nkukira. 29Aho n’aho enindo y’ensagama ye neyomera, nahulira mu ngingo ze okwo yakizibwe mu busasi bwe. 30Mbe aho honka Yezu namanya muli wenene okw’ amani gamurugamo, nahindukira embaga, nagira ati: Ayakwat’emyenda zange ni ga?#5, 30 Yezu akumanya ayakwasire emyenda ze, nawe akwenda kwatura ha bweru kwikiriza kuhango kw’omukazi ogwo, abe ndolero y’abantu bona. 31Abahemba be nibamugambira bati: Okubona okw’embaga ekukuhiganisya, kai oti: Ayankwataho ni ga? 32Nalora mbazu zona kubona ayakora echo. 33Nawe omukazi ogwo, obwo yamanyaga echakozirwe muli wenene, natina nachundw’olumazi, naiza namugwa obusyo ye, namugambira ebikomereze byona. 34Wenene namugambira ati: Mwana wange, kwikiriza kwawe kwakukiza, nogende n’omulebo, oyehulire mu busasi bwawe.
35Yaliga akifumora, nibaruga ow’omukuru w’esomero nibabika bati: Omuhara wawe yafwire, ochanaliza ki Omwolekerezi? 36Nawe Yezu, ka yahulire ekigambo echo bagambire, nagira omukuru w’esomero ati: Noleka kutina, ikiriza chonka. 37Tiyalekire muntu n’omo kumuruba, raba si Petro na Yakobo na Yohana, mutabani wabo Yakobo. 38Nibahika mu nzu y’omukuru w’esomero, nahulira eyombo, no kulira, n’empamo ningi. 39Ka yatahiremo, nabagambira ati: Mukuyombera ki nimulira? Omuharakazi tiyafwire, nawe anagire. 40Nibamusekerera. Nawe wenene nairucha bona, natwara ise na nina muharakazi n’abo yaliga ali nabo, nataha omwo omuharakazi yaliga amamire. 41Ka yakwasire omukono gw’omuharakazi, namugambira ati: Talitha kumi, nikwo kugira ati: Muharakazi, (nkukugambira), imuka. 42Kachwi n’ako omuharakazi naimuka nalibata; kuba yaliga ali n’emyaka ikumi n’ebili; nibakwatw’obutini bwingi. 43Nabazibira n’amani bileke kumanywa muntu n’omo, nagamba kuha omuharakazi ebilyo.
Aktuálne označené:
Marko 5: KED1946
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published in 1946 by the White Fathers. Published online with the permission of the White Fathers.
