Marko 4
4
OLUGANI LW’OMUBIBI. — EMBIBO EKUKURA MPORA MPORA.
1Nasuba kutandika kwolekerera ha chambu; kai embaga ningi nemusumbirira, naswa nahanama mu bwato, naikaraho ali mu nanza, embaga yona eli ha mbarama y’enanza ha charo. 2Akabolekerera bingi mu ngani, nabagambira mu bwolekerezi bwe ati: 3Muhulire! Lora, omubibi akahuruka kuza kubiba. 4Mbe ka yabibire, embibo endi negwa ha muhanda, enoni zo mw’igulu niziza nizigilya. 5Endi kai negwa ha lukili, neburwaho itaka lingi, mbe nemera kachwi n’ako, obwo yaliga etali n’itaka lingi; 6izoba ka lyasohwere, nehotoka, kai obwo yalita etali na mizi, neyoma. 7Kandi endi negwa mu mahwa, n’amahwa nigakura nigaginiga, nebura kutunga. 8Kandi endi negwa mw’itaka izima, netunga nekura neyera, netunga endi makumi asatu, endi makumi mukaga endi igana. 9Mbe nagira ati: Ali n’amatwi go kuhulira, ahulire#4, 9 Mu ngani isatu ezo Yezu akususanisya obukama bwa Mungu bukili mu nsi, niyo Eklezia ye, nk’okwo elabona amazongoko mengi, n’abazemi, nawe n’okwo elakura mpora mpora, etamwe esugane mu nsi zona..
10Ka yasigere wenka, baliya ikumi na babili abaliga bali nage nibamubuza olugani. 11Nabagambira ati: Imwe mukahabwa kumanya ebitamize by’obukama bwa Mungu, nawe baliya abali hanza bakugambirwa byona mu ngani, 12niho abalozi nibalora batakubona, n’abahulizi nibahulira batakusombokerwa, kandi batahinduka, bakakizibwa ebiheno byabo#4, 12 Lora Matayo 13, 16.. 13Nabagambira ati: Timukumanya olugani lunu? kai mukumanya muta engani zona? 14Omubibi akubiba ekigambo. 15Abali ha muhanda ni banu ababibirwe ekigambo, mbe ka bahulira ekigambo, kachwi n’ako sitani niliza, nilihamo ekigambo ekikuba kibibirwe mu mitima zabo. 16Kandi abakususa batyo n’ababibirwe ha lukili; abo ka bahulira ekigambo, kachwi n’ako nibachanankura no kusemererwa; 17kandi nibabura emizi muli bonene, kai nibaguma naku nke zonka; kumara obusasi n’enaku nibiletwa ekigambo, aho n’aho nibasitara. 18Abandi ababibirwe mu mahwa n’abakuhulira ekigambo, 19nawe amagambo go mu nsi n’obuzigi bw’ebintu n’obwegongi bw’amagambo gandi bukutahamo nibunig’ekigambo, nikibura kuraba ebizima. 20Kandi ababibirwe mw’itaka izima ni banu abakuhulira ekigambo, bakachanankura, bakatunga ondi makumi asatu, ondi makumi mukaga, ondi igana.
21Mbe nabagambira ati: Si olumuli lukwiza kutebwa mu kitukuru hamo mu bitarahansi? si tibakuluta ha mutereko? 22Kuba tihaliho ekintu ekiserekire ekitalisokorwa, kai tihaliho ekikukorwa bwesereke ekitalisururuka. 23Ali n’amatwi go kuhulira, ahulire. 24Kandi nabagambira ati: Mulore echo mukuhulira. Olulengo olwo mukulengeramo, nilwo mulilengerwamo, no kusagyaho. 25Kuba ali nabyo niwe akuhabwa, kai atali nabyo alyakwa n’ebyo akuba ali nabyo#4, 25 Lora Matayo 13, 12.. 26Kandi nabagambira ati: Obukama bwa Mungu ni nk’omuntu akubiba embibo mw’itaka, 27nanagira, nasisimuka, mu kiro na musana, embibo nemera nekura, wenene atakumanya. 28Kuba itaka likutunga lyonene lyonka, likutandika kumeza inansi, kandi likutaho echangara, kumara nilitunga enzuma zizwire mu changara. 29Mbe k’ekwera, nataho oluhabyo, kuba igesa lyahikire.
OLUGANI LW’EMBIBO YA HARDARI. — EKIHURE MU NANZA.
30Nagira ati: Obukama bwa Mungu tukubulenganisya na ki? hamo lugani ki olwo tulabuchweramo? 31Nk’embibo ya hardari eyo babibire mw’itaka, eli noro kukira mbibo zona zo mu nsi; 32mbe ka bagibibire, nekura neba iti, nilikira amanansi gona, negir’amatabi mahango, n’enoni zo mw’igulu nizihicha kutura mu mbeho zalyo#4, 32 Lora Matayo 13, 32.. 33Yabagambiraga mu ngani zityo, nk’okwo bahichaga kuhulira; 34tiyabagambiraga hatali mu ngani, nawe abahemba be yabasomboreraga byona, bali bonka.
35Olunaku olwo ka habere kebazo, nabagambira ati: Twambuke mwambu gundi. 36Ka bakesize embaga, nibamuhika, naba mu bwato, kai amato gandi galiga gali nage. 37Nihabayo ekihure kihango ch’omuyaga, nikises’amakonzo mu bwato, obwato nibwizura. 38Wenene yaliga ali mu nsezi, anagire; nibamusisimura nibamugambira bati: Mwolekerezi, tokukukwaho itwe tukafwa? 39Ka yemukire, nachahalira omuyaga, nagambira enanza ati: Nobuze, noyesize. Mbe omuyaga nigufwa, niliba itore koto. 40Nabagambira ati: Muli batini muta? timukagizire kwikiriza si? Nibatina obutini bwingi, nibagambirana bati: Okuchwa oti: onu ni ga? kuba akulagira omuyaga n’enanza, nibimuhulira.
Aktuálne označené:
Marko 4: KED1946
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published in 1946 by the White Fathers. Published online with the permission of the White Fathers.
