Marko 1
1
YOHANA BATISTA NALAGA. — YEZU NABATIZIBWA. — NAROZIBWA SITANI.
1Obutandikiro bw’Evanjeli ya Yezu Kristu, Omwana wa Mungu. 2Nk’okwo chayandikirwe Izaiya omulagi ati: Lora, ine nkutuma mumalaika wange obusyo yawe, niwe alichuma omuhanda gwawe mu meso gawe; 3ilaka ly’akuhamuka mu mbuga ati: Muchume omuhanda gw’Omukama, mugorore amakubi ge#1, 3 Omulimo gw’Omwebembezi gwaliga guli gwo kuchuma emihanda z’Omukama wetu Yezu Kristu mu myoyo z’abantu, nk’okwo bakola, omukama k’akwiza kusura echaro, babe bahikire kwanankula obuchunguzi.. 4Yohana yaliga ali mu mbuga nabatiza, nayolekerera batisimu yo kutamwa ha bwo kukiz’ebiheno. 5Ab’ensi yona ya Buyahudi n’aba Yeruzalemu bona bakamuzaho, nibabatizibwa wenene mu mugera gwa Yordani, nibegamba ebiheno byabo#1, 5 Yohana nayolekerera emihanda ibili zo kwechuma: kutamw’ebiheno no kubatizibwa, kandi kwolekererwa entungwa nzima, ezo Omukama wetu akwenda.. 6Yohana yaliga azwere ensense z’entungabulende, mu kibunu che ayebohire olukoba lw’oluhu, yalyaga ensyenene n’obwoki bwo mw’iswa. Yayolekereraga nagira ati: 7Akunkiz’amani akundug’enuma, owe ntahikire kwinamira no kusurumulira olukoba lw’enketo ze. 8Ine sanga nimbabatiza mu menzi, nawe wenene alibabatiza mu Mwoyo Mutakatifu#1, 8 Lora Matayo 3, 11..
9Mbe mu naku ezo Yezu naruga Nazareti ya Galilaya, nabatizibwa Yohana mu Yordani. 10Mbe ka yasabukire mu menzi, aho n’aho nabona igulu nilikinguka, Omwoyo, nigususa eliba, niguhanantuka, nigwikara hali wenene. 11Kai ilaka niliruga mw’igulu, liti: Iwe n’iwe Mwana wange owe nkwenda; nkasemererwa hal’iwe.
12Aho n’aho Omwoyo nigumusagara mw’iswa. 13Mbe ka yamazire mw’iswa misana makumi ana n’ebiro makumi ana, narozibwa sitani; yaliga ali n’enamenswa, n’abamalaika nibamukolera.
SIMONI NA ANDREA NA YAKOBO NA YOHANA NIBAYETWA.
14Yohana ka yakwasirwe, Yezu naiza Galilaya, nayolekerera Evanjeli y’obukama bwa Mungu, 15nagira ati: Kuba enaku zahika, n’obukama bwa Mungu bwerire hehi; mutamw’ ebiheno, mwikirize Evanjeli#1, 15 Kutamwa no kwikiriza ebigambo bya Mungu nigw’omuhanda gwo kutaha mu bukama bwo mw’igulu, nk’okwo Yezu yayolekerere.. 16Ka yarabire ha mbarama y’enanza ya Galilaya, nabona Simoni na Andrea, mutabani wabo, nibanaga enero mu nanza, obwo baliga bali bategi. 17Yezu nabagira ati: Nimundube, ine ndabagira mube bategi b’abantu. 18Mbe aho n’aho nibaleka enero, nibamuruba. 19Ka yarugire aho, kwirira obusyo kake, nabona Yakobo, mwende Zebedeyo, na Yohana, mutabani wabo, na bonene basoboraga enero mu bwato; 20kachwi n’ako nabayeta. Nibasiga Zebedeyo ise mu bwato n’abategi b’empera, nibamuruba.
OWA SITANI NAKIZIBWA. — NINAZARA PETRO N’ABANDI NIBAKIZIBWA.
21Nibataha Kafarnahumi; aho n’aho ha lunaku lwa sabato nataha mw’isomero, nabolekerera. 22Nibakumisibwa ebyo yayolekereraga, kuba yaliga nabolekerera nk’ali n’obuhicha, atali nk’abandiki#1, 22 Lora Matayo 5, 20.. 23Mw’isomero lyabo haliga halimo omuntu w’omwoyo gw’obulofu, nahamuka, 24nagira ati: Tuli na ki n’ewe, Yezu Munazareti? Okeza kutusingaricha si? Nkumanya okw’oli Mutakatifu wa Mungu#1, 24 Isitani, elikufumorera mu kanwa k’omuntu ogwo, likusombokerwa Yezu okw’ali Masiha ayezire kusanzabura omugwe gwalyo, nawe Yezu akulizibira kumusokora, omwanya gutakezire.. 25Mbe Yezu nalitinisya nagira ati: Nobuze, kai rugayo mu muntu onu. 26Mbe omwoyo gw’obulofu nigumuhendagura, niguyana n’ilaka ihango, nigumurugamo. 27Bona nibatangara, nibaba bo kubuzanya bonene bonka nibagira bati: Kinu ni kiha? Ni bwenge ki bunu? kuba akulagira n’obuhicha emyoyo z’obulofu, nizimuhulira. 28Kachwi n’ako enkuma ze nizigenda mu nsi yona ya Galilaya#1, 28 Mungu wenka niwe akuhicha kwiruch’amasitani, kuba amani gago gakukira ag’abantu, obwo bali bamalaika, naho zili myoyo mibi..
29Aho n’aho ka barugire mw’isomero, nibeza mu nzu ya Simoni na Andrea, bali na Yakobo na Yohana. 30Ninazara Petro yaliga anyamire ali n’omuswiza; kachwi n’ako nibamumugambira. 31Nagenda namwimucha, amukwasire ha mukono; kachwi n’ako omuswiza nigumuhwaho, naba wo kubakolera. 32Ka habere kebazo, izoba lyalagere, nibamuletera abarwere n’abali n’amasitani bona; 33abantu bona bo mu charo baliga basumbire ha mulyango. 34Nakiza bengi abanazibwaga endwara zona, nairuch’amasitani mengi, nawe tiyabalekire kutenga okwo gamumanyaga.
YEZU NAYOLEKERERA. — OW’OMUBILI NAKIZIBWA.
35Ka yemukire kanencha muno, nahuruka nagenda mw’iswa, niyo naba wo kusomera. 36Simoni namuruba n’abo yaliga ali nabo. 37Mbe ka bamubwene, nibamugambira bati: Bona bakukuhiga. 38Wenene nabagira ati: Tugende mu byaro bya hehi na mu bikale, nolekerereyo, kuba nicho chandeta#1, 38 Yezu echamuleta mu nsi ni kwolekerera abantu omuhanda gwo kuza mw’igulu no kutuchungula no kufwa ha musalaba.. 39Yaliga nayolekerera mu masomero gabo na muli Galilaya yona, nairuch’amasitani.
40Ow’omubili namwizaho, namusaba ateliz’ebizwi, namugira ati: Okayenda, okuhicha kunkiza. 41Yezu namwitirw’ ekisa, nagorora omukono gwe, namukwataho, namugira ati: Nkwenda, nokire. 42Mbe ka yafumwere, kachwi n’ako omubili nigumuhwaho, nakira. 43Namuchahalira, namusindika kachwi n’ako, 44kai namugambira ati: Lora otagambira omuntu n’omo, nawe roko, oyeyoleke omukuru w’abasaserdoti, ohereze ha bwo kukibizwa kwawe ebyo Musa yalagire byo kubamanyisya#1, 44 Lora Matayo 8, 4.. 45Nawe wenene ka yagenzire, natandika kukitenga no kuchatulira; nicho Yezu yaliga atakihicha kwizira ha bweru mu charo, nawe yaliga ali mw’iswa elitalimo bantu; mbe nibamwizaho abarugaga hona hona.
Aktuálne označené:
Marko 1: KED1946
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published in 1946 by the White Fathers. Published online with the permission of the White Fathers.
