Matayo 27
27
YUDA NAYESUNGA. — YEZU OBUSYO YA PILATO.
1Ka habere kanencha, abakuru b’abasaserdoti bona n’abagurusi b’abantu nibategekerana ebya Yezu, bamwite. 2Nibamusagara abohire, nibamuha Ponsyo Pilato#27, 2 Abayahudi baliga batali n’obuhicha bwo kulamula omuntu kwitwa mu lukare lwabo, nicho basagalire Yezu hali Pilato, ayaliga ali mulamuzi w’Abayahudi ha mwanya gw’Abanaroma, abatwaraga Abayahudi mu naku ezo.. 3Aho Yuda ayamutunzire ka yabwene yalamwirwe, nayefuza#27, 3 Yuda tiyatamirwe ekiheno che nk’okwo Petro yatamirwe. Ka yahulire okwo Yezu alafwa, nakwatw’obutini, nafw’omutima, nawe tiyasabire ekisa hali Mungu., nasubiza abakuru b’abasaserdoti n’abagurusi ebihinzu makumi asatu by’efweza, 4nagira ati: Mpenire kutunda ensagama etali na ntambala. Bonene nibasubamo bati: Itwe byatusasa ki? n’iwe omwene. 5Ka yanagire ebihinzu by’efweza mw’eklezia, narugaho naza kwesunga. 6Abakuru b’abasaserdoti nibatwara ebihinzu by’efweza, nibagira bati: Kizibirwe kubibika mu nsabo y’eklezia, kuba ni by’obuguzi bw’ensagama. 7Ka batengenwe, nibabigura ensambu y’omubumbi yo kuzikamoga abageni. 8Nicho ensambu egyo bagyetera bati: Hakeldama, nikwo kugira oti: ensambu y’ensagama, kuhika ha lunaku lwa lero. 9Niho nikihika echagambirwe omulagi Yeremiya, nagira ati: Bakatwara ebihinzu by’efweza makumi asatu, obuguzi bw’ayalengirwe, owe abana ba Israeli bachwire obuguzi, 10nibabigura ensambu y’omubumbi, nk’okwo Omukama yandagire.
11Mbe Yezu nayemerera obusyo y’omutware, kai omutware namubuza nagira ati: Oli mukama w’Abayahudi? Yezu namugira ati: Wakigamba. 12Mbe abakuru b’abasaserdoti n’abagurusi nibamuchulira, wenene atakusubamo kigambo. 13Aho Pilato namugambira ati: Tokuhulira ebilego ebyo bakukusohereza? 14Nawe tiyamusubiremo kigambo n’ekimo; omutware naswa nakuma muno. 15Omutware yaliga amanyire ha lunaku lukuru kusurumulira abantu embohe emo eyo bayendaga. 16Mbe haliga haliho embohe emo mbi, eyo bayetaga bati: Baraba. 17Mbe ka basumbire, Pilato nagira ati: Mukwenda mbasurumulire ga? Baraba nangu Yezu, owe bakweta Kristu? 18Kuba yamanyaga okwo baliga bamuletere ichubi. 19Akikere ha kitebe cho kulamuliraho, omukazi we namutumaho wo kumugambira ati: Otagira ekigambo n’omuntu ogwo arongire, kuba lero nasasibwa bingi mu kiroto ha bwa wenene. 20Nawe abakuru b’abasaserdoti n’abagurusi nibayohereza embaga esabe Baraba, nawe Yezu bamwite. 21Mbe omutware nasubamo nabagambira ati: Mu babili abo mukwenda mbasurumulireho ga? Bonene nibasubamo bati: Baraba. 22Pilato nabagambira ati: Kai Yezu akwetwa Kristu mmugire nta? 23Bona nibagira bati: Alegwe ha musalaba. Omutware nabagira ati: Akozire kabi ki? Bonene nibakana kuyomba nibagira bati: Nalegwe ha musalaba.
YEZU NALAMURWA KUFWA. — NIBAMUSEKERERA. — OMUHANDA GW’OMUSALABA.
24Pilato ka yabwene okwo atakubona kintu, n’eyombo ekakana muno, nibamuleter’amenzi, nanaba ngaro obusyo y’abantu, nagira ati: Ine tindi na ntambala ha nsagama y’omuzima onu; n’imwe mulabona. 25Embaga yona nesubamo negira eti: Ensagama ye ebere hal’itwe na ha bana betu. 26Aho nibasurumura Baraba; mbe ka bamazire kusanzula Yezu, namubaha, bamulege ha musalaba#27, 26 Myaka ibili kumara kufwa kwa Yezu Pilato nalegwa ha mukuru we, nibamusagara kulamurwa Roma; nibamurungura hara, mbe nafw’omutima nayeita omwene. Kai Abayahudi abezumirize bakukagakaga buli hantu nibagaywa abantu bona..
27Aho abasirikale b’omutware nibamusagara mu lukare, ekohoriti#27, 27 “Ekohoriti” yaliga eli n’abasirikale magana mukaga. yona nemwekumiriraho. 28Nibamuzura ebizwaro bye, nibamuhagatiza omugutu gumutuku; 29nibazing’engata y’amahwa, nibagita ha mutwe gwe, n’ibingo mu mukono gwe gw’obulyo. Nibatez’ebizwi mu meso ge, nibamusekerera, nibagira bati: Kamerere, mukama w’Abayahudi! 30Nibamuchwer’amachwanta, nibakwata ibingo, nibater’omutwe gwe.
31Ka bamazire kumusekerera, nibamuzura omugutu, nibamuzweka ebizwaro bye nibamusagara kulegwa ha musalaba. 32Baliga bakigenda, nibabugangana n’omuntu Omunasirene, izina lye Simoni; nibamusiniriza ategure omusalaba gwa Yezu.
YEZU NALEGWA, NAMARA SAHA ISATU HA MUSALABA, NAFWA.
33Mbe nibahika ha hantu ahakwetwa Golgota, niyo Kalvariyo. 34Nibamuha kunwa evini etoberemo endurwi; ka yarolizeho, nayanga kunwa#27, 34 “Kalvariyo” ensonga zacho ni “omwanya gw’oluhanga”. Abandi bati: Adamu niwe yazikirwe honene aho; nicho habonerwaho ifwo y’emisalaba zindi ekisusano ch’oluhanga hamo amagufwa abili. — Omunwo ogwo gwaliga guli gwo kugerura obusasi bwe, nicho Yezu yayangire kugunwa.. 35Ka bamazire kumulega ha musalaba, nibagabana ebizwaro bye nibayesa olweso, niho bihike ebyagambirwe omulagi, nagira ati: Bakagabana ebizwaro byange, kai enkanzu yange nibagyesera olweso. 36Bakekaraho nibamulinda. 37Ha mutwe gwe nibataho enzuno ye eyandikirwe eti: Onu ni Yezu, Omukama w’Abayahudi. 38Aho nibalega nage ha musalaba abasuma babili, omo ha bulyo, ondi ha bumoso. 39Abarabahoga bamuzumaga nibasingisy’emitwe zabo, 40nibagira bati: Mbe iwe akukambula eklezia ya Mungu, kai akagyombeka mu naku isatu, noyechungure; raba oli Mwana wa Mungu, nohanantuke ha musalaba. 41Nikwo batyo n’abakuru b’abasaserdoti bamusekereraga n’abandiki n’abagurusi, nibagira bati: 42Yakizag’abandi, kai takuhicha kwekiza omwene; raba ali mukama wa Israeli, nahanantuke hati ha musalaba, tumwikirize. 43Yayesigaga Mungu, namukize hati, raba namwenda; kuba yagiraga ati: Ndi Mwana wa Mungu. 44Nikwo batyo n’abasuma abaliga balegirwe ha musalaba hamo nage, bona bamuzumaga.
45Kuruga ha saha ya mukaga nihababo omwirima mu nsi yona kuhika saha yo mwenda. 46Mbe kuti ha saha yo mwenda Yezu nahamuka n’ilaka ihango nagira ati: Eli, Eli lamma sabakthani? Nikwo kugira ati: Mungu wange, Mungu wange, wannagiranira ki#27, 46 Mu katungu ako Mungu nasana kuti henda yayanga Omwana we, kuba Yezu yaliga atwere ebiheno byona by’abantu, ali muheni kukira abandi bona, kuti yakozire wenka ebiheno byona by’ensi. Mbe Yezu kutekateka ebyo, nasaswa muno mu mutima gwe.? 47Nawe abandi abaliga baliho ka bahulire, nibagira bati: Onu akweta Eliya. 48Aho n’aho omo muli bonene nairukirira ikobyo, nalitamo esara, nalita h’ebingo namuha kunwa. 49Kai abandi nibagira bati: Leka tulore, hamo Eliya akwiza kumukiza. 50Mbe Yezu nasuba kuhamuka n’ilaka ihango, omwoyo niguhwaho. 51Omwenda ogwaliga guhemire mw’eklezia nigutemukamo bihinzu bibili, kuruga oluguru kuhika ifwo#27, 51 Mw’eklezia ya Yeruzalemu haliga halimo ikingirizo ly’omwenda ihango, kai izima muno, elyataganisyaga emyanya ibili: omwanya gwo kutantika niguyetwa Ahatakatifu, nimwo emiherezo zaherezibwaga; ogwa kabili, niguyetwa: Ahatakatifu ha Batakatifu, omwo Isandikwa ly’Ekilagano elyaliga lilimo amabale abili g’ebilagiro hamo n’ekitabo ch’emiku z’ebilagiro. Kutemuka kw’omwenda ogwo kukamanyisya okw’Omulago gw’era gwahwereho, n’okw’Omulago muhya gwatandika. Kuruga kufwa kw’Omuchunguzi abantu bona bakwirira Mungu., n’ensi netengeta, n’amabale nigatika, 52n’ebituro nibifunduka, engingo zindi z’abatakatifu, abaliga banagire, nizizoka, 53nibaruga mu bituro, bazokire, nibeza mu kikale kitakatifu, nibabonekera bengi. 54Omukuru w’abasirikale igana n’abo yaliga ali nabo nibalinda Yezu, ka babwene ensi netengeta, n’ebindi ebyagwireho, bakatina, nibagira bati: Waza! koto onu sanga ali Mwana wa Mungu. 55Haliga haliho abakazi bengi bali haraho kake, abaliga barubire Yezu kuruga Galilaya nibamukolera; 56muli bonene haliga halimo Maria Madalena, na Maria nina Yakobo na Yozefu, na nina bende Zebedeyo.
YEZU NAZIKWA.
57Mbe ka habere bwebazo, naiza omuntu ogwo muhango w’Arimateya, izina lye Yozefu, ayaliga ali na wenene muhemba wa Yezu. 58Ogwo naza hali Pilato namusaba engingo za Yezu. Aho Pilato nalagira kuha engingo. 59Mbe Yozefu ka yehireho engingo, nazisemba mu mwenda gumwera. 60Nazizika mu kituro che kihya, echaliga kisimbirwe mw’ibale; nahiringisiza ibale ihango ha mulyango gw’ekituro, narugaho. 61Haliga haliha Maria Madalena na Maria ondi, bekere obusyo y’ekituro. 62Bwire kucha ha lulaliriro lwa Paska#27, 62 Nilw’olunaku olwebemberaga sabato hamo enaku nkuru z’Abayahudi., abakuru b’abasaserdoti n’Abafarizayo nibasumba owa Pilato, 63nibagira bati: Rugaba, tukwizuka, okw’omubehi ogwo, akili mwoyo, nagira ati: Enaku isatu ka zilirabaho, ndizoka. 64Mbe nolagire kulinda ekituro che kuhika ha lunaku lwa kasatu, leka abahemba be bateza kumwiba, bakagambira embaga bati: Yazoka mu bafu; mbe obuhabi bwo kuhereruka nibukana kukir’obwo kutandika. 65Pilato nabagambira ati: Muli n’abalinzi, nimugende mulinde nk’okwo mukumanya. 66Mbe abo nibagenda, nibalinda ekituro, nibataho olukingizo h’ebale, n’abalinzi.
Aktuálne označené:
Matayo 27: KED1946
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published in 1946 by the White Fathers. Published online with the permission of the White Fathers.
