Luka 5
5
YEZU NAYETA ABAHEMBA BE BO KUTANDIKA.
1Aho embaga nesumba hali wenene kuhulir’ekigambo cha Mungu, wenene ali ha chambu ch’enanza ya Genezareti, aimerere. 2Nabona amato abili gali ha chambu; abategi baliga basyokire nibanaby’enero zabo. 3Nasyabara mu bwato bumo obwaliga buli bwa Simoni, namugambira kunegera kake obuzima; naikara nayolekerer’abantu ali mu bwato. 4Ka yalekere kufumora, nagambira Simoni ati: Sagara obuziba, munag’enero zanu, mwit’enfwi. 5Simoni nasubamo namugambira ati: Mwolekerezi, twatega kiro chona, kwita nangu, nawe obwo iwe wagamba, nkunag’enero. 6Ka bagizire batyo, nibet’enfwi ningi muno, enero zabo nizitemukiraho. 7Nibatigisya abezabo, abaliga bali mu bwato bundi, beze kubahwera. Nibeza nibezuz’amato abili, nigahiga kwika. 8Simoni Petro ka yabwene ebyo, nagwa mu maguru ga Yezu, nagira ati: Mukama wange, nondugeho, kuba ine ndi muntu muheni. 9Kuba wenene n’abaliga bali nage bona bakatangazibwa muno kubon’enfwi ezo baisire; 10nikwo batyo Yakobo na Yohana, abende Zebedeyo, abaliga bali bezabo Simoni. Yezu nagambira Simoni ati: Noleke kutina; kuruga lero oliba mutegi w’abantu#5, 10 Yezu akesoraho obwato bwa Petro nk’olunyamo lw’Eklezia katolika, amanyisye okwo Petro n’abahunguzi be nibo bali n’obuhicha bwo kwolekerera edini.. 11Nibagoromorera amato ha charo, nibasiga byona nibamuruba.
YEZU NAKIZA OW’OMUBILI N’OMULEMA W’AMAGURU. — NAYETA MATAYO.
12Aho yaliga ali mu lusozi lumo, niwe n’omuntu achwekir’engingo nabona Yezu, namuhabudu, namusaba nagira ati: Mukama wange, okayenda kunkiza, okuhicha. 13Nagorora omukono, namukoraho nagira ati: Nkwenda, nokire. Aho honka omubili nigumuhwaho. 14Namuzibira kugambir’omuntu, ati: Nawe roko, oyeyoleke ha musaserdoti, ogire omuherezo gwo kukizibwa kwawe, nk’okwo Musa yalagire, ha kubamanyisya#5, 14 Lora Matayo 8, 4.. 15Nawe enkuma ye neranganwa muno; embaga ningi neyesoroza kumuhulira no kukizibwa endwara zabo. 16Nawe wenene nagenda mw’iswa kulembereza.
17Mbe lunaku lumo yaliga aikere nayolekerera, Abafarizayo n’abolekerezi b’ebilagiro bona baliga bekere, abaliga barugire buli lusozi lwa Galilaya na Yudeya na Yeruzalemu; n’amani g’Omukama galiga galiho go kubakiza. 18Niho n’abantu abaliga bategulire omuntu h’elaro, ayaliga alemere amaguru, nibahiga aho kumutahya mu nzu no kumuta obusyo ye. 19Nibabura aho kumurabya kuber’embaga kukana, nibahanama ha luswi, nibamurabya mu mategula, nibamuhanantura n’elaro hagati mu meso ga Yezu. 20Ka yabwene kwikiriza kwabo, nagira ati: Iwe muntu, wakizibwa ebiheno byawe. 21Abafarizayo n’abandiki nibatandika kutekateka bati: Onu ni ga akuzuma Mungu? Akuhicha kukiz’ebiheno ni ga, atali Mungu wenka? 22Nawe Yezu, obwo yamanyaga ebitekateko byabo, nasubamo nabagira ati: Mukutekatekera ki mu mitima zanu? 23Echanguhire ni kiha, kugira nti: Ebiheno byawe byakizibwa, nangu kugira nti: Imuka, olibate? 24Mbe ka mumanye okw’Omwana w’omuntu ali n’obuhicha mu nsi bwo kukiz’ebiheno, nagambira omulema w’amaguru ati: Nkukugambira nti: imuka, twara iraro lyawe, otahe mu ka. 25Aho honka naimuka baliho, natwara ilaro elyo yaliga amamireho, nagenda mu ka, nasima Mungu. 26Nibagwa mu kitangaro bona, nibasima Mungu. Nibakwatw’obutini bwingi nibagira bati: Lero twabon’amahano.
27Ebyo ka byahwere, nahuruka, nabona omusoroza ogwo, izina lye Levi, aikere ha kigobo, namugambira ati: Nondube. 28Nasiga byona, naimuka, namuruba. 29Levi akamuteker’amageni mu nzu ye: haliga haliho abasoroza bengi n’abandi abaliga bekere nabo nibalya. 30Abafarizayo n’abandiki babo nibarunduma, nibagambir’abahemba be bati: Mukulira ki nimunwa n’abaheni n’abasoroza? 31Yezu nasubamo nabagambira ati: Abazima tibazur’omufumu, nawe abarwere. 32Tinezire kweta abatakatifu, nawe abaheni, batamwe#5, 32 Lora Matayo 9, 13.. 33Bonene nibamugambira bati: Kubaki abahemba ba Yohana bakusiba kengi nibalembereza kimokimo nk’Abafarizayo, kai abawe nibalya nibanwa? 34Wenene nabagira ati: Si abanwani b’omuswezi bakuhicha kusiba, omuswezi aho akuba ali nabo? 35Nawe enaku ziliza, ezo balibehaho omuswezi, mbe mu naku ezo niho balisiba. 36Mbe nabagambira olugani okwo hataliho akutemura ekisato ha mwenda muhya akakibazira ha mwenda mukokoro; kuba akutemura omuhya, kai hona omwenda mukokoro tiguhikire kutebwaho ekisato kihya. 37Kai tihaliho akuta evini mpya mu nzoga nkokoro, kuba evini mpya ekwat’ enzoga, na yonene neseseka, kai n’enzoga nizifwa busa. 38Nawe evini mpya ni yo kutebwa mu nzoga mpya, mbe nibigumaho byona na byona#5, 38 Lora Matayo 9, 17.. 39Kai tihaliho akunwa nkokoro, kai aho honka akayenda mpya, kuba akugira ati: Enkokoro niyo esingire.
Aktuálne označené:
Luka 5: KED1946
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published in 1946 by the White Fathers. Published online with the permission of the White Fathers.
