Luka 4
4
YEZU NAROZIBWA SITANI.— NAYOLEKERERA NAZARETI, NIBAMUGAYA.
1Yezu, aizwire Omwoyo Mutakatifu, naruga Yordani, nasagarwa Omwoyo mw’iswa, 2namara naku makumi ana narozibwa sitani. Tiyalire kalyo mu naku ezo; ka zahwere, enzala nemuruma. 3Mbe isitani nilimugambira liti: Raba oli mwana wa Mungu, gambira ibale linu libe mukate. 4Yezu nalisubiramo ati: Chandikirwe kiti: Omuntu takutungwa omukate gwonka, nawe buli kigambo cha Mungu. 5Isitani nilimusagara h’ebanga lilehire, nilimwoleka engoma z’ensi zona mu katungu kamo, 6nilimugambira liti: Nkukuha obuhicha obwo bwona n’ikuzo lyabwo, kuba nkahabwa byona, kai owe nkwenda nkubimuha. 7Mbe iwe okampabudu, byona nibiba byawe. 8Yezu nasubamo naligambira ati: Chandikirwe kiti: Ohabudu Omukama Mungu wawe, okolere wenene wenka. 9Nilimusagara Yeruzalemu, nilimwemereza ha kanoni k’eklezia, nilimugambira liti: Raba oli mwana wa Mungu, noyenage ha nsi hanu. 10Kuba chandikirwe kiti: Akakulagirira bamalaika be kukulinda; 11balikubatura mu ngaro, oleke kusitaz’okuguru kwawe h’ebale. 12Yezu nasubamo naligambira ati: Bakagira bati: Otaliroza Omukama Mungu wawe. 13Ebyo kuroza ka byahwere, isitani nilimuhigiza mu mwanya gw’enaku#4, 13 Isitani likayesubiriza Yezu aho yasasibwe, atakabere wo kufwa..
14Yezu nasuba Galilaya mu mani g’Omwoyo, enkuma ze nizisugana mu nsi yona. 15Wenene yaliga nayolekerera mu masomero gabo#4, 15 Lora Matayo 4, 23., bona nibamusima. 16Naiza Nazareti eyo yalezirwe, nataha mw’isomero ha lunaku lwa sabato, nk’okwo yaliga amanyire, naimerera kusoma. 17Nibamuha ekitabo cha Izaiya omulagi. Nafundur’ekitabo, nahikira ha mwanya ahayandikirwe hati: 18Omwoyo gw’Omukama guli hal’ine; nicho yansigire amazuta, nantuma kwolekerera abahabi evanjeli no kukiz’emyoyo ezinogire, 19no kugambira embohe kusurumurwa, abahume kubona, abegatirizibwe kuchunguka, no kugamba omwaka gw’omugisa gw’Omukama, n’olunaku lw’empera. 20Ka yafundikire ekitabo, nakisubiz’omuhereza, naikara. Bona mw’isomero nibamwetegereza. 21Mbe natandika kubagambira ati: Waza! lero olwandiko lunu lwahika, olwo mwahulira. 22Bona baliga bamumanyire, nibakumisibwa ebigambo by’enema ebyarugire mu kanwa ke, nibagira bati: Onu si ti mwana wa Yozefu? 23Nabagambira ati: Nikwo, mukungambira omunapi gunu: Mufumu, noyekize iwe omwene; ebihango ebyo twahulire bikakolerwa Kafarnahumi, nobikorega na hanu mu nsi yanu. 24Nagira ati: Koto nkubagambira nti: Tihaliho omulagi akwikirizibwa mu nsi yabo. 25Koto nkubagambira nti: Haliga haliho abafwerwe beba bengi muli Israeli mu naku za Eliya, aho igulu lyakingirwe myaka isatu n’amezi mukaga, aho enzara yabereho mpango mu nsi yona#4, 25 Yezu akubezukiza okwo kara enzura ekamara myaka isatu n’amezi mukaga kugwa nangu, ensambu zona zikayoma, embibo nizisirira, mu naku za Eliya.; 26nawe Eliya tiyatumirwe hali omo muli abo, nawe Sarepta ya Sidoni, ha mukazi mufwerw’eba. 27Kandi baliga baliho ab’omubili bengi mul’Israeli mu naku z’omulagi Elizeyo; tiyaliho muntu muli abo ayakizibwe, raba si Namani Omunasiriya.
28Abaliga bali mw’isomero bona nibezur’ebiniga, ka bahulire ebyo#4, 28 Abantu abaliga basumbire mw’isomero bachwaga bati: Yezu takubura kukola amahano mengi mu charo chabo.. 29Nibekuma nibamuhurucha mu charo; nibamusagara ha luguru lw’ebanga, aho echaro chabo chaliga chombekere, bamuhiringisize ha nsi. 30Nawe wenene nabaraba hagati nagenda.
YEZU NAKIZA OWA SITANI, NA NINAZARA SIMONI, N’ABANDI BENGI.
31Nalengetuka Kafarnahumi, echaro cha Galilaya, niyo yabolekereraga mu naku za sabato. 32Bakumisibwaga ebyo yayolekereraga, kuba ekigambo che chaliga kili n’obuhicha. 33Mw’isomero haliga haliho omuntu ogwo ali na sitani ly’obulofu, nabotoka n’ilaka ihango, 34nagira ati: Leka; tuli na kiha n’ewe, Yezu Omunazareti? Si wezire kutumara? Nkumanya owe oli, Mutakatifu wa Mungu. 35Yezu namuchahalira, nagira ati: Buza, nomurugemo. Isitani ka lyamunagire hagati, nilimurugamo, tilyamukozireho kabi. 36Bona nibakwatw’obutini, nibafumorana bati: Kinu ni kigambo ki, kuba akulagir’emyoyo z’obulofu n’obuhicha n’amani, nizigenda? 37Enkuma ze nizisugana mu nsi honahona.
38Yezu ka yahurukire mw’isomero, nataha mu nzu ya Simoni. Nawe ninazara Petro yaliga akwasirwe omuswiza mwingi, nibamumulemberereza. 39Ka yamwimerereho, nalagir’omuswiza, nigumuhwaho. Aho n’aho naimuka nabakolera.
40Mbe izoba ka lyalagere, bona abaliga bali n’abarwere ba buli busasi nibabamuletera. Wenene nataho buli muntu omukono, nabakiza. 41Amasitani nigaruga muli bengi nigayomba nigagira gati: Iwe n’iwe Mwana wa Mungu. Nagachahalira, tiyagalekire kufumora, kuba gamanyaga okw’ali Kristu.
42Mbe obwire ka bwachere, naimuka nagenda mw’iswa, embaga nemuhiga, nibeza nibamuhikaho; nibamwangira atabasiga. 43Wenene nabagambira ati: Kuba ndi no kwolekerera evanjeli y’obukama bwa Mungu#4, 43 Lora Matayo 3, 2. na mu byaro bindi; kuba nicho natumirirwe. 44Yaliga nayolekerera mu masomero ga Galilaya.
Aktuálne označené:
Luka 4: KED1946
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published in 1946 by the White Fathers. Published online with the permission of the White Fathers.
