Luka 22

Ŵazukuru ndi ŵaFarisi wapangana kumuko Yesu

(Mateyu 26.1-5; Marko 14.1-2; Yohane 11.45-53)

1Ndipo laŵandikanga dghera la vyambura mtupu, lakutamulika Phaska. 2Ndipo ŵapenjanga ŵazukuru ŵara ndi ŵalembi mo ŵambayiyenge; chifukwa wopanga khamu lo.

Yuda wapangana kumu kombo Yesu

(Mateyu 26.14-16; Marko 14.10-11)

3Ndipo Satana wangusere mwaku Yuda, wakutamulika mKeriote, wakuŵa mu kupendeka kwa chumi ndi ŵaŵi wo. 4Ndipo wanguruta, wangurongoro ndi ŵazukuru ŵara ndi zinduna, mo wangampereke kwaku iwo. 5Ndipo ŵangukondwa, ndi ŵangupangana kumpaska ndrama. 6Ndipo wanguzomera, ndi walembenga nyengo yakufwasa kwachimpereka kwaku iwo ku ubende ku mzinda.

Yesu warongoso kurgha dghera la phaska

(Mateyu 26.17-25; Marko 14.12-21; Yohane 13.21-30)

7Ndipo linguza lo zuŵa la vyambura mtupu, mwaku lenile kutenere kubayiya phaska. 8Ndipo wangutuma Petro ndi Yohane, wakuti, “Rutani, tirongosoliyeni phaska, alinga tirghenge.” 9Ndipo ŵanguti kwaku iyo, “Mukhumba tikarongosole pani?” 10Ndipo iyo wanguŵanene, “Awonani, mwati mwasere mu msumba wo, wakumanenge namwe munthu wakupinga chiŵiya cha maji; mrondoni mu nyumba mwenimo wasere. 11Ndipo muneniyenge mweninyumba yo, ‘Muwomba watiti, Che pani chipinda cho cha ŵalendo, mwenimo ndirghenge phaska pamoza ndi ŵasambizi ŵangu?’ 12Ndipo yuwa wamrongo imwe chamchanya chikuru chakuruliskika; kweniko rongosoni.” 13Ndipo ŵanguruta, ŵangusaniya uli ndi mo wanguŵanene; ndipo ŵangulirongoso phaska.

Njonesku ya Ambuya

(Mateyu 26.26-30; Marko 14.22-26; 1 ŴaKorinte 11.23-26)

14Ndipo penipo linguza ora lo, wanguja pasi, ndi ŵakutumika wo pamoza nayo. 15Ndipo wanguti kwaku yiwo, “Ndi linweka ndanweka kurgha pamoza namwe phaska lenili, ndenga ndindakomwe: 16chifukwa ndikuneniyani, kuti nkharghanga lo cha, mpaka lingafiskika mu ufumu waku Chiuta.” 17Ndipo wanguronde jomera, ndipo wati wawonga wanguti, “Toni lenili, ndi gaŵanani: 18chifukwa ndikuneniyani kuti kwanda sono kuti nkhamwangapo cha chipasi cha mphereska, mpaka ufumu waku Chiuta ukazanga.” 19Ndipo wanguto chiŵande, ndipo wati wawonga wangumenya, ndi wangupaska kwaku wo, wakuti, “Chenichi ndi liŵavu langu, [lakupaskikiya chifukwa chaku imwe; chenichi chitiyani kwachikumbuka ine.” 20Viyo so jomera nalo pavuli pa koneska, wakuti, “Jomera lenili nchipanganu chifya mu ndopa zangu, zakudikiya pa chifwa chaku imwe.] 21Kweni wonani, janja la wakundikombo le nane pamoza pa gome. 22Pakuti nadi Mwana wa munthu waruta, kwakulingana ndi chakutemeka: kweni owe kwaku yo munthu, mwaku mweniyo wakomboleke!” 23Ndipo iwo ŵangwamba kufumbana mu ŵeneko, kuti, ndiyani mwaku wo wangukhasa kuchita chenichi.

Suskanu yakuti muraku njani

24Ndipo so kunguŵa suskanu mwaku wo, yakuti, njani waku wo wawoneka kuŵa mraku. 25Kweni wanguŵanene, “Ŵakaronga ŵa mitundu ŵatufuliya ŵanthu ŵawo, ndiŵakuŵatufuliya ŵatamulika akwene. 26Kweni imwe viyo cha; kweni mraku mwaku imwe waŵenge nge ndi mumanako; ndi chirongozgi nge ngwakuteŵeta. 27Chifukwa mraku njani, wakuja pa kurgha, pamwenga wakuteŵeta? Asi ndiyo waja pa kurgha? Kweni ine nde mukati mwinu uli ngwakuteŵeta.

28“Kweni imwe mwaŵa ŵakujaririya pamoza nane mu mesedu ghangu; ndipo ndimikiya imwe ufumu, 29uli ndimo Ada ŵakumikiya ine, 30alinga kuti murghenge ndi mumwenge pa gome langu mu ufumu wangu; ndipo mujenge pa vitengu, ŵakweruzga mafuku chumi ndi ghaŵi ghaku Yisraele.

Yesu wakamba ndi kumkana kwaku Petro

(Mateyu 26.31-35; Marko 14.27-31; Yohane 13.36-38)

31“Simoni, Simoni, awona Satana yo wangujifumbiya imwe kwachimpepetani uli ndi trigu: 32kweni ine ndinguŵeyerere paku iwe, alinga kuti chingapereŵe cha chivwanu chako; ndipo iwe, utakuti wang'anamuka, khozganga ŵabali ŵako.” 33Ndipo iyo wangumunene, “Ambuya, pamoza ndi imwe ndi wakurongosoleka kuruta kosekose, ku ulinda ndi ku nyifwa.” 34Ndipo iyo wanguti, “Ndikunene, Petro, kuti tambala wenga wandakokoŵereke usiku uno undikanenge katatu, kuti ulive kundiziŵa.”

Chikwama, thumba ndi lipanga

35Ndipo wanguŵanene, “Penipo ndingumtumani ŵambura chikwama, katiri, viyatu, kumbi mungukavuka kanthu?” Ndipo iwo ŵanguti, “Kanthu nako cha.” 36Ndipo wanguŵanene, “Kweni sono wakuŵa ndi chikwama watonge, ndi katiri viyo: ndiyo walive, wasaske chirundu chake, ndi wagulenge lipanga. 37Chifukwa ndikuneniyani, kuti chakulembeka chenichi chitene kufiskikiya mwaku ine, ‘Wangupendeke pamoza ndi ŵaziradangu:’ chifukwa so cho cha paku ine che nawo umari.” 38Ndipo iwo ŵanguti, “Ambuya awonani, panu pe malipanga ghaŵi.” Ndipo wanguti kwaku wo, “Mbwenu.”

Yesu waromba mu phiri la Olivete

(Mateyu 26.36-46; Marko 14.32-42)

39Ndipo wangutuwako, wanguruta, mwa karusu, ku phiri la Olivete; ndipo ŵasambizi nawo ŵangumrondo.

40Ndipo wanguti waza pa malo, wanguti kwaku iwo, “Rombani kuti mungasere cha mu kusedu.” 41Ndipo mwenecho wangupatukako kwaku wo uli nkhupong'a kwa mwa; ndipo wanguti wagwada pa makongonu, warombanga, wakuti, 42“Ada, asani mukhumba, mutuzgeko kwangu nkhombo#22.42 nkhombo: nkhombo yapa ying'anamuwa masuzgu gho Yesu Kristu wanguseremu. iyi: kweni khumbu langu cha, kweni linu, lichitike.” [43Ndipo wangumwoneke mungelo wakutuliya kuchanya, wakumkhomeska. 44Ndipo pakuŵa mu mphirimbu warombanga kwakufwiririyapo: ndipo dukutira lake linguŵa nge ndi manthone gha ndopa ghakujirimiya pasi.] 45Ndipo wati wasokako ku rombo lo, wanguza ku ŵasambizi ndi wanguŵasaniya ŵakura tulo kwachisungu, 46ndipo wanguŵanene, “Chifukwa chine mura tulo? Yukani, rombani, alinga kuti mungasere mu kesedu cha.”

Kukoreka kwaku Yesu

(Mateyu 26.47-56; Marko 14.43-50; Yohane 18.3-11)

47Wenga weche kurongoro iyo, awonani, mzinda, ndi yo watamulika Yuda, yumoza wa chumi ndi ŵaŵi, waŵadanjiriyanga; ndipo waŵandikanga kwaku Yesu kwachimfyofyontha. 48Ndipo Yesu wanguti kwaku iyo, “Yuda, kumbi upachiya Mwana wa munthu ndi mfyofyonthu?” 49Ndipo ŵachiona ŵakumzunguliya cho chikaŵangapo, ŵanguti, “Ambuya kumbi tinepuwenge ndi lipanga?” 50Ndipo yumoza waku wo wangumkoso muŵanda wa mzukuru mura, ndi wangudumuwa gutu lake lakumarghe, 51kweni Yesu wangwamuka, wanguti, “Lekani penipo!” Ndipo wangulikwaska gutu, wangumchizga. 52Ndipo Yesu wanguti kwaku wo ŵanguziya pake, ŵazukuru ŵara ndi nduna za kasopi ndi ŵara, “Kumbi mwaturiya nge mpha wakupoka, ndi malipanga ndi zinthonga? 53Ndenga ndeche pamoza namwe zuŵa ndi zuŵa mu kasopi yo, kuti mungutambaruliya manja pangu cha; kweni lenili ndi ora linu, ndi mtufu wa mdima.”

Petro wakana Yesu

(Mateyu 26.57-58, 69-75; Marko 14.53-54, 66-72; Yohane 18.12-18, 25-27)

54Ndipo ŵanguti ŵamko, ŵanguka nayo, ndipo ŵangumserezga mu nyumba ya mzukuru mura. Ndipo Petro warondongakutariko. 55Ndipo ŵanguti ŵakozga moto mukati mu luluwa, ndi ŵanguti ŵaja pasi pamoza, wanguja pasi Petro mukati mwawo. 56Ndipo msungwana wachimwona wakujariya kuchiri ku ukweru wa moto, ndi wakulereseska paku iyo, watinge, “Uyu nayo wenga pamoza ndi iyo.” 57Kweni iyo wangukana, wakuti, “Wamunthukazi, kuti ndimziŵa cha.” 58Ndipo pavuli pa kanyengo munyake wangumwona, watinge, “Iwe nawe we waku wo.” Ndipo Petro watinge, “Wamunthu, awa, ine cha.” 59Ndipo jepu nge ndi ora limoza munyake ngana wangurapa, wakuti, “Kwakuneneska uyu nayo wenga pamoza ndi iyo: chifukwa so ndi muGalile.” 60Kweni Petro wanguti, “Wamunthu, kuti ndiziŵa cha chenicho ukamba.” Ndipo sosonukweni wachirongoro iyo, tambala wangukokoŵereka. 61Ndipo wangung'anamuka Mbuya, wangulereska Petro. Ndipo Petro wangukumbuka nenedu la Ambuya, mo wangumunene, “Weche wandakokoŵereke le tambala, undikanenge katatu.” 62Ndipo wangutuliya kubwaro, wanguliya kwakuŵaŵa.

Yesu wawoyeka ndi kupumika

(Mateyu 26.67-68; Marko 14.65)

63Ndipo ŵanthurumi wo ŵamkonga Yesu, ŵamtombozganga ndi kumkwechuwa. 64Ndipo ŵati ŵamburumutizga, ŵamfumbanga, ŵakuti, “Loska; njani yo wakupuma?” 65Ndipo vinandi vinyake ŵanenanga paku iyo, ŵakumtuka.

Yesu wateruzgika ndi upu wa ŵaYuda

(Mateyu 26.59-66; Marko 14.55-64; Yohane 18.19-24)

66Ndipo kuchicha unguutika ura wa khamu lo, ŵazukuru ŵara ndi so ŵalembi; ndipo ŵangumrongozge ku upu wawo, ŵakuti, 67“Asani ndiwe Kristu, tineniyenge.” Kweni wanguti kwaku wo, “Asani ndinganene imwe, kuti mungavwana cha: 68ndipo asani ndifumbenge imwe, kuti mungandamuka cha. 69Kweni kutuwa ku sono Mwana wa munthu wajariyenge pasi ku marghe gha nthazi yaku Chiuta.” 70Ndipo ŵanguti wose, “Iwe viyo we Mwana waku Chiuta kumbi?” Ndipo wanguŵanene, “Imwe mutiti kuti ndine.” 71Ndipo ŵanguti, “Teche kusoŵa so ukaboni; chifukwa taŵeni tavwa ku mlomo wake.”

Aktuálne označené:

Luka 22: TongaMw

Zvýraznenie

Zdieľať

Kopírovať