Luka 21

Kaperekedu ka choko mpasku

(Marko 12.41-44)

1Kweni wachiyinuka wanguwona ŵaromba ŵakupong'a mu mipasku yawo mu chija cho. 2Ndipo wanguwona choko chisauchi chakuti chakupong'amu tumatambala tuŵi. 3Ndipo wanguti, “Ndikuneneskiyani, kuti choko chenichi chikavu chapong'amu kwakuruska wose. 4Chifukwa wose yaŵa mu ufurwi wawo ŵapong'a mu mpasku yo: kweni icho mu kapereŵedu kake chapong'a vyenivyo vyose chaŵenga navyo, chijariyu chake chose.”

Yesu wakamba ndi kubwanganduka kwa kasopi

(Mateyu 24.1-2; Marko 13.1-2)

5Ndipo po ŵakambanga ŵanyake vya kasopi, mo wakumatikiya ndi mya yakunozga ndi mpasku, wanguti, 6“Vyose ivi muwona, ghazenge mazuŵa mwaku ghenigho kuti urekekenge po panu cha mwa pa mwa, weniwo urekenge kugadabulika.”

Visuzgu ndi viŵembu

(Mateyu 24.3-4; Marko 13.3-13)

7Ndipo ŵangumfumba ŵanguti, “Muwomba, vyenivyo viŵengepo zuŵanji na? Ndipo nchine chisimikizgu cho, chakurongo kuti vyekufupi kuŵapo vyenivyo?” 8Ndipo iyo wanguti, “Thoŵani, mungarandizgika: pakuti ŵanandi ŵaziyenge mu zina langu, wakuti ‘Ndine’; ndipo ‘Nyengo yaŵandika.’ Mungarutanga cha kuvuli kwawo. 9Ndipo penipo mungavwiya zinkhondu ndi vibumuzi, mungachiruskika cha: chifukwa kutene vyenivyo kuŵapo danga; kweni umari wo kuti ngwa sosonukweni cha.”

10Ndipo waŵeneniyanga, “Mtundu wamyukiya pa mtundu, ndi ufumu pa ufumu; 11ndipo viŵengepo vyeuyeu vikuru, ndi mu malo ndi malo vilala ndi videru; ndipo viŵengepo vyakofya, ndi visimikizgu vikuru vyakutuliya kuchanya. 12Kweni vindaŵepo vinthu vyenivyo vyose, mukamangikanga ndi kuŵembeka, mutorekiyenge ku cheruzgu mu masinagoge, ndi kuŵikika mu ulinda, mukatolekiyanga paurongo pa ŵakaronga ndi ŵeruzgi, chifukwa cha zina langu. 13Vikaŵiyanga imwe nge mbukaboni. 14Ŵikiyani limu viyo ku mitima yinu kujipimiya danga cha mo mwamukiyenge; 15chifukwa ine ndimpaskeninge mlomo ndi zeru, yeniyo zose mphindikwa zinu kuti ziziŵenge cha kwamukako chingana nkhumikirana namwe. 16Kweni mukombolekenge ndi ŵapapi nawo, ndi ŵabali, ndi vinini, ndi mabwezi; ndipo ŵabayengepo ŵanyake ŵaku imwe. 17Ndipo muŵenge ŵakutinkhika ndi wose chifukwa cha zina langu. 18Kweni chingana ndi sisi laku mutu winu kuti lamkwanangika cha. 19Mu unkhunthiya winu mwanduliyenge mizimu yinu.

Kunangika kwa Yerusalemu

(Mateyu 24.15-21; Marko 13.14-19)

20“Kweni penipo mukawonanga Yerusalemu wazungurizgika ndi maugoŵi, ziŵani penipo kuti laŵandika phasulu lake. 21Penipo ŵamu Yuda ŵathaŵiyenge ku mapiri; ndi ŵa mukati mwake ŵatuwengemo; ndi ŵamu minda ŵarekenge kusere mwake. 22Pakuti yagha ndi mazuŵa gha thayu kuti vifiskike vyose vyakulembeka. 23Owe kwaku wo mbanthumbo ndi kwaku wo mbakonkheska mu mazuŵa gha! Chifukwa paŵenge kukweŵeka kukuru pa charu, ndi kandundu pa khamu lenili. 24Ndipo ŵanyake ŵabayikenge ndi uyi wa lipanga, ndi ŵanyake ŵakorekenge nge mbamagoŵa ku mitundu yose, ndipo Yerusalemu waŵenge wakuphwatika ndi Mitundu, mpaka zifiskikenge nyengu za Mitundu.

Kuza kwa Mwana wa munthu

(Mateyu 24.29-31; Marko 13.24-27)

25“Ndipo muŵenge visimikizgu mu dazi ndi mwezi ndi zinyenyezi: ndipo panupasi mtundu yose yikaŵanga yakuzizikika, ndi yakopa kuuruma kwa nyanja ndi maŵiriŵiri; 26ŵanthu ŵamkufwa chipoyo ndi ofi, mu chilereze chaku vyo vituza pa charu; chifukwa nthazi za kuchanya zisukunikenge. 27Ndipo sono ŵakamuwonanga Mwana wa munthu wakuza mu mtambo ndi nthazi ndi unkhankhu ukuru. 28Kweni vichamba kuŵapo vyenivyo, yinuskani ndi tumphuskani mitu yinu; pakuti uŵandika uwombozi winu.”

Chisambizgu cha mkuyu

(Mateyu 26.1-5; Marko 13.28-31)

29Ndipo wanguŵakambiya ntharika: “Alereni mkuyu wo, ndi miti yose; 30penipo yatunda, muziŵa mwakumwaŵeni pakulereska kuti sono chaŵandika chifuku. 31Viyo imwe namwe, muchiwona vyenivi vyaŵapo, ziŵani kuti waŵandika ufumu waku Chiuta. 32Nadi ndikuneniyani kuti yingaruta mphapu yeniyi cha mpaka vyose vyaŵapo. 33Kuchanya ndi panupasi virutenge; kweni mazu ghangu kuti gharutenge cha.

Nkhwakwenere kulindizga

34“Kweni jichenjeriyeni, vinu yingavimbirwa mitima yinu ndi mgutu, ndi vinyo mukari ndi maphuruputiro gha chijariyu chino, ndi zuŵa liya lingamuwiyani kwamabuchibuchi; 35chifukwa viyo liziyenge paku wose ŵakuja pa chisku chose cha charu. 36Kweni cherezgani ŵakuninizika nyengo zose, alinga kuti mupunde, kupozomoka ku kwaku vyenivi vyose vyakukhasa kuŵapo, ndi kumapo paurongo pa Mwana wa munthu.”

37Ndipo mu mazuŵa gho waŵanga mu kasopi wakusambizga; ndipo usiku ndi usiku watuliyanga ndi kutandara mu phiri lakutamulika Olivete. 38Ndipo khamu lo lose lachereriyanga kwaku iyo mu kasopi kwachimuvwa.

Aktuálne označené:

Luka 21: TongaMw

Zvýraznenie

Zdieľať

Kopírovať