Luka 20
20
Fumba ndi mtufu waku Yesu
(Mateyu 21.23-27; Marko 11.27-33)
1Ndipo kunguŵa pa limoza la mazuŵa gho, wachisambizga iyo khamu lo mu kasopi ndi wachimemeza evangeli, ŵangumziya ŵazukuru ŵara ndi ŵalembi pamoza ndi ŵara, 2ndipo ŵangunena nayo, kuti, “Tineniyenge uchitiya vyenivi mu mtufu wakutinji, pamwenga ndi yani yo wakupaska mtufu wenuwu?” 3Ndipo wangwamuka, wanguti kwaku wo, “Nane so ndikufumbeninge fumbo; ndipo ndineniyeni: 4Kumbi ubatizo waku Yohane wenga wakutuwa kuchanya, pamwenga wakutuwa ku ŵanthu?” 5Ndipo iwo ŵangususkana kwaku ŵija, ŵakuti, “Asani tingati, ‘Kutuwa kuchanya’, wanenenge, ‘Na chifukwa chine mungureka kuvwana nayo?’ 6Kweni asani tingati ‘Kutuwa ku ŵanthu,’ khamu lose lo litipong'enge mya; chifukwa ndakukhorwa kuti Yohane wenga mchimi.” 7Ndipo ŵangwamuka kuti ŵengavi kuziŵa kweniko ungutuliya. 8Ndipo Yesu wanguti kwaku iwo, “Chingana ndine kuti ndikuneniyeninge cha ndi mtufu wakutinji ndichitiya vyenivi.”
Ntharika ya ŵalimi ŵa munda wa mphereska
(Mateyu 21.33-46; Marko 12.1-12)
9Ndipo wangwamba kukambiya khamu lo ntharika yeniyi: “Munthu wangupanda munda wamphereska, ndipo wanguwupazgiya ku ŵalimi, ndipo wangutuwapo nyengo yitali. 10Ndipo pa nyengo wangutuma muŵanda ku ŵalimi wo, alinga kuti ŵampaskeko chipasi cha munda wamphereska: kweni ŵalimi, ŵati ŵamkwechuwa, ŵangumwezga wambughuya. 11Ndipo wanguwerezgapo kutuma muŵanda munyake: ndipo yiwo, ŵati ŵamkwechuwa iyo nayo, ndi ŵati ŵamlengeska, ŵangumwezga wambughuya. 12Ndipo wanguwerezgapo kutuma wachitatu: ndipo yiwo, ŵati ŵamlasa uyu nayo, ŵangumbwefuliya kubwaro. 13Sono wanguti mweni-munda wamphereska, ‘Ndichitenge chine? Nditumenge mwana wangu wakwanjiwa; kokuli wamphwerenge.’ 14Kweni ŵati ŵamuwona ŵalimi wo ŵangupangirana kwaku ŵija ŵakuti, ‘Mwenuyu ndi mhara: tibaye, alinga kuti chihara cho chiŵenge chidu.’ 15Ndipo ŵanguti ŵamumbwefuliya kubwaro ku munda wamphereska, ŵangumbaya. Na, mwenimunda yo waŵachitiyenge chine? 16Wazenge ndi wanangenge ŵalimi yaŵa, ndipo wapaskenge munda wamphereska ku ŵamwenga.” Ndipo ŵanguti ŵavwa, ŵanguti, “Kungaŵa viyo cha.” 17Kweni iyo wati walereska paku iwo, wanguti, “Nchine chakulembeka chenichi,
‘Mwa weniwo ŵanguwukana ŵazengi-nyumba,
wenuwu waŵiya mutu wa nyondu’?
18“Yose wakuwa pa mwa wuwa watikinyikenge; kweni paku mweniyo ungawiya, umuthibuskenge.”
Fumbu ndi zakusonkha msonkhu
(Mateyu 22.15-22; Marko 12.13-17)
19Ndipo ŵalembi ndi ŵazukuru ŵara ŵangulembe kumko ku manja mu ora leniliya; ndipo ŵangopa khamu lo; chifukwa ŵanguziŵa kuti paku iwo wangutayiya ntharika yeniyi: 20ndipo ŵangumkhazga ndi ŵangutuma ŵaskoli wo ŵangujiŵikamo kuŵa ŵarunji, alinga kuti ŵamko ndi mazu ghake, viyo kuti ŵampereka ku cheruzgu ndi ku mtufu wa nduna. 21Ndipo ŵangumfumba, ŵakuti, “Muwomba, tiziŵa kuti ukamba ndi usambizga kwakurunjika, ndipo kuti urumba chisku cha munthu cha, kweni mu uneneska usambizga nthowa yaku Chiuta. 22Kuyiyamu ifwe nthu kupaska mthulu kwaku Kaisare, pamwenga awa?” 23Kweni wanguziŵa urghargha wawo, wanguti kwaku iwo, 24“Ndirongoni tambala. Kumbi chikozgu ndi chakulembekapo vyo wenavyo vyakuyani?” Ndipo iwo ŵanguti, “Vyaku Kaisare.” 25Ndipo iyo wanguŵanene, “Wezgiyani viyo vyaku Kaisare kwaku Kaisare, ndi vyaku Chiuta kwaku Chiuta.” 26Ndipo kuti ŵanguziŵa cha kumko ndi kanenedu ko paurongo pa khamu lo: ndipo ŵanguzizwa ndi kwamuka kwake ŵanguchetama.
Fumbu ndi chiyuka cha kuŵakufwa
(Mateyu 22.23-33; Marko 12.18-27)
27Ndipo ŵanguza ŵanyake ŵamu ŵaSaduki, wo ŵatiti kulive chiyuka; 28ŵangumfumba, ŵakuti, “Msambizgi, Mosese wangulembe ifwe kuti, asani mbali wa munthu wakuŵa ndi muwoli wangafwa, ndi uyu wangaŵa wambura mwana, mbali wake yo wachito choko cho, ndi wayuskiyepo mbeu ku mbali wake. 29Kwenga viyo ŵabali ŵankhonde ndi ŵaŵi: ndipo wachimoza wati wato muwoli, wangufwa wambura mwana; 30ndipo wachiŵi yo; 31ndipo wachitatu wangumto; ndipo kwakukozgana wo ŵankhonde ndi ŵaŵi nawo kuti ŵangusiyapo ŵana cha, ndipo wangufwa. 32Pavuli pake wangufwa munthukazi nayo. 33Viyo muchiyuka cho waŵenge muwoli waku nunju waku wo? Chifukwa ŵankhonde ndi ŵaŵi wo ŵanguŵa nayo nge ndi muwoli.” 34Ndipo Yesu wanguŵanene, “Wana wo ŵa mgonezi uwu ŵato ndipo ŵatoreskeka; 35kweni wo ŵatenereskeke kwachifikako ku mgonezi wuwa ndi ku chiyuka cha ŵakufwa, kuti ŵato cha, chingana nkhuti ŵatoreskeka cha; 36chifukwa chingana nkhuti ŵaziŵa kufwa so cha; chifukwa ŵe nge mbangelo; ndipo mbana ŵaku Chiuta, pakuŵa ŵana ŵa chiyuka. 37Kweni kuti ŵakufwa wo ŵayuskika, Mosese nayo wangurongole, mu Chivwati, cho po watiti, Mbuya ndi Chiuta waku Abrahamu, ndi Chiuta waku Yisaki, ndi Chiuta waku Yakobe. 38Kweni kuti ndi Chiuta wa ŵakufwa cha, kweni wa ŵamoyo; chifukwa wose ŵajariya iyo umoyo.” 39Kweni ŵanyake ŵamu ŵalembi ŵangwamuka, ŵanguti, “Msambizgi, wakamba umampha.” 40Chifukwa kuti ŵangaganga kumfumba kanthu kanyake so cha.
Fumbu lapaku Mesiya
(Mateyu 22.41-46; Luka 20.41-44)
41Ndipo wanguti kwaku iwo, “Wakamba uli kuti Kristu ndi mwana waku Davidi? 42Chifukwa mweneko Davidi mu buku la Sumu watiti,
‘Mbuya wanguti ku mbuyangu,
Ja ku marghe ghangu;
43mpaka ndiŵaŵikenge ŵamawongo ŵako chitambaliru cha marundi ghako.’
44Davidi viyo wamtamula Mbuya; na, ndi mwana wake uli?”
Yesu wachenjezga ndi ŵasambizgi ŵamarangu
(Mateyu 23.1-36; Marko 12.38-40)
45Ndipo penipo nkhamu lose lategherezganga, Yesu wanguti ku ŵasambizi ŵake, 46“Mucheŵe ndi ŵalembi wo ŵakhumba kwendayenda mu makhanju, ndi ŵatanja matauzgu mu maluluwa gha maronda, ndi vitengu vyachimoza mu masinagoge ndi malo ghachimoza mu madghera; 47wo ŵakampha nyumba za vyoko, ndipo mu munguni ŵarombe kwathaliku; yaŵa ŵarondenge chisusa chakuruska.”
Aktuálne označené:
Luka 20: TongaMw
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Bible Society of Malawi
