Yesus 'ai so-soma'a 3
3
Si-la ngowa'a ḇolo
1Toma wangere rimoi ca'olo ro'ange wangere so'o ne'o, 'a Petrus re Yohanes 'aḏi tagi ra Ma Jou'ongu Madutu 'ai Wala ma soana di'a 'aḏi manyiata. Toma 'orasa so'o gena-ge biasa ḏua ngowa'a Yahudi mo-moini 'aḏi manyiata. 2Toma 'orasa gena-ge, ananga 'aḏi gasa ino ngowa'a matengo 'o ḇolo singe-ngeta'a dau tala moju, 'u sigare ra Ma Jou'ongu Madutu 'ai Wala ma soana ma ngalana lamo'o, ga'a ya si'aro'o ngalana Rousu. Ma wangere ma jelele i'a ananga 'u sigare toma ngi'i gena-ge, la 'u golo'o pipisi toma ngowa-ngowa'a 'aḏi osama ra Ma Jou'ongu Madutu 'ai Wala ma soana. 3Wakutu unanga gena-ge 'o oḏi'i 'a Petrus re Yohanes 'aḏi co-cori osama ra Ma Jou'ongu Madutu 'ai Wala ma soana, unanga 'o golo'o sedekah ra ananga. 4Ḏua 'a Petrus re 'a Yohanes 'aḏi tailako unanga, kara Petrus 'o kanau, “Tatamo ngomi.” 5Dadi unanga 'o tailako ananga, wari i'a si 'aḏi pula'a 'ori i'a ra unanga.
6Mada'a 'a Petrus 'o kanau i'a ra unanga, “Ngomi kaminga guraci re salaka ua, mada'a 'oru ga'a ra ngoi, ngoi to pula'a ra ngana: Rema kuasa ra Yesus Kristus ngowa'a Nazaret ino, no te'oso re no tagi!” 7Ḏua 'a Petrus 'o riono 'a gu'u unanga 'ai giama ma kuwiḏa re 'u side'oso. Toma 'orasa gena-ge ḏua, ngowa'a ḇolo 'ai rou re 'ai rou ma camala ri te-te'e. 8Gena ḏua, unanga 'o te'oso re 'o maḏupa-ḏupaka re mulaingi 'o tagi i'a ino. Ḏua, unanga 'o mamete'e ra Petrus re 'a Yohanes 'aḏi osama ra Ma Jou'ongu Madutu 'ai Wala ma soana re 'o tagi 'o mate-teḏene re 'o puji re silamo'o Ma Jou'ongu Madutu. 9Ngowa'a mo-moini toma ngi'i gena-ge ya oḏi'i unanga ro tagi re 'o silamo'o Ma Jou'ongu Madutu 'ai lomanga 10re 'aḏi waro ḏua unanga nena-ne ngowa'a ḇolo ga'a 'o tegoro 'o golo-golo'o sedekah toma “Ngalana Rousu” ra Ma Jou'ongu Madutu 'ai Wala ma soana. Ananga 'aḏi heranga masala 'oru 'i dadi ḏua toma ngowa'a nena-ne.
Petrus 'o bobita ra Ma Jou'ongu Madutu 'ai Wala ma soana
11Unanga nena-ne 'a gu'u 'a Petrus re 'a Yohanes manga giama sababu 'o maroanga masala singadolo ananga nga ḏu'ange 'aḏi osama Serambi Salomo ra Ma Jou'ongu Madutu 'ai Wala ma soana. Ḏua ngowa'a mo-moini 'aḏi matai lalara sapolo re 'aḏi gowolo ananga sababu 'aḏi heranga masala. 12Wakutu 'a Petrus 'o oḏi'i ngowa-ngowa'a gena-ge, unanga 'o kanau i'a ra ananga, “Hei ngowa-ngowa'a Israel, i'a sa'olo ngini ni heranga masala? I'a sa'olo ngini ni tailako ngomi? 'Oru ni ta'ajiri ngowa'a ḇolo nange-ne 'o tagi nyengara sababu ngomi minga kuasa bolo sababu ngomi ngowa'a loasa re banari?! 13Na 'isene! Abraham, Ishak re 'a Yakub re ngene nanga ete re dotumu 'aḏi silamo'o re siḏubuso Ma Jou'ongu Madutu. Unanga gena-ge 'o silamo'o Yesus, Unanga 'Ai falalomu. Mada'a 'a Yesus ne, ngini nu sipula'a ra Pilatus. Re kalaha 'a Pilatus mau 'U sibebasa Unanga, ngini ni golo'o Pilatus 'o soma'a 'ai sordado-sordado 'aḏi sisalib Unanga!#Sup. 3:15 14Ngini ni dawongo ua Ngowa'a Loasa re Banari re Ngowa'a 'Ofi-'Ofi gena-ge, mada'a ngini ni golo'o 'a Pilatus 'o sibebasa ngowa'a se-sengene ngowa'a.#Mat. 27:15-23; Mrk. 15:6-14; Luk. 23:13-23; Yoh. 19:12-15 15Ngini ni sisengene Unanga ga'a 'o 'ahu ma cimi. Unanga ro sengene, mada'a Ma Jou'ongu Madutu dadunu 'U si'ahu moju. Ngomi nena-ne mi dadi sakisi sababu maoḏi'i masiretene Yesus dadunu 'o 'ahu moju. 16Ioronongoḏu ngowa'a Yahudi, ngowa'a ḇolo nena-ne, ngowa'a ga'a ngini ni nana'o re ni oḏi'i unanga ga'a 'o golo'o pipisi ma di'ara ḏua, unanga 'ai rou ma camala ri te-te'e sababu unanga 'o ngaku Yesus re 'Ai kuasa. Sababu unanga 'ai ngo-ngaku ra Yesus unanga gena-ge ro la ḏua. Re ngini ni oḏi'i masiretene 'oru 'i dadi ḏua ra unanga.
17Ioronongoḏu ngowa'a Yahudi, ngoi ta waro ngini mo-moini: bae ngini, bae ninga bi-biri'i, ngini ni maḏiga'a ra Yesus so'o gena-ge sababu ni waro ua Yesus gena-ge 'O Kristus. 18Mada'a, enanga gena-ge 'i dadi ma tero sa'olo Ma Jou'ongu Madutu 'a siajele pasala ḏua ra Unanga 'ai nabi-nabi mo-moini mangale 'O Kristus ga'a Unanga balasu 'o sanga sangisara. 19Sababu gena-ge, ngini balasu ni maḏibo toma ngo'omo boloto re ni ngali ninga de'oso re ḏegoro re ni mete'e Ma Jou'ongu Madutu, la Unanga 'a singi-ngiranga ninga ḏosa-ḏosa, 20kara Ma Jou'ongu Madutu 'o sapolo ra ngini re 'A site'e ninga ngo-ngaku re ḏuanga i'a 'O 'utusu Yesus 'o sapolo moju di'a ngini sababu Ma Jou'ongu Madutu 'a sitantukanga pasala ḏua mangale Unanga gena-ge 'O Kristus di'a ngini. 21Unanga balasu 'o tegoro da'u toma soroga moju singadolo Ma Jou'ongu Madutu 'o sidadi 'ori i'a mo-moini 'i dadi su-sungi 'i ma tero sa'olo 'au wali nabi-nabi ya siajele pasala ḏua. 22Musa 'o kanau mangale Yesus gena-ge, ‘Ma Jou'ongu Madutu ḏuanga i'a 'o sitede Matengo 'o dadi nabi ra ngini ninga bangsa manga sigolona masiretene, unanga gena-ge sa'olo ngoi, Musa. Ngini balasu na mete'e 'Ai demo wakutu Unanga nu kanau.#Dad. 18:15, 18 23'A guna ḇato 'o 'isene mada'a 'a mete'e ua Nabi gena-ge 'ai demo, unanga gena-ge 'o osama nyo-nyoimi ua ra Ma Jou'ongu Madutu 'ai 'umata re 'o sanga hukumu sengene.’#Dad. 18:19
24Nabi-nabi manga repe, mulaingi Nabi Samuel re 'age ḏi'i nabi ma lelegu ya siajele pasala ḏua mangale 'ori i'a 'i dadi toma 'orasa gena-ge. 25Nabi-nabi gena-ge ya siajele pasala ḏua mangale Ma Jou'ongu Madutu 'ai jaji ra Abraham, ninga ete re dotumu, ma betongo so'o ne: ‘Ngoi ta sibarakati ngowa'a mo-moini toma dungia sitabi donga ra Matengo tani ju'uda tala.’ Jaji gena-ge di'a ngini ḏi'i.#Do. 22:18 26Sababu gena-ge, Ma Jou'ongu Madutu 'o sitede pasala ḏua 'Ai Falalomu Yesus, kara 'O soma'a Unanga 'o sapolo ra ngini siḏa, di'a Unanga 'o sibarakati ngini ngowa'a Yahudi, la ngini nyengara ni maḏibo toma ngo'omo boloto re ni mete'e mode-mode'e Unanga 'ai do-doto'o taninga 'ahu lobi'i re wangere.”
Aktuálne označené:
Yesus 'ai so-soma'a 3: SNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
2015 © Indonesian Bible Society