Yesus 'ai so-soma'a 4
4
'A Petrus re Yohanes 'aḏi talaḏi toma Mahkamah 'Agama
1Wakutu ananga 'aḏi ma'u kanau moju, 'imam-'imam#4:1 Toma kartasi lo-lolo lelegu 'age 'imam-'imam ma sae'e re sordado ma sae'e ra Ma Jou'ongu Madutu 'ai Wala ma ja-jaga, re ngowa-ngowa'a Saduki, ananga 'aḏi sapolo ra Petrus re 'a Yohanes. 2Ananga 'aḏi ruta sababu 'a Petrus re Yohanes 'aḏi siajele toma ngowa-ngowa'a mangale Yesus ro sengene, mada'a dadunu 'o 'ahu moju.#4:2 Saduki 'aḏi ngaku ua ngowa'a sengene nyengara dadunu 'o 'ahu moju Nena-ne 'i dadi bukiti rimoi mangale ngowa'a 'aḏi sengene ḏua nyengara dadunu 'aḏi 'ahu moju ḏi'i. 3Ḏua sordado-sordado gena-ge 'aḏi cako'o 'a Petrus re Yohanes, kara singosama toma bui. Sababu ri lobi'i, ananga 'aḏi tahana 'a Petrus re Yohanes utu gena-ge singadolo ma ḇiḇini i'a. 4Mada'a ngowa-ngowa'a manga repe ga'a 'aḏi 'isene 'a Yesus 'ai so-soma'a gena-ge manga do-doto'o, ananga gena-ge 'aḏi ngaku re 'aḏi dadi ngowa'a ngaku Yesus. Manga nyo-nyoimi 'i madogo-dogo singadolo na-nau'u ḏa nga cala romotoa 'aḏi dadi ngowa'a ngaku Yesus.
5Ma ḇiḇini i'a, Mahkamah 'Agama (Yahudi manga sae'e, 'agama ma bi-biri'i re guru-guru 'agama) ananga 'aḏi malomu toma limau Yerusalem. 6Ananga 'aḏi ma'u sanga toma 'imam 'agung Hanas, Kayafas, Yohanes, Aleksander, re ngowa'a lelegu toma 'imam 'agung Hanas 'ai ngitu re ngale. 7Ananga 'aḏi gasa 'a Petrus re 'a Yohanes sitalaḏi toma Mahkamah 'Agama. I'a da'a ananga 'aḏi sano, “Ma duhu sa'olo ngini ni si-la ngowa ḇolo gena-ge? Ni sipake 'oru bolo 'a guna 'ai kuasa singadolo ngini ni si-la unanga gena-ge?”
8Petrus Ma Ngagara 'Ofi-'Ofi 'u ḏegoro 'a sangoro, “Tuanga-Tuanga Yahudi manga sae'e re Tuanga-Tuanga 'agama ma bi-biri'i. 9Ngini ni sijuruhakimi ngomi sababu ngomi mi 'a'a 'ori i'a la-la: Ngomi mi si-la ngowa'a ḇolo gena-ge re ni disa waro ma duhu sa'olo mi si-la? 10Na'o so'o gena, Tuanga-Tuanga mo-moini re ngowa'a Israel mo-moini balasu na waro mangale ngowa'a nena-ne 'o te'oso masiretene sababu unanga ro la. Gena-ge 'i dadi sababu Yesus Kristus, ngowa'a Nazaret, 'Ai de-de'e re 'Ai kuasa. Tuanga-Tuanga ni sisalib ḏua Unanga gena-ge mada'a Ma Jou'ongu Madutu dadunu 'u si'ahu moju. 11Yesus nena-ne 'i silefo toma Boku 'Ofi-'Ofi ma dara ma betongo so'o ne:
‘Maḏi ga'a ngini, wala ma tukanga-tukanga, na upa'a ḏua,
ma nyonyata maḏi gena-ge ri dadi maḏi ma re'u i'a di'a wala ma bangini.’#Nya. 118:22
12Pa'i ra Yesus ḇato nyengara ngowa-ngowa'a 'aḏi sanga 'ahu kasingado-ngadolo i'a. Sababu toma dungia sitabi donga, matengo i'a mai ua 'o sanga kuasa di'a 'o sisalamata ngene.”
13Mahkamah 'Agama gena-ge 'aḏi dadi heranga masala. Sababu, kalaha ananga gena-ge ngowa'a kama sokola ua, ananga ya oḏi'i 'a Petrus re 'a Yohanes 'aḏi kanau kamanga mojongo ua. Ananga ḏi'i ya waro 'a Petrus re 'a Yohanes 'aḏi mete'e Yesus ḏua. 14Mada'a ananga 'aḏi kanau yoḏu'u sababu ngowa ḇolo nena-ne ro la, re unanga 'o made-de'oso re 'o mamete'e rea Petrus re 'a Yohanes ra ananga manga biono. 15Ḏua ananga 'aḏi soma'a Yesus 'ai so-soma'a nga muḏiḏi gena-ge 'aḏi supu sieanga tala kamara juruhakimi. Pasala i'a ananga 'aḏi masigaro'o. 16Ananga 'aḏi ma'u kanau, “Ngowa-ngowa'a nena-ne, ngene wa'u 'a'a sa'olo? Ngowa'a mo-moini toma limau Yerusalem ya waro mangale ananga gena-ge 'a'a ga'a hera-heranga gena-ge. Ngene wa soloto mai 'i yoḏu'u. 17Dadi habari mangale ananga manga ga'a hera-heranga gena-ge, awa-awa singadolo enanga 'i rera re walata, ngene balasu simaha awa ananga nga muḏiḏi 'aḏi siajele mangale Yesus ra guna ḇato.”
18Ḏua juruhakimi-juruhakimi gena-ge 'aḏi 'aro'o 'a Petrus re 'a Yohanes dadunu osama re 'aḏi kanau, “Nga'unu ua ngini ni doto'o mangale Yesus bolo ni terongo Yesus 'ai lomanga.”
19Mada'a Petrus re 'a Yohanes ya sangoro, “Ni madibanga masiretene, 'oru 'i banari ra Ma Jou'ongu Madutu 'ai momina: Mete'e Tuanga-Tuanga ninga mau bolo mete'e Ma Jou'ongu Madutu 'ai 'akala ma mau?! 20Ngomi mi matogumu yoḏu'u masiajele 'oru ga'a ngomi masiretene maoḏi'i re ma'isene ḏua.” 21Juruhakimi-juruhakimi gena-ge ya sanga ua enanga ma sababu di'a ya'u sihukumu 'a Petrus re 'a Yohanes, sababu ngowa'a manga repe ya oḏi'i ga'a hera-heranga gena-ge re 'aḏi puji re silamo'o Ma Jou'ongu Madutu. Dadi juruhakimi-juruhakimi 'aḏi kanau remanga ruta ra Petrus re 'a Yohanes, kara sisupu ananga. 22Ngowa'a ḇolo ga'a ro la gena-ge, unanga 'ai 'umuru musungu nyagi rata pai'i.
Ngowa-ngowa'a ngaku Yesus 'aḏi golo'o de-de'e ra Ma Jou'ongu Madutu, la 'aḏi mojongo awa
23Wakutu juruhakimi-juruhakimi 'aḏi sibebasa 'a Petrus re Yohanes pasala i'a, ananga 'aḏi maḏibo tamanga ḏagilomu, kara ananga ya sijarita mo-moini 'oru 'imam-'imam ma sae'e re Yahudi manga sae'e ya'u kanau ra ananga. 24Wakutu 'a Petrus re Yohanes manga ḏagilomu ya 'isene mangale jarita gena-ge, ananga mo-moini ya sirimoi manga 'akala re sinyingara re 'aḏi manyiata ra Ma Jou'ongu Madutu. Ananga 'aḏi manyiata, “Ma Jou, no sidadi ḏua diwanga, dungia, ngoloto re ma dara mo-moini.#Sup. 20:11; Neh. 9:6; Nya. 146:6 25Re 'Ani Ngagara 'Ofi-'Ofi masiretene 'i sigaraki 'Ani falalomu, minga ete re dotumu, 'a Daud 'ai 'akala re sinyingara. Unanga gena-ge 'o kanau,
‘I'a sa'olo bangsa-bangsa Yahudi ua 'aḏi ruta
re i'a sa'olo ngowa-ngowa'a Yahudi 'aḏi masigaro'o 'ori i'a mapake ua?#Nya. 2:1-2
26'Olana-'olana toma dungia 'aḏi madodahe di'a parangi
re bangsa-bangsa toma dungia manga sae'e 'aḏi marimoi di'a 'aḏi lawana Ma Jou'ongu Madutu re 'Ai Mesias.’
27'Oru Daud siajele pasala ḏua 'i dadi, sababu Herodes re 'a Pontius Pilatus ya'u lomu ḏua ngowa-ngowa'a Yahudi ua re ngowa-ngowa'a Israel toma limau gena-ge. Ananga 'aḏi ma'u sanga re 'aḏi ma'u rimoi 'aḏi lawana Yesus, 'Ani Falalomu 'Ofi-'Ofi. Unanga gena-ge, Ma Jou'ongu Madutu nu sitantukanga Unanga 'O dadi Mesias.#Mat. 27:1-2; Mrk. 15:1; Luk. 23:1, 7-11; Yoh. 18:28-29 28Ananga 'aḏi marimoi 'aḏi 'a'a so'o gena sababu Ma Jou'ongu Madutu 'au wali moju 'a sitantukanga pasala ḏua enanga balasu 'i dadi so'o gena mete'e 'Ai kuasa re 'Ai mau masiretene. 29Nange-ne Ma Jou'ongu Madutu na waro mangale ananga 'aḏi sinati-nati ngomi. Ngomi ga'a ta Ma Jou'ongu Madutu ma tero sa'olo 'Ani budaka,#4:29 Demo gena-ge toma demo Yunani: “budaka” mada'a toma konteks gena-ge ma ngale: ngomi ga'a ta Ma Jou'ongu Madutu ma tero sa'olo 'Ani budaka. Oḏi'i demo budaka toma kamus. mi golo'o na site'e minga 'akala re sinyingara, la mi singadolo Habari Roanga kaminga mojongo ua. 30No riono ngomi, la ngowa'a siḏi ma'u si-la, re mi 'a'a didina'o heranga re 'ori i'a hera-heranga mete'e Yesus 'ai kuasa, Unanga 'Ani Falalomu 'Ofi-'Ofi.”
31Ananga 'aḏi manyiata togumu i'a, ngi'i gena-ge 'i elala. Re ananga mo-moini Ma Ngagara 'Ofi-'Ofi ya'u ḏegoro re ananga 'aḏi singadolo Ma Jou'ongu Madutu 'ai demo kama mojongo ua.
Ngowa'a ngaku Yesus manga 'ahu re manga 'akala re sinyingara ya sirimoi
32Ngowa'a ngaku Yesus mo-moini ya sirimoi manga 'ahu re manga 'akala re sinyingara. Matengo i'a mai ua na'o rema 'ori rana 'a basono pa'i ta unanga masiretene ḇato ua, mada'a di'a ananga mo-moini.#Som. 2:44-45 33Yesus 'ai so-soma'a gena-ge ananga 'aḏi pula'a sakisi rema kuasa lamo'o mangale Yesus 'o sengene ḏua, mada'a dadunu 'O 'ahu moju, re Ma Jou'ongu Madutu ya'u sibarakati ananga mo-moini. 34-35'Age rema ngowa'a matengo i'a mai ua 'a bosono 'ai 'ahu 'i ngadolo ua, sababu soi rai o'o i'a matengo i'a rai wala bolo rai tana'a 'a wu'unu. Re enanga ma ijana 'a gasa re 'a sipula'a ra Yesus 'ai so-soma'a, kara ananga ya sibalangu di'a ananga mo-moini mete'e manga paralu.
36-37So'o gena ḏi'i 'a Yusuf, unanga 'a wu'unu 'ai tana'a, ma ijana 'a gasa re 'a sipula'a ra Yesus 'ai so-soma'a. Yusuf 'ai 'asala ngowa'a Lewi toma Siprus ino. Yesus 'ai so-soma'a 'aḏi silomanga unanga Barnabas (lomanga gena-ge ma ngale: ngowa'a ga'a site'e 'akala re sinyingara).
Aktuálne označené:
Yesus 'ai so-soma'a 4: SNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
2015 © Indonesian Bible Society