Àpɔ́sɔ̀lɔ̀ 8
8
1Sɔ́ɔ̀ wéè e kɛá à ga-wɔ̃̀ mɔ̀.
Sɔ́ɔ̀ e Wálà-mìà sã̀ dɔ
Lúó e kília káa, o gbɛ̃̀ gbaa wáà Wálà-mìà lɛ́ o kɛ Zùlúsàlɛ̀ɛ, sã̀ dɔ̀ dóo wɛlɛ yɔɔ zɛ̀. É kã́ àpɔ́sɔ̀lɔ̀ vɔ̀ɔ mɔ̀ɔ, Wálà-mìà yé o tóa, o séĩ́ o wɛ̃̀ĩĩ̀ e kɛá Zùdíà wà Sɛ̀mɛ́lìà lɛ̀ séĩ́ mɔ̀. 2Gɔ̃à lɛ́ o zò e kɛ gágà gbìnì Wálà lɛ̀ɛ pìàa, o dò o Tíímì bĩ̀ĩ̀. O dà yéĩ̀ kpó-kpó yí gbóó ɓoò ká.
3Kɛɛ Sɔ́ɔ̀ e kɛ à kɛ-zì naapìà kɛ é Wálà-mìà yí sìè. E kɛ wààpìà kɛ́ì píé, áà gɔ̃à nì, loà nì o gã̀ã̀ tã́ã̀, áà ɓɔ̀ o ká pɛlɛí, áà o dùò bĩ́-kɛ̀ì.
Sɛ̀mɛ́lìà-mìà o wɔ̃́ làṹ yièa ma
4Wálà-mìà lɛ́ o wɛ̃̀ĩĩ̀ e kɛáa, o ló lɛ̀ɛ tɛ̃̀ɛ̃́ɛ mɔ̀ wɔ̃́ làṹ yièa gèeè ká. 5Félè e ló Sɛ̀mɛ́lìà-pɛlɛí, áà Kɛ́lɛ̀ì-wɔ̃̀ gèè lòũ̀ ká míá o yía lɛ̀ɛ. 6Mia kù gbùò zɛ̀ tóó dɔɔ̀ e kɛá wɔ̃́ lɛ́ Félè a gèea mɔ̀ kpó-kpó ɓo. O séĩ́ o o tóó dɔ à mɔ̀, wáà wɔ̃́ kpàlézɛ̀ nì lɛ́ e kɛ à kɛpìàa gɛ̃̀. 7Pɛ yɔɔ e kɛ gópìà mia búnùzɛ̀ píé gbóó gágà kpó-kpó ká. Mia lɛ́ o dɔ-pɛ gaà e kɛá o mɔ̀ɔ, wà mia kpɔ́lɔ̀ɔ búnùzɛ̀ nì o laà e kɛá nɔ́ kíli. 8Géli gbùò kpó-kpó e kɛ Sɛ̀mɛ́lìà à lúó ká.
9Pɛ́lɛ e kília yía, gɔ̃ lɛ́ ò si Sáímɔ̀ɔ, e kɛ yí. Aà à kɛ do Sɛ̀mɛ́lìà-mìà lé áà pà nyìɛ̀ yɔɔ̀ yɔɔ̀ lɛ́ e kɛ à kɛpìàa ká. A gèe kélɛ̀ lɛ mi kpànazɛ̀ kpó-kpó ká. 10Mia séĩ́ lɛ́ o kɛ sɛ́lɛ́ e kília yía, ó kɛ bɛ̃̀ɛ̃ fĩ́ĩ́-nyɛ zɛ̀ ɛ̃́ɛ̃́ kpànazɛ̀ɛ, o o tóó dɔ à mɔ̀ kpó-kpó ɓo. Míáa wa gèe kélɛ̀, “À ye lɛ́ Wálà là yíkɛ̀ gáàa, lɛ́ ò si yíkɛ̀ gáàa kpànazɛ̀ɛ, lɛ à káa.” 11Yé aà kɛ o lé aà pa là nyìɛ̀ yɔɔ̀ yɔɔ̀ kɛɛ̀ ká ɓɛ̀lɛ̀-píé gbèĩ zɛ̀ɛ, o kɛ nɔ́ o tóó dɔpìà à mɔ̀. 12Kɛɛ o wɔ̃́ lɛ́ Félè a gèea gɛ̃̀ wánà ká. E kɛ wɔ̃́ làṹ, lɛ́ à gbɛ̃̀ɛ̃̀ lɛ Wálà zì tò-mia-là wà Zízɛ̀ Kɛ́lɛ̀ì tɔ́ mɔ̀ɔ gèepìà. Lɛ̀ wa gɛ̃̀ wánà káa, loà wà gɔ̃à nì o bàtáì kɛɛ̀ e kɛ à ká. 13Sáímɔ̀ dìè-tĩ́ bɛ̃̀ɛ̃ a gɛ̃̀ wánà ká nɔ́ kíli. Lɛ̀ lɛ́ à bàtáì kɛɛ̀ e kɛáa, lɛ̀ɛ́ gbaa kɛ gópìà Félè sã́ã́-kɔ̀ yí. Lɛ̀ lɛ́ e wɔ̃́ kpàlézɛ̀ wà à lé-pa zɛ̀ nì lɛ́ Félè e kɛ à kɛpìàa gɛ̃̀ɛ, à lé kpó-kpó paà e kɛá.
14Àpɔ́sɔ̀lɔ̀ vɔ̀ lɛ́ o kɛ Zùlúsàlɛ̀ɛ, wa ma kélɛ̀ Sɛ̀mɛ́lìà-mìà waà Wálà lé-wèa ma. Wa mɔ́ɔ̀ Pílɛ̀ wà Zɔ̃̀ɔ̃́ o vɔ ɓo o píé. 15Lɛ̀ lɛ́ o ɓɔ yía, o sɛ̀nɛ ɓo mia lɛ́ waà o zò dɔ Zízɛ̀ mɔ̀ lɛ́ o kɛ yía, o mɔ́ɔ̀ wɔ̃̀ mɔ̀, kɛ ó Gɛ̀ɛ̀ Púlú sɔ̀lɔ̀ ɓo. 16Ƃii kɛ Gɛ̀ɛ̀ Púlúa lɛ̀ɛ́ nu nɛ́ o là, kɛɛ o bàtáì lɛ́ nɔ́ à kɛɛ̀ lɛ à ká nɛ́ ko Dàa-mì Zízɛ̀ tɔ́ yía. 17Yé e kɛ kília, Pílɛ̀ wà Zɔ̃̀ɔ̃́ o o kɔ̀ kpɔ́ o là. Míáa o Gɛ̀ɛ̀ Púlú sɔ̀lɔ̀ ɓo gbaa.
18Sáímɔ̀ a gɛ̃̀ kélɛ̀ lɛ̀ lɛ́ àpɔ́sɔ̀lɔ̀ vɔ̀ɔ o o kɔ̀ kpɔ́ míáa làa, Gɛ̀ɛ̀ Púlú nɔɔ̀ e kɛá o lɛ̀ɛ gbaa. Lɛ̀ e kɛ kília, e pɛlèe dò nɔ Pílɛ̀ wà Zɔ̃̀ɔ̃́ o lɛ̀ɛ, 19áà gèè kélɛ̀, “Yíkɛ̀ gáàa e kéa kà à nɔ m lɛ̀ɛ, kɛɛ ma bɛ̃̀ɛ̃, ḿm̀ m kɔ̀ kpɔ̀á mia làa, kɛ ó Gɛ̀ɛ̀ Púlú sɔ̀lɔ̀ ɓo nɔ́ kíli.”
20Kɛɛ Pílɛ̀ a là nìɛ̀ weeá kélɛ̀, “Kà ɓà pɛlèea ka yí è sìè, i yɛ́lɛ́ ɓa táá kélɛ̀ Wálà là nɔ̀-lɛ̀ɛ-pɛ̀ɛ íì bɛ̀i à lɔ́ɔ̀ pɛlèe káa mɔ́ɔ̀ wɔ̃̀ mɔ̀. 21Ƃà wɔ̃́ gbɛɛ wá yɛɓo kò kɛ̀ɛ yí. Ɛ́ɛ̃́ i dɔ̀lɔ̀ gbɛɛ wá à mɔ̀, ɓii i zò píé wá kpeĩ Wálà wɛlɛ mɔ̀. 22À mɔ́ɔ̀ wɔ̃̀ mɔ̀ɔ, ì i sɔ̃̀ɔ̃ yɔɔ e kéa mɛ́ vɔ̀ɔ, í sɛ̀nɛ ɓo ko Dàa-mì lɛ̀ɛ, kɛ é yɛ́lɛ́-táá yɔɔ lɛ́ e i yía, ɓo i mɔ̀. 23Ƃii maà gɛ̃̀ gbaa kélɛ̀ dàa-gbe-là aà i zò kɛ gbaa nyɔ́ɔ̀ɔ kpó-kpó ɓo. Ɛ́ɛ̃́ maà i kɛ̀ kɛ-wɔ̃̀ yɔɔ là lùò ká míní sí gbaa.”
24Sáímɔ̀ a gèe Pílɛ̀ wà Zɔ̃̀ɔ̃́ o lɛ̀ɛ, “Kà sɛ̀nɛ ɓo ko Dàa-mì lɛ̀ɛ m mɔ́ɔ̀ wɔ̃̀ mɔ̀, yékɛ̀ wɔ̃́ lɛ́ ka gèe m gbĩ mɔ̀ɔ, à dò é kɛ m ká.”
25Yé gbaa Pílɛ̀ wà Zɔ̃̀ɔ̃́ o nyɛ kélá-wè ɓoò mɔ̀, wáà ko Dàa-mì lé-wè gèèa, o ló o mɛ̀ĩ́ Zùlúsàlɛ̀. Lɛ̀ o kɛ lópìà o mɛ̀ĩ́a, o wɔ̃́ làṹ yièa gèe sɛ́lɛ́ kélé kélé lɛ́ e kɛ Sɛ̀mɛ́lìàa yí píé.
Félè wà Itìópìà-mìa
26Ko Dàa-mì là vɔ-mì e à gèe Félè lɛ̀ɛ, “Ì wɛ̀lɛ̀ í i wũ dɔ mɛ̀ĩ́ gbĩ mɔ̀, í ló zi lɛ́ è go Zùlúsàlɛ̀, áà lò Gézàa píé.” (Zí e kéa à gbɛ̃̀ɛ̃̀ lɛ lɛ̀ púlú gbùò lɛ́ ká dɔɔ̀ wá yia mɔ̀.) 27-28Lɛ̀ e kɛ kília, Félè e wɛ̀lɛ̀, e ló. Yé e kɛ kília, gɔ̃ lɛ́ e kɛ Itìópìà mi káa, e kɛ lópìà e pà. Gɔ̃́ e kília, e kɛ Kã̀dásì lɛ́ e kɛ Itìópìà-sɛ̀lɛ̀ líé-sí-lèè káa, là yɛɓo-kɛ-mì kpànazɛ̀ dò ká. À ye lɛ́ e kɛ lééa là pɛlèe-kpɔ̀-tã́ã̀-kà wũ-là-mì káa. À lóò e kɛá Zùlúsàlɛ̀ kɛ é gbini Wálà lɛ̀ɛ. E kɛ gópìà yi gbaa áà lò e pà. E kɛ yàá là mia yàà-yí-pɛ̀ɛ yí, áà lò. E kɛ kii lɛ́ e dɔ̀-Wálà-lé-là-mì lɛ́ ò si Ààzáyàa là kii káa lónípìà. 29Gɛ̀ɛ̀ Púlú a gèe Félè lɛ̀ɛ, “Lo mia yàà-yí-pɛ̀ e yía ká kɔ̀ɛ́.” 30Félè e ló à píé bàlá, a wéè ma, áà dɔ̀-Wálà-lé-là-mì lɛ́ ò si Ààzáyàa là kíía lónì. E à wɛ̃́ĩ́-lɔ̀ɔ kɛ kélɛ̀, “Pɛ lɛ́ ɓà gèea, íì à yí ma?”
31Lɛ́ a gèe à lɛ̀ɛ, “Ḿm̀ lo à yí maà kpɛ, yé mi lɛ̀ɛ́ à yí fɛ̃̀ɛ̃-fɛ̃́ɛ̃́ m lɛ̀ɛ ká?” A gèe gbaa Félè lɛ̀ɛ é tɛ̀nɛ̀ mia yàà-yí-pɛ̀ɛ yí, é nu yà à sɔ́nɔ́. 32Kíía lɛ̀ yé e kɛ à gèepìàa, gɛ̃̀ e ké.
“O kɛ lópìà à ká lɛ̀ zí ò loá ɓáá ká e zɛ-pìàa lɛ́ ɓe.
E kɛ lɛ̀ ɓáá nyɔ̀nɔ́ lɛ́ ò à kɛì kã, lɛ́ lɛ̀ɛ́ wééa lɛ́ ɓe.
Lɛ̀ɛ́ gbaa wɔ̃́ dò gbɛɛ gèe.
33O à sí péétĩ́, ɛ̃́ɛ̃́ zi lɛ́ wáá là wɔ̃́ kã́ã̀ káa, òó gbaa kã́ à ká.
Bɛ̀i lɛ̀ɛ́ ló kɛɛ̀ mi gbɛɛ mɔ̀ kɛ é wɔ̃́ gbɛɛ gèe é gbɛ̃̀á à sùu-là-mìà mɔ̀.
Ƃii à zì kɛ̀ɓe lɛ́ e tã́ã̀ zèea, aà ɓɔ e nyɛ-lùò mɔ̀.”
34Gɔ̃ kpànazɛ̀ e kília a gèe Félè lɛ̀ɛ, “Mi lɛ́ dɔ̀-Wálà-lé-là-mì è wèè à ká e kéa, à zɔ̃̀ɔ̃̀ m lɛ̀ɛ. Kɛ̀ à dìè lɛ, ɛ̃́ɛ̃́ kɛ̀ mi gbɛɛ lɛ?” 35Félè e gbɛ̃̀ gbaa, áà wɔ̃́ gèè. Kii lɛ̀ nɔ́ doó lɛ́ gɔ̃́ɔ a gèe e kéa, Félè e gbɛ̃̀ à lɛ̀ mɔ̀, áà wɔ̃́ làṹ yiè lɛ́ à gbɛ̃̀ɛ̃̀ lɛ Zízɛ̀ mɔ̀ɔ gèè. 36Lɛ̀ o kɛ zi gbùòa làa, o ɓɔ zía lɛ̀ dò lɛ́ yíí e kɛ yía mɔ̀. Gɔ̃ kpànazɛ̀ e kília a gèe kélɛ̀, “Yíí dò gɛ̃̀ e ké. Mɛ́ è m tèa m bàtáì kɛɛ̀ mɔ̀?”
[ 37Félè a gèe à lɛ̀ɛ, “Yé i zò dɔɔ̀ aà kɛá Zízɛ̀ mɔ̀ zi séĩ́ káa, kɛɛ bɛ̀i aà kɛ i mɔ̀ ó i bàtáì kɛ.”
Gɔ̃́ɛɛ a gèe kélɛ̀, “Ḿm̀ à gɛ̃̀ wánà ká kélɛ̀ Zízɛ̀ Kɛ́lɛ̀ì lɛ́ e Wálà Gbe káa.”]
38Gɔ̃ kpànazɛ̀ɛ e à gèe ó mia yàà-yí-pɛ̀ɛ tèá. Yé e kɛ kília, Félè wà gɔ̃́ɔ o kpɔ́ o kíe mɔ̀, o ló yíía bà. Félè e gɔ̃́ e kília bàtáì kɛ. 39Lɛ̀ o gó yíía bàa, ko Dàa-mì zì Gɛ̀ɛ̀ e ló Félè ká. Gɔ̃ kpànazɛ̀ɛ lɛ̀ɛ́ gbaa à gɛ̃̀ gbaa. Kɛɛ e kɛ lópìà nɔ́ tĩã́ e wɛlɛ líé géli ká. 40Félè e e dìè gɛ̃̀ dɔ̀á gbaa Àzótà. E ló wɔ̃́ làṹ yièa gèeá sí sɛ́lɛ́ séĩ́ yí, é tóá kíli é ɓɔá Sízàlíà.
Aktuálne označené:
Àpɔ́sɔ̀lɔ̀ 8: MNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Mann New Testament © Bible Society in Liberia, 1978.