Àpɔ́sɔ̀lɔ̀ 9
9
Sɔ́ɔ̀ e e zò dɔ Zízɛ̀ mɔ̀
(Àpɔ́sɔ̀lɔ̀ 22.6-16; 26.12-18)
1Lúó e kília káa, Sɔ́ɔ̀ e kɛ nɔ́ tĩã́ mia túó-wɔ̃̀, lɛ́ e mi zɛ-wɔ̃̀ káa, gèepìà ko Dàa-mì là tòà-píé-mìàa gbĩ mɔ̀. E ló sálà-ɓò-Wálà-mɔ̀-mìà wũ-là-mìa píé, 2áà gèè à lɛ̀ɛ é kii lɛ́ è lo à zɔ̃̀ɔ̃̀ mia lɛ́ o kɛ Zúù-mìà zì Wálà-kà lɛ́ e Dùmásàa wìa lɛ̀ɛ, nɔ à lɛ̀ɛ. E à kɛ kíli kɛɛ é mi nɔ́ɔ fé gɛ̃̀á, áà tò ko Dàa-mì là Zía píé, é kɛ bɛ̃̀ɛ̃ lee káo, ɛ̃́ɛ̃́ gɔ̃ káo, é o kṹ, é nu o ká Zùlúsàlɛ̀.
3Lɛ̀ e kɛ zi là, áà lò Dùmásà, ɛ̃́ɛ̃́ lɛ̀ lɛ́ e ɓɔ sɛ́lɛ́ e kília sɔ́nɔ́ kɔ̀ɛ́ɛ, nɔ́ zá lea, lɛ̀-fɔ̀nɔ-kɔ̀ dò e gó lɛ̀í, e lɛ̀ fɔ̀nɔ à bà. 4E dà tã́ã̀, e wéé dò ma, áà gèè à lɛ̀ɛ, “Sɔ́ɔ̀, Sɔ́ɔ̀, mɛ́ e kɛ lɛ́ ì m sã̀ dɔ ɓe?”
5E wɛ̃́ĩ́-lɔ̀ɔ kɛ kélɛ̀, “Dé e i ká, m Dàa-mì?”
Wéé lɛ́ a maa, a gèe kélɛ̀, “Ma Zízɛ̀ lɛ́ ì à sã̀ dɔɔ lɛ. 6Kɛɛ ì wɛ̀lɛ̀, í ló sɛ́lɛ́ gbùòa yí. Wɔ̃́ lɛ́ lɛ i mɔ̀ í à kɛɛ, à gèeè lɛ́ɛ̀ lo kɛɛ̀ à ká i lɛ̀ɛ à lɛ̀ mɔ̀.”
7Mia lɛ́ wà Sɔ́ɔ̀ nì o kɛ lópìàa, o kɛ dɔ̀á yi o lɛ̀à gaàa zɛ̀ ká. O wéé e kília ma. Kɛɛ òó gbaa mi dò gɛ̃̀. 8Sɔ́ɔ̀ e wɛ̀lɛ̀ gbaa, e e nyìɛ fóló. Kɛɛ bɛ̀i lɛ̀ɛ́ gbaa kɛ à mɔ̀ é pɛ nɔ́ɔ fé gɛ̃̀. O o kɔ̀ dà gbaa à zì, o ló à ká Dùmásà. 9Lɛ̀ɛ́ gbaa lɛ̀ gɛ̃̀ lúó yààka píé. Lúó yààka e kília píéa, lɛ̀ɛ́ gbaa pɛ ɓèlè, kɛ bɛ̃̀ɛ̃ ó gèe e yíí mi.
10Tò-Zízɛ̀-píé-mì doó e kɛ Dùmásà. O kɛ à sípìà Ánànáyà. Gɔ̃́ e kília ko Dàa-mì e wɔ̃́ dò gèe à lɛ̀ɛ pɛ lɛ́ lɛ kélɛ̀ mɛ̀ĩ̀ lɛ́ ɓea, zɛɛ̀ yí kélɛ̀, “Ánànáyà.”
E wéé kélɛ̀, “Ma gɛ̃̀ m ké, ko Dàa-mì.”
11Ko Dàa-mì a gèe à lɛ̀ɛ, “Ì wɛ̀lɛ̀ í ló zi yé ò si Zi Kpeĩ-kpeĩa píé. Lo Zúdà píé kɛ́ì, í gɔ̃ lɛ́ ò si Sɔ́ɔ̀, lɛ́ è go Táásàa, ɓá wɛ̃̀ĩ̀-lɔ̀ɔ kɛ. Lɛ sɛ̀nɛ ɓopìà yi. 12Sɔ́ɔ̀ bɛ̃̀ɛ̃ e gɔ̃ lɛ́ ò si Ánànáyàa gɛ̃̀ pɛ lɛ́ lɛ kélɛ̀ mɛ̀ĩ̀ lɛ́ ɓea, zɛɛ̀ yí. Gɔ̃́ e kília e nu, e e kɔ̀ kpɔ́ à là, kɛ à nyìɛ é lɛ̀ gɛ̃̀ zeĩ́.”
13Ánànáyà a là nìɛ̀ weeá kélɛ̀, “Ko Dàa-mì, mia búnù-búnùzɛ̀ waà gɔ̃́ e kéa wɔ̃̀ gèe m lɛ̀ɛ. Waà wɔ̃́ yɔɔ̀ yɔɔ̀ lɛ́ aà kɛ ɓà mia nì ká Zùlúsàlɛ̀ɛ gèe m lɛ̀ɛ. 14Ɛ́ɛ̃́ aà nu Dùmásà zèe yíkɛ̀ gáàa lɛ́ è go sálà-ɓò-Wálà-mɔ̀-mìà kpànazɛ̀ɛ kɛ̀lɛ̀ɛ ká, kɛ é mia séĩ́ lɛ́ ò i tɔ́ súo kɛ̀ɛ kṹ.”
15Ko Dàa-mì a gèe à lɛ̀ɛ, “Ì lo. Ƃii maà sí, kɛ é yɛɓo kɛ m lɛ̀ɛ, kɛ é sɛ́lɛ́ gbɛɛ yí-mìà wà sɛ́lɛ́ líé-sí-mìà, ɛ̃́ɛ̃́ Éézɛ̀lɛ̀-mìà o kɛ, kɛ ó m tɔ́ dɔ. 16M dìè-tĩ́ ḿm̀ lo wàa séĩ́ lɛ́ lɛ à mɔ̀ á ɓèlè m mɔ́ɔ̀ wɔ̃̀ mɔ̀ɔ, zɔ̃̀ɔ̃̀ à lɛ̀ɛ.”
17Lɛ̀ e kɛ kília, Ánànáyà e ló. E wàà káa wì, e e kɔ̀ kpɔ́ Sɔ́ɔ̀ là. A gèe à lɛ̀ɛ, “M lèe-gé Sɔ́ɔ̀, ko Dàa-mì aà m vɔ. Zízɛ̀ dìè-tĩ́ lɛ́ e ɓíé i là zi gbùò píé lɛ̀ lɛ́ i kɛ nupìà zèea káa. E m vɔ i píé, kɛ í lɛ̀ gɛ̃̀ zeĩ́, ɛ̃́ɛ̃́ kɛ i paà é kɛá Gɛ̀ɛ̀ Púlú ká.” 18Nɔ́ zá lea, pɛ lɛ́ à kpàáà yí lɛ kélɛ̀ kpã̀ã́ kèlè lɛ́ ɓea, e gó gbaa Sɔ́ɔ̀ nyìɛ là, e dà tã́ã̀. Bɛ̀i e kɛ gbaa à mɔ̀ é lɛ̀ gɛ̃̀. E wɛ̀lɛ̀ gbaa e dɔ. À bàtáì kɛɛ̀ e kɛ gbaa à ká. 19Lɛ̀ lɛ́ e pɛ ɓèlè gbaa, à zì yíkɛ̀ gáàa e nu gbaa e mɛ̀ĩ́ à yí.
Sɔ́ɔ̀ e wɔ̃́ làṹ yièa gèe Dùmásà
Sɔ́ɔ̀ e kɛ tò-Zízɛ̀-píé-mìàa píé Dùmásà lúó zààle píé. 20Yé e kɛ nɔ́ kília, e ló gbaa Zúù-mìà zì Wálà-kàa wì píé, áà Zízɛ̀ wɔ̃̀ gèè lòũ̀ ká. A gèe kélɛ̀, “Zízɛ̀ lɛ́ e Wálà Gbe káa.”
21Mia séĩ́ lɛ́ o à wéè maa, e kɛ o lɛ̀ɛ kpàlézɛ̀, wáà wɛ̃́ĩ́-lɔ̀ɔ kɛ̀ kélɛ̀, “Ḿ gɔ̃̀, gɔ̃́ e kéa lɛ́ e kɛ Zùlúsàlɛ̀, áà mia lɛ́ ò tɔ́ e kéa gèea zɛ̀ɛ? Ḿ gɔ̃̀, e nu zèe wɔ̃́ nɔ́ doóa wɛ̃́ĩ̀, kɛ é o kṹ, é ló o ká sálà-ɓò-Wálà-mɔ̀-mìà kpànazɛ̀ɛ píé?”
22Kɛɛ Sɔ́ɔ̀ zì wɔ̃́ làṹ yièa gèeè mɛ́ e kɛ kɛpìà gágà teele. E kɛ à zɔ̃̀ɔ̃̀pìà kélɛ̀ Zízɛ̀ lɛ́ e Kɛ́lɛ̀ì káa. À kɛ̀ kíli yía, e kpɔu yà à ká Zúù-mìà lɛ́ o kɛ Dùmásàa lé.
23Lɛ̀ lúó búnù-búnùzɛ̀ e diea, Zúù-mìà o wàà à kìlì yí, kɛ ó zɛ. 24Kɛɛ Sɔ́ɔ̀ e à wɔ̃̀ ma. Mia o kɛ o yɛ́lɛ́ kɛpìà pɛ́lɛ gbùò e kília mɔ́ɔ̀ gàlà-lé mɔ̀ bĩ́ã́ ɛ̃́ɛ̃́ nyɛ́nɛ́ĩ́, kɛ ó zɛ. 25Kɛɛ bĩ́míà doó káa, Sɔ́ɔ̀ zì tòà-píé-mìàa o à sí, wa yà kɔ̃̀ɛ̃́ yí, wa yɔ̀ɔ́ gàlàa bũ ká.
Sɔ́ɔ̀ kɛ̀ Zùlúsàlɛ̀
26Sɔ́ɔ̀ e ló gbaa Zùlúsàlɛ̀, áà kɛ-zì nàà kɛ é dà tò-Zízɛ̀-píé-mìàa bà. Kɛɛ òó gbaa à gɛ̃̀ wánà ká kélɛ̀ lɛ tò-Zízɛ̀-píé-mì ká. O séĩ́ o kɛ túópìà à lɛ̀ɛ. 27Yé e kɛ kília, Bánábà e à sí, e ló à ká àpɔ́sɔ̀lɔ̀ vɔ̀ɔ píé. Bánábà e zi lɛ́ Sɔ́ɔ̀ e ko Dàa-mì gɛ̃̀á zi gbùò píéa wɔ̃̀ gèe o lɛ̀ɛ. A gèe o lɛ̀ɛ kélɛ̀ ko Dàa-mì aà mɛ́ĩ́ ɓo à lɛ̀ɛ. E bɛ̀i, e zi lɛ́ Sɔ́ɔ̀ aà yɛ́lɛ̀ ɓoá e nyìɛ là, áà wɔ̃́ làṹ yièa gèè à ká Zízɛ̀ tɔ́ yí zàá Dùmásàa wɔ̃̀ gèe o lɛ̀ɛ nɔ́ kíli. 28Yé e kɛ kília, Sɔ́ɔ̀ e kɛ gbaa o píé yi. E kɛ lópìà Zùlúsàlɛ̀ lɛ̀ séĩ́ mɔ̀ wɔ̃́ làṹ yièa gèeè ká nyìɛ gágà ká ko Dàa-mì tɔ́ yí zàá. 29Sɔ́ɔ̀ wà Zúù-mìà lɛ́ ò Gílíì-wè gèea, wà ye nì o wɔ̃́ gèe, wáà tèé dà. Kɛɛ wa kɛ-zì naa ó à zɛ. 30Kɛɛ yé Sɔ́ɔ̀ ɓɛ́ĩ̀ Wálà-mìàa wa wɔ̃̀ maa, o Sɔ́ɔ̀ sí, o ló à ká Sízàlíà. Wa vɔ gbaa Táásà.
31Lúó e kília lɛ́ Wálà-mìà lɛ́ o kɛ Zùdíà, e bɛ̀i Gálàlíì ɛ̃́ɛ̃́ Sɛ̀mɛ́lìà lɛ̀ séĩ́ mɔ̀ɔ, o zò-yà-gé sɔ̀lɔ̀ ɓo à káa. O mɛ́ e gbɛ̃̀ gbaa, áà kɛ̀ gágà, ɛ̃́ɛ̃́ o kù e kɛ kɛpìà gbaa gbùò Gɛ̀ɛ̀ Púlú zì gbũ̀-o-mɔ̀ yí zàá, lɛ̀ o kɛ táápìà tùò ko Dàa-mì lɛ̀ɛ yí zàáa ká.
Pílɛ̀ e ló Lídà wà Zɔ́pà
32Pílɛ̀ e kɛ lópìà lɛ̀ séĩ́ mɔ̀. Lúó doó káa, e ló ɓɔɔ̀ Wálà-mìà lɛ́ o pɛ́lɛ lɛ́ ò si Lídàa yía píé. 33Pílɛ̀ e ɓɔ gɔ̃ lɛ́ ò si Ìníàa là à lɛ̀ mɔ̀. Gɔ̃́ e kília à dɔ-pɛ gaà e kɛá à mɔ̀. Aà kɛ̀ɛ̀ sálàka ɓo wɔ̀ɔ̀á tã́ã̀. 34Pílɛ̀ a gèe à lɛ̀ɛ, “Ìníà. Zízɛ̀ Kɛ́lɛ̀ì lɛ́ɛ̀ i la yáá kɛ̀lɛ̀. Wɛ̀lɛ̀ í ɓà kpĩ̀ĩ̀a pɛ̀ kɛ.” Nɔ́ zá lea, Ìníà e wɛ̀lɛ̀ gbaa. 35Mia séĩ́ lɛ́ o kɛ Lídà, wà Sɛ́ɛ́lɔ̃̀ɔ, o à gɛ̃̀. O bɛ̃̀ɛ̃, o nìɛ̀ gbaa ko Dàa-mì píé.
36Zízɛ̀ là tòà-píé-mì lɛ́ ò si Tábítàa, e kɛ pɛ́lɛ lɛ́ ò si Zɔ́pàa yí. Léé e kília tɔ́ e Gílíì-wè yía lɛ́ Dɔ́kà. À paà e kɛá wɔ̃́ yiè kɛɛ̀ ká. E kɛ gbũpìà mia yéĩ̀zɛ̀ mɔ̀. 37Lúó e kília káa, yáá a kṹ. E tó yáá e kília bà. O à bílí zúlú, o ló à ká, wa wɔɔ ká-yí-kà lɛ́ e kɛ lɛ̀í-kà yía wì. 38Zɔ́pà lɛ̀ɛ́ gbaa kɛ Lídà ká gbèĩ. Lɛ̀ lɛ́ tò-Zízɛ̀-píé-mìà lɛ́ o kɛ Zɔ́pàa, wa ma kélɛ̀ Pílɛ̀ lɛ Lídàa, o gɔ̃à pèèlɛ vɔ à píé wè-vɔ-wè e kéa ká. “Ƃà kpé lɛ sɛ̀. Ì i gã̀ kɛ táá mɔ̀ í ɓɔ ko mɔ̀.” 39Yé e kɛ kília, Pílɛ̀ e wɛ̀lɛ̀ gbaa, wà ye nì wáà lò. Lɛ̀ lɛ́ e ɓɔɔ, o à sí, o ló à ká lɛ̀í-kàa yí. Gã̀ã loà séĩ́ lɛ́ o kɛ yía, o sɔ̃́ à mɔ̀ gbóó ká, wáà wà dà-sɔ̀ ɛ̃́ɛ̃́ sɔ-là-sɔ̀ nì lɛ́ Dɔ́kà a kɛ, kɛ lɛ tĩã́ o píéa, zɔ̃̀ɔ̃̀ à lɛ̀ɛ. 40Pílɛ̀ e míá o kília o séĩ́ o gbɛ̃̀ pɛlɛí. E káá gbaa e kpuò là, áà sɛ̀nɛ ɓò. Pílɛ̀ e nìɛ̀ gbaa gɛ̀ɛ-bílía píé, áà gèè, “Tábítà, wɛ̀lɛ̀ í yà.” E e nyìɛ fóló. Lɛ̀ lɛ́ e Pílɛ̀ gɛ̃̀ɛ, e wɛ̀lɛ̀ e yà. 41Pílɛ̀ e e kɔ̀ yà à kɔ̀ wì, e gbũ à mɔ̀ é wɛ̀lɛ̀. Yé e kɛ kília, e Wálà-mìà wà gã̀ã loàa súo kɛ, e lééa nɔ gbaa o lɛ̀ɛ e ɓéèe ká. 42Wɔ̃́ e kéa dɔ̀ɔ̀ e wɛ̃̀ĩ Zɔ́pà lɛ̀ séĩ́ mɔ̀. Mia búnùzɛ̀ o o zò dɔ ko Dàa-mì mɔ̀. 43Pílɛ̀ e kɛ Zɔ́pà lúó búnùzɛ̀ píé. E kɛ gɔ̃ lɛ́ ò si Sáímɔ̀, lɛ́ e kɛ wìì kii sɔ́lɔ́-mì káa píé kɛ́ì.
Aktuálne označené:
Àpɔ́sɔ̀lɔ̀ 9: MNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Mann New Testament © Bible Society in Liberia, 1978.