Matius 8
8
Si Yesus sumama' si tou kusta
(Mrk. 1:40-45; Luk. 5:12-16)
1Kekawus i Yesus merosio' in tolaina, sé tou keli meréro-rérot makiit Sia. 2Wo mai ai Sia si esa tou kusta, kumundu en sumiri', icuana “Tuang, sa woo casalé' i Tuang, ro'na samaan i Tuang en sakitku.”
3Wo yulur i Yesus eng kama-Na e misu' si tou itu wo kumua, “Icasalé'-Ku, masama'o ko.” Asi témpo ituke' imasama'o eng kusta i tou itu.
4 #
Im. 14:2; Mrk. 1:44 Wo icua i Yesus ai sia, “Ta'néieno mangé, tioo icuamu en anio' a si séike' mangé, taan mangéo ipapaturu' en owakmu a si imam wo mééo mio' raragés binatang pinokol tanu si aiperénta i Musa, en itu tanu tuus ai séra.”
Si Yesus sumama' si ata i perwira Romawi
(Luk. 7:1-10; Yoh. 4:46-53)
5An tutuw i Yesus muntep ang Kapernaum, mai si esa perwira meta'up wo Sia, wo mekiupus, 6“Tuang, si ataku makatekel oka am balé ampa'paan ing késo', sia wenduo keli.”
7Icua i Yesus ai sia, “Maai oka Aku en sumama' sia.”
8Taan icua i perwira itu, “Tuang, ra'ica patus aku tumerima si Tuang am baléku, taan icuao mai esa nuwu'ke', tantu si ataku masama' oka. 9Ampa'paan yaku awéané' kikiiten sé maperénta yaku. Wo ka'i yaku awéan suraro sé paperéntanku. Sa peréntanku esaan asé suraro-suraro itu ‘Mangé!’, tantu sia mangé. Wo sa peréntanku si esa ‘Mai!’, tantu sia mai, kuma'pa ka'i a si ataku, ‘Tawoien si anio'!’, tantu tawoienna.”
10Kelinga in itu, si Yesus mangaya'ka' wo icua-Na ai séra sé makiit Sia, “En ulitna icua-Ku mangé ai camu, ra'ipé' kawisa ipeta'up-Ku em paémanen wangko' tanu si anio' mandé esake' tou an uner é tou Israel. 11#Luk. 13:29 Icua-Ku ai camu, kelian en tou maai oka a micona wo a makona owo en lumukut kuman mewali-wali wo si Abraham, Ishak wo si Yakub an untep ing Kakolanoan in Sorga. 12#Mat. 22:13, 25:30; Luk. 13:28 Taan kelian tou Yahudi sé musti woo mamualio tou i Amang Kasuruan tiya' oka ang kariréimbengan si riréimbeng keli. A mangé mbitu séra maamé' oka akar mengare-ngare'ket im baang.” 13Wo icua i Yesus a si perwira itu, “Maréngo mangé wo mamualio ai co tanu im paémanenmu.” An tutuw ituke' masama'o si atana itu.
Si Yesus sumama' si inang émpo i Petrus wo sé tou walina
(Mrk. 1:29-34; Luk. 4:38-41)
14Icateka' mangé am balé i Petrus, sérén i Yesus si inang émpo i Petrus makatekel ampa'paan in sakit paso'. 15Timboian-Na eng kama i wéwéné itu wo icatalao en sakit paso'na. Sia ka'i tumoor wo selewirenna si Yesus.
16An tutuw matawio im bengi, iwali éra mai waya a si Yesus sé tou rinasuk i sétang, wo ang karapi i makasake' numuwu' yusér-Na sé roh léwo' itu wo samaan-Na waya sé tou sumakit. 17#Yes. 53:4 En itu imamuali wosama' malekep en taar si aicua i nabi Yesaya, “Siao e muléng ing kalembianta wo tumanggong in sakitta.”
En andumoro' i mengakiit a si Yesus
(Luk. 9:57-62)
18An tutuw i Yesus suméré sé tou keli lumi'cir Sia, ru'du'-Na sé murit en lumewet angé in lour. 19Wo mai si makailek wutul in Torat wo kumua a si Yesus, “Guru, yaku kumiit oka si Guru, am bisake' en angéan i Guru.”
20Icua i Yesus ai sia, “Si serigala awéan wileng paento'an, taniitu ka'i sé burung awéan em parumunan. Taan si Toyaang i Tou ra'ica wana paento'an.”
21Wo awéan esa tou walina, esaan asé murit-murit i Yesus, kumua ai Sia, “Tuang, énanai mangéku icubur owo si amangku.”
22Taan icua i Yesus ai sia, “Kumiito mai Yaku wo iwayao mio' si tou imaté eng kumubur si tou imaté.”
En deges repet ayenteng i Yesus
(Mrk. 4:35-41; Luk. 8:22-25)
23Wo si Yesus sumaké an londéi wo kiiten ka'i é murit-Na. 24Tumarépé'anke', rumegesai en deges repet keli an lour itu, akar en londéi itu tawio tuminep, taan si Yesus kinakili'an. 25Wo mai sé murit-Na e molo Sia, Icua éra, “Guru, tawangenai, kita tawio maté.”
26Icua-Na ai séra, “Kéitu réén kamu maindé', éi camu sé ra'ipé' talos maéman?” Wo si Yesus tumulung wo peréntan-Na en deges wo en lour itu, akar en lour wutu-wutul malener.
27Sé tou itu ka'i mangaya'ka' wo kumua, “Tou tanu sapa réén Sia, akar en deges wo en lour ka'i kumiit im perénta-Na?”
Si Yesus sumama' sé rua tou sé rinasuk i sétang
(Mrk. 5:1-20; Luk. 8:26-39)
28An tutuw i Yesus icateka' an lewet in lour, an sangkum é tou Gadara, mai sé rua tou sé rinasuk i sétang ang kubur owo e meta'up wo Sia. Séra itu léwo' keli akar ra'ica wana mandé esake' tou em brani lumangkoi an lalan itu. 29Wo séra ka'i mangko', “Sapa en urusan-Mu wo icami, éi Toyaang i Casuruan? Mai-Mu réén okoien kami mandé ra'ipé' an témpona?”
30Ra'ica tayang ai séra itu, kelian ulit sé wawi ang karoro'an i maéré-éré kanen. 31Wo pangileken é sétang itu a si Yesus, “Sa yusér-Mu kami, iru'du'o mangé kami méra a sé reru' é wawi itu.”
32Icua i Yesus ai séra, “Mangém!” Wo kumesoto séra wo muntep a sé wawi itu. Sé reru' é wawi itu lumo'tic ang kepal wo muntep an lour wo maté an untep in dano.
33Wo sé matéir sé wawi itu tumincas angé ang kota, icateka' mangé ang kota, wo isisil éra waya eng kamamualian itu, wo ka'i andumoro' sé imamuali a sé rua tou sé rinasuk é sétang. 34Kelinga in itu, sé tou ang kota itu mangé meta'up wo si Yesus. An tutuw éra meta'upo, séra wutu-wutul mekiupus wosama' Sia tumela'u in sangkum éra.
Aktuálne označené:
Matius 8: TNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
En Taar Weru a nunuwu' é Tontemboan @ LAI 2018
