Matius 7

En andumoro' i maakim in tou

(Luk. 6:37-38, 41-42)

1“Tioo kamu mengaakim, wosama' kamu ra'ica akimen. 2#Mrk. 4:24Ampa'paan em pakaakim sé pengapakén iow i maakim sé tou, em pakaakim itu ka'i em pakén oka i Amang Kasuruan e makim icamu. Wo em paukur sé pengaukur iow a sé tou walina, siituo oka ka'i en yukur ai camu. 3Kéitu réén en awu ing kayu am beren i poowmu kaséréan iow, taan em balak am beren iow in esa, ra'ica kailekan iow? 4Tambisa réén kamu ro'na kumua a si poowmu, ‘Mayoo icesotku en awu ing kayu am berenmu’, taan awéan balak am beren iow? 5Éi tou punek! Icesot owo em balak am beren iow, wosama' ro'na kaséréan iow wutul eng kumesot in awu ing kayu am beren i poowmu itu.

6Tioo kamu mengakua in Taar i Amang Kasuruan a sé tou sé ra'ica kiim tumerima, en itu putéke' kamu méé im barang le'nas a si asu kuma'pa mangkil i mutiara a sé wawi. Pakasa en itu ipeléa-léak éra oka wo sumali'si' kumarét icamu.”

En andumoro' in sombayang

(Luk. 11:9-13)

7“Mangileko mangé, wo kamu wéan oka. Éréno, wo kamu makéré oka. Tuméngkoro, wo em papalen wukaan oka torona miow. 8Ampa'paan susur en tou i mangilek tumerima oka, wo susur in tou i mangéré makéré oka, wo susur in tou en tuméngkor im papalen wukaan oka. 9Awéan réén esaan tou ai camu e méé watu a si toyaangna, sa sia mangilek roti, 10kuma'pa méé ula', sa sia mangilek sera'? 11Anaé, sa kamu sé léwo' makailek mawéé sé loor a sé toyaang iow, wopé'taré si Amang iow an sorga! Iwéé-Na oka mai sé loor a sé tou sé imangilek ai Sia. 12#Luk. 6:31Sapa sé icasalé' miow émaan é tou walina ai camu, tanu siituo si musti émaan iow a sé tou itu. Siituo en sususuien ang kitap Torat wo ang kitap é nabi.”

En lalan si wutul

(Luk. 13:24)

13 # Luk. 13:24 “Muntepo mangé kumiit im papalen pesut. Em papalen welar wo en lalan wangko' maangé am papaté, wo kelian en tou muntep kumiit im papalen itu. 14Taan em papalen pesut wo en lalan pesut, maangé ang katouan akar ing kauré-uré wo wayake' im pira en tou sé kumiit am bitu.”

En andumoro' in sususuien si mengasélé'kow

(Luk. 6:43-44)

15“Maténga-téngamo mangé a sé nabi ra'ica wutul. Séra maai ai camu tanuoka domba, taan en ulitna séra itu serigala léwo'. 16Kailekan oka miow séra asi wuéna im pinengaéma' éra. Ro'na réén sé tou mupu' im bua'na in anggor an serawet owo kuma'pa wua'na in ara an dukut tutunéan owo? 17Anaé en tuura loor mawua' loor, taan en tuura ra'ica loor mawua' ra'ica loor. 18En tuura loor ra'ica kawisa mua' ra'ica loor wo en tuura ra'ica loor ra'ica kawisa mua' loor. 19#Mat. 3:10; Luk. 3:9 En tuura sé ra'ica mawua' loor, tantu tongkéien wo tiya' an api. 20#Mat. 12:33 Taniitu ka'i wo sé nabi ra'ica wutul. Katuusan oka miow séra asi wuéna im pinengaéma' éra.

21Ra'ica pakasa sé tou sé matowa Yaku, ‘Kasuruan, Kasuruan’, muntep oka ang Kakolanoan in Sorga, taan wayake' in tou sé mengaéma' ing kasalé'an i Amang-Ku an sorga. 22Asi endo kaka'puan ing kayo'baan, keli oka tou e matowa Yaku, ‘Kasuruan, Kasuruan, ra'ica réén ipakua ami en taar i Amang Kasuruan mapaké i ngaran-Mu, wo mausér sé sétang mapaké i ngaran-Mu, wo maéma' keli kakaya'kaan mapaké ka'i i ngaran-Mu?’

23 # Mzm. 6:9 Asi oras ituo, icua-Ku oka ai séra ang karapi ra'ica ipaene-enep, ‘Ra'ica katuusan-Ku kamu! Tumayango mangé an dior-Ku, kamu im baya sé mengaéma' ing kaléwo-léwo'an!’ ”

Si tou pandéi wo si tou bodok

(Luk. 6:47-49)

24“Anaé, si esa wo si esa tou sé iluminga in aicua-Ku anio' wo pengaémaanna, sia ipeputé wo si tou pandéi, si mangun im baléna am bawo im batu. 25Wo tumumpao mai en uran repet wo mayo en lewu, wo rumegeso mai en deges repet tumena im balé itu, taan em balé itu ra'ica rume'ba, ampa'paan em balé itu winangun am bawo im batu.

26Taan si esa wo si esa tou sé iluminga in aicua-Ku anio' wo ra'ica pengaémaanna, sia meputé wo si tou bodok, si mangun im baléna am bawo in dangi'ngis. 27Tumumpao mai en uran repet wo mayo en lewu, wo rumegeso mai en deges repet tumena im balé itu, akar em balé itu rume'ba wo ra'io icakua e maléwo'.”

Sé tou mangaya'ka' luminga in sususuien i Yesus

28 # Mrk. 1:22; Luk. 4:32 An tutuw i Yesus makasusuio, sé tou keli mangaya-ngaya'ka' luminga in sususuien-Na. 29Ampa'paan Sia mengasusui wuta ing kawasa, ra'ica tanu sé makailek wutul in Torat.

Aktuálne označené:

Matius 7: TNT

Zvýraznenie

Zdieľať

Kopírovať