Motíosi 16
16
Beseduseyéŋe na Befelisiéŋe bú úhene gieninye
(Mél 8.11-13; Lók 11.6,29; 12.54-56)
1Befelisiéŋe na Beseduseyéŋe go báyɛkɛna Yésusu. Go go mo dámbɛna, gáábɔ́ go mo úhune bá amɔ́ a ŋa gieninye gá gobékúke gɛ́ɛgɛ gɛ́ dúfenyemú goŋaá ɛ ɛ́damɔ́ go úlene naá Asaŋa. 2Gɛ́hɛ́ go bó gundie a amɔ́: «Aŋa hɛɔbɔ́bɔ́ɔ hɛ́ obamɔ́, no oya no amɔ́: “Gɛcamɛna gɛ́ gaá bɛ́ɛ́mbá bese, goakɛ́ mpólómɛnáa ɛ lɛ́ síéŋí sieŋi#16.2 Gɛca gá Ŋgɔ́ŋɛ́ sá cóá cóá gɛ́ dɛ bɛanánáa dogálɔ dá Yésusu naá gig 2 na 3..” 3Na gɛyɛ́nɛ́ túlúbú, no amɔ́: “Nobólá nó gaá naáa ínoni, goakɛ́ mpólómɛnáa ɛ lɛ́ cumbúlulu.” No íyimene go falona aáŋa nobólá nó gaá naáa ɛ́na nó do gaá naáa; kanɛ́ golɛnca gá moóma mɔ́ɔmɔ mó bádómbanamɔ́ go medúgú má ínoni, no do báhódánáa.» 4Yésusu go bó gundie a amɔ́: «Batɔ bá ínoni báaba bá lɔ́mɔ́ bahándá, bá fíidenye Asaŋa nnyimé, bú úhene gieninye gá gobékúke; bá dɛ gaá bɛáa gieninye gá gobékúke gíncoó, bó do dómbáa gɛ́ɛgɛ gá Yónasɛ.» Gɛ́hɛ́ go síe a báá bó góná hɔ́ɔlɔ́, a báá dómbá.
Ondɔ yá go fudugenye uguŋe yá Befelisiéŋe
(Mél 8.14-21; Lók 12.1-6)
5Behúúní bá mba bófoolío go gɔ́lɔ bɛlɛ́dɛ aŋa bá mbaá bácaáa naá cɔ́lɔ boayá búunú. 6Yésusu a amɔ́ gáábɔ́ a amɔ́: «Bébeŋéemú nɔnɔ bese go ondɔ yá go fudugenye uguŋe yá Befelisiéŋe na Beseduseyéŋe!» 7Behúúní go ɛ́da go bágálɛnagalɛna bá amɔ́: «A gálagalamɔ́ náana go goŋaá dɛ dɛ báá gɔ́lɔ bɛlɛ́dɛ.» 8Yésusu go lɛnca boóma bɔ́ɔbɔ bá mbaá lɔmɔ́ bá bágálɛnagalɛna, go bó úhune a amɔ́: «Batɔ bá gioliminyo fágɔfágɔ báaba, goakɛ́ mbééníŋínyí ya goŋaá dɛ dɛ báá gɔ́lɔ bɛlɛ́dɛ ɛ lɔ́mɔ́ naá ɛdɛ́má yɛnyɔ́ o? 9No gá lɛ́ no do ɔ́bɔ́ lí? No do gɔnɔ́ béeniŋenye bɛlɛ́dɛ bɛ́táanɔ bɛ́ɛbɛ no mbaá abánáa batɔ banɔ́mɔtɔ́ batɔ́sɛnɔ batáanɔ na ombanɔ yá ncada sɛ́ɛsɛ no mbaá gúlúgé na sɛ́ o? 10Gó gunde no do gɔnɔ́ béeniŋenye bɛlɛ́dɛ bɛ́táanɔ na bɛ́andɛ́ bɛ́ɛbɛ no mbaá abánáa batɔ banɔ́mɔtɔ́ batɔ́sɛnɔ bénni na ombanɔ yá ncada sɛ́ɛsɛ no mbaá gúlúgé na sɛ́ o? 11Nɛɛ́nɛ no lɔ́mɔ́ no do ɔ́bɔ́nɔ́ɔ goŋaá cɛ báá lɛ kálagala gɛsɛnɛ gá bɛlɛ́dɛ gɔ́ɔgɔ mbáá ná gálɛ́dá caá: Bébeŋéemú nɔnɔ kanɛ́ go ondɔ yá go fudugenye uguŋe yá Befelisiéŋe na Beseduseyéŋe!» 12Gɔ́ɔ behúúní bá lɛncamɔ́ goŋaá a dɛ mbá bó gálɛda go ondɔ yá go fudugenye uguŋe, kanɛ́ go bɔ́ɔbɔ Befelisiéŋe na Beseduseyéŋe bá mbaá lɛ bá húunenye.
Píele o ó oyɛ́dá a amɔ́ Yésusu a lɛ́ Kilítusu
(Mél 8.27-30; Lók 9.18-21)
13Yésusu go ɛ́da naá gigísi gá cí gá Sɛsalɛ́ɛ ba Filípe; gɛ́hɛ́ go úhune behúúní bɛ́hɛ́ a amɔ́: «Batɔ bó oyamɔ́ bá amɔ́ nɛɛ́nɛ go busío bá Moɔnɔ́ ba mɔtɔ o?» 14Behúúní go gundie bá amɔ́: «Báaba bó oya bá amɔ́ o lɔ́mɔ́ Sáŋa Begiyuminye; bóncodío bá amɔ́ o lɔ́mɔ́ Elíi; bóncodío bá amɔ́ o lɔ́mɔ́ Selemíi ɛ́na lí mbúsí ya Asaŋa incoó.» 15Yésusu go bó úhune a amɔ́: «Kanɛ́ bɛɛnyɔ́ɔ, no oyamɔ́ no amɔ́ ndɔ́mɔ́ ánɛ́ɛ o?» 16Símono Píele a á gɔ́lɔ́ dogálɔ, go mo gundie a amɔ́: «O lɔ́mɔ́ Kilítusu, Moɔnɔ́ ba Asaŋa ogɔ́sɔ.» 17Gɔ́ɔ Yésusu a mo gundiemú a amɔ́: «O lɛ́ bese makɔ́nɔ́, maamɔ́ɔ Símono, ohaŋa ba Yónasɛ, goakɛ́ caá akɛ́ mɔtɔ mɔ́ɔ a báá ná go dúfíe mammana yɛ́ɛyɛ, kanɛ́ a lɔ́mɔ́ Baaba mɔ́ɔnyɔ naá mmoɛná. 18Kɔ́ɔ yɔmɔ́ɔ ko oyanamɔ́ daŋɛ́daŋɛ caá, o lɔ́mɔ́ Píele, nɔ́ɔnɔ gó lɛ́ aá gɛdánɛ́dánɛ́. Gɔ́ɔ nná dábɛgamɔ́ yɔmɔ́ Giimbó gá boolímínyí kɔ́ɔ#16.18 O bana, go eninye na Ɛ́fɛsɛ 2/20.. Akɛ́ bogaaga bá nigúe bó do ná ŋa boóma na gɛ́. 19Nná go fáa mubuune má Bufuŋe bá mmoɛná; buimée bɔ́ɔbɔ o ŋgaá gódá naá cí, bá ŋga bó gódá naá mmoɛná, kɔ́ɔ buimée bɔ́ɔbɔ o ŋgaá fulúné naá cí, bá ŋga bó fulúné naá mmoɛná#16.19 O bana, go eninye na 18.18; Sáŋ 20.23..» 20Gɔ́ɔ Yésusu a lɔsɛnɔmɔ́ behúúní bɛ́hɛ́ na mbébégidine a amɔ́ bá dɛ hóámá bá dɛ oyáná mɔtɔ bá amɔ́ a lɛ́ Kilítusu.
Yésusu a á dóógío nigúe nɛ́hɛ́ na púfuge yɛhɛ́
(Mél 8.31-33; Lók 9.22-27)
21Gó dúme hɔ́ɔlɔ́, Yésusu go ɛ́da go oyanɛna behúúní bɛ́hɛ́ daŋɛ́daŋɛ a amɔ́: «Gó háanana goŋaá ŋgɛ́da naá Yolósalɛmɛ. Nná lumene na gɛɔ́bɛgɔ makɔ́nɔ́ hɔ́ɔ naá ɛmbɔ́gɔ ya bafɛanɔ́ɔ bá gɛdɔŋɔ, mefuŋe má bedúmbí bɛbáágá naá Asaŋa, na muloodio má gicele. Batɔ bá ná ŋgóna, ndɛ go fúfuge naá nnyimé ya medúgú mádadɔ́.» 22Píele go gɔ́gɛdɔ Yésusu go boayá go ɛ́da go mo goomanɛna a amɔ́: «Daadáa, ŋgáa Asaŋa a go beŋe! Boóma bɔ́ɔbɔ go oyamɔ́ bɔ́ɔbɔ, bó do gaá go bolɛ́ná.» 23Kanɛ́ Yésusu a á bábondóná, go oyana Píele a amɔ́: «Tɔ́ŋɔ́mɛ́dɛ́náamɔ́ háalá! Sátana, dómbá naá nnyimé yamɛ! O lɛ́ gikumí naá pɛ́ yamɛ ya bosɔ́mɔ, mammana, mbééníŋínyí sáhɔ sɛ́ dɛ bósó sá Asaŋa, sɛ́ lɔ́mɔ́ sá batɔ.»
Goŋaá ó ba biené Yésusu
(Mél 8.34—9.1; Lók 9.23-27)
24Gɔ́ɔ Yésusu o oyanamɔ́ behúúní bɛ́hɛ́ a amɔ́: «Aáŋa mɔtɔ a lɛ́galɛga go mbiene, ŋgáa a dɔmbɔ go ɔyɔ go gɛ́hɛ́ moatɛ́, a kélemene bɛdɔmbɔ a mbiene. 25Mammana, mɔtɔ mɔ́ɔnyɔ a lɛ́galɛgamɔ́ go sódio gɛɔyɔ gɛ́hɛ́, a ná gɛ́ yímie; kanɛ́ mɔ́ɔnyɔ a ŋgaá yímíe gɛɔyɔ gɛ́hɛ́ go busío bámɛ, a ŋga gɔnɔ́ gɛ́ bɛa. 26Mɔtɔ a amɔ́ a bóda cí iŋkimée, a soa obɔ moánɛ na gɛɔyɔ gɛ́hɛ́, kasɛ́á besé a lɔ́mɔ́ ba go dáŋaba o? Ɛ́na gɔnɔ́, boóma bó lɛ́ hɔ́ɔ bɔ́ɔbɔ mɔtɔ a lɔ́mɔ́ ba go íŋene go go fáŋa gɛɔyɔ gɛ́hɛ́ o?
27«Mammana, Moɔnɔ́ ba mɔtɔ a ŋgu úlé naá bugúmigumi bá Isée, olɔŋɔ na bɛɛ́ŋgɛlɛsɛ bɛ́hɛ́, a lɛ go ɛ́da go fáanana onyɔ moánɛ aŋa mbɔ́dɔ yɛhɛ́ ya go yɔgɔnɔ#16.27 O bana, go eninye na Ɛsagɔ 62.13; na Olóma 2.6.ɛ lɔ́mɔ́. 28Mammana, ŋgaá nyó oyáná caá, batɔ bóntió naá báaba bá lɔ́mɔ́ háalá, bá dɛ ŋgá gúenene kanɛ goŋaá bɛ́ ɛ́ ɛ́ná Moɔnɔ́ ba mɔtɔ u úlene naá odɛ́nɛ́ yá ufuŋe.»
Aktuálne označené:
Motíosi 16: YAS
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
