Motíosi 15
15
Yésusu na Befelisiéŋe bá suŋene suŋene
(Mél 7.1-13)
1Gɔ́ɔ nɛnamá ná Befelisiéŋe na nɛnamá ná muloodio má gicele bɛ́ ɛ́damɔ́ fadɛgɛna naá Yolósalɛmɛ go nco gíde Yésusu, go mo úhune bá amɔ́: 2«Go busío báakɛ́ behúúní báhɔ bá lɔ́mɔ́ bá dɛ bienénée caŋa sá biisée bɛ́cɔ́? Mammana, bá dɛ dóánánáa go básoga ɛmbɔ́gɔ otóotoɛ yá go ɛ́da go manyáanya#15.2 O bana, go eninye na Lók 11.38..» 3Yésusu go bó baga a amɔ́: «Bɛɛnyɔ́ɔ moatɛ́, ɛkádɛ́ no dómbanɛnamɔ́ gɛlɔsɛnɔ gá Asaŋa go go ɔyɔ aŋa caŋa sá biisée bɛ́nyɔ́ sɛ́ oyamɔ́ o? 4Asaŋa a mbo oyɛ́dá a amɔ́: “Hálámána tɛ́ɔ na yigúédíi”, gɔnɔ́: “Mɔ́ɔnyɔ a yɔmɛnɔmɔ́ isée ɛ́na nnyeedíi, noséésényée nɛ́hɛ́ nó lɔ́mɔ́ nigúe#15.4 O bana Gihúmie 20.12; ya Bicele 5.16, tɔ́nɔ ya Léfi 20.9.”. 5Kanɛ́ bɛɛnyɔ́ɔ no oya no amɔ́: “Mɔtɔ uŋkimée mɔ́ɔnyɔ o oyanamɔ́ isée ɛ́na nnyeedíi a amɔ́: gidúgune gɛ́ɛgɛ ŋgaá ná lɛ́ bá go go fáa gɛ́ lɛ́ gɛbáágá gɛ́ɛgɛ gɛ́ lɔ́mɔ́ fonáalú. 6Mɔtɔ mɔ́ɔnyɔ a dɛ báá gɔnɔ́ naá gɛgaŋa gá go hálamana isée#15.6 IséeŊgɔ́ŋɛ́ síncodío sɛ́ bɛanana Isée ɛ́na nnyeedíi.”. Nɔ́ɔnɔ, no á fúgúné gicele gá Asaŋa go go ɔyɔ aŋa caŋa sá biisée bɛ́nyɔ́ sɛ́ oyamɔ́. 7Bekuilí báaba! Mbúsí ya Asaŋa Iseyíi ɛ mba gálágáláa mammana gɔ́ɔgɔ ɛ mbaá lɛ yɛ oya go busío bɛ́nyɔ́ yɛ amɔ́:
8Asaŋa a amɔ́: “Boɛ́nɔ bɔ́ɔbɔ bó mbúlugenye goana na nyuudé, kanɛ́ odɛ́má yábɔ́ yó lɛ́ halaháláa namɛ.
9Mbúlugie yabɔ́ go busío bámɛ ɛ lɛ́ godugúnú, goakɛ́ bicele bɛ́ɛbɛ bá húunenyemú bɛ́ lɔ́mɔ́ bɛ́ɛbɛ bá batɔ moatɛ́ go báágɛnana#15.9 O bana Iseyíi 29.13, bó lɔ́mɔ́ nɔ́ɔnɔ naá nogɛlɛ́gɛ ná cóá..”»
Moóma mɔ́ɔmɔ mó díeŋenyemú mɔtɔ naá oŋgíso yá Asaŋa
(Mél 7.14-23)
10Gɔ́ɔ Yésusu a gɔnɔmɔ́ dɔ́ŋɛnɔ gitúu gá batɔ a amɔ́ gáábɔ́ a amɔ́: «Bódólígínyóomú nɔnɔ no gunde no ɔ́bɔ. 11Caá akɛ́ bɔ́ɔbɔ bó íŋenenemú naá nyuudé ná mɔtɔ bɔ́ bó mo áganamɔ́ biílo naá oŋgíso yá Asaŋa; kanɛ́ bó lɔ́mɔ́ bɔ́ɔbɔ bó húmenemú naá nyuudé nɛ́hɛ́ bɔ́ bó mo áganamɔ́ biílo naá oŋgíso yá Asaŋa.»
12Kɔ́ɔ behúúní bá mo báyɛkɛnamɔ́ bá amɔ́ gɛ́hɛ́ aá: «Go íyimene go amɔ́ aŋa Befelisiéŋe bá báá nɔ́ ɔ́bɔ́ dogálɔ dɔ́ɔdɔ, bó báá bó séesenye makɔ́nɔ́ o?» 13Yésusu go bó gundie a amɔ́: «Bogónɛ́dá buimée bɔ́ɔbɔ Baaba mɔ́ɔnyɔ a lɔ́mɔ́ naá mmoɛná a lɔ́mɔ́ kanɛ go bó góna, bá ŋga bó bálá. 14Kanɛ́ bó dɛ́ɛ́náamɔ́ nɔnɔ: bá lɛ́ begélígeli báaba bá gɔ́gɔmɔ́ basɔ́gɔ́ɔ begélígeli. Hálá kanɛ́, ugélígeli a amɔ́ a gɔ́gɔ sɔ́gɔ́ɔ ugélígeli, bá goó obɛ́ná bɔ́ɔ biimée báandɛ́ naá gɛbɛ́lábɛ́lá!»
15Píele go gɔ́lɔ dogálɔ go oyana Yésusu a amɔ́: «Có falónɛ́náamɔ́ gɛlalaga gá ncaba gɛ́ɛgɛ.» 16Yésusu a amɔ́: «Bɛɛnyɔ́ɔ no gá lɛ́ tɔ́nɔ kanɛ nciŋí o? 17No do bósó go íyimene goŋaá buimée bɔ́ɔbɔ bó íŋenemú naá nyuudé ná mɔtɔ bó dómbana naá ɛsɔdɔ, naá nnyimé bó húme bó ɛ́da naá gɛbɛ́lábɛ́lá o? 18Kanɛ́ bɔ́ɔbɔ bó húmenemú naá nyuudé bó úlenemú naá odɛ́má, bɔ́ɔbɔ moánɛ bɔ́ bó áganamɔ́ mɔtɔ biílo naá oŋgíso yá Asaŋa. 19Kɔ́ɔ, naá odɛ́má yá mɔtɔ gɔ́ɔ bɛgáda bá mbééníŋínyí bɛ́ úlenemú hɔ́ɔ, bɛ́ bɛ́ mo dómanamɔ́ go go óna batɔ, go go ŋanana gɛdáŋa na go fídene gɛɔyɔ gá hanyɔ́, go go íbene, go go bude ufíno yá sɔ́gɔ́ɔ, go go gálagala gá basɔ́gɔ́ɔ nnyimé nnyimé. 20Moóma mɔ́ɔmɔ mɔ́ mó áganamɔ́ mɔtɔ biílo naá oŋgíso yá Asaŋa; kanɛ́ gonyáanya kanɛ go básoga ɛmbɔ́gɔ gó do bósó go ágana mɔtɔ biílo naá oŋgíso yá Asaŋa.»
Gioliminyo gá giinyí giinyí gá okɔ́dɔ
(Mél 7.24-30)
21Kɔ́ɔ Yésusu u úlukiemú hɔ́ɔlɔ́, gɛ́hɛ́ go ɛ́da naá gigísi gá cí gɛ́ɛgɛ mekúígíi na tɛ́sɔnɔ sá Tíile na Sídono. 22Okɔ́dɔ ummue ba gɛdɔŋɔ gá Kanáana#15.22 Okɔ́dɔ mɔ́ɔnyɔ, akɛ́ a dɛ bɛ́ɛ́mbá ba Beyúdene, bó do báá goŋaá a dɛ mbɔ́ ɔ́bɔ bá gálagala go mɔtɔ ummue bá amɔ́ Yésusu., mɔ́ɔnyɔ a mbaá lɛ ɔ ɔyɔ naá gigísi gá cí moánɛ go úle anáa Yésusu a mbaá lɛ, go ɛ́da go ánca a amɔ́: «Ŋgɛ́náamɔ́ mahana, Daadáa, Moɔnɔ́ bá Défidi! Gɛbɛ́ gá giliíli gɛ́ génegenye ombóla bamɛ makɔ́nɔ́.» 23Yésusu a lɛ́ kanɛ go mo gundie boóma. Kɔ́ɔ behúúní bɛ́hɛ́ bá mo báyɛkɛnamɔ́, bá amɔ́ gɛ́hɛ́ aá: «Gundíe okɔ́dɔ mɔ́ɔnyɔ na nnyimé#15.23 «Gundíe okɔ́dɔ mɔ́ɔnyɔ na nnyimé»: gokikilidie gúncodío gó lɔ́mɔ́Mo ŋɛnamɔ́ (mo fáamɔ́) bɔ́ɔbɔ ɔ ɔŋɔnɔmɔ́., goakɛ́ ɛ ɛ́dana naá busío a có bienene na go ánca.» 24Gɛ́hɛ́ go gundie a amɔ́: «Baaba a lɔ́mɔ́ tómáalú goana go bɛdómbáa bá boɛ́nɔ bá Ɛ́sɛlahɛ́ɛlɛ bɛ́ɛbɛ bɛ́ mbaá yímé#15.24 Go eninye na 10.5-6..» 25Kanɛ́ gɔ́ɔ okɔ́dɔ mɔ́ɔnyɔ a ncomɔ́ gule enúu naá busío bɛ́hɛ́ a amɔ́: «Daadáa, ŋgoyóomú!» 26Yésusu go mo gundie a amɔ́: «Gó do fɛanánáa go gɔ́lɔ gɛlɛ́dɛ gá baábayɔ́ o fáa baaná bá mbóa.» 27Okɔ́dɔ a amɔ́: «Daadáa, bó lɛ́ mammana. Hálá kanɛ́, baaná bá mbóa bá bédúgemú na pumbú sá bɛlɛ́dɛ sɛ́ɛsɛ sɛ́ balagadanamɔ́ go cí ya tábɛ́la ya bagɔ́nɔ́ɔ bá sɛ́.» 28Kɔ́ɔ Yésusu a mo gundiemú a amɔ́: «Okɔ́dɔ, gioliminyo gáhɔ gɛ́ lɛ́ gɛkɔ́nɔ́nɔ́ɔ! Ŋgáa bɔ́ɔbɔ o lɛ́galɛgamɔ́ bó báŋa nɔ́ɔ!» Ombóla bɛ́hɛ́ go dómba go éŋuge naá gigúlí gá ndiemi.
Yésusu e éŋugenye bitúu bitúu bá bɔgɔnɔ́gɔnɔ
29Yésusu u úlúkíe hɔ́ɔlɔ́, gɛ́hɛ́ go ɛ́da naá cɔ́lɔ ya máŋɛ́ má Gelilée. A á bólɛ́gá gɛɛnɛ, gɛ́hɛ́ go lukumene. 30Kɔ́ɔ bitúu bitúu bá batɔ bɛ́ ɛ́damɔ́ go mo úlenine na banɛ́mɔnɛmɔ, begélígeli, batɔ bá go cɔndɔ, bimmúke na bɔgɔnɔ́gɔnɔ gɔnɔ́ bóntió gɛca. Bá báa lɛ gó nco bó dɛ́ɛnana naá bɛgɔ́ndɔ́ bá Yésusu, a bó éŋugenye. 31Batɔ go ɛ́da go békúke makɔ́nɔ́ aŋa gɔ́ɔgɔ bá mbaá lɛ bɛ́ ɛ́nana bimmúke bɛ́ gálagala, batɔ bá go cɔndɔ bá gundene bese, banɛ́mɔnɛmɔ bɛ́ ɛnda, begélígeli bɛ́ ɛ́nanɛna. Gɔ́ɔ bitúu bitúu bá batɔ bɛ́ɛbɔ bɛ́ ɛ́damɔ́ go búlugenye Asaŋa ba Ɛ́sɛlahɛ́ɛlɛ.
Yésusu a á nyéényényée batɔ batɔ́sɛnɔ bénni
(Mél 8.1-10)
32Gɔ́ɔ Yésusu a dɔ́ŋɛnɔmɔ́ behúúní bɛ́hɛ́, go bó oyana a amɔ́: «Ŋgɛ́nana gɛcɛcá gá batɔ gɛ́ɛgɛ mahana, goakɛ́ medúgú mádadɔ́ mámáa bá lɔ́mɔ́ namɛ, bá dɛ bɛanánáa boóma bá go nyáa. Cɛ lɛ́gálɛ́gáa go bó gúlugie na ncaná; bá lɛ́ ba go yɛ́mɛlɛda go pɛ́ na yɛ́.» 33Behúúní go mo oyana bá amɔ́: «Bɛɛcɔ́ɔ bábáa halaháláa na gɛdɔŋɔ, dɛ gaá ná gɔ́lɔ́ manyáanya má ŋaá má háa go go dúge bitúu bitúu bá batɔ bɛ́ɛbɛ áhanɛ́ɛ o?» 34Gɛ́hɛ́ go bó úhune a amɔ́: «No lɛ́ na bɛlɛ́dɛ bínikíi hɔ́ɔlɔ́ o?» Gáábɔ́ go mo gundie bá amɔ́: «Bɛ́ lɛ́ bɛ́táanɔ na bɛ́andɛ́ na baaná bá moɔbɔ́.» 35Gɔ́ɔ o oyanamɔ́ batɔ goŋaá bá lukumenene go cí, 36mɔ́ɔ go gɔ́lɔ bɛlɛ́dɛ bá bɛ́táanɔ na bɛ́andɛ́ na moɔbɔ́, a báá béhiigí Asaŋa, go bɛ́ gɛ́sa, i íŋenene behúúní bɛ́hɛ́, bá abana gitúu gá batɔ. 37Batɔ biimée go nyáanya bá báá hóógío. Bigísi bá bɛlɛ́dɛ bɛ́ɛbɛ bɛ́ mbaá síénénée, bá báá gɔ́lɔ́ bá báá gundé na bɛ́. Bɛ́ mba lɛ́ bɛ́ hóogono ncada ɛ́táanɔ na ɛ́handɛ́ dácɛ dácɛ. 38Batɔ báaba bá mbaá nyáányáa ombanɔ yábɔ́ yó mba lɛ́ banɔ́mɔtɔ́ tɔ́sɛnɔ ínni, kanɛ go bana bakɔ́dɔ na baábayɔ́. 39Naá nnyimé ya Yésusu go gúlugie bitúu bitúu bá batɔ, gɛ́hɛ́ go bólɛga naá gilué go ɛ́da naá gigísi gá cí gá Magadána#15.39 Magadána: bá dɛ íyi hoóma háaha. Naá Ŋgɔ́ŋɛ́ síncodío, bá há dɔ́ŋɔnɔ bá amɔ́ Magadaláa..
Aktuálne označené:
Motíosi 15: YAS
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
