Johani 8

Ʉnkiikʉlʉ ʉjʉ akoliigwe mbʉlogwe

1Looli Jesu alɨnkʉsookamo ndʉpaso ʉlwa tempeli, alɨnkʉbʉʉka pabʉjo ʉbʉ bikʉtɨ ɨKyamba kya Misyʉngʉtɨ. 2Nʉlʉbʉnjʉ bo bʉkiile, alɨnkʉbʉʉka kangɨ alɨnkwingɨla ndʉpaso ʉlwa tempeli. Abandʉ boosa balɨnkʉbʉʉka kʉmyake, po alɨnkʉtʉʉgala nʉ kwanda ʉkʉbamanyisya. 3Abamanyisi baa ndagɨlo sya Moose#8:3 Abamanyisi baa ndagɨlo sya Moose Bala kʉ Ɨsyakʉlɨngaania. na Bafalisai, balɨnkʉntwala kʉmyake ʉnkiikʉlʉ jʉmo ʉjʉ aakoliigwe mbʉlogwe, balɨnkʉmmbɨɨka pakatɨ pa kɨlʉndɨlo ɨkya bandʉ. 4Po balɨnkʉmmbʉʉla Jesu balɨnkʉtɨ, “Gwe Mmanyisi, ʉnkiikʉlʉ ʉjʉ akoliigwe bo alɨ pakʉlogwa. 5Moose, ʉkʉkongana nɨ ndagɨlo syake, aatʉlagiile ʉkʉnngoga ʉnkiikʉlʉ ʉgwa lʉko ʉlʉ, kʉ njɨla ɨjaa kʉntuunya na mabwe.#8:5 Bala kalata gwa Abanyaleebi 20:10; Ʉkʉkʉmbʉka Ɨngomeelesyo 22:22-24. Po ʉgwe kʉtɨ fiki?” 6Abeene baalɨnndaalʉʉsiisye bo ʉlo ʉkʉnngela, ʉkʉtɨ bajaage ɨnjɨla ɨjaa kʉnsitaaka. Looli Jesu alɨnkwinama alɨnkʉsimba nʉ loobe lwake paasi pa mfu. 7Bo bikwendelela ʉkʉnndaalʉʉsya, Jesu alɨnkwɨma alɨnkʉbaamula alɨnkʉtɨ, “Lɨnga alipo jʉmo pakatɨ pamyɨnu, ʉjʉ akabombamo sikʉ ʉbʉtʉlanongwa, jo aje gwa kwanda ʉkʉntuunya ni ibwe ʉnkiikʉlʉ ʉjʉ.” 8Po Jesu alɨnkwinama kangɨ paasi, alɨnkʉsimba pa mfu.

9Bo bapɨliike ɨsyo, balɨnkwanda ʉkʉsookapo jʉmoojʉmo, ʉkwandɨla abakangale mpaka abalʉmyana. Kʉmmalɨɨkɨsyo Jesu alɨnkʉsyala mwene nʉ nkiikʉlʉ jʉla, ʉjʉ aalyɨmile nkyeni mmyake. 10Po Jesu alɨnkwɨma, alɨnkʉnndaalʉʉsya alɨnkʉtɨ, “Jʉʉba, balɨ kʉʉgʉ aba bikʉkʉsitaaka? Bʉle, akajapo najʉmo ʉjʉ asyele ʉkʉtɨ akʉlonge?” 11Alɨnkwamula alɨnkʉtɨ, “Gwe Ntwa, akajapo najʉmo.” Po Jesu alɨnkʉmmbʉʉla alɨnkʉtɨ, “Na niine ndikʉkʉlonga. Bʉʉkaga, looli ʉkwandɨla ʉmwisyʉgʉ, ʉlɨngatʉlaga kangɨ ɨnongwa.”]#8:11 Baakalata bamo abaa ijolo bakaja nʉ tʉnandɨ ʉtʉ 7:53–8:11.

Jesu jo lʉmuli lwa kiisʉ

12Po Jesu alɨnkwendelela ʉkʉjoba kangɨ nɨ kɨlʉndɨlo kɨla alɨnkʉtɨ, “Ʉne ndɨ lʉmuli kʉ bandʉ abaa pakiisʉ. Ʉmundʉ gwesa ʉjʉ ikʉngonga ʉne, atikwisa kwendamo sikʉ mu ngiisi, looli ikʉjaga nʉ lʉmuli ʉlʉ aalukʉnndongosyaga mbʉʉmi bwa bwila na bwila.” 13ABafalisai balɨnkʉmmbʉʉla Jesu balɨnkʉtɨ, “Ʉgwe kwisisimɨkɨsya gwimwene, ɨsi kʉjoba sikaja sya kʉsʉʉbɨligwa.” 14Jesu alɨnkʉbaamula alɨnkʉtɨ, “Nalɨnga ngwisisimɨkɨsya jʉjʉʉne, ɨsi ngʉjoba sya nalooli, paapo mmeenye kʉno mfumile, kangɨ mmeenye kʉno ngʉbʉʉka. Looli ʉmwe mukamanya kʉno mfumile na kʉno ngʉbʉʉka. 15Ʉmwe mukʉʉndonga ʉne ʉkʉkongana nʉ tʉndʉ ʉtʉ tukʉboneka, looli ʉne ndikʉnndonga najʉmo. 16Leelo lɨnga ʉne ngʉnndonga ʉmundʉ, ngʉnndonga kʉ bʉgolofu, paapo ndikʉja niimwene, looli ngʉja na Taata ʉjʉ andʉmile. 17Mu ndagɨlo syɨnu sisimbiigwe ʉkʉtɨ, ʉbʉkeeti ʉbwa bandʉ babɨlɨ, bukʉsʉʉbɨligwa ʉkʉja bwa nalooli.#8:17 Bala kalata gwa Ʉkʉkʉmbʉka Ɨngomeelesyo 17:6; 19:15. 18Kʉ njɨla ɨjɨ ʉne ngwisisimɨkɨsya jʉjʉʉne, na Taata ʉjʉ andʉmile jo nkeeti gwangʉ.”

19Po aBafalisai balɨnkʉnndaalʉʉsya Jesu balɨnkʉtɨ, “Bʉle, ʉGʉʉso alɨ kʉʉgʉ?” Jesu alɨnkʉbaamula alɨnkʉtɨ, “Mukaamanya ʉne, joope Taata mukammanya. Lɨnga mwalɨɨmeenye ʉne, po mwabagiile ʉkʉmmanya Taata.” 20Jesu aajobile ɨsyo syosa bo alɨ pakʉmanyisya ndʉpaso lwa tempeli, pabʉjo ʉbʉ baabɨɨkangapo amabokosi agaa ndalama. Looli akaaliko ʉmundʉ ʉgwa kʉnkola, paapo akabalɨlo kaake kaakaalɨ ʉkʉfika.

Jesu ikʉjoba ɨsya bʉfwe bwake

21Po Jesu alɨnkʉbabʉʉla kangɨ aBafalisai bala alɨnkʉtɨ, “Ʉne nsumwike, ʉmwe aamukʉʉndondaga, looli aamukʉfwa kʉnongwa jaa bʉtʉlanongwa bwɨnu. Ʉmwe mukabagɨla ʉkwisa kʉno ngʉbʉʉka.” 22Po balɨnkwanda ʉkʉlaalʉʉsania balɨnkʉtɨ, “Fiki ikʉjoba ʉkʉtɨ tʉkabagɨla ʉkʉnkonga kʉno ikʉbʉʉka? Kalɨ, ikʉbʉʉka kʉkwigoga?” 23Jesu alɨnkwendelela ʉkʉbabʉʉla alɨnkʉtɨ, “Ʉmwe mufumile paasi apa, looli ʉne mfumile kʉmwanya. Ʉmwe mulɨ baa pakiisʉ apa, looli ʉne ngaja gwa pakiisʉ apa. 24Jo nongwa ɨjɨ mbabʉʉlile ʉkʉtɨ aamukwisa kʉfwa kʉnongwa jaa bʉtʉlanongwa bwɨnu. Po lɨnga mutikʉʉnyiitɨka ʉne ʉkʉtɨ jo jʉʉjo,#8:24 Mutikʉʉnyiitɨka ʉne ʉkʉtɨ jo jʉʉjo Apa Jesu ikwijoba bo muno Kyala ikwijobela nDwitɨkano ʉLʉkʉʉlʉ. Bala kalata gwa Ʉkʉsooka 3:14; Jeesaja 43:10. aamukwisa kʉfwa kʉnongwa jaa bʉtʉlanongwa bwɨnu.”

25Po balɨnkʉnndaalʉʉsya Jesu balɨnkʉtɨ, “Tʉbʉʉle ʉgwe gwe gwani?” Jesu alɨnkʉbaamula alɨnkʉtɨ, “Ʉkʉfuma kʉbwandɨlo bo ngʉmanyisya, mbabʉʉlile ʉkʉtɨ ʉne ne ani. 26Ndɨ nasyo nyingi ɨsi naabagiile ʉkʉbajoba nʉ kʉbalonga ʉmwe, looli ndikʉbomba bo ʉlo. Paapo ʉne ngʉbabʉʉla abandʉ boosa ɨnongwa syene sila, ɨsi nsipɨliike ʉkʉfuma kʉmyake Taata. Jo ʉjʉ aalɨndʉmile kangɨ ikʉjoba ʉbwanalooli.”

27Abeene bakaasyageenie ʉkʉtɨ aajobaga nabo ɨsya Taata ʉgwa kʉmwanya. 28Po Jesu alɨnkʉsisimɨkɨsya alɨnkʉtɨ, “Bo mumfyʉsiisye Nnyamundʉ ʉkʉtɨ munngoge, po aamukwisa kʉmanya ʉkʉtɨ ʉne jo jʉʉjo. Kangɨ aamukwisa kʉmanyaga ʉkʉtɨ syosa ɨsi ngʉbomba, ndikʉbomba kʉ maka gangʉ, looli ngʉsijoba ɨsi Taata aamanyiisye. 29Ʉjʉ andʉmile alɨ pamopeene na niine. Akaandeka niimwene, paapo akabalɨlo koosa ngʉsibomba ɨsi sikʉnkyela.”

30Jesu bo alɨ pakʉjoba ɨsyo, abandʉ bingi balɨnkʉmmwitɨka.

Kyala ikʉbabɨɨka abandʉ mbwabʉke

31Po Jesu alɨnkʉbabʉʉla aBajuuta bala, aba bammwitiike, alɨnkʉtɨ, “Lɨnga mukʉgakonga amasyʉ gangʉ, po nalooli mukʉjaga bafundigwa bangʉ. 32Kangɨ aamukʉbʉmanyaga ʉbwanalooli. Po kʉ njɨla jaa bwanalooli ʉbo, Kyala ikwisa kʉbabɨɨka mbwabʉke.”

33Abeene balɨnkʉnndaalʉʉsya balɨnkʉtɨ, “Ʉswe tʉlɨ biisʉkʉlʉ baa Abulahamu. Tʉkabɨɨkigwamo sikʉ nʉ mundʉ ʉkʉja batʉmwa. Fiki kʉjoba ʉkʉtɨ ʉswe aatukʉja baabʉke?” 34Jesu alɨnkʉbaamula alɨnkʉtɨ, “Nalooli nikʉbabʉʉla, ʉmundʉ gwesa ʉjʉ ikwendelela ʉkʉbomba ʉbʉtʉlanongwa, ikʉbʉbombela ʉbʉtʉlanongwa bo ʉlwa ntʉmwa.#8:34 Ʉntʉmwa Bala kʉ Ɨsyakʉlɨngaania. 35Ʉntʉmwa atikʉtʉʉgala mu nyumba jaa ntwa gwake amasikʉ goosa, looli ʉmwana gwa ntwa, jo ʉjʉ ikʉsyala mu nyumba amasikʉ goosa. 36Po lɨnga ne Mwana gwa Kyala mbaabwile ʉkʉfuma mbʉtʉlanongwa bwɨnu, mutikʉjaga batʉmwa kangɨ, looli mukʉjaga baabʉke nalooli. 37Mmeenye ʉkʉtɨ ʉmwe mulɨ biisʉkʉlʉ baa Abulahamu, leelo mukʉlonda ʉkʉʉngoga ʉne, paapo mukʉkaana ʉkwitɨka ɨsi ngʉbamanyisya. 38Ʉne ngʉbabʉʉla ɨsi nsibwene kwa Taata, looli ʉmwe mukʉsibomba ɨsi ʉgwiseemwe abamanyiisye.”

39Abeene balɨnkʉmmwamula Jesu balɨnkʉtɨ, “Ʉswe taata jo Abulahamu.”#8:39 Ʉswe taata jo Abulahamu ABajuuta baatɨgɨ batikʉlongigwa paapo baana baa Abulahamu, ʉjʉ aasʉngʉliigwe na Kyala. Bala iisyʉ Abulahamu kʉ Ɨsyakʉlɨngaania. Jesu alɨnkʉbabʉʉla alɨnkʉtɨ, “Lɨnga nalooli mulɨ baana baa Abulahamu, ngalɨ mukʉsibomba ɨsi Abulahamu aabombaga. 40Looli lɨɨlɨno mukʉlonda ɨnjɨla ɨjaa kʉʉngoga, na paapo mbabʉʉlile ʉbwanalooli ʉbʉ naabʉpɨliike ʉkʉfuma kwa Kyala. Abulahamu akaabombile bo ɨsi mukʉlonda ʉkʉʉmbombela ʉne. 41Ɨmbombo ɨsi mukʉsibomba sikʉfuma kʉ gwiseemwe ʉjʉngɨ.” ABajuuta bala balɨnkʉmmwamula Jesu balɨnkʉtɨ, “Ʉswe tʉkaja sigwana, looli Kyala mwene jo Taata.” 42Jesu alɨnkʉbaamula alɨnkʉtɨ, “Lɨnga Kyala aalɨ Gwiseemwe, po ngalɨ muunganile. Ʉne ngiisa kʉ maka gangʉ, looli jo Kyala ʉjʉ andʉmile. 43Fiki mutikʉsyagania ɨsi ngʉjoba? Paapo mukʉsikaana ɨnongwa syangʉ. 44Ʉmwe mulɨ baa Seetano ʉjʉ jo gwiseemwe, nuumwe mukʉlonda ʉkʉbomba ɨsi ʉgwiseemwe ikʉsilonda. Seetano ngogi bwila, kangɨ akiigana ʉkwɨma mbwanalooli, paapo ʉbwanalooli bʉkajamo mu ndumbula jaake. Lɨnga Seetano ikʉjoba ʉbʉtʉngʉlʉ ako ko kajɨɨlo kaake, paapo ʉmwene ntʉngʉlʉ kangɨ jo gwise gwa batʉngʉlʉ boosa. 45Looli paapo ʉne ngʉbabʉʉla ɨsya nalooli, jo nongwa ɨjɨ mutikʉʉnyiitɨka.

46“Jo jwani pakatɨ pamyɨnu ʉjʉ abagiile ʉkʉsisimɨkɨsya ʉkʉtɨ ʉne ndɨ ntʉlanongwa? Lɨnga ɨsi ngʉbabʉʉla sya bwanalooli, po fiki mutikʉʉnyiitɨka? 47Fyobeene ʉmwe mutikʉsikonga ɨsi Kyala ikʉjoba, paapo ʉmwe mukaja bandʉ baake.”

Jesu nkʉlʉmba ʉkʉnkɨnda Abulahamu

48ABajuuta balɨnkʉnndaalʉʉsya Jesu balɨnkʉtɨ, “Bʉle, tʉtikʉjoba ɨsya nalooli lɨnga tukʉtɨ ʉgwe ʉlɨ Nsamalija nʉ kʉtɨ ʉlɨ nɨ mbepo ɨnyali?” 49Jesu alɨnkʉbaamula alɨnkʉtɨ, “Ʉne ngaja nɨ mbepo ɨnyali. Ʉne ngʉmmwɨmɨka Taata, looli ʉmwe mutikʉʉnyɨɨmɨka ʉne. 50Ndikʉlonda ʉkʉtɨ ʉmwe mumbege ʉbʉsisya, looli alipo ʉjʉ ikʉlonda ʉkʉmbapo, kangɨ jo aikʉjaga Ndongi gwa nalooli. 51Nalooli nikʉbabʉʉla, ʉmundʉ gwesa ʉjʉ ikʉsikonga ɨsi ngʉmanyisya, atiisakʉfwamo sikʉ.”

52Po aBajuuta balɨnkʉmmbʉʉla Jesu balɨnkʉtɨ, “Akabalɨlo aka tʉsyageenie ʉkʉtɨ ʉgwe ʉlɨ nɨ mbepo ɨnyali! Abulahamu aafwile. Abakunguluka boope baafwile. Looli ʉgwe kʉtɨ, ‘Ʉmundʉ gwesa ʉjʉ ikʉsikonga ɨsi ngʉmanyisya, atiisakʉfwamo sikʉ.’ 53Kalɨ ʉgwe, kwipela ʉkʉja nkʉlʉmba ʉkʉnkɨnda ʉmwisʉkʉlʉ gwɨtʉ Abulahamu? Ʉmwene aafwile. Abakunguluka boope baafwile. Kalɨ, ʉgwe kwipela ʉkʉja gwe gwani?” 54Jesu alɨnkʉbaamula alɨnkʉtɨ, “Lɨnga ngwipapo ʉbʉsisya, ʉbʉsisya bwangʉ bʉkaja na mbombo najɨmo. Looli Taata, ʉjʉ ʉmwe mukʉtɨ jo Kyala gwɨnu, jo ʉjʉ ikʉmbapo ʉbʉsisya ʉne. 55Na ʉlʉ mukaalɨ mukammanya Kyala, looli ʉne nʉmmeenye. Lɨnga ngʉjoba ʉkʉtɨ ngammanya Kyala, po bo ndɨ ntʉngʉlʉ bo ʉmwe. Looli ʉne nʉmmeenye Kyala, kangɨ ɨsi ikʉjoba ngʉsikonga. 56Ʉmwisʉkʉlʉ gwɨnu Abulahamu aahobwike fiijo ʉkʉmanya ʉkʉtɨ ʉne ngwisa. Aafwene aalɨɨmbwene, aahobwike fiijo.”

57Po aBajuuta balɨnkʉkalala, balɨnkʉnndaalʉʉsya Jesu balɨnkʉtɨ, “Ʉgwe ʉkaalɨ ʉkʉfika ɨfyɨnja amalongo mahaano, po gwalɨmmbwene bʉleebʉle Abulahamu?” 58Jesu alɨnkʉbaamula alɨnkʉtɨ, “Nalooli nikʉbabʉʉla, ʉne ndiko bo Abulahamu akaalɨ ʉkʉpaapigwa.”#8:58 Ʉne ndiko bo Abulahamu akaalɨ ʉkʉpaapigwa Apa Jesu aabombiile ɨngamu jaa Kyala bo muno jɨsimbiigwe mwa Kalata ʉMwikemo. Bala kalata gwa Ʉkʉsooka 3:14; Jeesaja 43:10. 59ABajuuta bo basipɨliike ɨsyo, balɨnkʉsala amabwe ʉkʉtɨ bantuunye nago nʉ kʉnngoga, looli Jesu alɨnkwifisa, alɨnkʉsookamo ndʉpaso lwa tempeli.

Aktuálne označené:

Johani 8: NYAK

Zvýraznenie

Zdieľať

Kopírovať