Lukə̀ 24

Yěsû a zhwuumə̀ a nɨ̀wɨghə̀

(Mat 28.1-8; Mrk 16.1-8; Jòn 20.1-10)

1A ngẅùʼə ngẅùʼə nɨ à lə̀ pənə ntsàambyə̀ njyə̂ amwuə ngàbə̀, pə̀ngyə̌ pa furə̀ ndèrə̀ a ntswùə̀ nɨ̀shyə̀ ntwuʼtə̀ mɨ̀ghurə̀ mɨ àzhyǎ ma nɨ pobə lə̀ tsùŋə̀nə la. 2Pobə lə̀ kɨ tô nɨ pɨ tinə̀ mə nɨ̀ghòorə tsa a ntswùə̀ nɨ̀shyə̀, 3La nkwùə̀ nɨ pobə lə̀ nkwuunə̀ amwuə nɨ̀shyə̀ ka pobə lə̀ zəənə̀ a ghobə a àkwuə̀ Yěsû. 4Ànwùə̀ ghu a pirə̀ mmə nkə̀ʼnə̀ a ghobə, pobə kɨ wùutə̀ pànə̀ pɨpaa furə̀ a mbyə̀ pobə amwuə ɨtsəʼə nɨ pèrə fuə̀nə tə ntsèntə̀. 5Pobə lə̀ pə nɨ àkẅàrə̀, ntsənkə̀ ɨ̀twuə̀ ɨ̀pobə a ɨ̀shyə̂, pànə̀ pa pɨpaa pyiitə̀ a ghobə lo, “A ghɨ̀rə̀ àkə nɨ̀ mə ntàʼà a ŋònə̀ ntɨ̀ŋnə̀ amwuə alyiʼə ɨ̀kwuə̀ pə̀ənə̀? 6Ka à pə e a nɨ̀ghə̂, à zhwuumə̀ a nɨ̀wɨghə̀. Ka nɨ̀ kẅuumə̀ a wɨghə ànwùə̀ nɨ à lə̀ shwəŋə̀nə ambo pɨghə nkwùə̀ nɨ à lə̀ pirə̀nə a Galìlyə̂ la?” 7À lə̀ shwəŋə̀ lo, “Pɨ ghǎ ŋâ Moonə̀ Ŋwùə̀ ambo ngàŋə ngɨ̀rə̀ ɨ̀nwùə̀ tɨ̀pòŋə̀ pobə̂ kẅùumə̀ e aŋunə àtɨ̀ghə pànkə̀nə, njyə̂ nkɨ làŋə̀ ɨtarə â zhwuumə̀ a nɨ̀wɨghə̀.”

8Lenəla, pobə kẅuumə̀ mɨ̀nwùə̀ nɨ Yěsû à lə̀ shwəŋə̀nə la. 9Pə̀ngyə̌ pɨ̀ghu lə̀ furə̀ a ntswùə̀ nɨ̀shyə̀ nkwə̂ nshwəŋə̀ ànwùə̀ àtsùmə̀ ambo ɨ̀zùŋə̀ ndzùmə̀ Yěsû pa ntsòbə̀ moʼo ghobə àpwùʼə̀ pə̀ənə̀. 10Pə̀ngyə̌ pɨ ghu lə̀ pə, Màriyà nɨ à lə̀ furə̀nə a Magdalà, nɨ Jòanà pobə Màriyà mǎ pɨ Jemə̀ farə pɨ̀tse pə̀ngyə̌ nɨ pobə pɨ pobə lə̀ shwəŋə̀nə mɨ̀nwùə̀ mə ambo ngàŋə ntwuumə̀ Yěsû. 11Àshwəŋnə̀ pə̀ngyə̌ pɨ̀ghu a lə̀ pə tsaʼa àshwəŋnə̀ àkɨ̀ghə̀ ambo ngàŋə ntwuumə̀ Yěsû. Lenəla, ka pobə pyiimə̀ a ghobə. 12La Pità a kɨ̀ɨrə̀ ndèrə̀ àtwuə̀ nɨ̀shyə̀, ŋŋuʼnə̀ a ɨ̀shyə̂ nnaŋə̀ amwuə nɨ̀shyə̀, ndzəənə̀ ɨtsəʼə nɨ pɨ lə̀ tẅəŋə̀nə a Yěsû nɨ pèrə, ndòo ntyiʼə̀ mmə nkwə̂ ànwùə̀ ghu a pə nkə̀ʼnə̀ e.

Yěsû a tsirə̀ pànə̀ pɨpaa a àlàŋə Emmaus

(Mrk 16.12-13)

13A pə tyìʼə̀ njyə̂ ghu ɨ̀zùŋə̀ ndzùmə̀ Yěsû ɨpaa mə ndèrə̀ a Emmaus nɨ a lə̀ pənə tsaʼa pɨ̀marə̀ sàmbaa a nɨ furə̀ a Yèrusalèmə̀. 14Pobə lə̀ mə ngyìinə̀ nshwəŋnə̀ mbə̀ʼə mɨ̀nwùə̀ nɨ mɨ lə̀ furə̀nə la. 15Tsaʼnə pobə lə̀ mənə ndèrə̀ la, Yěsû àtwuə̀ ɨ̀pɨ̀ŋmə̀ e a tsirə̀ a ghobə, ntyiʼə̀ ngyìinə̀ pobə pɨ pobə, 16A ghɨ̀rə̀ lo kò pobə zhyə̂ a ghobə lo la ze. 17Yěsû a pyiitə̀ nɨ pobə lo, “Nɨ̀ wə̀ ngyìinə̀ nshwəŋə̀ lə ànwùə̀ àkə?”

Pobə təəmə̀, àsòmnə̀ a pə a ɨ̀sɨghə̀ pobə. 18Kleopàsə̀, taʼà ŋwùə̀ ɨghobə ɨ̀tse, a pyiitə̀ e lo; “Ghò la ndàʼà ŋwùə̀ amwuə Yèrusalèmə̀ nɨ ka a zhyə̂ e ànwùə̀ nɨ a ghɨ̀rə̀nə amwuə mɨ̀njyə̂ mə?” 19Yěsû a pyiitə̀ a ghobə lo, “Ànwùə̀ zə̀ a pə ànwùə̀ àkə?”

Pobə kẅùə̀ ambo ze lo, “Ànwùə̀ mbə̀ʼə Yěsû ŋwùə̀ Nazarètə̀. À lə̀ pə ngàŋə̀ ntwuumə̀ Nẅùə̀ mmə ngɨ̀rə̀ mɨ̀nwùə̀ mɨ yerə̀nə yerə̀nə nkɨ mmə nshwəŋə̀ mɨ̀nwùə̀ mɨ yerə̀nə yerə̀nə a mbyə̀ Nẅùə̀ pobə pànə̀ pɨ̀tsùmə̀. 20La pɨ̀fò màʼà Nẅùə̀ pobə pɨ̀saʼà pɨ àlaʼà ɨ̀pəə lə̀ lə̂ ɨ̀sàʼa e nshwəŋə̀ lo pɨ̀ kẅùumə̀ e aŋunə àtɨ̀ghə pànkə̀nə. 21Pəə lə̀ mə nkwàŋə̀ lo à ghǎ tsuʼù ze tsuʼù ɨ̀twuə̀ pànə̀ pɨ Israel. La tɨ̀tsòŋə̀ lə̌ njyə̂ ɨtarə tsaʼnə ɨ̀nwùə̀ pə̀ ɨ̀tsùmə̀ ghɨ̀rə̀nə. 22A nɨ lèrə̀ nɨ mbyə̀, pə̀ngyə̌ pɨ̀tse amwuə pəə lə̀ shwəŋə̀ ànwùə̀ nɨ a kə̀ʼnə̀nə a wəə, lo Pobə lə̀ lèrə̀ a ntswùə̀ nɨ̀shyə̀ a ngẅùʼə ngẅùʼə, 23la ka zəənə̀ a ghobə àkwuə̀ e. Pobə kẅirə̀ nkwə̂, nshwəŋə̀ nɨ pəə lo pobə zəənə̀ pəngèrə̀ pɨ furə̀ a mbyə̀ pobə tsaʼa ndzə̀əmə̀ nshwəŋə̀ lo a wə̀ yi ntɨ̀ŋnə̀. 24Pànə̀ pɨ̀tse amwuə pəə lə̀ lèrə̀ àtwuə̀ nɨ̀shyə̀ ghu nkɨ ndzəənə̀ tyìʼə̀ tsaʼnə pə̀ngyə̌ pa lə̀ shwəŋə̀nə la.”

25Yěsû a shwəŋə̀ ambo pobə lo, “Pɨghə ɨ̀kɨ̀ghə̀ pə̀ənə̀, mbə̀ʼə nɨ̀ fàʼà mbyiimə̀ a wɨghə mɨ̀nwùə̀ mɨ̀tsùmə̀ nɨ ngàŋə ntwuumə̀ Nẅùə̀ lə̀ shwəŋə̀nə la apə̀. 26Ka nɨ̀ zəənə̀ a wɨghə lo a lə̀ kùʼnə̀ lo Ghù Ndzoʼnə wa â zəənə̀ ngəʼə̀ aŋunə mɨ̀nwùə̀ mə mbə̀ʼə ghǎ kwuunə̀ amwuə alyiʼə àghuʼtə̀ e?” 27A tyiʼə̀ mbìʼnə̀ aŋunə àŋwàʼnə̀ Mǔsî, nɨ ɨ̀ŋwàʼnə̀ ngàŋə ntwuumə̀ Nẅùə̀ ɨ̀tsùmə̀, ntiitə̀ mɨ̀nwùə̀ nɨ pɨ lə̀ ŋwàʼnə̀nə amwuə àŋwàʼnə̀ Nẅùə̀ àtsùmə̀ mbə̀ʼə e la. 28Tsaʼnə pobə lə̀ paatə̀nə alyiʼə nɨ pobə lə̀ mənə ndèrə̀ ghu la, Yěsû a ghɨ̀rə̀ tsaʼa a làŋə̀ alyiʼə ghu lèrə̀ nɨ mbyə̀. 29La pobə puʼù mbô ambo ze nshwəŋə̀ lo, “Lyə̂ pə̀ənə̀ ntiinə ɨ̀twuʼə̀ ɨ wə̀ ntyiʼə̀ nsinə̀, nkwùə̀ ɨ̀ làŋə̀.” Lenəla, a kwuunə̀ a nɨ lyə̂ pobə pɨ pobə. 30Nkwùə̀ nɨ pobə pɨ pobə lə̀ mənə ndzɨghə̀, à lə̀ piinə̀ àpaanə̀, nchàʼtə̀ a Nẅùə̀, mbiʼtə̀ a zèrə̀ ŋâ ambo pobə. 31Ɨ̀myə̂ ɨ̀mobə lə̀ laanə̀ pobə zhyə̂ lo a Yěsû, a zùŋə̀ mbî e a ɨ̀myə̂ pobə. 32Pobə lə̀ tyiʼə̀ nshwəŋə̀ pobə nɨ pobə lo, “Ka mɨ̀ntɨŋmə̀ ɨ̀məənə̀ tə ndwùumə̀ e tsaʼa ɨ̀mǔ nkwùə̀ nɨ à tənə mmə ngyìinə̀ pə̀ənə̀ pɨ pobə mmə nshwəŋə̀ ànwùə̀ Nẅùə̀ la?”

33Pobə lə̀ lòo a ɨ̀shyə̂ tyìʼə̀ nkwùə̀ ghu, nkẅirə̀ nshwuʼə̀ a Yèrusalèmə̀ ngə̀ ntsirə̀ ɨ̀zùŋə̀ ndzùmə̀ Yěsû ntsòbə̀ moʼo pobə pɨ̀tse pànə̀ nɨ pobə pɨ pobə lə̀ pənə. 34Pànə̀ pə̀ amwuə ndâ tyiʼə̀ nshwəŋə̀ ambo pobə lo, “Ndòʼnə̀mbyə̂ à zhwuumə̀ a nɨ̀wɨghə̀ nkǔŋə nkuŋə. À tô mə nnèrə̀ mbɨ̀ŋmə̀ e ambo Shimùnə̀.”

Yěsû a nèrə̀ mbɨ̀ŋmə̀ e ambo ɨ̀zùŋə̀ ndzùmə̀ ɨ̀pe

(Mat 28.16-20; Mrk 16.14-18; Jòn 20.19-23; Ɨ̀fà 1.6-8)

35Pobə pa pɨpaa lə̀ shwəŋə̀ ànwùə̀ nɨ a lə̀ ghɨ̀rə̀nə àlàŋə la, farə tsaʼnə pobə lə̀ zhyə̂nə a Yěsû nkwùə̀ nɨ à lə̀ piʼtə̀nə àpaanə̀ ŋŋâ ambo pobə.

36Tsaʼnə pobə lə̀ pirə̀nə mmə nshwəŋnə̀ la, Yěsû a təəmə̀ a tɨ̀tɨ̀rə̀ pobə nshwəŋə̀ lo, “Àporə̀porə̀ â pə ambo pɨghə.” 37Pobə lə̀ wùutə̀, àkẅàrə̀ a kwuunə̀ a ghobə. Pobə nkwàŋə̀ lo pobə zəənə̀ àwuə̀. 38Yěsû a pyiitə̀ a ghobə lo, “Nɨ̀ pô lə̀ àkə? Mɨnkə à pirə̀ amwuə pɨghə mbə̀ʼə àkə? 39Nɨ̀ naŋə̀ mbô ɨ̀mâ pobə mɨ̀kwùə̀ ɨ̀mâ. A tyìʼə̀ mɨ̀ŋə̀! Nɨ̀ pètə̀ mə̀ ndzəənə̀. Ka àwuə̀ a pə e nɨ mbòbə̀ mbɨ̀ŋmə̀ pobə ɨ̀kẅìinə tsaʼnə nɨ̀ zəənə̀nə m̀bə nɨ pèrə lə.”

40Nkwùə̀ nɨ à lə̀ shwəŋə̀nə la, à lə̀ nèrə̀ mbô ɨ̀me ghobə mɨ̀kwùə̀ ɨ̀me ambo pobə. 41Nɨ̀ghaʼà à lə̀ lẅenə̀ amwuə mɨ̀ntɨŋmə̀ ɨ̀mobə ka mɨ̀zùŋə tə pobə kwàŋə̀ lo lə̌ tyiʼə̀ ànwùə̀? Yěsû a pyiitə̀ ambo pobə lo, “Nɨ̀ wə̀ mbə nɨ àzwuumə̀ zɨghə̀nə a nɨ̀ghə̂?” 42Pobə ŋâ àtùmə ɨ̀swuə̀ nɨ pɨ laamə̀nə ntòonə̀ ambo ze, 43lenəla, a kẅiirə̀ nkwurə̀ a mbyə̀ pobə.

44A shwəŋə̀ ambo pobə lo, “Lə̌ mɨ̀nwùə̀ nɨ ndə̀ shwəŋə̀nə a wɨghə nkwùə̀ nɨ ndə̀ pənə pə̀ənə̀. Ɨ̀nwùə̀ ɨ̀tsùmə̀ nɨ pɨ lə̀ ŋwàʼnə̀nə mbə̀ʼə mə̀ amwuə àŋwàʼnə̀ Mǔsî, nɨ àŋwàʼnə̀ ngàŋə ntwuumə̀ Nẅùə̀ farə àŋwàʼnə̀ Psalms chyə̂ a nɨ ghɨ̀rə̀.”

45A tyiʼə̀ nnyaʼkə̀ ɨ̀twuə̀ ɨ̀pobə, pobə zhyə̂ ànwùə̀ nɨ pɨ ŋwàʼnə̀nə amwuə àŋwàʼnə̀ Nẅùə̀. 46A shwəŋə̀ ambo pobə lo, “Pɨ lə̀ ŋwàʼnə̀ la lo, Ghù Ndzoʼnə wa à ghǎ zəənə̀ ngəʼə̀, kwɨghə̀, a kɨ pə njyə̂ ɨtarə â zhwuumə̀ a nɨ̀wɨghə̀, 47mbə̀ʼə pànə̀ tyiʼə̀ nchwìitə̀ ntwuumə̀ Nẅùə̀ aŋunə nɨ̀linə̀ ɨ̀tse lo pànə̂ pə̀ŋə̀ mɨ̀ntɨŋmə̀ ɨ̀mobə mbə̀ʼə Nẅùə̀ â lə̀ənə̀ ɨ̀fàntə̀ ɨ̀nwùə̀ ɨ̀pobə, a nɨ pìʼnə̀ a Yèrusalèmə̀ ngə̀ mbyàa amwuə ɨ̀laʼà ɨ̀tsùmə̀. 48Nɨ̌ pə pɨ̀ndzəənə̀ zəənə̀nə aŋunə mɨ̀nwùə̀ mə. 49Nɨ̀ naŋə̀, ngwə̀ ngə̀ tsàa wɨghə nɨ àzwuumə̀ nɨ Tǎ ɨwəə à lə̀ kàʼnə lo à ghǎ tsàa. La nɨ̌ nwuunə̀ a nɨ̀ghə̂ pyabə̀ tə pyàa nkwùə̀ nɨ mɨ̀tɨ̀ŋnə̀ ghǎ furə̀ a nɨ̀pwuurə̀ shwuʼə̀ aŋunə pɨghə.”

Yěsû a koʼò ndèrə̀ a nɨ̀pwuurə̀

50Nkwùə̀ nɨ Yěsû à lə̀ lòonə a ghobə nfurə̀ a Yèrusalèmə̀ ngə̀ mbyàa a Betanì, à lə̀ ŋaŋə̀ mbô ɨ̀me àtɨ̀ghə, nchyâ mborə̀ aŋunə pobə. 51Tsaʼnə à lə̀ mənə nchyâ mborə̀ aŋunə pobə la, pɨ lə̀ lòo e nkoʼò ndèrə̀ a nɨ̀pwuurə̀. 52Pobə lə̀ tyiʼə̀ nkẅirə̀ nkwə̂ a Yèrusalèmə̀ nɨ nɨ̀ghaʼà yɨ̀noʼnə, 53ntyiʼə̀ ngoŋə̀ a Ndâ Mɨ̀shwàʼà Nẅùə̀ ntə nguʼtə̀ a Nẅùə̀ nkwùə̀ ɨ̀tsùmə̀.

Aktuálne označené:

Lukə̀ 24: pny

Zvýraznenie

Zdieľať

Kopírovať