Lukə̀ 23

Pɨ lòo a Yěsû ndèrə̀ a mbyə̀ Palètə̀

(Mat 27.1-2; Mrk 15.1-5; Jòn 18.28-38)

1Ŋwùə̀ ntsùmə̀ nɨ à lə̀ pənə amwuə Kansèrə̀ à lə̀ lòo a ɨ̀shyə̂, ndòo a Yěsû ndèrə̀ a mbyə̀ Palètə̀. 2Pobə tyiʼə̀ mbìʼnə̀ a nɨ ẅìimə̀ e, nshwəŋə̀ lo, “Pəə kô a ŋònə̀ wə̀ a mə ntsə̀ŋə̀ ɨ̀twuə̀ pə̀ənə̀ amwuə àlaʼà ghə. Ndzòŋə̀ a wəə lo kò pəə twuə̀ pɨ̀taghə̀ ambo Kaasà, nchi mmə nshwəŋə̀ lo à chyə̂ mbə Ghù Ndzoʼnə wa nkɨ mbə ɨ̀fò.”

3Lenəla Palètə̀ a pyiitə̀ e lo, “Ghò la ɨ̀fò pɨ̀Jew?”

A kẅùə̀ lo, “Wə̀ shwəŋə̀ a lenə.” 4Palètə̀ a tyiʼə̀ nshwəŋə̀ ambo pɨ̀fò màʼà Nẅùə̀ pobə pɨ àpùŋə̀ pə̀ənə̀ lo, “Ka ǹdzəənə̀ mə̀ àwɨ̀ghə̀ ànwùə̀ ŋònə̀ wə̀.” 5Pobə tyiʼə̀ nshwəŋə̀ nɨ mɨ̀tɨ̀ŋnə̀ lo, “À pə̀ŋə̀ ɨ̀twuə̀ pə̀ənə̀ amwuə àlaʼà Judyà àtsùmə̀. À lə̀ pìʼnə̀ a Galìlyə̂ tsaʼnə à pyàa mə a nɨ̀ghə̂ lə.”

Pɨ lòo Yěsû ndèrə̀ a mbyə̀ ɨ̀fò Heròdə̀

6Nkwùə̀ nɨ Palètə̀ a lə̀ zuʼnə mɨ̀nwùə̀ nɨ Yěsû a lə̀ ghɨ̀rə̀nə la, a pyiitə̀ lo, “Ŋònə̀ wə̀ la ŋwùə̀ Galìlyə̂?” 7Tyìʼə̀ tsaʼnə Palètə̀ à lə̀ zhyə̂nə lo à furə̀ a Galìlyə̂ amwuə pàa àlaʼà Heròdə̀ la, à lə̀ tsàa e ambo ze nɨ à lə̀ pənə a Yèrusalèmə̀ nkwùə̀ ghu. 8Heròdə̀ à lə̀ ghaʼà ka mɨ̀zùŋə nkwùə̀ nɨ à lə̀ zəənə̀nə a Yěsû, ntiinə à lə̀ pyə̀nə ntàʼà a nɨ zəənə̀ e aŋunə ntyə̌ sàa, ntyiʼə̀ mmə nkwàŋə̀ a nɨ zəənə̀ ɨ̀lènə̀ ɨ̀nwùə̀ pɨ̀tse nɨ ǎ ghɨ̀rə̀ ntiinə à pyə̀ mə ndzuʼù mɨ̀nwùə̀ mbə̀ʼə e. 9Lenəla, Heròdə̀ pyiitə̀ Yěsû nɨ mɨ̀nwùə̀ mɨ̀noʼnə; la ka a kẅùə̀ e a yètse. 10Pɨ̀fò màʼà Nẅùə̀ nɨ pɨ̀nèrə̀ mbòomə lə̀ koʼò ntəəmə̀ a mbyə̀, ntəəmə̀ ntɨ̀ŋnə̀ aŋunə mɨ̀nwùə̀ nɨ pɨ lə̀ ẅìimə̀nə a Yěsû aŋunə la. 11Heròdə̀ pobə pɨ̀soyì ɨ̀pe ẅìi Yěsû ntyiʼə̀ nnyèŋə̀ e. Pobə lə̀ màʼà atsəʼə nɨ̀fò aŋunə ze nkẅirə̀ ntsàa e ambo Palètə̀. 12Heròdə̀ pobə Palètə̀ tyiʼə̀ mbə pɨ̀swùunə a nɨ furə̀ njyə̂ ghu ntiinə pobə lə̀ pyə̀nə mbə nɨ kɨpaanə a tɨ̀tɨ̀rə̀ pobə.

Palètə̀ a ŋâ a Yěsû ambo pɨ̀Jew

13Nkwùə̀ nɨ Yěsû à lə̀ kẅirə̀nə ndèrə̀ ambo Palètə̀ la, Palètə̀ a shwatə̀ pɨ̀fò màʼà Nẅùə̀, pànə̀ nɨ pobə pa mbuʼtə̀ ɨ̀laʼà pobə pə̀ənə̀, 14nshwəŋə̀ ambo pobə lo, “Nɨ̀ tô nɨ ŋònə̀ wə̀ ambo mɨ̀ŋə̀ tsaʼa ŋònə̀ nɨ à mənə ntsə̀ŋə̀ ɨ̀twuə̀ pə̀ənə̀, ǹkùmə̀ nshàrə̀ e ɨ̀shìʼnə̀ a mbyə̀ pɨghə, ka zəənə̀ mə̀ àwɨ̀ghə̀ ànwùə̀ nɨ nɨ̀ wə̀ nshwəŋə̀ mbə̀ʼə e lə. 15Ka Heròdə̀ à lə̀ kɨ ndzəənə̀ e ànwùə̀ nɨ à wɨ̀ghə̀nə, ntiinə à kẅirə̀nə ntsàa e ambo pə̀ənə̀. Nɨ̀ zəənə̀ ka à ghɨ̀rə̀ e ànwùə̀ àtse nɨ mbə̀ʼə pɨ zhwuutə̀ e. 16Mbɨ kəʼə̀ e ɨ̀shìʼnə̀ myàʼtə̀ e.” 17[Amwuə nkwùə̀ Nɨ̀ghaʼà Àlàŋə̀ Mmyàʼtə̀ ntsùmə̀ pɨ̀Jew lə̀ mə ntsoʼò a taʼà ngàŋə̀ ɨ̀tsaŋə̀ ẅùə̀ nɨ Palètə̀ ǎ tyiʼə̀ fuukə̀ mmyàʼtə̀ â lèrə̀.] 18La pobə pɨ̀tsùmə̀ yìi nɨ ɨ̀tɨ̀ŋnə̀ lo, “Zhwuutə̀ a ŋònə̀ wə̀ nfuukə̀ Barabbas ŋŋâ ambo pəə.” 19Pɨ lə̀ chyâ a Barabbas amwuə nkaʼà ɨ̀tsaŋə̀ ntiinə à lə̀ kùmə̀nə ndumə amwuə mbòmpə àlaʼà nzhwuutə̀ ŋwùə̀. 20Palètə̀ à lə̀ pə nɨ àkwàŋə̀ a nɨ myàʼtə̀ Yěsû, lenəla nkẅirə̀ ndəpə̀ a ghobə. 21La pobə kɨ nkyiinə̀ kyiinə̀nə lo, “Kẅùumə̀ e aŋunə àtɨ̀ghə pànkə̀nə.”

22Palètə̀ a shwəŋə̀ ambo pobə aŋunə nòmbàa nkwùə̀ ɨtarə lo, “À ghɨ̀rə̀ àkə nɨ a pɨ̂nə? Ka ǹdzəənə̀ mə̀ ɨ̀sùmə nɨ mbə̀ʼə pɨ zhwuutə̀ e aŋunə. Njiilo mbɨ kəʼə̀ e ɨ̀shìʼnə̀ myàʼtə̀ e â lèrə̀.”

23La pobə kɨ nkyiinə̀ kyiinə̀nə nɨ ngyə̀ ntɨ̀ŋnə̀ mmə nshwəŋə̀ lo pɨ̀ kẅùumə̀ a Yěsû aŋunə àtɨ̀ghə pànkə̀nə. Àzhwùə̀ àzobə a tyiʼə̀ nzhyiʼə̀ a Palètə̀ 24Lenəla Palètə̀ a pyiimə̀ ambo pobə lo pobə̂ zhwuutə̀ a Yěsû. 25À lə̀ myàʼtə̀ a Barabbas ŋònə̀ nɨ pɨ lə̀ chyânə a nkaʼà ɨ̀tsaŋə̀ ntiinə à lə̀ kùmə̀nə ndumə nkɨ nzhwuutə̀ a ŋwùə̀ a nɨ zùŋə̀ tsaʼnə pobə lə̀ pyiitə̀nə. La ngə̀ aŋunə Yěsû, a ŋâ e ambo pobə lo fàʼà tsaʼnə pobə tàʼnə.

Pɨ kẅùumə̀ a Yěsû aŋunə àtɨ̀ghə pànkə̀nə

26Tsaʼnə pɨ̀soyì lə̀ lòonə e mmə ndèrə̀, pobə lə̀ tsirə̀ a Shimùnə̀ ŋwùə̀ Sìrenə̀ nɨ à lə̀ pirə̀nə mmə nkwuunə̀ a Yèrusalèmə̀. Pobə lə̀ kô e ngɨ̀rə̀ a pìʼì àtɨ̀ghə pànkə̀nə ndzùŋə̀ a Yěsû. 27Àpùŋə̀ pànə̀ pɨ̀noʼnə a lə̀ zùŋə̀ e farə pə̀ngyə̌ pyə̀ nɨ pɨ lə̀ mənə nsòmnə̀ ngyìi mbə̀ʼə e. 28La Yěsû a pə̀ŋə̀ nshwəŋə̀ nɨ pobə lo, “Pə̀ngyə̌ pɨ Yèrusalèmə̀ kò nɨ yìi a wɨghə pə a gha, nɨ̀ yìi mbɨ̀ŋmə̀ ɨ̀zɨghə farə ɨ̀poonə̀ pɨghə. 29Mbə̀ʼnə nkwùə̀ ɨ̀ zə̀ ntô nɨ nɨ̌ shwəŋə̀ lo, ‘Mborə̀ ɨ̀ chyə̂ ambo pɨ̀kǐ pə̀ngyə̌, nɨ mɨ̀pùmə̀ nɨ mɨ laʼa mə mbirə̀ e tɨ pyə̂, farə mbɨŋnə̀ nɨ mɨ laʼa mə nnyoŋə̀ e a moonə̀ apə̀.’ 30Pànə̀ ghǎ pìʼnə̀ a nɨ shwəŋə̀ ambo mɨ̀mbarə̀ nkwùə̀ ghu lo, ‘Zhiʼə̀ a wəə!’ farə ambo pɨ̀kòŋə̀ lo ‘Kẅupə̀ a wəə.’ 31Pobə tə pəla ngɨ̀rə̀ mɨ̀nwùə̀ mə nkwùə̀ nɨ àtɨ̀ghə a pirə̀nə yè fî pobə ghǎ ntyiʼə̀ ngɨ̀rə̀ ɨla nkwùə̀ nɨ a zwuumə̀nə?” 32Pɨ lə̀ kɨ ndòo ngàŋə ngɨ̀rə̀ ɨ̀nwùə̀ tɨ̀pòŋə̀ ɨ̀tse ɨpaa lo ghə̀ zhwuutə̀ pobə pɨ pobə. 33Nkwùə̀ nɨ Pobə lə̀ tônə mbyàa a alyiʼə nɨ pɨ lə̀ mənə nfuŋə̀ nɨ “Àghòʼrə Àtwuə̀”, pobə lə̀ kẅùumə̀ a Yěsû pobə ngàŋə ngɨ̀rə̀ ɨ̀nwùə̀ tɨ̀pòŋə̀ yɨ̀tse ɨpaa aŋunə ɨ̀tɨ̀ghə pɨ̀pànkə̀nə. Taʼà a pə a pàa àpô Yěsû yè zɨghə̀nə, taʼà a kɨ mbə a pàa àpô yè kẅàbə̀. 34Lenəla Yěsû a shwəŋə̀ lo, “Tǎ lə̀ənə̀ ɨ̀fàntə̀ ɨ̀nwùə̀ ɨ̀pobə, ntiinə ka pobə zhyə̂ a ghobə ànwùə̀ nɨ pobə pə̀ ngɨ̀rə̀”. Pobə màʼà ɨpirə a nɨ zhyə̂ tsaʼnə mbə̀ʼə pobə ghàbə̀ ɨtsəʼə ɨ̀pe. 35Pànə̀ lə̀ təəmə̀ a nɨ̀pwùnə mmə nnaŋə̀, la ɨ̀twuə̀ àlaʼà mə ngẅìi e nshwəŋə̀ lo à lə̀ mə nchwarə̀ pànə̀ pɨ̀tse, â chwarə̀ ɨ̀pɨ̀ŋmə̀ e mbə̀ʼə a pə Ghù Ndzoʼnə wa nɨ Nẅùə̀ à lə̀ tsoʼnə la. 36Pɨ̀soyì lə̀ nkɨ mə nnyèŋə̀ e mmə ŋŋâ mɨ̀lùʼù mɨ̀tɨ̀ŋnə̀ ambo ze, 37mmə nshwəŋə̀ lo, “Wə̀ pə la mbə ɨ̀fò pɨ̀Jew wə̀ chwarə̀ ɨ̀pɨ̀ŋmə̀ o.” 38Pobə lə̀ lòo àpàa àtɨ̀ghə ŋŋwàʼnə̀ aŋunə lo; “LƏ̌ Ɨ̀FÒ PƗ̀JEW” mbaanə̀ aŋunə àtɨ̀ghə pànkə̀nə àtwuə̀ ze. 39Taʼà ngàŋə̀ ngɨ̀rə̀ ɨ̀nwùə̀ tɨ̀pòŋə̀ nɨ pɨ lə̀ kẅùumə̀nə e pobə pɨ pobə la, à lə̀ mə ndzòomə̀ Yěsû mbyiitə̀ lo, “Ka wə̀ pə̀ o la Ghù Ndzoʼnə wa? Chwarə̀ ɨ̀pɨ̀ŋmə̀ o nkɨ nchwarə̀ a wəə.” 40La ẅùə̀ ngàŋə̀ ngɨ̀rə̀ ɨ̀nwùə̀ tɨ̀pòŋə̀ a saʼà e nshwəŋə̀ lo, “Ka wə̀ pô o Nẅùə̀ lə ntiinə pɨ zhwuutə̀nə o tsaʼnə pɨ kɨnə nzhwuutə̀ e? 41La aŋunə pùu nkǔŋə nkuŋə; pùu pə mə nkẅiirə̀ la mɨ̀ntsoʼnə̀ mɨ àfàʼà ɨ̀mû aŋunə ngɨ̀rə̀ mɨ̀nwùə̀ ɨ̀zû. La ŋònə̀ wə̀ ka à fàntə̀ e ànwùə̀ àtse.” 42A shwəŋə̀ ambo Yěsû lo; “Kẅempə̀ mə̀ a Yěsû nkwùə̀ nɨ wə̀ nwuunə̀nə aŋunə aləŋə Nɨ̀fò o.”

43Yěsû shwəŋə̀ ambo ze lo, “Ǹshwəŋə̀ tyìʼə̀ nkǔŋə nkuŋə lo, sìnə̀ wə̀, wə̌ pə pùu a Paradise.”

Nɨ̀wɨghə̀ Yěsû

44-45A lə̀ pə tsaʼa ntɨ̀ŋnə̀ àzhwùunə, ndzùmə ɨ̀ sinə̀ nnàanə̀ àlaʼà àtsùmə̀ tə mbyàa a ndzə̀ŋə̀ nẅùumə̀, atsəʼə za nɨ a lə̀ pənə a tɨ̀tɨ̀rə̀ Ndâ Mɨ̀shwàʼà Nẅùə̀ la, a saanə̀ ɨ̀pàa ɨpaa. 46Yěsû a kyiinə̀ nɨ ngyə̀ ntɨ̀ŋnə̀, nshwəŋə̀ lo, “Tǎ ǹchyâ Àzhwùə̀ mə̀ amwuə mbô ɨ̀mô!” Nkwùə̀ nɨ à lə̀ shwəŋə̀nə la àzhwùə̀ e a ləənə̀. 47Nkwùə̀ nɨ Àtwuə̀ pɨ̀soyì nkɨrə̀ a lə̀ zəənə̀nə ànwùə̀ nɨ a lòonə alyiʼə, à lə̀ ghuʼtə̀ a Nẅùə̀; nshwəŋə̀ lo, “A tyìʼə̀ nkǔŋə nkuŋə lo ŋònə̀ wə̀ à lə̀ pəla ŋònə̀ nɨ mɨ̀nwùə̀ ɨ̀me təəmə̀nə.”

48Nkwùə̀ nɨ pànə̀ pɨ̀tsùmə̀ nɨ pɨ lə̀ shwatə̀nə a nɨ zəənə̀ ànwùə̀ nɨ a mənə ndàŋə̀, pobə lə̀ kwâ mbô ɨ̀mobə ngẅìimə̀ mɨ̀ntɨŋmə̀ ɨ̀mobə nɨ àsòmnə̀ nkwə̂ ghobə a ɨmwuə alyiʼə ɨ̀pobə. 49Pànə̀ pɨ̀tsùmə̀ nɨ pɨ lə̀ zhyə̂nə a Yěsû pobə pə̀ngyə̌ pa nɨ pɨ lə̀ furə̀nə Galìlyə̂ ndzùŋə̀ e la, pobə lə̀ təəmə̀ a ndyə̌ sàa a nɨ zəənə̀ mɨ̀nwùə̀ mèrə mə̀.

Pɨ tẅəŋə̀ a Yěsû

50Ŋònə̀ ɨ̀tse nɨ pɨ lə̀ mənə nfuŋə̀ nɨ Jòsebə̀ mbə ŋwùə̀ pɨ̀Jew nfurə̀ a Àrəmàtyâ, à lə̀ pə ŋònə̀ ɨ̀shìʼnə̀, mɨ̀nwùə̀ ɨ̀me kɨ ntəəmə̀ a kɨ mbə taʼà ŋwùə̀ Kansèrə̀. 51Ka a lə̀ pyiimə̀ e ànwùə̀ nɨ pobə lə̀ mənə ntàʼà a nɨ ghɨ̀rə̀ aŋunə Yěsû pobə zhyə̀ nɨ pobə lə̀ ghɨ̀rə̀nə, nkɨ mmə ntàʼà a nɨ zɨghə̀ ànwùə̀ Nɨ̀fò Nẅùə̀ 52Ŋònə̀ wə̀ à lə̀ ghə̀ ambo Palètə̀ ndoonə̀ lo mbə̀ʼə a lòo àkwuə̀ Yěsû lo. 53À lə̀ tyiʼə̀ nshwuʼkə̀ àkwuə̀ Yěsû ndyibə̀ amwuə atsəʼə, nnùŋə̀ e amwuə nɨ̀shyə̀ nɨ pɨ tuŋə̀nə aŋunə nɨ̀ghòorə nɨ pɨ lə̀ tẅəŋə̀ mə e a ŋwùə̀ amwuə apə̀. 54A lə̀ pə Njyə̂ nɨ pɨ lə̀ mənə ntsùnkə̀ ɨ̀pwuumə̀ njyə̂ ɨ̂ laanə̀ mbə Njyə̂ àlaʼà pɨ̀Jew, 55pə̀ngyə̌ nɨ pobə pɨ Yěsû lə̀ furə̀nə a Galìlyə̂ lə̀ zùŋə̀ a Jòsebə̀, ngə̀ ndzəənə̀ nɨ̀shyə̀ nɨ pɨ lə̀ nùŋə̀nə àkwuə̀ e amwuə. 56Lenəla, pobə lə̀ kẅirə̀ ndèrə̀ àlaʼà pobə ngə̀ ntsùŋə̀ ɨ̀pwuumə̀ àzhyǎ pɨ̀shìʼnə̀ pobə mɨ̀ghurə̀ mɨ àzhyǎ mɨ̀shìʼnə̀ a nɨ zoʼò àkwuə̀ Yěsû. Pobə lə̀ zhwùutə̀ aŋunə njyə̂ àlaʼà, a nɨ ndzùŋə̀ a mbòomə pɨ̀Jew.

Aktuálne označené:

Lukə̀ 23: pny

Zvýraznenie

Zdieľať

Kopírovať