Lukə̀ 22
22
Tsaʼnə pɨ lə̀ tàʼnə àlàŋə a nɨ kô a Yěsû
(Mat 26.1-5; Mrk 14.1-2; Jòn 11.45-53)
1Nkwùə̀ Nɨ̀ghaʼà Àpaanə̀ Tɨkoʼò ɨ̀ lə̀ paatə̀, nɨ pɨ lə̀ mənə nfuŋə̀ nɨ Àlàŋə̀ Mmyàʼtə̀. 2Pɨ̀fò màʼà Nẅùə̀ pobə pɨ̀nèrə̀ mbòomə lə̀ mə ntàʼà àlàŋə a nɨ nyaʼtə̀ nzhwuutə̀ Yěsû, ntiinə pobə lə̀ mənə mbô pə̀ənə̀.
Yudà a pyiimə̀ a nɨ shwùunə̀ a Yěsû
(Mat 26.14-16; Mrk 14.10-11)
3Satàanə̀ à lə̀ kwuunə̀ a ntɨŋmə̀ Yudà Iskaryòtə̀ nɨ à lə̀ pənə taʼà ŋwùə̀ amwuə ɨ̀zùŋə̀ ndzùmə̀ Yěsû pa ntsòbə̀ ɨpaa. 4Lenəla, Yudà a ghə̀ mbyantə̀ pobə pɨ̀fò màʼà Nẅùə̀ nɨ pɨ̀mbyabə̀ Ndâ Mɨ̀shwàʼà Nẅùə̀ tsaʼnə ǎ shwùunə̀ Yěsû ambo pobə. 5Pobə lə̀ pə nɨ nɨ̀ghaʼà ntyiʼə̀ nkaʼà a nɨ ŋâ e nɨ nkabə̀. 6À lə̀ pyiimə̀ pobə pɨ pobə ntyiʼə̀ mmə ntàʼà ɨ̀sàanə̀ a nɨ ŋâ Yěsû ambo pobə nkwùə̀ nɨ ka àpùŋə̀ pə̀ənə̀ a pə pə e alyiʼə ghu.
Yěsû pobə ɨ̀zùŋə̀ ndzùmə̀ ɨ̀pe zɨghə̀ mɨ̀zɨghə̀ mɨ Àlàŋə̀ Mmyàʼtə̀
(Mat 26.17-25; Mrk 14.12-21; Jòn 13.21-30)
7Njyə̂ nɨ̀ghaʼà a nɨ zɨghə̀ Àpaanə̀ Tɨkoʼò ɨ̀ lə̀ kùʼù, zhyə̂ nɨ pɨ lə̀ mənə nkyiimə̀ mɨ̀mbyə̂ mɨ nɨ̀ghaʼà Àlàŋə̀ Mmyàʼtə̀. 8Yěsû a tsàa Pità pobə Jònə, nshwəŋə̀ ambo pobə lo, “Nɨ lèrə̀, ngə̀ ntsùŋə̀ mɨ̀zɨghə̀ mə pobə ɨ̀pwuumə̀ ɨ̀tsùmə̀ ambo pə̀ənə̀ a nɨ zɨghə̀.” 9Pobə pyiitə̀ e lo, “Wə̀ tàʼà lo pəə ghə̀ ntsùŋə̀ alyiʼə zə la ɨghə?” 10A kẅùə̀ lo, “Tsaʼnə nɨ̌ mə nkwuunə̀ a mbòmpə àlaʼà Yèrusalèmə̀ nɨ̌ tsirə̀ a ŋònə̀ nɨ à pìʼnə nɨkɨŋə nɨ nchyə. Nɨ̀ zùŋə̀ e ngə̀ nkwuunə̀ amwuə ndâ nɨ ǎ kwuunə̀. 11Nɨ̀ kwuunə̀ nɨ̀ shwəŋə̀ ambo ngàŋə̀ ndâ lo, ‘Ɨ̀nèrə̀ ɨ̀nwùə̀ à wə̀ mbyiitə̀ o lo, ntaŋə pɨ̀ghɨ̀ɨnə̀ wa nɨ mbə̀ʼə pəə pɨ ɨ̀zùŋə̀ ndzùmə̀ ɨ̀pâ zɨghə̀ mɨ̀zɨghə̀ mɨ Àlàŋə̀ Mmyàʼtə̀ ghu la ɨghə?’ 12À pɨ nèrə̀ a wɨghə nɨ ntaŋə ghù ẅùunə a àtɨ̀ghə aŋunə ndâ nɨkaŋə nɨ àzwuumə̀ àtsùmə̀ amwuə, nɨ̂ tsùŋə̀ a mèrə alyiʼə ghu.”
13Pobə lə̀ lèrə̀ ndzəənə̀ àzwuumə̀ àtsùmə̀ tyìʼə̀ tsaʼnə à lə̀ shwəŋə̀nə a ghobə. Lenəla pobə tyiʼə̀ ntsùŋə̀ mɨ̀zɨghə̀ mɨ Nɨ̀ghaʼà Àlàŋə̀ Mmyàʼtə̀.
14Nkwùə̀ ɨ̀ lə̀ kùʼù, Yěsû a nwuunə̀ aŋunə tepèrə̀ pobə ngàŋə ntwuumə̀ ɨ̀ze, 15nshwəŋə̀ ambo pobə lo, “Ǹtàʼà mə a nɨ zɨghə̀ mɨ̀zɨghə̀ mɨ Àlàŋə̀ Mmyàʼtə̀ mə pə̀ənə̀ zaʼà pòŋə̀ zəənə̀ ngəʼə̀. 16Ǹshwəŋə̀ a wɨghə lo, ka m̀bə chi zɨghə̀ mə̀ a mèrə tə pyàa tsaʼnə ànwùə̀ Nɨ̀fò Nẅùə̀ a ghǎ tô.”
17Lenəla, à lə̀ pìʼì ndoŋə̀ mɨ̀lùʼù, ŋŋâ a mɨyàa ambo Nẅùə̀ nshwəŋə̀ lo, “Nɨ̀ kò nnô nkẅemnə̀. 18Ka mbə chi nô mə̀ mɨ̀lùʼù mə tə mbyàa nkwùə̀ nɨ ànwùə̀ Nɨ̀fò Nẅùə̀ a ghǎ tô.”
19À lə̀ piinə̀ àpaanə̀ ŋŋâ a mɨyàa ambo Nẅùə̀ mbiʼtə̀ a zèrə, ŋŋâ ambo pobə, nshwəŋə̀ lo, “Lə̌ mbɨ̀ŋmə̀ mə̀ nɨ ŋ̀ŋânə àtwuə̀ nɨ pɨghə. Nɨ̀ tyiʼə̀ mmə ngɨ̀rə̀ a lenə, a nɨ kẅempə̀ mə̀.” 20Tyìʼə̀ amwuə ndwuumə̀ ghu, a ŋâ ndoŋə̀ ghu ambo pobə nkwùə̀ nɨ pɨ lə̀ zɨghə̀nə mmyàanə̀ la. Nshwəŋə̀ lo, “Ndoŋə̀ zə̀ lə̌ ɨ̀kàanə̀ ghù shwuə̀ nɨ Nẅùə̀ à wàrə̀nə àtwuə̀ nɨ pɨghə nɨ àləəmə̀ mə̀ nɨ a kẅìnə̀nə àtwuə̀ nɨ pɨghə la. 21La, nɨ̀ naŋə̀! Ẅùə̀ nɨ à pɨ shwùunə̀ mə̀ a wə̀ aŋunə tepèrə̀ pəə ze. 22Mɨ̀ŋə̀ moonə̀ ŋwùə̀ mbɨ kwɨghə̀ tsaʼa Nẅùə̀ à lə̀ nùŋə̀nə a lenə. La ngəʼə̀ noʼnə ɨ ghǎ pə aŋunə ŋònə̀ nɨ à shwùunə̀nə e la.” 23Ɨ̀zùŋə̀ ndzùmə̀ ɨ̀pe pìʼnə̀ a nɨ pyiitə̀ a tɨ̀tɨ̀rə̀ pobə lo lə̌ ɨ̀wə̌ nɨ à pɨ ghɨ̀rə̀ a zə ànwùə̀?
Àtànkə̀ mbə̀ʼə ŋònə̀ nɨ à tsàarə̀nə
24Àtànkə̀ a lə̀ furə̀ a tɨ̀tɨ̀rə̀ pobə lo, a ghǎ pə ɨ̀wə̌ pə̀ ŋònə̀ ngẅùunə nkwùə̀ nɨ ànwùə̀ Nɨ̀fò Nẅùə̀ a ghǎ tô. 25Yěsû a shwəŋə̀ ambo pobə lo, “Amwuə àtwuə̀ ɨ̀shyə̂ ghə̀, pɨ̀fò pɨ àlaʼà pa nɨ ɨ̀tɨ̀ŋnə̀ nkɨ mmə mbuʼtə̀ pə̀ənə̀ ɨ̀pobə, ɨ̀twuə̀ àlaʼà kɨ nchi mbyiimə̀ nɨ̀linə̀ lo pɨ̀swùə pɨ pə̀ənə̀.” 26La ka pə e a lenə a tɨ̀tɨ̀rə̀ pɨghə, mbòŋə̀ lo, ŋònə̀ ngẅùunə amwuə pɨghə â tyiʼə̀ tsaʼa mɨnkɨ̂. Ŋònə̀ nɨ à pənə àtwuə̀ pɨghə â tyiʼə̀ mbə tsaʼa ngàŋə̀ àfàʼà 27A ɨ̀wə̌ mbə ŋònə̀ ngẅùunə, ẅùə̀ nɨ à nwuunə̀nə lo zɨghə̀ e kə̀ ẅùə̀ nɨ à pɨ ŋâ mɨ̀zɨghə̀? Ka à pə e ẅùə̀ wa nɨ à nwuunə̀nə àtwuə̀ tepèrə̀ la? La ǹkùmə̀ mbə a tɨ̀tɨ̀rə̀ pɨghə la tsaʼa ngàŋə̀ àfàʼà. 28Pɨghə la pànə̀ pa nɨ nɨ̀ lə̀ pənə pə̀ənə̀ amwuə nkwùə̀ ntòmnə̀ mə̀. 29Tsaʼnə Tǎ ɨwəə à lə̀ ŋânə ɨ̀tɨ̀ŋnə̀ ambo mɨ̀ŋə̀ a nɨ puʼtə̀ àtwuə̀ ɨ̀shyə̂ zə̀, mbɨ kɨ ŋâ ɨ̀tɨ̀ŋnə̀ ghu ambo pɨghə, 30mbə̀ʼə nɨ tyiʼə̀ ndzɨghə̀, nnô aŋunə tepèrə̀ amwuə ànwùə̀ nɨ̀fò mə̀, kɨ chi nwuunə̀ aŋunə ɨləŋə nɨ̀fò pa ntsòbə̀ ɨpaa àtwuə̀ mɨ̀ngẅàrə̀ mɨ Israel.
Yěsû a shwəŋə̀ tsaʼnə Pità à ghǎ ntwuunə̀ e
31“Shimùnə̀, Shimùnə̀ naŋə̀, Satàanə̀ a loonə̀ mə ɨ̀sàanə̀ a nɨ zhwiʼì a wɨghə fuukə̀ pànə̀ pɨ̀shìʼnə̀ amwuə pɨ tɨ̀pòŋə̀. 32La, ǹchàʼtə̀ mə Nẅùə̀ àtwuə̀ ghò, Shimùnə̀, lo kò àpyiimə̀ o a porə̀. La nkwùə̀ nɨ wə̀ kẅirə̀nə nkwə̂ o ambo mɨ̀ŋə̀ wə̀ tyiʼə̀ ntaŋnə̀ a nɨ pə̀ʼkə̀ mɨ̀ntɨŋmə̀ mɨ pɨlyimə ɨ̀pô.” 33Pità a kẅùə̀ lo, “Ndòʼnə̀mbyə̂, ǹchuʼtə̀ mə a nɨ lèrə̀ pùu a ɨ̀tsaŋə̀ kə̀ a nɨ kwɨghə̀ pùu.” 34A kẅùə̀ lo, “Ǹshwəŋə̀ ambo ghò Pità, ankəʼə ǎ kɨ toŋə̀ sìnə̀ wə̀ ghò twuunə̀ mə̀ nkwùə̀ ɨtarə lo ka wə̀ zhyə̂ o a gha.”
35Nkwùə̀ ghu, Yěsû a pyiitə̀ ghobə lo, “Nkwùə̀ nɨ ndə̀ tsàanə a wɨghə àpyìinə tɨ məpàamə̀ kə̀ àpàamə̀, kə̀ ɨtabə, tə nɨ̀ lə̀ puŋə̀ àzwuumə̀ ɨ̀tse?”
Pobə kẅùə̀ lo, “Ka pəə lə̀ puŋə̀ a wəə àzwuumə̀ àtse.”
36A shwəŋə̀ ambo pobə lo, “La tɨ̀tsòŋə̀, ŋònə̀ nɨ à pənə nɨ məpàamə̀ â lòo a ẅèrə, farə àpàamə̀. La ŋònə̀ nɨ ka à pə e nɨ mɨnẅuə ntsòo, â shwùunə̀ a atsəʼə e ndzwuunə̀ a taʼà. 37Ngwə̀ nshwəŋə̀ ambo pɨghə lo ànwùə̀ zə̀ nɨ àŋwàʼnə̀ Nẅùə̀ a lə̀ shwəŋə̀nə mbə̀ʼə mə̀ la, a pɨ lòo alyiʼə lo, ‘Pɨ lə̀ shaŋə̀ e aŋunə ngàŋə̀ ngɨ̀rə̀ ɨ̀nwùə̀ tɨ̀pòŋə̀,’ ntii ànwùə̀ nɨ pɨ lə̀ ŋwàʼnə̀nə mbə̀ʼə mə̀ a zə ntô pwùumə̀.” 38Ɨ̀zùŋə̀ ndzùmə̀ ɨ̀pe shwəŋə̀ lo “Zəənə̀! Ndòʼnə̀mbyə̂ Yěsû, pɨ̀mɨnẅuə pɨ ntsòo pɨpaa pə a nɨ̀ghə̂.” A kẅùə̀ ambo pobə lo, “Â kùʼù!”
Yěsû a chàʼtə̀ a Nẅùə̀ àtwuə̀ Mbarə̀ Olìvə̀
(Mat 26.36-46; Mrk 14.32-42)
39Yěsû a furə̀ tsaʼnə à lə̀ pyə̀nə mmə ngɨ̀rə̀, ndèrə̀ aŋunə Mbarə̀ Olìvə̀, ɨ̀zùŋə̀ ndzùmə̀ ɨ̀pe zùŋə̀ e pobə pɨ pobə koʼò ndèrə̀ ghu. 40Nkwùə̀ nɨ à lə̀ pyàanə alyiʼə ghu à lə̀ shwəŋə̀ ambo pobə lo nɨ̀ mə nchàʼtə̀ a Nẅùə̀ mbə̀ʼə nɨ̀ kunə̀ amwuə àkwàʼnə̀ Satàanə̀. 41Lenəla à lə̀ mìntə̀ e a nɨ̀pwùnə pobə, ntə̂ mɨ̀kwìʼtə ɨ̀me a ɨ̀shyə̂ nchàʼtə̀ a Nẅùə̀, 42nshwəŋə̀ lo, “Tǎ, wə̀ tə mbəla nkòŋə̀, wə̀ kẅiirə̀ ndoŋə̀ ngəʼə̀ zə̀ ambo mɨ̀ŋə̀. La a pə amwuə ndwuumə̀ nɨ wə̀ tàʼnə, kò a pə e amwuə ɨ̀ghâ ndwuumə̀.” 43Lenəla angèrə̀ a furə̀ a nɨ̀pwuurə̀ ntô ambo ze mbə̀ʼkə̀ ntɨŋmə̀ e. 44Yěsû à lə̀ tyiʼə̀ mbə amwuə àkwàŋə̀ yè noʼnə aŋunə ntòmnə̀ yɨ̀noʼnə nɨ ɨ̀ zə ntô, nkyiitə̀ ndàŋə̀ nɨ mbyə̀ nchàʼtə̀ a Nẅùə̀ nɨ ntɨŋmə̀ e ɨ̀tsùmə̀, àlyìʼnə̀ e a tapə̀ a ɨ̀shyə̂ tsaʼa àləəmə̀. 45Nkwùə̀ nɨ à lə̀ lòonə a ɨ̀shyə̂ aŋunə àchàʼtə̀ Nẅùə̀ la, à lə̀ kẅirə̀ ndèrə̀ ambo ɨ̀zùŋə̀ ndzùmə̀ ɨ̀pe, ntsirə̀ a ghobə pobə mə ndyə̂ ntii àsòmnə̀ nɨ a lə̀ pənə amwuə pobə a lə̀ ghɨ̀rə̀ mɨ̀ntɨŋmə̀ ɨ̀mobə porə̀. 46Yěsû a pyiitə̀ a ghobə lo, “a ghɨ̀rə̀ àkə nɨ tə ndyə̂? Nɨ̀ lòo a ɨ̀shyə̂ nchàʼtə̀ a Nẅùə̀ mbə̀ʼə nɨ̀ kunə̀ amwuə àkwàʼnə̀ Satàanə̀.”
Pɨ kô a Yěsû
(Mat 26.47-56; Mrk 14.43-50; Jòn 18.3-11)
47Tsaʼa Yěsû a pirə̀ mə nshwəŋnə̀ la, àpùŋə̀ pə̀ənə̀ a tô nɨ Yudà a mbyə̀. Mbə taʼà ŋwùə̀ amwuə ɨ̀zùŋə̀ ndzùmə̀ ɨ̀pe ntsòbə̀ ɨpaa. A koʼò ntô ambo Yěsû nnyoŋə̀ mɨ̀ghə̀ʼə̀ ɨ̀me. 48Yěsû a shwəŋə̀ ambo ze lo, “Yudà! Wə̀ pɨ shwùunə̀ a moonə̀ ŋwùə̀ la a nɨ nyoŋə̀ mɨ̀ghə̀ʼə̀ ɨ̀me?” 49Nkwùə̀ nɨ ɨ̀zùŋə̀ ndzùmə̀ Yěsû lə̀ zəənə̀nə ànwùə̀ nɨ a zə ntô ghɨ̀rə̀, pobə pyiitə̀ lo, “Ndòʼnə̀mbyə̂ pəə zòŋnə̀ nɨ pɨ̀mɨnẅuə pɨ ntsòo ɨ̀pəə?” 50Lenəla taʼà ŋwùə̀ ɨghobə a kəʼə̀ àpùʼù àtwuə̀ pɨ̀fò màʼà Nẅùə̀ ndə̂ nɨtugrə ɨ̀tse tsɨ̀ zɨghə̀nə. 51La Yěsû a shwəŋə̀ lo, “A kùʼù.” Lenəla à lə̀ zùŋə̀ mbarəkə̀ nɨtugrə nɨ ŋònə̀ ghu mbarə̀ e.
52Yěsû a pyiitə̀ ambo pɨ̀fò màʼà Nẅùə̀ pobə pɨ ngàŋə̀ àfàʼà Ndâ Mɨ̀shwàʼà Nẅùə̀ ghobə pɨ̀lɨ̀ŋmə̂ nɨ pɨ tônə lo kô e lo, “Nɨ̀ tô nɨ mɨ̀nẅùə pobə mɨ̀pòrə̀ lo kô mə̀ tsaʼa ɨ̀ndzə̀ərə̀? 53Ndə̀ pə pə̀ənə̀ amwuə Ndâ Mɨ̀shwàʼà Nẅùə̀ njyə̂ ɨ̀tsùmə̀ ka nɨ̀ kô wɨghə gha, la lə̌ nkwùə̀ ɨzɨghə, mbə nkwùə̀ nɨ mɨ̀tɨ̀ŋnə̀ mɨ ndzùmə mə̀ fàʼà.”
Pità a twuunə̀ a Yěsû
(Mat 26.57-58, 26.69-75; Mrk 14.53-54, 14.66-72; Jòn 18.12-18, 18.25-27)
54Lenəla pànə̀ pə lə̀ kô a Yěsû, ndòo e ngə̀ a ndâ àtwuə̀ pɨ̀fò màʼà Nẅùə̀. Pità à lə̀ mə ndzùŋə̀ a ghobə a ndzùmə̀ ndzùmə̀. 55La nkwùə̀ nɨ pɨ lə̀ chwùə̀nə ɨ̀mǔ a tɨ̀tɨ̀rə̀ àtɨ̀taa àtwuə̀ pɨ̀fò màʼà Nẅùə̀ wə̀ lo pànə̂ zô, Pità à lə̀ ghə̀ nnwuunə̀ a ɨ̀shyə̂ pobə pɨ pobə. 56Ngàŋə̀ àfàʼà àtwuə̀ pɨ̀fò màʼà Nẅùə̀ nɨ à lə̀ pənə mə̀ngyə̌ a zəənə̀ a Pità a nwuunə̀ a nɨ̀pwùnə ɨ̀mǔ wə̀. A tsùŋə̀ nnaŋə̀ e ɨ̀shìʼnə̀ nshwəŋə̀ lo, “Ŋònə̀ wə̀ à lə̀ pə pobə Yěsû.”
57Pità a làʼnə̀ ànwùə̀ ghu nshwəŋə̀ lo, “Mə̀ngyə̌, ka ǹzhyə̂ mə̀ a ye.”
58A kɨ pə tyìʼə̀ aŋunə mətùmə nkwùə̀ lə, ŋònə̀ ɨ̀tse a kɨ nchi ndzəənə̀ e, nshwəŋə̀ lo, “Ghò la taʼà ŋwùə̀ amwuə pobə.”
Pità a kẅùə̀ lo, “Ndɨ̀ŋmə̂, ka mbə mə̀.”
59A kɨ chi pə tyìʼə̀ aŋunə mətùmə nkwùə̀, ghùtse ŋwùə̀ a kẅirə̀ nshwəŋə̀ nɨ ngyə̀ ntɨ̀ŋnə̀ lo, “A nkǔŋə nkuŋə, ŋònə̀ wə̀ à lə̀ pə pobə ze, ntiinə à pənə ŋwùə̀ Galìlyə̂.”
60Pità a kẅùə̀ lo, “Tǎ ka ǹzhyə̂ mə̀ ànwùə̀ nɨ wə̀ wə̀ nshwəŋə̀ lə.” Tsaʼnə à lə̀ pirə̀nə mmə nshwəŋnə̀ la, ankəʼə a toŋə̀. 61Ndòʼnə̀mbyə̂ a pə̀ŋə̀ nnaŋə̀ a Pità. Lenəla a kẅempə̀ àshwəŋnə̀ Ndòʼnə̀mbyə̂ nɨ à lə̀ shwəŋnə̀ ambo ze lo, “Ankəʼə ǎ kɨ toŋə̀ sìnə̀, wə̀ twuunə̀ mə̀ nkwùə̀ ɨtarə.” 62Pità à lə̀ lòo nfurə̀ ngyìi tə nswuʼə̀. 63Pànə̀ nɨ pɨ lə̀ pənə mbyabə̀ Yěsû lə̀ nyèŋə̀ e nkɨ mbuʼù e. 64Pɨ lə̀ korə̀ ɨ̀myə̂ ɨ̀me nshwəŋə̀ lo, “Səʼə̀ a ŋònə̀ nɨ a tsòonə o?” 65Pɨ lə̀ nshwəŋə̀ mɨ̀nwùə̀ mɨ̀noʼnə ambo ze a nɨ tsə̀ŋə̀ ntɨŋmə̀ e.
Yěsû a mbyə̀ Kansèrə̀
66Njyə̂ ɨ̀ lə̀ laanə̀, pɨ̀lɨ̀ŋmə̂ pɨ àlaʼà, nɨ pɨ̀fò màʼà Nẅùə̀ pobə pɨ̀nèrə̀ mbòomə shwatə̀, pɨ lòo a Yěsû ntô a mbyə̀ Kansèrə̀. 67Pobə shwəŋə̀ lo, “Ghò la Ghù Ndzoʼnə wa? Shwəŋə̀ pəə zuʼù.”
Yěsû a kẅùə̀ lo, “Ǹtə mbə lə nshwəŋə̀ a wɨghə nɨ̀ pyiimə̀ a wɨghə apə̀; 68Ǹtə nkɨ mbə lə mbyiitə̀ a wɨghə nɨ àpyiitə̀, nɨ̀ kẅùə̀ a wɨghə apə̀. 69La a nɨ pìʼnə̀ tɨ̀tsòŋə̀, Moonə̀ Ŋwùə̀ à pɨ nwuunə̀ a pàa àpô Nẅùə̀koʼò yè zɨghə̀nə.”
70Pobə pɨ̀tsùmə̀ pyiitə̀ lo, “Ghò lanə nshwəŋə̀ la lo ghǒ Moonə̀ Nẅùə̀?”
A kẅùə̀ lo, “Nɨ̀ shwəŋə̀ a lenə.”
71Pobə shwəŋə̀ lo, “Ka pə̀ənə̀ chi ntàʼà a wəənə̀ pɨ̀ndzəənə̀ zəənə̀nə pɨ̀tse mbə̀ʼə ànwùə̀ zə̀, pə̀ənə̀ zuʼù a ntswùə̀ ze.”
Aktuálne označené:
Lukə̀ 22: pny
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2017, Cameroon Association for Bible Translation and Literacy
