John 12
12
NAKATA 12
Marym Jesus ukhukhektaa Bethanymi
(Mt. 26:6-13; Mk. 14:3-9)
1Tapfumani Kangiutivinguktinagu uvlut 6it naatinagit, Jesus Bethanymun tikittuk, takanani Lazarus naiyuinaktuk, inupkaktauhimayugaluak Jesuskun. 2Talvani tapkua negiaktukuyaat Jesus Marthalu kivgaktuktuk, Lazaruslu negikatauyuk Jesusmi. 3Talva Mary tiguhigami tipigiktumik ukhuktegunmik akitukpiaktumik Jesusim itigait ukhukhektaik alatekhugik nuyaminun. Iglulu tipaalakhiyuk mamakpiaktumik. 4Maligutaitalu ilangat, Judas Iscariot, tapfuma niuvgutiginiaktaa, ukallaktuk, 5“Ukua ukhuktegut hug niuvgutigiyaungipat 300 dalanun tuniyaukuvlugit ilingayunun?” 6Taima ukaktuk kukiyukpiagami manikagviallu maligutaita munagigamiuk ilaani kukitpaktuk tapfumanga; tamnali ilingayun nagligingitagaluangit. 7Jesus ukaktuk, “Angnak pihuektailuhiuk, ukhuktegutim ilangit tutkugiaktugliuk iluvekhamnun, 8ilingayun ilipfingniihimangniagmata, ilipfili naiyuktigiyunaekipfinga.
9Jewmiullu amigaitun tuhaagamik Jesus takananiiman kaivaktun takuyumavlugik Jesus, Lazaruslu inupkaktauhimangman tapfumuna. 10Angayyuvikpagyuakullu ataningita Lazarustauk tukutumayaat, 11tapfumuna Jewmiut amihut kimagahualegmatigik ukpekhutik Jesusmun.
Jesus tikittuk Jerusalemun nagugiyauvluni
(Mt. 21:1-11; Mk. 11:1-11; Lk. 19:28-40)
12Akaguguman inuit amigaitun kaivaktun Kangiutivigmun tuhaayun Jesus kailengman Jerusalemun. 13Tapkua ungavakhutik napaaktun kihektutainik palgiaktaat. Nipikuktuyumik ukainaktun,
“Hosanna, nagugiyauyuk tamna kaigami Atangum atiagun. Israelmiun ataningat nagugiyauli"
14Jesuslu kenmekpagmik hiutekuktuyumik katkagami uhitektuk Godim Ukauhiit tiitigakhimangmata, 15“Zionmiun kammahuktailuhi ilaa Atanekhi kailengman, kenmekpagnuak hiutekuktuyuk atukhugu.” 16Maligutaita tapfumani kangekhimangngitpiaktaat tamna, kinguagunli Jesus makiktitaukaaktillugu itkaktaat tiitigakhimangman tapfumuna, inuit kuviahutigivagmayyuk taimatun. 17Inuillu Jesusmitpaktun kaitkumagu Lazarus iluvgaanin tapfuma, unipkautigiyaat. 18Inuillu palgiaktaat tuhaagamik Jesusim naunaikutagun tapfumuna. 19Pharisekut ingmingnun ukainaktun, “Ilipfi huliyunaekpaktuhi, inuit tamangmik maligmayyuk.”
Greekimiut tukhiaktun
20Kangiutivigmungaktun ilangit Jewmiungitun angayyuyumavlutik. 21Tapkua Philipmun Bethsaidamiutagmun Galileemi upagniktun ukakhutik, “Atanek, Jesus takuyumayakkut.” 22Philiplu kaigami uniutiyaa Andrew, Andrew Philiplu kaimigamik tapfuminga Jesus uniutiyaak. 23Jesusim kiuyaik, “Inum engningata tukuyyutaata tikivikhanga tikilektuk. 24Ilumuktumik ukautigipfi, nautiakhak atauhek nunamun katangngitkumi tukuluni, kihimgiuktuk, tukugumili nunami nauniaktuk ahianikhuni. 25Inum inuhini aliagigumiuk tamangniaktaa, inumlunin inuhini nunami nagugiyuitkumiuk tutkugtaginiaktaa inuhengmun nungulaitumun. 26Kialika kivgaktugumaguminga maliktakhagiyanga, nanilikiak itkuma talvanitauk kivgaga itniaktuk. Inumlu kivgaktukpanga Angutima naguginiaktaa tamna.
27“Tayya umatimni ukumailiugama kanuk ukangniakkik? Angutiga pivikhamnin umanga annautinga? Imanak kaivagama pivikhamnun. 28Angutiga, atkin nagugiguk.” Kilangminlu nipi tuhaanaktuk, “Ilaa nagugivaktaga naguginiagigalu aahin.” 29Inuillu amigaitun nangekatauvlutik tuhaagamitku kallulegnahugiyun taimatumik ukakhutik. Allat ukaktugaluit, “Ihalgulgum ukagvigimagulunin.” 30Jesus kiuyuk, 'Una nipi tuhaanaktuk pivluhi, pivlunga pingitugaluak. 31Tayya nunaum inungit uktuktaulektun. Tayyalu nunaum inungita ataningat anitaunialektuk. 32Uvangalu nunamin kangataktitauniaguma kagitiniagitka inuit tamaita uvamnun.” 33Taima Jesus ukaktuk tukuniagutini naunaekhugu. 34Inuit kiuyaat, “Pitkuyainin tuhaavaktugut Christ inuhimangniaktuk taimunga. Kanuk ukaktutin, Inum engniga kangataktitauyukhauman? Inum engniga kinauva?” 35Jesusim ukallautiyain, “Kaumanek ilaa aahin naiyugafugniaktuk ilipfingni kaumangnengmi pihukpagluhi, taaktum ulingnakhavaahi. Inuk pihugumi taaktillugu pihugiaminik nalulektuk. 36Ilipfili kaumanekaktilluhi kaumanengmun ukpekpagluhi kaumanim kitungagikuvluhi.” Jesuslu taima ukaguegami kimauyuk iyekhuni inminik tapkunanga.
Judeamiuni ukpektaituni ikitun ukpektugaluit
37Tapfumanilu Jesus naunaikutanik amigaitunik havagaluagman inuit ukpegngitpiaktaat, 38Isaiam ukauhiit ilumugmata ukakhimangman imaatun,
“Atanek, ukauhiptingnun kikut ukpekpat?
Kimunlunin Atanek hakuginiminik takupkaiva?”
39Tapkua inuit ukpelimaitun Isaiah ukakhimaman aahin,
40“Godim tautuguektitain ihumatuektitugit tautugnakhavun iyigingnin kangekhilugillu umatainin uvanga naguhipkakuvlugit.”
41Isaiah taimatumik ukakhimavaktuk Jesusim hakugigninga tautukamiuk ukautigivlugulu.
42Tapfumanilu Jewmiut ataningit ilait tapfumunga ukpektun, tapkuali kamahukpallaagamik Pharisekunun ukangngitugaluit atugvigmin anitaukunatik, 43nagugiyauyumavlutik inungnin, ihumagitailivlugu God.
Jesusim ilihauyyutain
44Jesus tukhulayuk ukakhuni, “Inum ukpegiguminga atautikun ukpegiyaa tiliyigalu. 45Aahin inum tautuguminga tiliyigalu tautuinaktaa. 46Kaumaniuyunga uvanga nunamunlu tikitpaktunga inuit ukpeguhuktun uvamnun naiyuinakunagit taagnengmi. 47Inum ukauhitka tuhaagamigit malikhimaitumik uktugiaktugunaitaga uvanga, tikinginama uktukuvlugit nunaum inungit, annautikuvlugit kihimi. 48Inum piyumangngitkuminga tuhaayumangngitkivlugit ukauhitka uktuktikaktuk ilaa. Ukauhima ilaa ukakhimayatka tapkua uktugniaktaat tamna uvluk kingullik tikitpan, 49uvanga uvapkun ukakhimaitkaluaktunga. Angutima tiligaminga ukaktitanga ukakhamnik ilihauyyutikhamniglu 50Ilihimayungalu tapfuma pitkuyain inunekaktun nungulaitumik. Ukakagama ukainakaluaktunga tuhaagama Angutimnin kihimi.
Aktuálne označené:
John 12: Sperry
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©1972 Canadian Bible Society
