John 11
11
NAKATA 11
Lazarus inupkaktauyuk
1Inuktauk aaniaktuk atikaktuk Lazarusmik iglugiegngitumi Bethanymiitpaktuk, takananilu nukagik Mary Marthalu naiyuktuk. 2Tamna Mary hivungani ukhukhekpaga Jesus tipigiktumik itigait allatekhugit nuyaminun, tapfuma ania Lazarus aaniaktuk. 3Talva nukagik tiliyuk Jesusmun ukakhutik, “Atanek ilanan aaniaktuk.” 4Jesusim tamna tuhaagamiuk ukallaktuk, “Tapfuma aaniagutaa tukuyyutikhaitugaluak takupkainiaktuglu Godim hakugininganik, tapfumunalu Godim engniga nagugiyaukuvlugu.” 5Ilaa Jesusim Martha, nukaalu Lazaruslu nagugiyain. 6Aanialengman tuhaagami takanani uvlifaamiyuk malgunik, 7kinguagunlu maligutini ukautiyain, “Aahintauk akuivagluta Judaeamun.” 8Maligutaita ukallautiyaat, “Rabbi, tayya Jewmiut millugumainaktillutin uyagagnik talvunga akuifaaniamiyutin?” 9Jesus kiuyuk, “Uvluk ikanekaktuk 12nik kaumaktillugu? Inuk pihukumi uvlutillugu nappakagngituk nunaum kaumaninga tautugnangman. 10Inuklunin pihukumi unuktillugu nappakaktuk kaumanekangnginami.” 11Taimatun ukaguegami imaatun ukallaktuk, “Lazarus ilannakput hinaakhivaktuk uvangali tupapkangniagiga.” 12Maligutaita ukautiyaat, “Atanek, hinaakhingnakpiagumi kihimi naguhiniagunakhiyuk.” 13Jesusim tukuyyutaa ukautigihimayaa, tapkuali ukauyyinahugiyagaluangat tapfuma hinigianik. 14Talva Jesus naunaitumik ukautiyain, “Lazarus ilaa tukuyuk, 15takananinginama tukuman kuviahuinaktunga pivluhi, ukpegluakuvluhi. Taki tapfumungauta.” 16Talva Thomas, taiyauyuk malgim igluanik, ukallaktuk malikatiminun, “Uvagullu mallauluta tukukatigikuvlugu tamna.”
17Jesus talvunga tikinami tuhaayaa Lazarus iluvekhimavangman uvluni hitamani. 18Taikalu Bethany Jerusalemin kanituk, mailguhimayuk malgunik. 19Jewmiullu amihut kaivaktun anuakhuktitumavlugik aningak pivlugu. 20Martham tuhaagamiuk Jesus kaglilengman palgiaktuktaa, Maryli naukhektugaluak.
21Talva Martham ukallautiyaa Jesus, “Atanek, hamanihimaguvin aniga tukuyunaituk. 22Tayyalunin ilihimayunga humillika tukhiagvigigungni God tapfuma tuniniaktaatin tapfuminga.” 23Jesusim ukallautiyaa, “Anin makikigumaaktuk.” 24Marthan ukallautiyaa, “Makilvium uvlua kingullia tikitpan makingniagman ilihimayunga.” 25Jesusim ukallautiyaa, “Makiyyutauyunga uvanga inugutauyungalu. Inum ukpegiguminga tukugaluakluni inuniaktuk. 26Inuyunlu ukpegluaglutik uvamnun tukuyunaektun. Tamna ukpegiviuk?” 27Angnam ukallautiyaa, “Ilaa, Atanek, Christiugavin, Godim engnigimatinlu nunamunlu kaiyukhaugavin ukpekluaktunga.”
28Taimatumik ukaguegami nukani Mary kaitkuyaa ukakhuni nipikukitumik, “Ilihauyyi tikinami kaitkuyaatin”. 29Marym tuhaagamiuk makittuk tayyainak upagahuakhugu. 30Jesusli iglukagluangitumun tikinahaktuk palgiaktuktauvimini-inami Marthamin. 31Jewmiullu iglumi pulaakhimayun anuakhuktitumavlugu Mary, tapkua takugamitku Mary kilamiuvluni makinman aninahuakhuni maliktaat iluvegmungaunahugivlugu kiakuvlugu taikani.
32Marymli Jesus tikinamiuk itigainun palluktuk ukautivlugu, “Atanek, hamanihimaguvin aniga tukuyunaituk.” 33Mary Jewmiullu kiavallaamata Jesusim takugamigit kuviahugunaektuk ukumailiukhuni 34apekhuiyuglu, “Namun ilivakpihiuk?” Tapkua ukallautiyaat, “Atanek, kailutin tautugiaktuglugu.” 35Jesus kulviyuk. 36Talva Jewmiut ukallaktun, “Nagugivallaagamiuk”. 37Ilangit ukaktugaluit, “Una takpikhipkaivagami takpiitumik hug tukutailingngitpauk Lazarus?”
38Jesus kuviahugunaekhuni akhun iluvegmungaktuk. Iluliukhimayuk tamna matumayuglu uyagamik. 39Jesus ukaktuk, “Uyagak ungavakhiuk.” Tukungayum naiyaata Martham Jesus ukallautiyaa, “Atanek, tukuhimagami uvluni hitamani tipaakhilektunakhiyuk.” 40Jesus kiuyaa, “Ukautingilapkin, ukpeguvin tautugniaktutin Godim hakugigninganik?” 41Tapkua akhaluagmayyuk uyagak Jesus aaglukhuni ukallaktuk, “Angutiga kuyagigipkin tuhaagangma. 42Ilaa tuhaaningnakpagangma ilihimagaluaktunga, imaitumik ukakkunga inuit hamaniitun pivlugit ukpekuvlugit ilvin tilivagangma.” 43Taima ukaguegami, nipikuktuyumik ukaktuk, “Lazarus kaiguit”. 44Tukungayuglu tamna aningnaktuk algait, itigaillu nimekhimaktillugit tukungayum annugakhautainik, akulialu ulikhimayuk kalikumik. Jesusim ukallautiyain, “Nimigutaiyakhiuk pihuglitauk.”
Angayyuvikpagyuakut ataningita tukutumavlugu Jesus ihumakatigiktun
(Mt. 26:1-5; Mk. 14:1-2; Lk. 22:1-2)
45Talva Jewmiut amigaitun Marymun kaithimavaktun takugamitku Jesusim havaanga tapfumunga ukpektun, 46ilailli Pharisekunungaktun uniutivlugu Jesusim havaktilanganik. 47Talva angayyuvikpagyuakut ataningit, Pharisekullu kaitkuyain katimayukhat ukakhutik, “Tamna inuk naunaikutanik amigaitunik pivaktuk. Uvagulli huliniakkita? 48Tamna pitailingitkuptigu inuit tamangmik ukpeginiaktaat, Romanmiullu ahiguktiniaktaat angayyuvikput nungutilugit nunakativullu. 49Tapkua ilangat, Caiaphas, tapfumani ataniuyuk angayyuvikpagyukunun, tapkunga ukallaktuk, “Ilipfi ilihimangngitpiaktuhi, 50ihumanginapfi imaatun, inuk atauhek tukutpan inuit pivlugit, inukatigit tamangmik tukukunagit, taima nagutpiaktuk ilipfingnun.” 51Taimatun ukangngitpiaktuk inmigun, angayyuvikpagyukunun ataniugami tapfumani hivuniugiakpaktuk Jesuskun tapfuma tukuyyutiginiamagit nunakatigit, 52aahin allat pivlugit Godim kitungain apfimayun, katikuvlugit atautimun. 53Talvangaaninlu Jewmiut akhun tukutumayaat Jesus.
54Jesuslu, talva, Jewmiuni takuyauyumangitpiaktuk Ephraimmun inuilguk hanianun aullakhuni, taikanili maligutini naiyuktain. 55Jewmiut Kangiutivingat tikilektuk talva, amigaitullu Jerusalemun akuiyun Kangiutivinguktinagu ingmingnik halumaektikuvlugit. 56Tapkualu Jesus kenigiaktuktaat ukakhutik ingmingnik nangektillugit angayyuvikpagyuami, “Kanuk ihumavihi? Negiaktuvingmungauyunaektuk huna, ai?” 57Angayyuvikpagyuakut ataningit, Pharisekullu pitkuivaktun inungnik nalliaklunin Jesusim humitilakhaanik ilihimagumi tapfuminga uniuyyiyukhak tapkununga, tapkua tigukuvlugu.
Aktuálne označené:
John 11: Sperry
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©1972 Canadian Bible Society
