John 13
13
NAKATA 13
Jesusim maligutimi itigait uaktain
1Kangiutivinguktinagu Jesus ilihimayuk aullavikhanga nunamin Anguminun kaglilengman. Tapfuma Jesusim maligutini nunamiitun nagugigamigit nagugiyain nutkakhimaitumik ihuanun.
2Tupilaglu ihumaliukpaktuk Judas, Simonim engniga, tunihikuvlugu Jesusmik. 3Maligutaillu negitillugit Jesus makittuk ilihimagami Angutimi tunivagmani tamainik aahin tikihimagami Godmin utegniakamilu tapfumunga. 4Negihuegami makittuk atigiekhunilu alagut tiguyaa hatkailitiutivlugu. 5Talva uagvingmun imengmik kuvihigami maligutimi itigait uagahualektait alaguminik hatkailitaminik alatekhugit. 6Upagmani Simon Peter, Peterm ukallautiyaa, “Atanek itigamnik uakhinahualekkin?” 7Jesusim kiuyaa, “Pilektamnik tayya naluyutin, kinguagunli kangekhiniakkutin.” 8Peterm ukallautiyaa, “Itigamnik uakhiyunaektutin ilaa.” Jesusim kiuyaa, “Uagngitgupkin talva ilaulimaitutin uvamnun.” 9Simon Peterm ukautimiyaa, “Atanek, uakit itigatka, algatkalu niakugalu.” 10Jesusim ukallautiyaa, “Inuk uakhimagumi uaktauyunaektuk tayya, itigait kihimi, halumaktitaugami taman. Ilipfilu halumayuhi, atauhek kihimi ilipfingni halumaektugaluak” 11ilihimagamiuk tamna tunihiniaktuk tapfuminga. Taima ukaktuk, “Tamapfi halumangngitpiaktuhi.”
12Jesusimlu uagamigit tapkua itigait, atigimivlunilu ingimiyuk ukautivlugit, “Ilipfingnun pivaktamnik kangekhivihi? 13Taiyapfinga 'Ilihauyyimik' 'Atanengmik'lu itkumayumik ukaktuhi tamnaugama. 14Uvangalu Atanengigupfinga Ilihauyyigigupfingalu, aahin uagapkit itigahi, ilipfitauk uakhiyukhauyuhi itigapfingnik. 15Maliktakhamik takupkaktitapfi ayyikutanik pikuvluhi. 16Ilumuktumik ukautigipfi, kivgak ataniminin ataniukiyaungitpiaktuk, tiliyauyuglu tiliyiminin ataniukiyaungituktauk. 17Uminga ilihimagupfi maliglugit kuviahukpiaktuhi.
18“Uvangali tamapfi ukautigingitagaluapfi. Pilluaktatka ilihimayatka; Godim Ukauhiilli ilumuktukhat tiitigakhimangmat, 'Inum negikatima hugiyuktanga akhun'. 19Talvangaanin ukautigipfi tamna piyautinagu, piyautpan ukpekuvluhi uvanga tamnaugama. 20Ilumuktumik ukautigipfi, inum ilagigumigit tiliyatka ilagiyanga uvanga, tapfumalu ilagiguminga atautikun ilagiyaa tiliyiga.”
Peterm Jesus ikutiginiangmagu ukautigiyauyuk
(Mt. 26:20-25; Mk. 14:17-21; Lk. 22:21-23)
21Taimatun Jesus ukagami kuglukpiaktuk umamini ukakhuni, “Ilumuktumik ukautigipfi ilapfi niuvgutiginiaktanga.” 22Maligutait ingmingnun kiviaktun naluvlutik nallitik ukautigimangagu. 23Talva maligutaita ilangat, Tamna Jesusim nagugiyaa, Jesusim hanianilektuk ingivluni. 24Tapfumungalu Simon Peter nulugakhuni apekhuktaa nalliak ukautigimangagu Jesusim. 25Tamnalu inangavluni Jesusim haniani ukallautiyaa, “Atanek, tamna kinauva?” 26Jesus kiuyuk, “Mukpauyak una mihutigikaalugu uminga nalliak tunigupku tamnauyuk.” Talva mukpauyam ilanga mihutigigamiuk tapfuminga tuniyaa Judas, Simon Iscariotim engniga. 27Tapfuma negimagu Satanim itegvigiyaa. Jesusim ukallautiyaa, “Piyumaaktan piguk kilamik.” 28Negikatauyunli Jesusim ukauhiit ukakhimayain Judasmun naluyain. 29Ilangit ihumayun, Judas manilekhiyiuman Jesus ukagivigiyaa imaatun, 'Niuvegiagin piyakhaptingnik Kangiutivingmun” Judas aitukuvlugulunin ilingayunun. 30Judaslu negiguegami tayyainak aniyuk. Tapfumani taakpiaktuk.
Jesus pitkuiyuk nutaamik kuviakutigun
31Judas aningman Jesus ukaktuk, “Tayya Inum engniga nagugiyauniaktuk, tapfumanilu Godtauk nagugiyauniaktuk. 32Godlu nagugiyaugumi umani, Godimlu naguginiaktaa tamna inmini, tayyainak piniaktuglu. 33Kitungatka, ilipfingniniagafuktunga. Ilipfili kenigiaktugniagipfinga ukakhimagaluakkunga Jewmiunun, 'Tikiniagutimnun kailimaituhi', ayyikutaniglu ukautigipfi tayya. 34Tuniyapfili pitkuyamik nutaamik kuviakutigivagluhi ilipfingnik, uvanga kuviagigapfi. 35Ilipfingnik kuviakutigigupfi inuit tamangmik ilihimangniaktun ilipfi malikpagapfinga.“
Peterm ikutiginiamagu Jesus naunaektuk
(Mt. 26:31-35; Mk. 14:27-31; Lk. 22:31-34)
36Simon Peter, ukautiyaa, “Atanek namungaulekkin?” Jesus kiuyuk, “Aullavikhamnun mallaulimaitutin tayya, ilaani kihimi malikhunguyutin.” 37Peterm ukallautiyaa, “Atanek hug maliglimaitagin tayya? Pivlutin inuhiga aitutiginiagiga.” 38Jesus kiuyuk, “Inuhin aitutiginiakiuk pivlunga? Ilumuktumik ukautigipkin, tingmiak nipyaaktinagu ilvin ikutiginiaktangma pingahuektuglutin.”
Aktuálne označené:
John 13: Sperry
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©1972 Canadian Bible Society
