MATTHAI 24
24
1Cuhnuah Jesuh cu a chuak i ṭempal a chuahtak lai ah, ṭempal sakmi zohter dingah a lamkaltu kha an ra. 2Jesuh nih, “Hi vialte hi nan hmu ko lo maw? Biataktein kan chimh hna, chimh lomi lungrual pakhat hmanh a um lai lo,” tiah a ti hna. 3Cuticun Oliv Tlang cung i a ṭhut lioah anmah lawngin lamkaltu kha a sinah an ra i, “Cucu zeitikahdah a si te lai? Na rat `hannâk le cân donghnâk ding hmelchunhnâk kha kan chim tuah,” tiah an ti. 4Jesuh nih, “Ahohmanh nih an in hlen nâkhnga lo, i ral ring u. 5Zeitintiah mi tampi ka min chalh in a ra lai i mi tampi an hlen hna lai. 6Cun raltuknâk le raldohnâk thawngpâng nan theih lai. Rak lau hlah u. Hi thil hna hi an si hrimhrim awk a si. Asinain donghnâk cu a si rih lai lo. 7Zeitintiah phunkhat le phunkhat an i doh lai. ram le ram an i doh lai. Hmun kipah mangṭâm a tlung lai, rai an tlung lai i kakip ah li ai hnin lai. 8Cu thil vialte cu nau hrinlai nganfah hramthawknâk a si. 9Cucân ah cun harnâk tuarter dingin an in tlaih hna lai i an in thah hna lai; ka min ruangah miphun vialte nih an in huat hna lai. 10Cu cân ah cun mi tampi an tlu lai, an i ripawt lai i an i hua lai. 11Profet deu tampi an chuak lai i mitampi an hlen hna lai. 12Sualnâk a karh tuk lai i dawtnâk a dai lai. 13Asinain a donghtiang a hmunmi nih khamhnâk a hmuh lai. 14Hi vanbawi pennâk Thawngṭha hi miphun vialte theihter awkah vawlei dih lakah chim a si lai, cuticun donghnâk kha a phân lai. 15“Profet Daniel nih a rak chimmi, ‘Ṭhiotu fihnung’ hmun thiang i a dir nan hmuh tikah a reltu hna nih a sullam hngal ko hna seh. 16Judia ram i a ummi hna tlangah tli hna seh. 17Inn cung i a ummi nih thil lak awkah inn chungah ṭum hlah seh; 18Lo i a ummi nih thil lak awkah inn ah tlung hlah seh. 19Cu cân ah fa pawimi le nau pawmmi caah a har khun lai. 20Cun nan zamnâk ni cu khuasik cân le Sabbath ni a sin nâkhnga lo thlacam u; 21Zeitintiah harnâk nganpi a tlung lai. Cubantuk harnâk cu vawlei semkâ in atu tiang a um bal lo i hmailei zong ah a um ti lai lo. 22Cu ni hna cu tawiter sihlahsehlaw ahohmanh khamh an si kho lai lo; asinain thimmi hna ruangah cu ni cu tawiter a si lai. 23Cucân ahcun nan sinah, “Hi kaah Krih a um, khika ah a um an ti tikah, zumhna hlah u, 24Zeitintiah krih deu le profet deu an chuak lai i a nganmi hmelchunhnâk le khuaruahharnâk tuah in an in hlen hna lai. Si kho sehlaw thimmi hmanh an hlen khawh hna lai. 25Ngaihmanh u, kan chimh chung cang hna hih. 26Cucaah nan sinah, zohhmanh u, ram kingah a um, an ti tikah vakal hlah u. Innkhân chungah a um an ti zongah, va zum hlah u. 27Zeitintiah Nimtlau â lek i vanhram deng tiangin a ceuh bantukin Mi Fapa a rat niah cun a si te lai. 28Zeitintiah saruak umnâk pauh ah langta zong an i pum tawn. 29Cubantuk harnâk cân a dih le cângkâ, ni a mui lai i thlapa nih a ceunâk a chuah ti lai lo. Van in arfi kha an tla lai i van ṭhawnnâk cu ai hnin lai. 30Cucân ah Mi Fapa hmelchunhnâk cu vanah a lang lai i vawlei miphun vialte cu ngaihchia in an hrûm an ai lai. Mi Fapa hi thiltikhawhnâk le a lianngami sunparnâk he vanah khuadawm lak i a rat kha an hmuh lai. 31A vanmi kha a liannammi muko thawng he a thlah hna lai i vawlei killi in vanhram deng khat te leiin khatte lei tiang thimmi kha an pumh hna lai. 32Theipi kungah tahchunhnâk cawng u. Azim a no i a hnah a cawrh tikah vaupi a chuak lai, tiah nan hngalh. 33Nannih zong nih cu thil vialte nan hmuh tikah, Amah cu a nai cang i inkâ hramah a um cang tiah hngal u. 34Biataktein kan chimh hna, cu thil cu a tlin dih lo ahcun atu chanmi hi an lo lai lo. 35Lei le van an rawk lai, ka bia cu zeitilei hmanh in a rawk lai lo. 36Asinain cu ni le suimilam cân cu, ahohmanh nih an hngal lo. Pa dah ti lo cun, van i vancungmi hmanh nih an hngal lo. 37Noah chan bantuk khan Mi Fapa arat cân ah a si te lai. 38Zeitintiah tilian a tlun i Noah tilawng chung i a luh ni tiangkhan, an ei, an ding, nupi pasal an i ngei, 39tilian nih alâk dih hna hlan lo zeihmanh an hngal lo. Mi Fapa arat ni zongah cubantuk cu a si te lai. 40Cu cân ahcun loah mi pahnih an um lai, mi pakhat lâk a si lai i pakhat nganh ta a si lai. 41Sumsu mi nu pahnih an um lai, pakhat lâk a si lai i pakhat nganh ta a si lai. 42Cucaah i ralring u, zei ni ahdah nan Bawipa a rat lai, nan hngal lo. 43Asinain hihi hngal u, mifir a rat lai kha in ngeitu nih rak hngal sehlaw, a ven lai i a in a bauh lai lo. 44Cucaah nannih zong ralring tein um u, zeitintiah nan i ralring lo cân ah nan Bawipa a ra sual lai. 45Zumh awk a tlâkmi le a fimmi sinum, a pu nih an chungkhar uktu le zohkhenhtu le rawl petu ah a hman hngami cu mizeidah a si lai? 46Apu a rat cân i cubantuk i a rak ummi sinum kha a si hrim hrim lai. 47Biataktein kan chimh hna, a ngeihmi vialte zohkhentu ah a canter lai. 48Asinain a sualmi sinum nih a lung chungin, kapu cu tuanah ara lai lo tiah ruah in, 49sin um dang kha rak vel sehlaw, a ding eimi hna sinah rak eiding ve sehlaw, 50â ralrin lo cân le â ruahchan lo cânah a pu kha a rak phân lai i 51tan hnih ah chuah in midepde hna covo kha a coter ve lai, caka ah cun ṭah le hacang rialnâk a um lai.
Aktuálne označené:
MATTHAI 24: HAKABSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
