MATTHAI 16
16
1Farasih le Sadusih kha an ra i Amah hniksak delnâk ah vanin hmelchunhnâk hmuhsak dingin an rak nawl. 2Anih nih, “Zanlei ah vankam a sen ahcun khua ṭhat â tim cang a si lai,” nan ti, 3cun zingkâ ah vankam a sen i khua a dawm caah, khua a chia lai, tiah nan ti. Midepde hna! Khua cân umtu ning cu nan hngalh nain atu cân hmelchunhnâk tu cu nan hngal kho lo. 4Tuchan misual le ṭangdang a kaimi hna nih hmelchunhnâk lawng nan ngiat. Jonah hmelchunhnâk dah ti lo, hmelchunhnâk dang zeihmanh pêk a si lai lo,” tiah a ti hna. Cun a chuahtâk hna i lo diam a kal. 5A lamkaltu nih varal an phâk tikah changreu ken an philh. 6Jesuh nih, “Farasih le Sadusih hna thilnu lakah i ralring u law fimhring tein um u,” tiah a ti hna. 7Annih nih, changreu kan i kenlo ruangah a si kho ko, tiah an ruah. 8Jesuh nih cucu a hngalh i, “Maw zumhnâk a tlawmmi hna zeiruangahdah changreu nan ngeih lo ruangah nan buai?” 9Atu tiangin nan hngal thiam rih lo maw? Mi thong nga changreu panga in hrai lio ah sei zeizat dah nan ruh kha nan hngal ti lo maw? 10Mi thongli changreu pasarih le a hleimi sei zeizatdah nan ruh timi zong kha? 11Changreu kong ka chim lo tiah zeicadah nan hngalh khawh lo. Farasih le Sadusih hna thilnu lakah i ralrinnâk bia a si kha,” tiah a ti hna. 12Cucângkâ changreu thilnu kong i ralrin peknâk si loin Farasih le Sadusih cawnpiaknâk chungin ralrin pekmi a si ti kha an hun hngalh cang. 13Jesuh nih Sisaria peng Filipi khuapawng a phâk tikah a lamkaltu hna sinah, “Mi nih, a ho an ka ti dah? tiah a hal hna. 14Annih nih, “Cheukhat nih, Baptisma petu Johan an in ti, cheukhat nih Elijah an in ti, cheukhat nih, Jeremiah maw, profet pakhat khat a si lai, an in ti,” tiah an ti. 15Anih nih, “Nannih nih tah aho nan ka ti dah?” tiah a ti hna. 16Simon Peter nih, “Krih Pathian nung Fapa na si,” tiah a ti. 17Jesuh nih a sinah, Jonah fapa Simon, mithluachuak na si, titsa le thisen nih an hngalhtermi a si lo, van i ka Pa nih an hngalhtermi na si. 18Cun nang cu, Peter na si tiah kan chimh, hi lung cungah hin ka kawhhran ka dirh lai i Mithi kutkâ hmanh nih an ngamh lai lo. 19Cun vanbawi pennâk tawh kha kan pêk lai i vulei cungah na ṭemmi cu vanah ṭem an si lai, vulei cungah na phoihmi cu vanah phoih an si ve lai,” tiah a ti. 20Krih a sinâk kong ahohmanh chim lo dingin lamkaltu kha nawl a pêk hna. 21Cu cân thawkin Jesuh nih Jerusalem khua i an kal lainâk le, tlangbawi upa hna le, nawlbia cawnpiaktu hna sinin thil tampi a temtuar lainâk ding le, thah i a um lainâk le, ni thum ni ah thawhter i a um te lainâk kong lamkaltu kha chimh hram a thawk hna. 22Peter nih a dang tein â kalpi i, “Bawipa, cuthil hna cu na cungah tlung hrimhrim hlah seh,” tiah a sîk. 23Asinain Peter kha a mer hnawh i “Satan, ka hnu ah kal! Ka caah tluknâk na si, Pathian thil kha ruat loin minung thil kha na ruah caah a si,” tiah a ti. 24Cuhnuah Jesuh nih a zultu hna sinah, “Zulh aka duhmi pauh nih, amah i hlawtin, a vailam putin ka zul seh. 25Zeitintiah a nunnâk himter a duhmi pauh nih an sung lai, Keimah ruangah a nunnâk a sungmi pauh nih an himter lai. 26Zeitintiah mi pakhat khat nih vawlei hi a dih lakin ngei sehlaw, a nunnâk a sungh ahcun san a tlai hnga maw? Asiloah mi nih a nunnâk caah zeidah a pêk kun hnga? 27Zeitintiah Mi Fapa hi a vanmi hna le a Pa sunparnâk he i thuamin a ra ṭhân lai, cu cân ah cun an tuahmi he â tlakin ṭuanman pêk an si te lai. 28Biataktein kan chimh hna, hika i a dirmi hna lakah hin, Mi Fapa a pennâk i a rat an hmuh hlan lo thihnâk a tep lo ding an um,” tiah a ti hna.
Aktuálne označené:
MATTHAI 16: HAKABSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
