MATTHAI 15
15
1Cuhnuah Jerusalem in nawlbiacawnpiaktu le Farasih kha Jesuh sinah an ra, 2“Zeiruangahdah na lamkaltu hna nih pupa phung an buar? Changreu an ei tikah an kut an ṭawl bal lo,” tiah an ti. 3Anih nih an sinah, “Nannih zong nih zeiruangahdah pupa phung ruangah Pathian nawlpêk nan buar tawn? 4Zeitintiah Pathian nih, ‘Nanu le napa upat hna,’ ti le anu le apa chiatserhtu cu thah ding,’ tiah a ti. 5Asinain nannih nih, ‘Anu le apa sinah, “Na ca i san ka rak tlaih cangnâk vialte cu Pathian sinah pekchanh a si cang,” a titu pauh nih, 6anu le apa upat a herh ti lo, nan ti tawn. Cuticun nan phung ruangah Pathian nawlpêk kha nan buar tawn. 7Mi depde hna, Isaiah nih nan kong a rak chimmi, 8“Hi mi hna nih an hmurkâ in anka naih i kâpahle in an ka upat, asinain an lungthin cu ka sin in hlapi ah a um. 9Minung nawlpek le zumhnâk kha an i cawnpiak caah anka biakmi hi pakpalawng a si, a timi hi a dik ngai,” tiah a leh hna. 10Mizapi kha a auh hna i, “Ngai u law, theithiam tuah u: 11Kâ i a lutmi cu minung thûr tertu a si lo; kâ i a chuakmi tu hi minung thûrtertu a si;” tiah a ti hna. 12Cuhnuah a lamkaltu kha an ra i, “Farasih hna nih na chimmi kha an zum hrimhrim lo ti kha na hngal maw?” tiah an ti. 13Anih nih, “Kung vialte van i ka Pa bunh lomi cu phawi a si dih lai,” tiah a leh hna. 14Annih cu biapi ah ruat hna hlah u. Hruaitu mitcaw an si. Mitcaw nih mitcaw a hruai ahcun khor chungah an tla lai,” tiah a ti hna. 15Peter nih, “Hi tahchunhnâk hi kan fianter ngat,” tiah a ti. 16Jesuh nih, “Atu tiang nannih zong theihthiamnâk ngei loin maw nan um ko rih? 17Kâ i a lutmi pauh cu pawchungah a phân i lênglei ah chuahter ṭhân a si. 18Asinain kâ in a chuakmi tu hi, lungthin in a rak chuakmi an si i cu nih cun minung hi a thûrter. 19Zeitintiah lungthin in ruahnâk ṭha lo, lainawnnâk, ṭângdangkainâk, nu le pa sualnâk, firnâk, lih i sualpuhnâk, thangchiatnâk hna a rak chuak tawn. 20Cu hna cu minung thurtertu an si, kut ṭawl lo i rawl ei nih cun mi a thurter lo,” tiah a ti. 21Jesuh nih cu hmun cu a chuahtâk i Tair le Sidon pengah a kal. 22Zohhmanh, cu ram i Kanaan minu pakhat a rak au i, “Maw, Bawipa, David Fapa, ka zângfah tuah. Ka fanu hi ṭha lo in khuachia nih a tuah,” tiah a ti. 23Asinain kâ khat hmanh in a let lo. A lamkaltu hna nih, “Kan hnu in a au lengmang fawn, kalter cang ko,” tiah an rak nawl. 24Anih nih, “A tlaumi tuu Israel mi hna sin dah ti lo ahcun thlah ka si ṭung lo,” tiah a leh hna. 25Minu cu a ra i a rak biak, “Bawipa ka bawm ko” a rak ti. 26Anih nih, “Fa le changreu lâk i uico pêk cu a ṭha lai lo,” tiah a leh. 27Anih nih, “A si ko Bawipa, asinain uico zong nih an bawi le cabuai tang i a tlami rawl ṭilfuan cu an ei tawn ko,” tiah a ti. 28Cucângkâ Jesuh nih a sinah, “Minu na zumhnâk a ngan tuk! na duhning tein na cungah tlung ko seh,” tiah a leh. Cu cân thawk cun a fanu cu a dam. 29Cuhmun cu Jesuh nih a chuahtâk i Galili tidil pawngkam ram kha a ṭol hna, tlangah a kai i cukâ ah cun a ṭhu. 30Mitampi nih an panh, mitcaw, ke bei, a holh kho lomi, pumtling lo, a phun phun an si. Jesuh kehram ah an chiah hna i a rak damter hna. 31Cuticun a holh kho lomi an holh i pumtling lomi an tling ṭhân, kebeimi kein an kal i mitcaw nih khua an hmuh kha mizapi nih an hmuh tikah an khuaruah a har i Israel Pathian kha an thangṭhat. 32Jesuh nih lamkaltu kha a auh hna i. “Mizapi hi nithum ka sinah an um cang, ei awk zeihmanh an ngeihlo caah ka zâng an fâk tuk. Rawlṭam in tlunter awk an ṭha lo. Culoahcun lampi ah an buhri sual lai,” tiah a ti hna. 33Lamkaltu hna nih, hi tluk in a tammi mibu eiawk rawl hi hmun kingah zeitindah kan hmuh khawh lai? tiah an ti. 34Jesuh nih an sinah, “Changreu zeizatdah nan ngeih?” tiah a ti hna. Annih nih, “Pasarih le nga tlawmpalte,” tiah an ti. 35Cuticun mi kha vulei ah ṭhu dingin nawl a pêk hna. 36Changreu pasarih le nga kha a lak i lawmhnâk bia a chim dih in an phawt hna. 37An dihlak in khim tein an ei i a hleimi zong sei sarih khat in an ruh. 38A eitu hna cu nu le ngakchia relchih loin mi 4000 hrawng an si. 39Mizapi kha a ṭinter hnu ah tilawng ah â cit i Magdala ramah a phân.
Aktuálne označené:
MATTHAI 15: HAKABSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
