Jesu koty rewarà kõ 24
24
Juteu kõ nivoi mã'ẽ omo'y teywete Pauru rè remẽwarà
1Ãmẽ 5 oke paire, Juteu rõvijãgwerà kõ ojapara oo Sesareja taa kyty, Jerusarẽ taa pe wyi. Kejõ oo kupa. Janejare'e pè oporegeta mãe kõ rõvijã wasu, Anania eu erà pè mã'ẽ. Ãmõ, Juteu rõvijã kõ mõ ve oo. Ãmõ, Romã pewarà tekoua kuwaparà oo, Teturu eu erà pè mã'ẽ. Mokopejõ oo kupa. A'e kõ oporegeta aità Pauru rè kovenatu Perisi rovake. 2A'e pè ovãe kupa ire, jõvijã ayvukasia rena pè ojimoaty kupa, kovenatu reve. Ãmẽ Romã pewarà tekoua kuwaparà ypy oporegeta. A'e nivoi mã'ẽ omo'y teywete Pauru rè, kovenatu reminu rõmõ. Oporegeta katu rã'ãga rã'ĩ ojimory ee.
– Kovenatu Perisi. Netekokuwavay ipi. Nekatuay wete oreupe ipi. Oreroryvay nere ipi, jõvijã ywete ene rewarà mõ. Ãmõ, orerau rejupa rewarà mõ, e'i. Nerewarà mõ tè orojimory katu ojee ipi, e'i. Nerewarà mõ teve naikoi miraia mõ orerena pè ipi. Ãmõ, jikõ'õa naikoi teve. Age'e rõwã a'evo orerereko rejupa, e'i imory rã'ãga. 3Kõ'ẽ jawe jawe a'evo oroiko ipi. Ajawyi oreroryvay nere ipi. Manyvo remẽ jẽ rõwã noreroryi nere ipi. 4Age'e noroporegeta puku'ãi neupe. Ajamã'ẽ ejapyaka rã'ĩ oreayvu rè, oro'e ene. Orokuwa neenutà, ivo neiko teãmã oreupe ipi rewarà mõ.
5– Ãwĩ kwaima'e orokuwa. Ipojy mã'ẽ tè. Poromo'eai ywete mã'ẽ teve. Pirujẽ taa taa rupi oo oo remẽ upi upi a'evo ekoi ipi. Ãmõ rupi teve omome'u Juteu kõ pè ipi, ãwisõ oõvijãgwerà kõ ayvu toerovija e'ã kupa ky'y. Ãmõ, Nasare taa wãnà rewarà kõ rõvijã teve ãwĩ, e'i rã'ãga. 6Kee e'i teve aepo jaa 'aryvo. Janejare'e moe'ea retã omojaiwe tarepe. A'evo 'evo ekoi rewarà mõ tè oropyy maevo. Oreayvu pojy rupi tè ãwĩvo oroereko. 7Ajamã'ẽ sota rõvijã, Risia eu erà pè mã'ẽ, oo orekoty ojimokasi. Wemĩgwai kõ reve wekyi orepo pe wyi. 8Ajaire a'e tè oremuroka nekoty, ãwisõ toromome'u aepo jaa neupe. Ajawyi tereporegeta ijupe esa. Ãwĩ ywete ojimome'u remẽ, “aje ywete” eretà pirujẽ oreayvu pè, e'i tite Teturu kovenatu pè.
9Aepo e'i remẽ,
– Õ'õ, aje ywete aepo e'i mã'ẽ, e'i e'i rã'ãga Juteu rõvijã kõ.
Pauru ojireko katu kovenatu Perisi rovake remẽwarà
10Ajaire kovenatu Perisi Pauru ypy omono toporegeta. Ãmẽ kee e'i Pauru:
– Akuwa ijatyray kwaray rõmõ tesõ nerokwapa orerekoa kuwaparà rõmõ neiko remẽ. Ajawyi eroryvay nerovake ajimome'u. Ene ywete neenutà eayvu ky'y, ajireko katu ijayvu ai kõ wyi remẽ, e'i. 11Kee a'età ene. Naiko pukuive Jerusarẽ taa pè aa paire epyy kupa. 12 ke remẽ tè epyy kupa, Janejare'e moe'e aa paire. A'e terekuwa esa, aje aepo a'e remẽ, e'i. 12Aã Juteu kõ nivoi mã'ẽ omo'y teywete ere. Nomã'ẽi manyvo ekojẽ aiko remẽ ere kupa. Nomã'ẽi teve jane kõ ayvuvaja vaja aiko Janejare'e moe'ea retã ypy pè aiko remẽ. Ãmõ, nomã'ẽi teve Janejare'e ayvu rè jimo'ea retã mõ wyry pè amojikõ'õoka jane kõ remẽ. Mape jẽ rõwã a'evo aiko remẽ, omã'ẽ ere kupa ipi. 13Ajawyi manyvo ne'i'ãi kuwa age'e aepo jaa rõmõ kupa mijã!
14– Ajawyi ije ywete kee a'età ene. Orerãmõi kõ reruparà mõ ve Janejare'e arovija imoe'e ipi. Wayvukwerà tãmõ Moisesi amyry pè okusiwaoka maekwerà pè “aje” a'e ipi. Wayvu mojenuarà kõ pè okusiwaoka maekwerà pè “aje” a'e teve. Ajamã'ẽ ijayvu age'ewarà pè teve “aje” a'e. A'e rupi katu teve aiko ipi, Jesu rekoa rupi tè. A'e pewarà mõ si, “Iwarite ãwĩ aepo e'i”, e'i ãwĩ kõ, a'evo aiko rewarà mõ tè. 15Ãwitõ ãwĩ kõ, “Aje, Janejare'e omãnõ mãe kõ omomoeratà”, e'i, aepo a'e mã'ẽ teve ije. Ijayvu kõ vo ve eayvu. Aje, pirujẽ omomoeratà. Ãwitõ ivo mãe kõ omomoeratà, a'evo tary ve nivoi mãe kõ, e'i. 16Ajawyi si ajimokasiay ivo katua rupi taiko Janejare'e rovake. Ãmõ, jane kõ rovake teve, e'i Pauru.
17E'i jẽ Pauru:
– Ãmõ, kee teve aiko maekwerà. Age'e rõwã Jerusarẽ rupi aiko. Ajaire naai 'ete a'e kyty ky'y. Ijaty kwaray rõmõ tesõ naai 'ete a'e kyty. Age'e tè katu ajivy mijẽ aa a'e kyty. Karakuri kõ araa eretãrãgwerà nimoma'ei mãe kõ pè ime'ẽ. Ãmõ, Janejare'e moe'ea retã pè eremime'ẽ rã araa, e'i. 18A'evo 'evo aiko remẽ omã'ẽ ere kupa, Janejare'e moe'ea retã ypy pè. Ajipiky'a'o paire jakatu omã'ẽ ere kupa. Ãmẽ a'evo aiko remẽ, aty wasu reve rõwã aiko. Najikõ'õ kõ'õi teve ee kõ.#J.K.R. 21.17-28 19Ajamã'ẽ Juteu kõ mõ a'e pè tui, Asia yvy wãnà kõ mõ. A'e kõ tè kuwasi erekoawerà kõ omome'u ene mijã, eaiwererà mõ rè sõ omã'ẽ kupa remẽ, a'e kõ tè omã'ẽ ere rewarà mõ. Aã kõ ãmẽ nomã'ẽi ere Janejare'e moe'ea retã ypy pè aju remẽ. 20Jõvijãgwerà kõ rovake aiko remẽ tè omã'ẽ ere kupa ky'y. Ajawyi a'evo aiko maekwerà kõrijõ tè kuwasi omome'u kupa mijã, a'e rovake sõ nivoi aiko remẽ. 21Kee a'e kõrijõ tè ovake kõ apõ'ã aporegeta remẽ. “Aje ywete omãnõ mãe kõ kãramõ opoeratà”, a'e. “A'e rewarà mõ ipõ age'e emojaiwea”, a'e ovake kõ, e'i Pauru oporegeta kovenatu pè.#J.K.R. 23.6
22Ãmẽ aepo jaa kovenatu Perisi wenu remẽ, kee e'i ijupe:
– Ãmõ remẽ teipõ akuwatà nerekoa. Sota rõvijã tovãe rã'ĩ nẽ, a'e tè nemuu rewarà mõ, e'i. Ãmẽ tè akuwatà nereko, e'i ijupe.
Ajamã'ẽ kovenatu Perisi Jesu rekoa rewarà wenupa mã'ẽ tè. 23Ajaire e'i sota rõvijã miti pè:
– Sota kõ mõ toãrõ jẽ rã'ĩ Pauru, e'i. Opota sõ ijimorypa kõ uu ipyri ipãtavõ remẽ, totuu nẽ ãmẽ, e'i.
Pauru kovenatu Perisi kõ rovake tui mijẽ remẽwarà
24Ãmẽ ãmõ 'ary pè, kovenatu Perisi uu mijẽ, werekwarà Tusira reve. Juteu wãivĩ'y tè erekwarà. Oike mijẽ jõvijã ayvukasia rena pè. Ãmẽ omuroka Pauru okoty, tomojenu Jesu ayvu e'eay ijupe kõ. Ãmẽ ivo katuay Pauru omojenu Kiristu Jesu rè jirovijaa mã'ẽ rewarà. 25Kee e'i teve Pauru:
– Janejare'e opota ivo tijaiko ipi, e'i. Ãmõ, opota teve tijajireko katu ivoa rupi tijaiko. Ãmõ, kãramõ Janejare'e poromosã'ãgatà, pirujẽ. Ivo mãe kõ weraatà wena kyty opyri toiko karuaru. Nivoi mãe kõ noeraa'ãi ãmẽ. A'e kõ omomorijau kõrijõtà tè, e'i Pauru.
Aepo kovenatu Perisi wenu remẽ, e'i Pauru pè:
– I'ete rã'ĩ neporegeta ije. Ejivy rã'ĩ ekwa. Ãmõ remẽ teipõ oromuroka tarà mijẽ. Ãmẽ si aenu katutà neayvu ky'y, e'i ijupe.
Ojimonyi Pauru ayvu renu rewarà mõ aepo e'i imoisyry. 26Kee e'i tite kovenatu Perisi oupe, Pauru rè: “Karakuri põ ome'ẽtà ije tamoẽoka?” e'i tite. Ajawyi omuroka py'yi imogeta. 27Nomoẽi jimopã'ãga pe wyi ajamã'ẽ, kee e'i oupe rewarà mõ: “Amoẽ sõ remẽ, Juteu kõ ojikõ'õtà ere ãmẽ. A'e kõ ywesõ tamory”, e'i oupe rewarà mõ.
Ajawyi tè nomoẽokai Pauru jimopã'ãga pupe wyi. Mõrijõ kwaray rõmõ Perisi a'evo kovenatu rõmõ ekoi jẽ. Ajaire ojisyry kovenatu rõmõ ekoia wyi, awyje ky'y. Ãmõ kovenatu tè mijẽ oike ekovijarerà rõmõ. Posiu Pesitu eu mã'ẽ tè oike ky'y. A'evo remẽ Pauru jimopã'ãga pè tui jẽ upa.
Aktuálne označené:
Jesu koty rewarà kõ 24: oymNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2013, Wycliffe Bible Translators, Inc. All rights reserved.