Jesu koty rewarà kõ 23
23
1Ãmẽ Pauru omã'ẽ ywete rã'ĩ jõvijãgwerà kõ rè javo ijupe kõ. Kee e'i ijupe kõ:
– Eretãrã kõ, pejapyaka eayvu rè aporegeta peupe remẽ. Nainõ gatui epe eaiwererà ereko epy'a pè Janejare'e wyi ipi. Ivo katuay ovake aiko ipi. Ãwĩvo teãmã eja'yrygà remeve aiko ipi, ajaate age'e remẽ, e'i.
2Anania eu Janejare'e pè oporegeta mãe kõ rõvijã wasu pè. Aepo e'i Pauru remẽ, ojurupeteoka ipyri tui mãe kõ pè. 3Ajawyi Pauru e'i ijupe:
– Janejare'e nerovija rã'ãga mã'ẽ tè ene! Ajawyi Janejare'e nemomorijautà! Emomorijauokaarà rõmõ mokoi neapy ywe'e tite rejupa. Neremirovijaa rupi rõwã a'evotà ererekooka rejupa! e'i Pauru ijupe.
4Ãmẽ kwaima'ekwerà Pauru pyri tui mãe kõ e'i ijupe:
– Aepo ere sõ Janejare'e pè oporegeta mãe kõ rõvijã wasu pè! e'i kupa. Tererõarõ tite e'ã Janejare'e remĩgwai! e'i kupa.
5Ãmẽ Pauru e'i ijupe kõ:
– Eretãrã kõ, nakuwai Janejare'e pè oporegeta mãe kõ rõvijã wasu tè sikaepo ãwĩ, e'i. Akuwa sõ remẽ, na'e'ãi kuwa ijupe mijã, kee Janejare'e okusiwaoka wayvu rõmõ rewarà mõ: “Penõvijãgwerà kõ tapeporegeta ai e'ã ikenẽ”, e'i rewarà mõ, e'i Pauru.#Jisyry. 22.28
6Ãmẽ Pauru omã'ẽ erokwa ee kõ remẽ, okuwa jõvijã kõ mõ Satuseu kõ. Ojipytery pè Pariseu kõ. Ajawyi wayvo tesõ oporegeta ijupe kõ:
– Eretãrã kõ, e'i. Pariseu teve ije, e'i. Papa amyry Pariseu teve, e'i. Age'e ike ajimojaiweroka ajupa pejẽ, kee a'e ipi rewarà mõ, “Aje ywete omãnõ mãe kõ opoeratà kãramõ”, a'e ipi rewarà mõ, e'i Pauru.#J.K.R. 26.5; Prp. 3.5
7[Aepo e'i ve Pariseu kõ ipi.] Ajawyi aepo e'i Pauru remẽ, Pariseu kõ, Satuseu kõ reve, ojiayvuvaja vaja ojeeve kupa ky'y. Ameve Pariseu kõ ojimokuipe'e ovote Satuseu kõ wyi ky'y. 8Kee e'i mã'ẽ tè Satuseu kõ rewarà mõ: “Omãnõ maekwerà kõ nopoera'ãi mijẽ kãramõ”, e'i mã'ẽ tè. Ãmõ, “Janejare'e remĩgwai yvapewarà kõ naikoi”, e'i mãe kõ tè. Ãmõ, “Jane'ãg ve naikoi”, e'i Satuseu kõ mã'ẽ. Pariseu kõ ãmẽ kee e'i mã'ẽ tè: “Uve jane'ãg mõ, yvapewarà”, e'i mã'ẽ. Ãmõ, “Uve Janejare'e remĩgwai yvapewarà kõ”, e'i mã'ẽ. Ãmõ, “Omãnõ mãe kõ opoeratà kãramõ”, e'i mã'ẽ.#Mat. 22.23; Mak. 12.18; Ruk. 20.27
[Ajawyi Pauru, “Omãnõ mãe kõ opoeratà kãramõ”, e'i remẽ, Pariseu kõ, “Õ'õ, aje”, e'i ky'y. Satuseu kõ ãmẽ, “Aje”, ne'i. Ajawyi tè ojimokuipe'e ojiwyi kupa ky'y. Pauru koty rewarà kõ rõmõ tè Pariseu kõ ãmẽ ky'y.] 9Ãmẽ ywesõ wapuka pukai tesõ kupa. Ãmẽ tãmõ Moisesi remikusiwarerà rè poromo'e mãe kõ mõ opõ'ã oporegeta. Pariseu kõ teve a'e kõ ãmẽ. A'e kõ kee e'i:
– Aã kwaima'e rè noromã'ẽi nivoi ekoi remẽ ipi. Janejare'e remĩgwai yvapewarà tè maevo oporegeta ijupe aepo te'i ipi. I'Ãg mõ yvapewarà tè maevo oporegeta ijupe aepo te'i. Ajawyi norojikõ'õ'ãi ee, e'i kupa ky'y.
10A'evo remẽ a'e pè tui mãe kõ ojikõ'õ ai ojee ky'y. Ipojy ai tè a'e pè ãmẽ kupa. Omomaranaità maevo Pauru kupa. Ajawyi sota rõvijã e'i oupe:
– Oovajarotà maevo ijuka kupa! e'i oupe.
Ajawyi omono wemĩgwai kõ mõ kuise'ẽ toeraa Pauru iwyi kõ imokatu sota kõ rena pè. 11Ãmẽ pya remẽ Jesu ojimoikatu Pauru pè.
– Ejimokasi ikenẽ, Pauru! e'i. Ãwitõ age'e ike Jerusarẽ taa wãnà kõ pè erekoa nemojikuwaoka tokuwa kupa. Ãwĩvo ve ajaire Romã taa pè teve tereo erewarà mojikuwaoka a'e wãnà kõ pè, e'i Jesu ijupe.
Juteu kõ, “Pauru sijuka”, e'i remẽwarà
12Ãmẽ kõ'ẽme Juteu kõ mõ ojimoaty. E'i ojiupe kupa:
– Pauru sijuka! e'i kupa. Tijajimi'u e'ã rã'ĩ ikõ Pauru sijuka e'ãve nẽ! e'i kupa. Tijay'u e'ã rã'ĩ teve! Aje ywete nisijavy'ãi janeayvu, e'i tite kupa.
1340 rõmõ tesõ aepo e'i tite mãe kõ. 14A'e kõ oo aepo javo Janejare'e pè oporegeta mãe kõ rõvijã kõ pè. Ãmõ, Juteu rõvijã kõ pè. Kee e'i kupa:
– Noromotee'ãi oreayvu ojiupe. Kee oro'e: “Pauru sijuka remẽ tè katu jajimi'utà. Ãmõ, jay'u tevetà”, oro'epa. 15Ajawyi kee oro'e pejẽ, jõvijãgwerà kõ tè pejẽ rewarà mõ. Kovi peporegeta sota kõ rõvijã pè toeru Pauru ike penovake kupa. Kee tapejẽ: “Emuroka Pauru. Apota ekoa aenu jẽ takuwa katu”, tapejẽ rã'ãga ikõ imono sota rõvijã pè, e'i kupa. Ãmẽ tyvija rupi oroãrõ amãtejẽtà ijuka orokupa, ike novãeive remeve, e'i oõvijã kõ pè kupa mijã.
16Ajamã'ẽ aepo e'i mã'ẽ Pauru kõjã memyry wenu sikaepo. Ajawyi oo imomewa Pauru pè, sota kõ rena pè. 17Ãmẽ Pauru, aepo wenu remẽ, sota rõvijã miti mõ omuu imogeta. E'i ijupe:
– Aã kõnomĩokyry eraa nerõvijã gyty, wemikuwa tomome'u ijupe, e'i ijupe.
18Weraa ãmẽ oõvijã gyty.
– Pauru emuu kee javo aã kõnomĩokyry pewarà mõ: “Eraa nerõvijã gyty wemikuwa tomome'u ijupe”, e'i ije, e'i.
19Ãmẽ sota rõvijã opopyy eraa kõnomĩokyry tyvija kyty tè, ãmõ kõ toenu e'ã manyvo e'i remẽ.
– Moma'e eretà põ ije? e'i.
20Ãmẽ kõnomĩokyry e'i:
– Aenu Juteu kõ oporegeta ai remẽ. Kovi kee e'ità imuu ene kupa: “Pauru emuu ike kyty, jõvijãgwerà kõ jimoatya rena kyty. Oropota ekoa oroenu jẽ torokuwa katu”, e'i rã'ãgatà imuu ene kupa. Iwarità tè aepo e'i kupa remẽ, e'i. 21Aty wasu tesõ Pauru ãpã kõ rõmõ ekoi, 40 rõmõ tesõ. Kee e'i kupa: “Pauru orojuka remẽ tè katu orojimi'utà”, e'i taenu kupa. Age'e ywete wãrõ kupa, “hoõ” tere ijupe kõ. Ajawyi ajo kuise'ẽ nekoty aepo momewa, tererovija e'ã ijayvu kõ, e'i. Teremonooka e'ã too, e'i sota rõvijã pè.
22Aepo e'i kõnomĩokyry paire, sota rõvijã e'i ijupe:
– Teremome'u e'ã ikõ aepo ere ije mã'ẽ ãmõ kõ pè nẽ, e'i ijupe.
[Aepo e'i paire omojivy imono kõnomĩokyry ãmẽ ky'y.]
Kovenatu Perisi rovake Pauru tui remẽwarà
23Aja paire sota rõvijã omoisyry amãtejẽtà Pauru too Juteu kõ wyi. Ajawyi, “Ejo ike”, e'i wemĩgwai sota rõvijã miti kõ pè, mõrijõ rõmõ. Uu kupa remẽ, kee e'i ijupe kõ:
– Pauru amonotà penupi kovenatu Perisi kyty, Sesareja taa kyty. Ajawyi eesa 200 rõmõ sota kõ. Ãmõ, 70 rõmõ kavaru rewarà kõ. Ãmõ, 200 rõmõ teve suruku poko rewarà kõ. Age'e pya peotà, 9 ora remẽ. 24Ãmõ, kavaru kõ ve tapemokatu amãtejẽ upi kõ Pauru too. Pereko katu ikõ Pauru peo remẽ nẽ, e'i. Kovenatu Perisi po pè peraa ime'ẽ, e'i sota rõvijã miti kõ pè.
25Aepo e'i paire, kareta okusiwa toeraa kupa. Kee e'i ikusiwa ee:
26Karautiu Risia remikusiwarerà aã, Kovenatu Perisi pewarà. Ãwĩ kareta akusiwa imono teremã'ẽ ee. Ejimorypa katuay wete ene ipi. Ikatu põ neiko mokope rupi mijã? a'e ene. 27Ãwĩ Pauru, amono moko kyty mã'ẽ, Juteu kõ remipyykwerà. Ke'ĩ ojukatà ereko kupa mã'ẽ. Ajamã'ẽ Romã wane'e tè sikaepo. Ajawyi oroereko katu iwyi kõ, eremĩgwai sota kõ reve.
28Nakuwai manyvo rewarà mõ põ ojikõ'õ ee kupa mã'ẽ. Ajawyi araaoka Juteu rõvijãgwerà kõ rovake, tokuwa kupa. 29Ajamã'ẽ kuise'ẽ akuwa, Juteu kõ rekoa temikusiwarerà rupi rõwã ekoi rewarà mõ tè sikaepo ojikõ'õ ee kupa. Aja rewarà mõ kõrijõ tè. Miraiwerà rõwã Pauru ajamã'ẽ. Ajawyi najukaokari ijupe kõ. Ãmõ, namonookari imopã'ãoka.
30Age'e ava mõ, “Juteu kõ ojukatà”, e'i ije imojenu takuwa. Ajawyi amonookatà amãtejẽ nekoty. Ãmõ, nivoi mã'ẽ omo'y ee mãe kõ ve amonotà ajaire nekoty. A'e kõ tomome'u katu neupe, manyvore põ ojikõ'õ ee kupa. Awyjepa eayvukwerà ky'y, e'i Karaujiu Risia ikusiwa kareta pupe.
31Oo sota kõ ãmẽ oõvijã ayvu rupi. Pauru weraa kupa. Kareta jikusiwarerà weraa teve kupa. Pya teipõ weraa kupa, Ãtipatiri taa kyty. 32Ãmẽ kõ'ẽme sota kõ, opy rè tè wata mãe kõ, ojivy uu sota kõ rena kyty, Pauru weraa maekwerà kõ. Kavaru rupi oo mãe kõ kõrijõ tè oo jẽ Pauru rupi. 33Ãmẽ oo ovãe Sesareja taa pè kupa. A'e pè ome'ẽ kareta jikusiwarerà kovenatu Perisi pè. Pauru ve ome'ẽ ipo pè kupa. 34Kovenatu kareta omogeta ãmẽ. Omogeta paire e'i Pauru pè:
– Mã yvy wãnà põ ene? e'i.
– Sirisi wãnerà tè ije, e'i Pauru.
35E'i mijẽ kovenatu Perisi ijupe:
– Ajaire oromuu tarà mijẽ ekoty nemome'u katuarerà kõ ovãema remẽ, taenu ywete si nerewarà, e'i.
Ajaire sota kõ mõ pè e'i:
– Eraa Pauru topyta jõvijã Eroti amyry posikoawerà retã wyry pè. A'e pè sota kõ toãrõ jẽ, e'i ijupe.
Aktuálne označené:
Jesu koty rewarà kõ 23: oymNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2013, Wycliffe Bible Translators, Inc. All rights reserved.