JO:N 14
14
Jisubv Abukoto:pc Lambcdc
1“Noluk asinkvdv:dcm mc:pinmcngoksuyoka; Ru:tummc mc:jvgtoka, ngomsin mc:jvgtoka. 2Ngok Abukc okumtc bojcrungko soyarc dung; cdcmpc kamangamvlo, ngo luma:ya:lang jc ngo noluk lcgangc mosvngkakupc gvdagku cmna, 3odokkc cdvlo ngo gvlangkula noluk lcgangc dungkoko mosv:yckumvlo, ngo lckoda gvlatycku odokkc ngo nolum ngokkolo:pc la:rvgsuycku, ngo okolo du:yckunc nolusin odo du:yckupc. 4Odokkc nolu kindag ngo okolop gvdagji odok lambcdcm.”
5Tomabv Bvm luto, “Ru:tuma, no okolopc gvdagji ngolu odok lambcdcm kinmang?”
6Jisubv bvm luto, “Ngo lambcdc, odokkc arodc, odokkc turnamdc; sc:kosin Abudo:pc gva:mang, ngokkokkima:mvlo. 7No ngom kinya:mvlo, no ngok Abudcmsin kinya:pc; su:pakkolokkc nolu Bvm kindagbong odokkc Bvm ka:tobo:sin.”
8Pilipbv Bvm luto, “Ru:tuma, Abudcm ngolum lcngkantei, odokkc ngolu mc:tv:suyc.”
9Jisubv bvm lubito, “Ngo siddv longcko du:mvnma:lang, odokkc ckvdaggom nolu ngom kinmang, Pilipa? Sc:kobv ngom ka:tobo:nc Abubvmci ka:tobong; no kapc lula:don, ‘Ngolum Abudcmci lcngkanteika cmna? 10Nolu mc:jvgma:nci jc ngo Abudo du:mvndung odokkc ngok Abudc ngokkolo du:mvndung cmna? Ngok nolum lunam agomkvdv:dc ngok avkc ilang gvlangki lumang; cmpige:la cdc Abudc sc:kobv ngokkolo du:dagnc Bvk agercm Bv gerdag. 11Ngom mc:jvgtoka ngokkolo:jc Abubv dung odokkc Abubv ngokkolo dung; cdcmpcmanggom ngom agerkvdv:dok lcgango:pci mc:jvgtok.
12“Aroru:pc, aroru:pc, ngo nolum lubidung, sc:kobv ngom mc:jvgdagnc ngok ager gernamdcm geryc; odokkc scmbulumyam bottaya:nc agercm geryc, kapila:nc ngo Abukoto:pc gvdagku. 13Okkomci ngok aminno nolu ka:ycnc, ngo cdcm ibiyc, Abudc:jen Awodo aminc gvycpc cmna; 14ngok aminno nolu okkomci koycji ngok aminno ngo cdcm biyc.
Angunnc Yalodok Pesunam
15“Nolu ngom aipc mc:mvlo, nolu ngok kvnggv:pc lulvgnam agom kvdv:dcm lukamdcmpc iyc. 16Odokkc ngo Abudcm kumtombiyc, odokkc Bv nolum lusvmosv:nc akoda biyc, noluk lcdulo lo:dvpc du:mvndopc, 17cdcmangagom Arodok Yalodcmsin, sc:kom rcngamsc torvgsula:ma:ycji, lcga:dc cdc Bvm ka:ma:sin cdcmanggom kinma:sin; nolu Bvm kindag, kapila:nc Bv noluk lcdulo du:mvndag, odokkc noluk lcdulo du:mvnyc.
18“Ngo nolum dunggur daggurnc kama:dopc mcla gvkuma:yc; ngo nolukkolo:pc gvlatycku. 19Cdcmpidaggom adjio:ko, odokkc sc rcngamsc ngom cdvlosin ka:begma:ycku, cmpige:la nolu ngom ka:begycku; kapila:nc ngo turra du:dag, nolusin turra du:yc. 20Odo longcdo nolu kinycpc ngo:jc ngok Abukolo du:dag cmna, odokkc nolu ngokkolo, odokkc ngo nolukkolo.
21“Sc:kokc ngok kvnggv:pc lulvgnam agom kvdv:dc du:nc odokkc cdcmbulum taddagnc, bv:na ngom aipc mc:ncdc; odokkc sc:kobv ngom aipc mc:dagnc ngok Ba:bukokki ayangkosuyc, odokkc ngo bvm aipc mc:yc odokkc ngo avyc bvm lcngkansuyc.” 22Juda:bv (Iskaroit bv:mang) bvm luto, “Ru:tuma, kapc cdcmpc no ngokkolo lcngkansuycncm, odokkc rcngamscmma:nc?” 23Jisubv bvm lubito, “tani: akonc ngom aipc mc:mvlo, bv ngok gomug kvdv:dcm taddag, odokkc ngok Abubv bvm aipc mc:yc, odokkc ngolu bvkkolo:pc gva:yc odokkc ngolu bvm lckko:pc du:bosuyc.
24“Sc:kobv ngom aipc mc:ma:ji ngok agomcm tadgabla lc:mang; odokkc noluk tadnam gomugkvdv:dc ngokkcmang cmpige:la cdc Abudokkc sc:ko ngom mclvgtagji.
25“Sc agomkvdv:scm ngo nolum lubitu:bong, ngo noluk lcdulo du:mvnna du:du:scm. 26Cmpige:la cdc Luyirncdc, Angunnc Yalodc, sc:kom cdc Abudc ngok aminno mclvgycnc, bv nolum appvng agom luyiryc, odokkc ngok lunam agom appv:dcm nolum mc:pangammoycku.
27“Mc:po-mcngancm ngo nolum lc:bidung; ngok mc:pom ngo nolum lc:bitung; mo:pvsok bikampc ngo nolum bimang. Noluk asinkvdv:dcm mc:pin-mcngoksuyoka, cdcmpcmanggom pcsomoyoka. 28Nolu ngom ludopc lunamdcm tattobong, ‘Ngo gvdakkubong, odokkc ngo nolukkolo:pc gvycku.’ Nolu ngom aipc mc:mvlo, nolu mc:poya:pc, kapila:nc ngo Abukoto:pc gvdakku; kapila:nc Abudc ngomyam bottaya:nc. 29Odokkc su:pak ngo nolum cdc cdcm ima:dapc lubitu:bong, odomvlojen cdvlo cdcbulu iycnc, nolu mc:jvgycpc cmna. 30Ngo bojckoda noluk lcdulo agom luposuma:ycbong, kapila:nc rcngamsok migom doncdc gva:dobong. Bvkkc ngok tayc:lo mopvla:namc kamang; 31Ckvdaggom ngo Abudc kvnggv:pc agom lukampc ido, odomvlojen mo:pvsc ngo Abudcm aipc mc:dag cmna kinycpc. Darobtoka, kajc sokkc gvkangkuboi.
Aktuálne označené:
JO:N 14: MISIBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
