SAHRUOTHUNA 1
1
Sana Kaw
1A hruothu lie Khazing ta alyi hne avuo a sa tiy yi ta, 2alyi ca hmingsuo hnyi vyi, a hrikatlawpa tana a cuo. Riyliy ca zingna ta buvkhung te Khazing Thlaapa#1.2 Khazing thlaapa acuolikie a cahrasapa thliy ca tiy cunglie ca aa khie. 3#2Kor 4.6 Cakhutaata Khazing ta, “Khena aw se,” ta te khena a aw. 4Khazing ta khena ca a pha ta pata a hmung. Cakhutaata khena ca zingna taata a che. 5Khazing ta khena ca Ningchung ta te, zingna ca Zuo a ta. Zuoluo ca a khung, mawdiy vya chiy te, capa ca ning khana ta a cuo.
6 #
2Pit 3.5
Cakhutaata Khazing ta, tiy liekhingkhuo lieta tiy hne tiy pache riypata aa kung pata avuo aw se a ta. 7Cahaacata Khazing ta aa kung pata avuo pa-aw sa te a rawlie a awpa tiy hne a cunglie a awpa tiy ta pata che te capa haa cata ama aw. 8Khazing ta aa kungpa ca Avuo a ta. Zuoluo ca a khung, mawdiy vya chiy te, capa ca ning hningna ta a cuo.
9Cakhutaata Khazing ta, “Avuo rawlie a awpa tiy ca suv kha ta a hmya se la alyi huvpa a luo se ta te capa haa cata a vya cuo. 10Khazing ta alyi huvpa ca Alyi ta te, suv kha lie aa hmyapa tiy ca Riyliy a ta. Khazing ta capa ca a pha ta pata a hmung. 11Cakhutaata Khazing ta, “Alyi lie hing uohnaasiyyhnaa, hmung a hnyipa hne a thyi chunglie a hmung a hnyipa thingkungruokung phangting pu se,” ta te capa haa cata a vya cuo. 12Alyi lie ca uohnaasiyyhnaa, hmung a hnyipa hne a thyi chunglie hmung a hnyipa thingkungruokung phangting ta a pu. Khazing ta capa ca a pha ta pata a hmung. 13Zuoluo ca a khung, mawdiy vya chiy te, capa ca ning thungna ta a cuo.
14Khazing ta, “Chung hne zuo a che riypa hne ning hne kung hne cuo a che riypata aa kungpa avuo lie kha khena aw sala, 15capa ca ta avuo kha khena pi sala alyi kha khena pi se,” ta te capa haa cata a vya cuo. 16Khazing ta khena lepa suohning tue te, a le viepa khena ta ningchung kha uv te a caw viepa khena ta zuo kha a uv. Aasiy zaw kha a sa. 17Khazing ta iema ca alyi kha khena pi riypa hne 18chung hne zuo kha uv pata khena kha zingna taata pache riypata avuo lie ca a chi yi. Khazing ta capa ca a pha ta pata a hmung. 19Zuoluo ca a khung, mawdiy vya chiy te, capa ca ning paliyna ta a cuo.
20Cakhutaata Khazing ta, “Tiy chunglie a hringpa tiy saruopa phangting aw sala alyi cung luo avuo lie khiy pavaa phangting zaw a zu yi se,” a ta. 21Cahaacata Khazing ta ciy aa chiypa a lesapa tiy saruopa zaw cuose, tiy chunglie a hringpa tiy saruopa phangting hne pavaa phangting zaw kha a sa yi. Khazing ta capa ca a pha ta pata a hmung. 22Khazing ta iema ca thluechiy pi yi te, “Pungzaa ung la riyliy tiy chunglie hing bi mya ung, pavaa ca alyi lie hing pungzaa mang sue,” a ta. 23Zuoluo ca a khung, mawdiy vya chiy te capa ca ning pangaana ta a cuo.
24Cakhutaata Khazing ta, “Alyi lie hing a hringpa saruopa phangting: ing lie a ziypa sahring phangting, ruosaa phangting hne aa valepa saruopa phangting aw se, ta te capa haa cata a vya cuo. 25Khazing ta alyi lie a awpa ruosaa phangting, ing lie a ziypa sahring phangting, hne alyi lie aa valepa saruopa phangting kha a sa yi. Khazing ta capa ca a pha ta pata a hmung.
26 #
1Kor 11.7
Cakhutaata Khazing ta, “Kiema hmingsuo malie a lu pata cawsaa sa ung siy; iema ca riyliy lie a awpa ngaa, avuo lie a awpa pavaa, ing lie a ziypa sahring, alyi lie a awpa saruopa phangting hne alyi cunglie a valepa saruopa phangting cunglie kha naw ama hnyi aa,” a ta. 27#Sah 5.1-2 #Mat 19.4; Mar 10.6 Caacuonakawta Khazing ta cawsaa kha ama hmingsuo a lu pata a sa yi, Khazing hmingsuo a lu pata a sa yi; capaa hne canung a sa yi.
28Khazing ta iema kha thluechiy pi yi te, “Saata a hluvsa sa ung la pungzaa ung la, alyi lie hing bi ung la alyi hing te tie ung; riyliy lie a awpa ngaa, avuo lie a zulepa pavaa alyi lie a awpa a hringpa saruopa phangting cunglie hing naw hnyi tie ung,” a ta yi. 29Khazing ta, “Mang tie ung, alyi lie a pupa hmung a hnyipa thingkungruokung bangkhuo hne a thyi chunglie hmung a hnyipa thingkung bangkhuo hing nama ning riypa tana ica pi yi. 30Phyipaliypa ruosaa bangkhuo, avuo lie a zupa pavaa bangkhuo, alyi lie a valepa saruopa bangkhuo, a huv a sungpa a hringpa bangkhuo cuota thinghnaaruohnaa bangkhuo hing ning riypata i pi yi,” a ta. Cakhutaata cahaacata a vya cuo. 31Khazing ta a tuepa bangkhuo kha mang te a pha hringhruo a ta. Zuoluo kha a khung, mawdiy vya chiy te ning caruvna ta a cuo.
දැනට තෝරාගෙන ඇත:
SAHRUOTHUNA 1: LNT
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Lutuv Holy Bible © Bible Society of Myanmar, 2023.