মথি 19
19
মিঃয়া খুওয়াফু আক্রংগো সুয়েংসাং পিইচা
(মার্ক ১০:১-১২)
1দিঃ চাঃগারো প্রব্রিনক যীশুচা গালীল প্রিনিগো বৈরো যর্দন খ্যং অরতাব্রাক যিহূদীয়া প্রিনিদুঃ কুউখাগেতি। 2কংগং লুঃউম্যারোচা যীশু নক্কা নক্কা লৈকেরি অর যীশু য়াংসুউরোগু আকং প্যাংলিইরি।
3য়াংখা লৈগায়ক ফরীশীরোচা যীশুগো চেংফু অাতুওয়কনা যীশুবাদুঃ লাঃলো মিংগেলিইরি, “মোশি থুংজৈংমা খ্যাংচামুছু অাক্রংগো প্রালো মিয়াগো খুওয়াফুচা খ্যাংসুউমাফ্র সাংরি লঃ?”
4আফ্রিমা যীশু প্রলিইরি, “কুবাংরো মেফেফুউ লঃ, থাওরা ফোরাচা পাথাখা য়াংসুউরোগো মিঃমানা য়ক্ক্যা প্যাংলো তিম্রিজলিইরি অর প্রলিইরি, 5‘য়াং অাক্রং অাতুওয়ক লুঃউরোচা মিখাং-ফাখাংগো বৈরো কুঃ মিয়ানা পং নিংফু অর য়াংসুউরো কেংথাচা তুখুউদৈং ফ্রইফু?’ 6য়াং আতুওয়কনা য়াংসুউরো অর নৈয়ক মুহুকপ্যা য়িগিলি কেংথাচা তেগেংথাব্যা। য়াং অাতুওয়ক থাওরা ফোরা যাচাগো তুখুদৈং পংলিইরি, লুঃউরোচা য়াংচাগো মুখুয়িগি।”
7য়াংখা ফরীশীরোচা যীশুগো প্রগেলিইরি, “য়াংপুয়েংছুগি মোশি যাফু খুওয়াজা রুই পিইলো মিয়াগো খুওয়াফু আঃনা ফিইলিইরি?”
8যীশু য়াংসুউরোগো প্রলিইরি, “কুবাংরো চিই কেইংরি অাতুওয়ক মিয়াগো খুওয়াফু কুবাংরোগো মোশিচা অাঃনা পিইলিইরি। য়িগিলি পাথাগাকাবাং দিপুয়েং মিহিকলিই। 9ঙা নাংরোগো প্রখ্যাংচাগা, খ্যাংসুউমুছু কামিসু আপ্রই মুলুকপ্রি অাখ্রা আপ্রই অাতুওয়ক মিয়াগো খুওয়ালো আখ্রা লুঃউগো নেজেকি য়াংসুউ কামিসু প্যাংরি।”
10য়াংখা যীশু তিবিরোচা যীশুগো প্রগেলিইরি, “মিয়ানা লাং দিঃপুয়েং আখ্যছুগি মাঙ্গালা মুপ্রুকচা আকংছুংব্যা।” 11যীশু য়াংসুউরোগো প্রলিইরি, “আলুংসুউ দিঃ চাঃগাগো লাক খেং ময়ুউনৈং; যাসুউরোগো দিঃ ক্ষেমতা পিইলিইরি য়াংসুউরোরা য়াংচাগো লাক খেং য়ুউনৈংরি। 12তয়কতিরি লুফুংসিরি ফ্রইলো ফুওয়ারি, য়াংচা কিজু য়াংসুউরো লাকথে মাঙ্গালা মুপ্রুক। অর তয়কতিরিগো লুঃউরোলি লুফুংসিরি প্যাংরি, য়াংচা কিজু য়াংসুউরো লাকথে মাঙ্গালা মুপ্রুক। অর তয়কতিরি হিকরি যাসুউরো গংখাংফুং নেংঙেংদ আতুওয়ক লাকথে মাঙ্গালা মুপ্রুক ছুলো চিইকো মিম্রি থারি। যাসুউ দিঃ চাঃগাগো লাক খেং য়ুউনৈংরি, য়াংসুউ লাক খেং য়ুউবেচিই।”
আস্যাং যীশুনা আমৈশ্যিরো
(মার্ক ১০:১৩-১৬; লূক ১৮:১৫-১৭)
13নক্কা লুঃউরোচা আমৈশ্যিরোগো যীশুবাদুঃ য়ুউ লাঃখাগেতি যাফুলিছুগি আমৈরো আগং আথাকমা লাক তাংরো যীশু ফোরাগা ছুউক তংঅং। ছুগি তিরিরোচা য়াং আমৈরোগো হককেলিইরি। 14য়াংখা যীশু প্রলিইরি, “আমৈশ্যিরোগো ঙাবাদুঃ লাঃফু পিই, ছিই মাথাগি; আক্রংগা গংখাং ফুংচা দিঃ আমৈশ্যিরো কিজু।” 15আমৈশ্যিরো আগং আথাকমা আলাক তাংলো ফোরামা ছুউক তংব্রিইনক, যীশুচা য়াংচাগা লাঃখারি।
উচাস্যাং আপ্যুও তয়ক
(মার্ক ১০:১৭-৩১; লূক ১৮:১৮-৩০)
16নক্কা আপ্যুও তয়ক য়ক্ক্যা লাঃলো যীশুগো প্রলিইরি, “ছারা, আম্রি হিক বাওয়াগো রাঃফু আতুওয়ক ঙা যা আকং অলুককো লুকরাফুলিঃ?”
17যীশু য়াংসুউগো প্রলিইরি, “আকং অলুককো য়ুউলো ঙাগো যাফু মিংরিলি? আকং ছুচা তয়করা হিকরিব্যা। নাংরা আম্রি হিক বাওয়াগো রাখ্যাংগিরিছুগি, য়াংসুউমা হিকচা অওয়াদাগো লাক খেংরাফু।”
18য়াং আপ্যুও য়ক্ক্যাচা প্রলিইরি, “যা যা অওয়াদালিঃ?”
যীশুচা প্রলিইরি, “পাণাতিপাতা মাপ্যাংগি, কামিসুু মলুককি, আদিনাদানা মাপ্যাংগি, মুসুওয়া সাকসিই মিপিইগি। 19মিখাং-ফাখাংগো ম্যাকন্হা পিইগে অর কুঃ ইংনেংবাসারোগো কুঃপুয়েং আখ্য-মিত্তা হিকগে।”
20য়াং য়ক্ক্যাচা যীশুগো প্রলিইরি, “ঙা য়াংচারো আলুংচাগো সুংরি অর ঙা যা লুকরাফুলিঃ?”
21যীশু য়াংসুউগো প্রলিইরি, “নাংরা আমেইং চাংজ আম্রি হিক বাওয়াগো রাখ্যাংগি, নাং লাঃলো নাকমা হিকচা উচ্চা পৈচিইগো রংলো ছাংরিসারোগো হ্লুউলৈই। য়াংখা নাংচা গংখাং ফুংগো রাঃমি। য়াংনক লাঃলো ঙামা তিবি ফ্রইখিলি।”
22দিঃ চাঃগাগো ক্রালো য়াং আপ্যুওশ্যিচা চিইমা দুঃখাওয়া রাঃলো লাঃলিইরি আক্রংগা য়াংসুউমা কংগং আম্যা উচ্চা-পৈচিই হিকরি।
23য়াংখা যীশুচা কুঃ তিবিরোগো খঃলো প্রলিইরি, “ঙা নাংরোগো আমেইং প্ররি, উচ্চাস্যাংরোচা গংখাং ফুংদুঃ রকফু কংগং খঅংখিফু। 24ঙা নাংরোগো প্রেংলো প্ররি, উচ্চাস্যাংরো থাওরা ফোরা নেংঙেংদদুঃ ওয়ংফুচা থাকপাং এঃ আপক্কা কুলুউ ওয়ংফুচা লুওয়িরি।”
25দিঃ চাঃগাগো ক্রালো তিবিরোচা এংঅলো প্রগেলিইরি, “ছুগি যাসুউলি আপ্রইকা ক্যুয়েনৈংফুচা?”
26যীশুচা তিবিরোগো ক্রিলো প্রলিইরি, “লুঃউরো আতুওয়ক য়াংচা খাকখিয়িনৈংরি য়িগিলি থাওরা ফোরা আতুওয়ক আলুংচা খাকমিখিয়ি।”
27য়াংখা পিতরচা প্রলিইরি, “ক্রিবা, ঙুরো আলুংচা বৈরো কুবাংমা তিবি ফ্রইকেরি; ঙুরো যা রাঃফুলিঃ?”
28যীশু য়াংসুউরোগো প্রলিইরি, “ঙা নাংরোগো আমেই প্ররি, নাংরো যাসুউরো ঙামা তিবি ফ্রইকেরি, কাবা আসৈই তিম্রিরি আখিংমা যাখা মুনুসাওয়া সাঃচা কুঃ রাঃথৈতি নেংঙেংদমা থৈংফুলি য়াংখা নাংরোলি তিছি নৈখু নেংঙেংদমা থৈগেমি অর ইস্রায়েরোমা তিছি ন্হচৈংগো তাঃরা চৈকেমি। 29অর খ্যাংসুউমুছু ঙা আতুওয়ক ইং-য়া, ঞিংনা-অয়মা, সাঃ-সিমিং মুুহুককিলি আঃরা-খ্যংগো বৈকেরি, য়াংসুউচা বৈচা থাক আপ্রেং তারা রাঃগেমি অর তিম্রিজ বাওয়াগো রাঃমি। 30যাসুউরো পাথামা স্যুয়িমা রেলো হিকরি, য়াংসুউরো তুবুং লুঃউচা অকতু ক্যাফু অর যাসুউরো আছুং স্যুয়িমা রেলো হিকরি য়াংসুউরো তুবুং লুঃউচা পাথামা ক্যাফু।”
Currently Selected:
মথি 19: BBSRMZ
Highlight
Share
Copy
Want to have your highlights saved across all your devices? Sign up or sign in