মথি 18
18
যাসুউ আগ্রিলিঃ?
(মার্ক ৯:৩৩-৩৭; লূক ৯:৪৬-৪৮)
1য়াং আখিংমা তিবিরোচা যীশুবাদুঃ লাঃলো মিংগেলিইরি, গংখাং ফুং নেংঙেংদমা যাসুউ আগ্রিইলিঃ?
2য়াংখা যীশু আশ্যি তয়ককো খঃলো য়াংসুউরো হ্রিইগা রেচিইলো প্রলিইরি, 3“ঙা নাংরোগো আমেইং প্রচাগা, নাংরোরা চিই হ্লিলো আশ্যিরো পুয়েং মফ্রছুগি-য়াংখা তাখালি গংখাং ফুংদুঃ মাতাকনৈং মুহুক। 4খ্যাংসুউমুছু দিঃ আশ্যি পুয়েং কুঃচিইকো নুন্হুং প্যাংগিরা, য়াংসুউ গংখাং ফুং নেংঙেংদমা আলুংসুউ থাক আগ্রিই। 5অর খ্যাংসুউমুছু দিঃসুউ পুয়েং আশ্যি তয়ককো ঙা নাঃমিনা লাক খেংরিছুগি-য়াংখা য়াংসুউচা ঙাগো লাক খেংরিহ্নাক তুউরি।
আপ্রই লেংদুঃ য়ুউ লাঃচা
(মার্ক ৯:৪২-৪৮; লূক ১৫:৩-৭; ১৭:১,২)
6“ঙাগো রুসিইসা আতুওয়ংমা দিঃ আশ্যিরোগা খ্যাংসুউগোমুছু আপ্রই লেংদুঃ য়ুউ লাঃরিছুগি, যাসুউ য়ুউ লাঃরিলি য়াংসুউ লৈংফাংমা ক্যকলুংগ্রিই তুলুং খ্যয়েংলো ম্রঃ আনাকমা ন্হবলৈকি য়াংসুউ আতুওয়ক কংরি। 7হায় লঃগা! আপ্রই লেংদুঃ য়ুউ লাঃফু আতুওয়ক কংগং আম্যা মকংরিচা নাক আতুওয়ংমা হিকরি। প্রফুছুগি য়াংপুয়েং মকংরি ছেন্দাচা হিকফু; য়িগিলি য়াং লুঃউচা সিইবেচিই, যা লুঃউগা দিঃ মকংচারো লাঃরি।
8“নাকমা আলাক মুহুককি আখ্রিইরা নাককো আপ্রই লেংদুঃ ঙাংরিছুগি য়াংচাগো পুয়েংবলৈই। নৈফাক আলাকনা নৈফাক আখ্রিইচা তাসাকপেলুং মিংমা ক্যাচাথাক আখ্রিই আকিই প্যাংলো বাওয়ামা নিংচা কংরি। 9নাক ম্যাকচিইরা নাককো আপ্রই লেংদুঃ ঙাংরিছুগি, য়াং ম্যাকচিইগো থুওয়েবলৈই। ম্যাকচিই ন্হৈফাক য়ুউলো আওয়িজিইমা ক্যাচাথাক আকেইং প্যাংলো লঃগামা নিংচা নাক আতুওয়ক কংরিসিই।”
10“ক্রি, নাংরোচা তাখালি দিঃ আশ্যিরো তয়ককোলি আনৈং মাপ্যাংগেকি। ঙা নাংরোগো প্রচাগা, গংখাং ফুংমা য়াংসুউরোমা তেমেংদরোচা খ্যাংখামুছু গংখাং ফুংমা ঙা ফাখাং ম্যাকন্হাগো ম্রাংগেতি।”
11“যাচারো প্যক লাঃখারি য়াংচারোগো হ্রাফু আতুওয়ক মুনুসাওয়া সাঃচা লাঃরি। নাংরো যা তুওয়ককেতিলিঃ? 12আচ্ছা নাথংগে, লুঃউ তয়কমা সাংফছুয়িই আকং তাঃরা হিকরি। য়াংচারো আতুওয়ংমা তগংরা আম্মা লেংদুঃ লাঃলো প্যকতিছুগি, য়াং ইংস্যাংচা কুছিকুগংগো তংনামা থাঃলো প্যকচা ছুয়িইকো হ্রাফু মাঃলালঃ? 13ঙা নাংরোগো আমেইং প্রচাগা, ইংস্যাংরা য়াং ছুয়িইকো রারিছুগি, থুউ কুছিকুগং ছুয়িইচা আম্মা লেংদুঃ মাঃলালিইচা থাক, যাসুউ আম্মা লেংদুঃ লাঃখারি য়াংসুউ আতুওয়ক অর আম্যা প্যরি। 14য়াংপুয়েং তেথেং নাংরোমা গংখাংফুংমা ফাংখামা ছেন্দা মুলুচাগা, দিঃ আশ্যিরো আতুওয়ংগা তয়কলি মাপ্যাকরাঅং।”
যা ঞিংচা মকং লুকতিলিঃ
(লূক ১৭:৩,৪)
15“নাকমা ঞিংরা নাককো য়ুউলো ছেংগ্যাংফাক লুকতিছুগি য়াংসুউবাদুঃ লাঃলো যাখা তয়কলি মিহিক য়াংখা য়াংসুউ আপ্রইকো তাং প্রালিই। য়াংখা ঞিংচা নাক চাঃগাগোরা নাথংরিছুগি, তুওয়কফুচাগা নাংচা কুঃ ঞিংগো প্রেং রাঃরি।” 16ছুগি নাক ঞিংরা চাঃগা নামথংছুগি য়াংখা তয়ক নৈয়ক নাক নক্কা য়ুউ লাঃলিই, যাফুলিছুগি য়াং তয়ক নৈয়ক সাকসিই চাঃগানা দিঃ আদিপিরোচা আমেইং ছুলো তাং প্রানৈংঅং। 17য়াংসুউরো চাঃগাগোবাং নামথংছুগি য়াংখা ক্যং লুঃউরোগো প্রলিই। য়াংসুউ ক্যং লুঃউ চাঃগাগো তয়ং নামথংছুগি য়াংসুউচা নাকবামা যিহুদী মুহুক অর ফেংদা ককসা পুয়েং ফ্রইলিইফিই।
18ঙা নাংরোগো অামেইং প্রচাগা, নাংরো কাবামা যা য়াংরিলি, গংখাং ফুংমালি য়াংচা য়াং হিকফু। অর যাচা হ্লফুলি গংখাং ফুংমালি য়াংচা হ্লহিকফু। 19“ঙা নাংরোগো অরলি প্রমি, নাংরো আতুওয়ংমা নৈয়করা তিজিতৈং প্যাংলো খ্যাংচাগো মুছু য়ুউলো ছুউক তংরিছুগি ঙামা গংখাং ফাখাংচা নাংরোগো য়াংচা পিইমি। 20আক্রংগা যাদেমা নৈয়ক থাক সুংয়ক ঙা নাঃমিনা তেরেমা চুককেতি, য়াংদেমা ঙা য়াংসুউরো আতুওয়ংমা রকতি।”
যা ভেন্ডেচা খুওয়ং মাঃরালিই
21য়াংখা পিতরচা যীশুবাদুঃ লাঃলো প্রলিইরি, “আস্যাং, ঙামা ঞিংচা ঙানা ছেংগ্যাংফাক লুকতি ঙা মনৈইখক তয়ং খুওয়ং রুওয়েফুলিঃ? খনৈখক লঃ?”
22যীশু পিতরগো প্রলিইরি, “সাসাক খনৈখক মুহুক, ছুগি ঙা নাককো আপ্রেং খনৈছিনা খনৈখক তয়ং খুওয়ং রুওয়েফু আতুওয়ক ঙা প্রফু।” 23“ক্রি, গংখাং ফুংচা মাং তাবা পুয়েং যাসুউ কুঃ ভেন্ডেরোগা আকক (হিসাব) তংলিইরি। 24মাংচা যাখা আকক য়ুউফু চালিইরি য়াংখা য়াংসুউরো আতুওয়ংগা জং তয়ক ভেন্ডেগো য়ুউখালিইরি, য়াংসুউচা মাংবামা সিং-সিং টেংগা আখিই য়ুউ হিকলিইরি। 25য়াংসুউচা আখিই টেংগাগো ছেফুচা ক্ষেমতা মিহিকলিই। য়াংখা আস্যাংচা আনা পিইলিইরি, য়াং লুঃউমা মিঃয়া, সাঃ-সিমিং অর ওয়েং-ছেং যা হিকরি হিকচাগো রংলো ম্রিংগো য়ুউফু আতুওয়ক। 26য়াংখা য়াং ভেন্ডেচা ইংস্যাং আখ্রিইগো কৈংলো প্রলিইরি, ‘অ ফোরা, ঙাগো সিখেংবা, কুবাংগো ঙা আলুং ম্রিংগো ছেঃমি।’ 27ইংস্যাংচা য়াংসুউগো মিত্তা ফ্রইলো রুওয়েলৈতি অর য়াংসুউমা ম্রিংগো খুওয়ং রুওয়েলৈতি।
28“নক্কা য়াং ভেন্ডেচা প্রাংমা রকখা কুঃপুয়েং তয়ক ভেন্ডেগো ম্রাংলিইরি। য়াংসুউবামা য়াং ভেন্ডেচা টেংগা তাঃরাহ্লক ম্রিং হিকলিইরি। য়াং ভেন্ডেচা থুউ ভেন্ডেগো লৈখ্র ফ্যলো প্রলিইরি, ‘নাং টেংগা ম্রিং য়ুউচা য়াংচা পিই।’
29“থুউ ভেন্ডেচা য়াংখা আখ্রিমা ওয়েলো প্রলিইরি, ‘ঙাগো সিখেংবা, কুবাংগো ঙা আলুং ম্রিংগো ছেঃমি।’” 30ছুগি য়াংসুউচা লাক মেখেংব্রি অরবাং ম্রিং মেছেঃসাগ্রা য়াংসুউগো থংমা খ্যা থাঃলিইরি।
31“দিঃ প্রাসানারোগো ম্রাংলো অর ভেন্ডেরোচা কংগং চিই নাঃগেরি। য়াংসুউরো লাঃলো কুঃরোমা ইংস্যাংগো প্রগেরি। 32য়াংখা ইংস্যাংচা য়াং ভেন্ডেগো খঃলো প্রলিইরি, ‘আছুগ্রিই ভেন্ডে! নাং ঙাগো আতংবেং থাঃলিইরি আতুওয়ক ঙা নাকমা হিকচা আলুং ম্রিংগো খুওয়ং রুওয়েলিইরি। 33ঙা যাপুয়েং নাককো মিত্তা থাঃলিইরি, য়াংপুয়েং নাকমা মিকছুয়ি ভেন্ডেগো মিত্তা থাঃফু মেতেংলিই লঃ?’ 34নক্কা ইংস্যাংচা মেইং প্যাংলো য়াংসুউমা হিকচা ম্রিংগো মেছেসাগ্রা, য়াংসুউগো দুঃখাওয়া পিইফু আতুওয়ক থংমা হিকচা লুঃউ আলাকমা এলিইরি।
35“য়াংপুয়েং তেথেং নাংরো তয়ক মুক্যুয়েং কুঃমা ঞিংরোগো চিই নুন্হুংগা খুওয়ং মুরুওয়েছুগি, য়াংখা গংখাং ফুংমা ফাখাংলি নাংরো আপমা দিঃপুয়েং প্যাংমি।”
Currently Selected:
মথি 18: BBSRMZ
Highlight
Share
Copy
Want to have your highlights saved across all your devices? Sign up or sign in