Ta je huliwa 9
9
1KE Saulo bala ame kong hnyekon he ka ootâ me hlingâ je laten Than, me e ame he ka at bihut ae nua, 2me sumâtâ je tusi gan he ka hom ka hnyi ta je sunago hnyi Damaseko, me me he ka cʼ ödra, me hom Jerusalema ai obaga me omomo, e ka hu tavat hmi ame he ka wâ. 3Ke tiga eû hnyi gethen hakekenyâ Damaseko: ke ame ie umumelam igigilo e melam ûnyi hnyi drany: 4me e ame ta but ka hnyi kânâ, me ame long ke hofuc ame ha kâu, ka habe, Saulo, Saulo lö, ieû gam u me okongu nya? 5Ke haingen, ka habe, U ia Than? Me e ame ha, ka habe, Inya Iesu wale u me labö okongoâ: 6todrö, be thö ka hnyi taun, ke adre me he ka ha köu hanymâm he ka ânyâ. 7Ke ame tot hnyibû tavat adre me tha he mē, adre me long hofuc ke ba bi at adre me wâ. 8Me ame todrö Saulo ûheny û hnyi kânâ, ke e ame bwele but, ke ba ûnyi ame wâ: me adre me lelo thö benyin, me hom e Damaseko ai. 9Ke kun ta bongon ka wadröu but, ke ame ca han me ic.
10Ke e hu ke aten hnyi Damaseko, Anania ien; ke haba Than ame ha kâu hnyi hna omanenâ, ka habe, Anania lö. Me e ame ha, ka habe, Than lö, inya ang. 11Ke haingen Than kâu, ka habe, Todrö, he thö ka hnyi getheniny taun, Wisa ien, me hnö hnyi uma umo Juda ge ke at a ien Saulo, at Taraso: anyin a wâ bi, e ame hic; 12ke e a hia but wâ at, Anania ien, ame didro, me ip li hnyamen hon e, me e ame he ka bwele hmetu but. 13Haba Anania ame thu, ka habe, Than lö, o ge long ut ûnyi ge tavat ae se hia bongon at ang, a gʼ ame ânyâ gan hmâ monu ka ânyâm tavat ae kap hnyi Jerusalema: 14ke e hu anyin dut musi eang ûnyi ge je taben tavat bihut he ka cʼ ödra hia adre me hawâ iâm. 15Haba Than ame ha kâu, ka habe, He thö, anyin adre ûca e hnân anyik utkaia he ka kap tilâ iök ka Aten ke je hnyei, me ta je than, me lakon Isaraela: 16anyin oge me he ka omanenâ kâu ûganiny vec e ame he ka hom can iök. 17Me ame he but Anania, me didro ka hnyi uma; ke e ame ip li hnyamen hon e, me ha, ka habe, Saulo lö, liamekeiny mönya, a kunö nya Than Iesu, waleji a manen köu eû hnyi gethen u je he hnyin, mʼ u me bwela but, me unöngöt ge Hanu Kap. 18Me ame ie kolu but ûnyi hnyi li emakan, helâ me je unö, me e ame bwela but; ke e ame todrö, me ame bapataisoâ e; 19ke a hia but han, me e ame hwege but.
Ke e ame tha laba me laten hnyi Damaseko hnyi ke je bong. 20Ke e ame ie kheti Iesu hnyi je sunago, a e thibi Nokon Khong. 21Ke haba tavat hia adre me long hwan, kʼ adre me lâiâ me ha, ka habe, Ca e at ame okongu ödra hnyi Jerusalema adre me hawâ ien e? ke e ame o but eang be ka helâe, me me cʼ ödra me hom but ka hnyi hnyimakan je taben tavat bihut. 22Ke ame hwege tot Saulo, kʼ ame ohnyibo tavat Juda hnyi Damaseko, me ohnathoâ a haba Iesu, me Keriso. 23Ke hwaban ta je bong ae se bia, me ame ûhnenamö at Juda he ka hlingâ e: 24ke ame manen kö Saulo hnödra hna si hnân. Ke adre me labö tue hnyi ta je homagöule hnyi lany me lit he ka hhngâ e: 25ke ame hom e hnen laten hnyi hnyinghet, me hnahna e hnyi tang ûnyi hnyi dok ae memang hnyi hak veto.
26Ke e ame o hnyi Jerusalema, kʼ ame cubec he ka tha laba me je laten: ke ödra hia adre me outen e, ke adre me ca ûnykûme bi a e ke aten minya. 27Ke haba Banaba ame hom e, me ame tha he mē ka ta je aposetolo, me e ame omanenâ ködrin a e ame wâ Than eû hnyi gethen, ke a hia but ha hofuc kâu, me hnen minya hna khetâ hwegiâ iö Iesu hnyi Damaseko. 28Me e ame labö tha he mödrin hnyi Jerusalema, 29kʼ ame khetâ hwegiâ hnyi ien Than: ke e ame ha hofuc me ivinö me at Helenisi; ke adre me elâm he ka hlingâ e. 30Ke e khana but je liamekeiny, me adre me hom but e Kaisaria ai, me kunâ e Taraso ai.
31Ke hnahic ut ekalesia hnyi je ke keihen Juda hia, me Galilaia, me Samaria, kʼ ame khulelau bi; ke adre me labö he me ot ka Than, kʼ ame kahwa je hnyekudra ûnyi ge Hanu Kap, kʼ adre me osehia but.
32Haba Peteru ame he hnyi je ke keihen hnyei hia, me e ame o ka tavat ae kap adre me laba hnyi Lida. 33Ke e ame wâ eling ke at, Ainea ien, at ame mokut hon hnen hna mokut eit ta huna; anyin e ame mokulec mok ae mat. 34Haba Peteru ame ha kâu, ka habe, Ainea lö, haba Iesu Keriso ame osoi u: todrö, me ânyâwia hnâm hna mokut. Me e ame ie todrö. 35Ke haba tavat hia adre me laba hnyi Lida, me Sarona adre me wâ ûnyi eling me hwio ka Than.
36Ke e hu hnyi Jopa ke aten, Tabitha ien, kʼ adre me wia bongon ien, me Doreka: haba momo e, me unöngöt ge ta je huliwa ae so kʼ ame betenge ka ta je theduoc. 37Ke hnyi je bong eling e ame mok, me e ame mokcu: ke adre hia but osûâ e, me adre me ip e hnyi hnyeule ethö. 38Ke ca sâkâû Lida me Jopa, ke a long ut laten a e but ling Peteru, me adre me kunâ kâu li at he ka sumâtâ, ka habe, Ca bec he ka o kohmun. 39Haba Peteru ame todrö me tha he mödru. E ame o but, me adre me hom e ka hnyi hnyeule ethö: ke ame tha tot mē ta je safac hia adre me ûtengiö, kʼ ödrin e omanenâ ta je ûkot me je ûkhaû ame tibet Doreka, ke tiga e bi unyidra. 40Ke haba Peteru ame obʼ ödrin dut hnyou ai, kʼ ame cibouca me hic; ke e ame hwio thö ka komok, me ha, ka habe, Tabitha lö, todrö. Me ame bwela but li emakan momo; ke e ame ō Peteru, me e ame laba thö. 41Ke e ame inâ hnyamen ka momo, me otilâ thö e; ke a hia but hawâ tavat ae kap, me wasafac, me e ame ham e ködrin a ga mödrut. 42Ke ame lung ûnyi eling hnyi Jopa hia: ke se hia tavat adre me hnyi labageju ka Than. 43Ke se hia je bong e ame laba hnyi Jopa unyin ke at jia Simona, at ame huliwan je unen meno.
දැනට තෝරාගෙන ඇත:
Ta je huliwa 9: IAAI
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
maintained by the British and Foreign Bible Society