Matayo 14
14
Okwitwa kwa Yoana Omubatija
(Mk. 6:14-29; Lk. 9:7-9)
1Mu magoro ago omukama Erode nongwa orukuma rwa Yesu. 2Nababwira abarerwa bae ati, Oyo niwe Yoana Omubatija asu:kire mu bafu:ye. Nikwo ebikorwa bya managa ebikorera mu mwene. 3Okuba Erode ariga agwatire Yoana namuboya, namuta mu nyumba yo buboywa kurwa Erodiya, omugasi wa Filipo wa:bo. 4Okuba Yoana amubwiriye ati, Kuganyibwe awe okuba nage. 5Anu ariga nenda okumwita, no:baya ecise, okuba bamwiganirisyaga ati, ni muragi. 6Rwejire rwakinga orusiku rwo kwicuka obwiburwa kwa Erode, omuyasya wa Erodiya nabina imbere yebwe, nakondisya Erode. 7Namuraga omurago ne ci:fumo amuyane co:ne co:ne cinu aramusabwa. 8Nawe nyiramwene ejire amukungirisya, na:ika ati, Nunanira anu ku rutuba omutwe gwa Yoana Omubatija. 9Omukama narumwa, nawe kurwo kwifuma kwae na kurwa banu bariga beyanjire nibarya nage, naragirira okugumuyana. 10Natuma omu:nu natemako Yoana omutwe mu nyumba yo buboywa. 11Omutwe gwae nibagure:ta ku rutuba nibagumuyana omuyara, nagusirira nyiramwene. 12Abe:igisibwa bae niba:ja nibabatura ecitundu nibamusi:ka, nibagenda nibabwira Yesu.
13Yesu ejire ongwa, nasyabara mu bwato naegnda mwibara bwitebe. Ebise byejire byongwa, nibiso:ka mu misi nibiribata maguru nibimuru:ba. 14Yesu ejire agoba naso:ka mu bwato narora ecise cinene, nabafwira cigongo, nabaosya abarwae bebwe.
Aba:nu bisira bita:nu mbari:sibwa
(Mk. 6:32-44; Lk. 9:10-17; Yo. 6:1-14)
15Kwejire kwaba kegoro, abe:igisibwa nibamu:jako, niba:ika ati, Anu ni:bara na risu:ba ryagendere. Ku:ra ebise bigende mu misi be:gurire ebiryo. 16Nawe Yesu nababwira ati, Batakenere kugenda. Emwe mubayane ebiryo. 17Nibamubwira ati, Citana ci:nu anu tari mikate eta:nu na swi ibiri era. 18Na:ika ati, Mubinde:tere anu. 19Naragirira ecise okwiyanja ku bunyasi. Nagega emikate eta:nu na jiswi ibiri, narore:rera inguru mu rwire, nasi:ma nabeganyamo emikate, najiyana abe:igisibwa, abe:igisibwa nibajigabira ebise. 20Nibarya bo:ne nibe:guta. Nibakofya ebiba:ra binu byasigae mbi:jura bi:bo ekumi na bibiri. 21Na banu bariye bariga uti barume bisira bita:nu, abagasi na ba:na batabariyweko.
Yesu naribata ku manji
(Mk. 6:45-52; Yo. 6:15-21)
22Aonao Yesu nasinyirisya abe:igisibwa bae okusyabara bamutangatire okugenda ku ngego yenderya, kukinga anu aramarira okuraga ebise. 23Ejire amara okuraga ebise narinya ku ci:ma enyere okujo:sabwa. Kwejire kwaba kegorogo:ro ariga:ri eyo enyere. 24Nawe obwato bwariga bwakingire ku ŋunga, mbutubangisibwa amatu:ma, okuba omuyaga gwariga gwe butwe. 25Mu ngeta mu ci:furo ca kana Yesu nabajako naribata ku nyanja. 26Abe:igisibwa bejire bamurora naribata ku nyanja, nibagutuka niba:ika ati, Ni:ungisi rinu. Nibakunga nibo:baya. 27Aonao Yesu nababwira ati, Musi:ri:ke, nanye, musige ku:baya.
28Petero namuindura ati, Ratabugenyi araba na:we, nabwira niku:jeko nindibata ku manji. 29Na:ika ati, I:ja. Mbe Petero naso:ka mu bwato naribata ku manji okugenda ku Yesu. 30Nawe ejire arora omuyaga, no:baya namba okusika nakunga na:ika ati, Ratabugenyi, nuunkisye! 31Aonao Yesu nagorora okuboko, namugwata, namubwira ati, Awe owo kwikirisya okuto:to, ?Cinu ecikwitima:tya niki? 32Bejire barinya mu bwato, omuyaga nigutemekera. 33Na banu bariga mu bwato nibamuramya, niba:ika ati, Ni cimari awe uri Mwana wa Nyamuanga.
Yesu naosya abarwae ba Genesareti
(Mk. 6:53-56)
34Bejire bamara okuunguka, nibagoba ku ca:ro ca Genesareti. 35Aba:nu bendeyo bejire bamumenya, nibatuma aba:nu mu ca:ro eco co:ne cinu cariga cisijene nibamure:tera bo:ne banu bariga barwae. 36Nibamwiremberesya baku:nieko era ku mufimjo gwe cifwaro cae, Mbe, bo:ne banu baku:nisye:ko nibaora kata.
දැනට තෝරාගෙන ඇත:
Matayo 14: KIJ1960
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Kijita New Testament © The British and Foreign Bible Society and The Bible Society of Tanzania, 1960.