Matayo 13
13
Ebijekekanyo byo Bukama bwa mu Rwire. Ecijekekanyo co mubibi
(Mk. 4:1-20; Lk. 8:4-15; Yo. 12:39-41)
1Ku rusiku urwo Yesu nauruka mu nyumba, neyanja ku njekekera ya inyanja. 2Ebise byafu nibimwikofyanyisya ndijei nasyabara mu bwato neyanja. Ecise co:ne nicimereguru ku njekekera. 3Nababwira byafu mu bijekekanyo, na:ika ati, Mbe omubibi aurukire naja okubiba. 4Anu ariga acabiba, jimbibo ejindi nijiragara ku njira, jinyonyi nijija njirya. 5Ejindi nijiragara ku rutare, amaaru gatariko ma:fu. Aonao nijimera, okuba amaaru gariga gatariko ma:fu. 6Risu:ba wejire ryaka nijiotoka, okuba jitariga na misi, niju:ma. 7Ejindi nijiragara mu mawa. Amawa nigamera nigajisoritya. 8Ejindi nijiragara mu maaru go bwana, nijitwasya amatwasyo, ejindi egana, ne jindi makumi gata:nu na rimwi, ne jindi makumi gasatu. 9Unu ana matwi go kungwa, nongwe.
10Abe:igisibwa bae niba:ja nibamubu:sya ati, ?Niki cinu oukora nuwaika nabo mu bijekekanyo? 11Nabaindura nababwira ati, Emwe mwayabirwe okumenya ebyo bumbise ebyo bukama bwa mu rwire, nawe abe:ne batayabirwe. 12Kwo kuba unu wo:ne ari nabyo, omwene ariyabwa, ka aryongesibwa byafu. Nawe unu atanaco ariso:sibwako na cinu anaco. 13Mbe kwenikora nina:ika nabo mu bijekekanyo, okuba okurora abarora nawe batakubona, no kungwa abongwa nawe batakungwa, nakabee kuri kusombo:kerwa. 14Oburagi bwa Isaya bwaku:miye mu bene, bunu obwaika ati,
Okungwa muryungwa nawe mutarisombo:kerwa.
Okurora murirora nawe mutari:te:ge:resya.
15Okuba omutima gwa ba:nu banu gwasitoere,
Na matwi gebwe gatakungwa kisi,
Na me:so gebwe baongeresisye,
Bareme okurora na me:so gebwe no kungwa na matwi gebwe,
No kusombo:kerwa no mutima gwebwe, no kucu:ka, nanye nibaonye.
16Nawe ame:so gemwe gana ribando okuba agarora, na matwi gemwe okuba agongwa. 17Kwo kuba ni cimari enibabwira ati, Abaragi ba:fu na barenge:resi ba:fu bariga mbarigira okurora binu omurora emwe, nawe batabirorere. Mbarigira okungwa binu omungwa nawe batabyunguywe.
18Mbe emwe nimungwe ecijekekanyo co mubibi. 19Omu:nu wo:ne unu kongwa omusango gwo bukama, akarema okusombo:kerwa, omubi:bi oyo na:ja naciso:syamo cinu cabibirwe mu mutima gwae. Oyo niwe unu abibirwe ku njira. 20Na oyo abibirwe ku rutare niwe unu kongwa omusango, ne:kirisya aonao nakonderwa, 21Nawe atari na misi munda yae, nako:rao kuto:to. Nawe akabona inya:ko no kunya:sibwa kurwo musango, aonao nayabibwa. 22Na oyo abibirwe mu mawa, niwe unu kongwa omusango, nawe okurumwarumwa ebye ca:ro no kubebeywa obuni:bi mbi:ganya omusango, nguremo:twasya. 23Nawe oyo abibirwe ku maaru go bwana niwe unu kongwa omusango no kugusombo:kerwa. Niwe oyo katwasya amatwasyo, oumwi katwasya egana, oundi makumi gata:nu na rimwi, oundi makumi gasatu.
Ecijekekanyo ca ingano na magorogoro
24Nabaterao ecijekekanyo ecindi, na:ika ati, Obukama bwa mu rwire bususene no mu:nu unu abibire imbibo yo bwana mwisambu ryae. 25Mbe nawe aba:nu be:jire bama:ma, na:ja omusoko wae nabibamo amagorogoro#amaune mu ngano, nagenda. 26Wejire jamera no kutinda nja:nurira, niwo ngabonekamo amagorogoro. 27Abagaya bae niba:ja nibabu:sya omwenemusi ati, ?Ratabugenyi, utabibire imbibo yo bwana mwisambu ryao? ?Mbe ka amagorogoro gaso:kere a:ki? 28Nababwira ati, Omusoko niwe akorere kutyo. Abagaya mbamubu:syaati, ?Owenda cigende cige:ye? 29Nawe omwene na:ika ati, Uri, amwi mukaba muce:ya amagorogoro, nimusinduriramo na jingano one. 30Musige bikure byone kukinga mwigesa. Na mwigesa ndibabwira abagesi ati, Mtangate mugakumanye amagorogoro mugaboe maseko mugo:ce. Nawe jingano mujigesere mu citara cani.
Ecijekekanyo ca ikaradari
(Mk. 4:30-32; Lk. 13:18-19)
31Nabaterao ecijekekanyo ecindi, na:ika ati, Obukama bwa mu rwire bususene na inje ya karadari, inu omu:nu agegere nabiba mwisambu ryae. 32Nawe ni mbibo no:to kukirwa junbibo jo:ne okuke:ya, nawe ikakura niba nene okukira emikubi jo:ne, ni:ba eti na jinyonyi ja mu rutumba njija nji:kara mu matabi gayo.
Ecijekekanyo ce cifwimbya
(Lk. 13:20-21)
33Nababwira ecijekekanyo ecindi ati, Obukama bwa mu rwire obususana ne cifwimbya, eco omugasi agegere nacisa:sya mu ndengo esatu ja ji:fu, nijifwimba jo:ne. 34Yesu abwiriye ebise emisango ejo jo:ne mu bijekekanyo, amwi atari mu cijekekanyo atakababwiriye musango. 35Korereki cikumire cinu ca:ikirwe no muragi ati,
Ndyasama omunwa gwani mu bijekekanyo,
Ndigamba binu bibisirwe kuso:ka buyangwa bwa i:si.
Obugajuro bwe cijekekanyo ca magorogoro
36Mbe niwo Yesu naraga ebise, nengira mu nyumba. Abe:igisibwa bae nibamu:jako niba:ika ati, Cigajurire ecijekekanyo ca magorogoro ga mwisambu. 37Nabaindura na:ika ati, Unu kabiba imbibo yo bwana niwe Omwana wo mu:nu. 38Risambu niryo i:si. Imbibo yo bwana nibo aba:na bo bukama, nawe amagorogoro ni ba:na bo mubi:bi. 39No musoko unu agabibire ni Syetani, na rigesa nibwo bute:ro bwa maimbo, na bagesi ni bamaraika. 40Mbe rwa amagorogoro kutyo abage:a nibago:ca mu muriro, nikwo kutyo kuriba ku bute:ro bwa maimbo. 41Omwana wo mu:nu arituma bamaraika bae bariso:sya mu bukama bwae binu ebiyabya byone na bo:ne banu abakora obunyamusi. 42Baribe:sa mu ryobo ryo muriro. Omwo nimwo kuriba okurira no kuguguna ame:no. 43Mbe niwo abarenge:resi barise:kana rwa risu:ba mu bukama bwa Esemwene. Unu ana matwi go kungwa, nongwe.
Obuni:bi bunu bubisire. Iru:ruyo bugusi bwafu. Riyega rya jiswi
44Rindi obukama bwa mu rwire bususene no buni:bi bunu bubisirwe mwisambu bunu omu:nu ejire abubona nabubisa nakonderwa nagenda naka:na binu ariga anabyo byone nagura risambu eryo. 45Rindi obukama bwa mu rwire obususana no muka:ni unu kayenja jiru:ru jiŋonde. 46Wejire abona ru:ru imwi eyo bugusi bwafu, nagenda naka:na binu ariga anabyo byone, naigura.
47Rindi, obukama bwa mu rwire obususana na riyega rinu ryeserwe mu nyanja nirikofya jiswi ja jinyami jo:ne. 48Ryejire ryejura, nibarikururira ku njekekera, nibenyanja, nibajikumanya ejo bwana mu nsero, nawe jimbi:bi nibaje:sa. 49Nikwo kutyo kuriba ku bute:ro bwa maimbo. Bamaraika bari:ja, bariba:ura ababi:bi nibabaso:sya mu barenge:resi. 50Nibabe:sa mu ryobo ryo muriro. Omwo nimwo kuriba okurira no kuguguna ame:no.
51Yesu nababu:sya ati, ?Mwasombo:kerwa omusango gunu? Nibe:kirisya ati, Yee! 52Nababwira ati, Omwandiki wo:ne unu e:igisibwe ebyo bukama bwa mu rwire niwe kasusana no mwenemusi unu kaso:sya mwibikiro ryae ebi:nu ebiya:ya ne bya kara.
Yesu naremwa mu ca:ro ca:bo
(Mk. 6:1-6; Lk. 4:16-30)
53Ejire Yesu amarisya ebijekekanyo binu, naso:kayo. 54Nakinga mu ca:ro ca:bo nabeigisya mu rikofyanyisyo ryebwe, ndijei nibarugu:ra, niba:ika ati, ?Aso:sisye a:ki amenge ganu, ne birugu:ro binu? 55?Unu tari niwe Omwana wo mubuya? ?Nyiramwene tari niwe katogwa Maryamu? ?Na bamura ba:bo tari Yakobo, na Yose, na Simoni, na Yuda? 56?Na bayara ba:bo bo:ne citari nabo? ?Mbe ka abwene a:ki binu byone? 57Nibamubiirirwa, nawe Yesu nababwira ati, Omuragi atakuburwa cibaro, tari mu ca:ro ca:bo na mu musi gwabo. 58Ka one atakorere eyo ebirugu:ro byafu kurwo bute:kirisya bwebwe.
දැනට තෝරාගෙන ඇත:
Matayo 13: KIJ1960
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Kijita New Testament © The British and Foreign Bible Society and The Bible Society of Tanzania, 1960.