JOHAN 15
15
Misu Ku te Aran hae
1“Kae tuh misu ku ccaccing nynh ka thua, ka Paaw tuh khokhu hoitu nynh thua. 2Ka kya athae thae leipaw aran miakaw kha marya bae hae zah, athae thaepaw aran miakaw kha houh a thae nawlan a ccikanpya. 3Nanning tuh kae hopya oh paw bya liate na thyaa vae oh. 4Kamaw kya tyn oh lah kae mah nae kya ka tyn cih. Aran nynh misu ku kya a kyngku khyh lanze athae a thae kho khyh hawte, nanning mah ka kya na kyngku khyh oh ze na thae kho lan khyh oh. 5Kae tuh misu ku, nanning tuh aran hae. Ka kya a tynpaw tuh kae mah a kya ka tyn zah, thae patae a thae; pawccecize kamaw leite nanning nynh pawsang na cyih kho khyh oh. 6Humhung zemah ka kya atyn khyh lanze aning tuh aran hawte ccaring vua thua zah karae arou; tuhcihawpaw aran hae kha suelua hae zah maee lungkhu lang phung hae zah maee nynh pong a u. 7Ka kya na tyn oh zah ka bya tuh nae kya atyn ze, na ry oh paw miakaw kha ngia oh lah, na mue cih oh. 8Thae patae na thae oh zah ka zuitu lang na tang oh liate ka Paaw phu-enaw a langkuh. 9Paaw nynh yn sungsah hawte nanning kha kae sungsah oh; ka sungsahnaw kyahin tyn oh. 10Kae nynh ka Paaw kawbya hae kha ka zui zah a sungsahnaw kya ka tyn hawte nanning nynh ka kawbya hae hynh na zui oh ze ka sungsahnaw kya na tyn cih oh. 11Ka lungtuanaw tuh nae kya a um nawlan te nae lungtuanaw phe accing nawlan hynh-e bya hynh kae hopya oh.
12“Ka kawbya tuh e hynh nynh thua: Kae nynh kae sungsah oh hawte nanning mah lu kheit te lu kheit sungsakuh oh.#Joh 13.34, 15.17; 1Jo 3.23; 2Jo 5 13Ccungccaw lu kheit nynh a ban hae hanlan a hiinnaw pyakupaw sungsakunaw laeze ale huapaw sungsakunaw tuh hum nynh sanmah hoi khyh. 14Kaw kae pya oh paw kha na cyi oh ze nanning tuh ka ban hae nynh na thua oh. 15Atu te nanning hynh see hae kae ci vae lan khyh oh; pawccecize see nynh tuh a bawipaw nynh a cyipaw kha nyh khyh; thuasalama ka ban hae kae ci vae oh; pawccecize ka Paaw kyate ka thaepaw balyn kha marya kae nysah oh. 16Nanning nynh kae hynh nae pokuh khyh oh; kae nynh nanning kha kae pokuh oh; nanning nynh na cceih oh zah zungzae atynpaw athae na thae nawlan oh te ka min te Paaw kalan na ngiaku oh paw miakaw kha ae pya nawlan oh nanning kha kae khang vae oh. 17Nanning lu kheit te lu kheit na sungsaku nawlan oh kaw kae pya oh.
Laephi nynh Huanaw
18“Laephi nynh nanning kha ae hua oh ze, nanning ae hua maw oh ze kae hynh yn hua hae cipaw la nyh oh. 19Nanning tuh laephi kya-e na thua oh ze, laephi nynh ka kya-e cite ae sungsah cih oh; thuasalama laephi kya-e na thua khyh oh keiccu thuasah, kae nynh laephi kyate kae po vae oh keiccu thuasah laephi nynh nanning kha ae hua oh. 20‘See tuh a bawipaw laeze lehua khyh,’ cite kae hopya oh paw ka bya kha liathui oh. Minmin nynh kae hynh vawsaw yn pya hae ze nanning kha mah vawsaw ae pya cih oh; minmin nynh ka bya kha a ngae hae ze nae bya kha mah a ngae cih hae.#Mat 10.24; Luk 6.40; Joh 13.16 21Thuasalama ka min keiccuze hynh-e hae balyn hynh nae tungvaw oun cyih cih hae, pawccecize kae yn sawtupaw kha nyh khyh hae. 22Kae nynh kae thua khyh zah mih kya ka la ho khyh zetuh seinaw hoi lan khyh hae paw, thuasalama atu tuh mih seinaw daangsahkunaw lanpaw hoi khyh hae. 23Kae yn huapaw tuh ka Paaw kha mah a hua. 24Hum nynh sanmah a law boi leipaw ryalaw hae kha mih kya ka la law khyh ze, minmin tuh seinaw hoi lan khyh hae, thuasalama atu tuh ka ryalaw kha mang a muih hae pite kae te ka Paaw kha parouhte oun hua hae. 25E tuh, ‘Akonglang um leite kae hynh yn hua hae,’ cite mih kawbya ccauh kya azeikuhpaw kha accing nawlan nynh thua.#Sam 35.19, 69.4
26“Paaw kyate nae kalan kae saw cih paw Bawmtu, Paaw kyate yn thua zah byaccing te phe abeihpaw Muisaw tuh he yn thua te, kamaw kong kha ccaekia yn khan cih. 27Atakaw te kamaw ryte na um oh keiccuze nanning mah ccaekia na la khan cih oh.
දැනට තෝරාගෙන ඇත:
JOHAN 15: ZB16
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Zotung Bible © Bible Society of Myanmar, 2016.